Display Style:
Column Style
सरकारया लकडाउनया तयारी मदु
लहनान्युज | चिल्लागा त्रयोदशी ११४१,चैत्र २७ शुक्रवाः।
सरकारं आः हे लकडाउनया छु न तयारी मदु धका स्पष्ट याःगु दु ।
थौं शुक्रवाः सूचना प्रविधि मन्त्रालय सरकारया निर्णय सार्वजनिक यासे मन्त्री पार्वत गुरुङं सरकारया आः हे लकडाउनया विषय छु न तयारी मदु धका धयादीगु दु।
“सरकार लकडाउन यायगु वा मयायेगु धइगु विषय लिसः बिइगु जरुरी मदु,” पत्रकारपिन्स तःगु न्ह्यसया लिसः वयकलं, “सरकारं लकडाउन याये दइ मखु धका नागरिक समाजं धयाच्वंगु दु ।
थज्याःगु महामारीइ गये याना बचे जुइगु, गुकथं सुरक्षित जुइगु व नेपाली जनताया जीवन सुरक्षा गुकथं ज्या यायेगु धका सरकार बिचाः यानाच्वंगु दु।”
वयकलं सकसिया नाप सहलह याये धुका सरकारं निश्चित मापदण्ड दयेका न्ह्या वनिइ धका धाःगु दु।
ब्वनेकू बन्द याना अनलाइन कक्षा न्ह्याकेत स्वास्थ्य मन्त्रालयया सिफारिस, कोरोनाया संक्रमण अप्वेफइगु धापू
लहनान्यूज | चिल्लागा त्रयोदशी ११४१, चैत्र २७ गते शुक्रबाः
स्वास्थ्य तथा जनसंख्या मन्त्रालयं कोरोना भाइरस संक्रमण हाकनं न्यनेफइगु धासें ब्वनेकू लिसें भिडभाड जुइगु थाय् बन्द यायेत सिफारिस याःगु दु ।
छुं ला न्ह्यनिसें स्यनामिपिं भौतिक कथं उपस्थित जुया ब्वनेकू क्याम्पसय् आखः ब्वनेगु न्ह्यनाच्वंगु खः । निगूगु झ्वया कोरोनाया महामारी वसेंलि थ्व न्येनावनेफइगु जूगु हुनिं सावधानी नालाकायेत्यनागु मन्त्रालयं न्ह्यथंगु दु ।
ब्वनेकू लिसें भीडभाड जुइगु थाय् सिनेमा हल, रेन्टुराँ, पार्टी प्यालेस बन्द यायेत मन्त्रालय सिफारिस याःगु धाःगु दु । लिपांगु ईलय् नेपालय् कोरोनाया न्हियान्हिथं संक्रमण अप्वःया च्वंगु दु ।
म्हिगः जक स्वस व ३२म्हेसित कोरोना संक्रमण पुष्टि जूगु खः ।
नेपालय् शान्तिपूर्ण प्रदर्शनय् अत्यधिक बल छ्यलिगु एम्नेस्टीया द्वपं, सञ्चार विधेयकपाखें अभिव्यक्ति स्वतन्त्रता लिकूंकु जिकीर
लहनान्यूज | चिल्लागा द्वादशी ११४१, चैत्र २६ गते, विहीबाः
एम्नेस्टी इन्टरनेसनलं नेपाःया सुरक्षा बलं शान्तिपूर्ण ब्वज्या जूगु थासय् न अत्याधिक बल प्रयोग यानाच्वंगु प्रतिवेदन सार्वजनिक याःगु दु ।
एम्नेस्टी इन्टरनेसनलं बुधवाः सन् २०२०÷२०२१ या प्रतिवेदन सार्वजनिक यानाः नेपालय् न्ह्यानाच्वंगु शान्तिपूर्ण ब्वज्या व अधिकारकःमिपिन्त सुरक्षा बलं अत्याधिक बल प्रयोग यानाः नियन्त्रणय् कायेगु यानाच्वंगु उल्लेख याःगु दु ।
प्रतिवेदनय् नेपाल सरकारं ‘नेपाल विशेष सेवा विधेयक’ मार्फत न्यायिक अनुमति बिना व्यक्तिया गोप्य सुचं कायेगु व्यवस्था यायेत्यंगु उल्लेख याःगु दु । नेपाल विशेष सेवा विधेयक संसद्या च्वयेया सदनं वंगु जेठय् अनुमोदन यायेवं क्वयेया सदनय् विचाराधीन अवस्थाय् दु ।
सूचना तथा सञ्चार मन्त्रालयं माक्व कानूनी सुरक्षा बिना अधिकारीपिन्त व्यक्ति व संस्थाय् निगरानी तयेगु, सूचं मुंकेगु व अभिलेख तयेगु यानाः उप्वः अधिकार बीगु प्रावधाननापया दूरसञ्चारसम्बन्धी विधेयक मस्यौदा तयार याःगु न प्रतिवेदनय् उल्लेख यानातःगु दु ।
सरकारं प्रस्ताव याःगु आमसञ्चार विधेयक, मिडिया काउन्सिल विधेयक व सूचना प्रविधि विधेयकय् संशोधन मजूसा नागरिकया अभिव्यक्ति स्वतन्त्रता म्ह्वों जुइगु उल्लेख यानातःगु दु ।
अथेहे पत्रकारनाप दर्जनौं मनूतय्त गलत सूचं ब्यूगु अले कोभिड–१९ महामारीया सन्दर्भय् सरकारया आलोचना याःगुलिइ ज्वंगु धागु दु । थ्वहेदथुइ ३०गु मल्याक वेबसाइट न बन्द याकूगु दु । सत्तारुढ दलं द्वन्द्वकालिन अपराधय् दुथ्याःपिन्त पूर्ण व स्वतन्त्र अनुसन्धानविना शक्तिशाली पदय् नियुक्ति यायेगु ज्या न्ह्याकूगु न प्रतिवेदनय् उल्लेख दु ।
अक्टोबरय् राष्ट्रिय मानवअधिकार आयोगं २सः व ८६म्ह आरोपित पीडक मनूतय्गु नां सार्वजनिक याःगु खःसां सरकारं कारबाही मयाःगु एम्नेस्टीया प्रतिवेदनय् उल्लेख जूगु दु ।
महाकुम्भ मेलाय् ब्वति कायेया नितिं राजदम्पत्ति हरिद्वारा झाल
लहनान्यूज | चिल्लागा द्वादशी ११४१, चैत्र २६ गते, विहीबाः
पुलाँम्ह जुजु ज्ञानेन्द्र शाह व कोमल शाह भारतया हरिद्वारय जुइगु महाकुम्भ २०२१ य् ब्वति कायेया नितिं विहीबा दिल्ली झाःगु दु ।
सन्यास परम्पराया सर्वाेच्च पदधारी निरञ्जन पीठाधीश्वर आचार्य महामण्डलेश्वर स्वामी केलाशानन्द गिरीया ब्वनाय् पुलाँम्ह राजदम्पत्तिया हरिद्वारा यात्रा जुइत्यंगु महाकुम्भ ग्वसाखलकं धयादिल ।
“महाकुम्भ २०२१ हरिद्वार सनातन परम्पराय् सर्वाेच्च लिसें सर्वाेत्तम महापर्व महाकुम्भ जूगु व छि हिन्दू सम्राट एवम् हिन्दू जुजु जुयादीगुलिं चैत्र ३० गते क्वचाइगु शाही स्नानय् वय्कया ब्वति दयेमा धइगु प्रवल इच्छा” आचार्य महामण्डलं प्वंकादिगु दु ।
उगु दिं पुनित सलिला माता गंगाय् स्नान याना भारतवर्षया उत्कृष्ट ऋषि मनीषिलिसें आर्शिवाद ग्रहण याना नेपाः देय्या कुशलताया लागि आशिष कायेत नं वय्कलं जुजुयात इनाप यानादीगु दु ।
ल्हाचिं च्वयातःगु ब्वनापौलय् “राज थःहे देवस्वरुप जूगु मान्यता हिन्दूपिन्के दूगु व छिकिपिंके देवाधिदेव महादेव पशुपति भगवानया अपार कृपा दूगु” धकाः नं न्ह्यथनातःगु दु ।
बिस्काः जात्रा मदिकेत सर्वोच्च अदालतया अन्तरिम आदेश, जात्रा दिकेगु निर्णय कार्यान्वयन मयायेत ख्वप जिल्ला प्रशासन ज्याकूयात आदेश
लहनान्यूज | चिल्लागा द्वादशी ११४१, चैत्र २६ गते, विहीबाः
सौर्यमास कथं न्हूदँया झ्वलय् ख्वपय् हनीगु बिस्काः जात्रा मदिकेत सर्वोच्च अदालतं अन्तरिम आदेश जारी याःगु दु ।
अधिवक्ता राजकुमार सुवालं दायर याःगु रिट निवेदनय् सुनुवाइ यासें न्यायाधीश पुरुषोत्तम भण्डारीया याकः इजलासं जात्रा दिकेगु निर्णय कार्यान्वयन मयायेत जिल्ला प्रशासन ज्याकू ख्वपयात आदेश ब्यूगु खः ।
प्रमुख जिल्ला अधिकारी प्रेमप्रसाद भट्टराईया अध्यक्षताय् आइतबाः च्वंगु कोभिड १९ संकट व्यवस्थापन सञ्चालन केन्द्रं कोरोना संक्रमण अप्वःगु धासें जात्रा याकेमबीगु निर्णय याःगु खः ।
उगु निर्णयविरुद्ध मंगलबाः लाःगु रिट निवेदनय् सुनुवाइ यासें सर्वोच्चं जात्रा न्ह्याकेत अनुमति ब्यूगु खः । जात्रा दिकेगु प्रशासनया निर्णयप्रति ख्वपया स्थानीय बासिन्दा अले गुथियारत आक्रोशित जूगु खः ।
उमिसं प्रशासनं धाःसां जात्रा मदिकेगु धासें रथ दयेकेज्यायात न्ह्याकातःगु खः । अथे हे, ख्वप नगरपालिकां शान्तिपूर्ण व कोरोना तापायेत होसियारीलिसें जात्रा न्ह्याकेगु निर्णय याःगु दु ।
नगरपालिकां सरोकारवालातलिसे सहलह यानाः रथ सालेगु व यःसिँ थनेगु परम्परायात थुगुसी नं निरन्तरता बीगु निर्णय याःगु खः ।
