Display Style:
Column Style
कोरोनाया बेलायती भेरिएन्ट न्यनेगु अप्वयावःगु धासें सरकारपाखें स्वास्थ्य मापदण्डय् कडाई यायेत निर्देशन
लहनान्यूज | चिल्लागा द्वादशी ११४१, चैत्र २६ गते, विहीबाः
नेपालय् नं कोरोनाको बेलायती भेरिएन्ट न्यनेगु अप्वयावःगु धासें सरकारं जनस्वास्थ्यया मापदण्डय् कडाइ यायेत निर्देशन ब्यूगु दु ।
स्वास्थ्य मन्त्रालयस म्हिगः च्वंगु मुँज्यां स्वास्थ्य मापदण्डय् कडाइ यायेगु निर्णय यासें रात्रीकालिन ब्यवसाय बहनी ९ ताः ई लिपा बन्द याकेत निर्देशन ब्यूगु खः । येँ व पोखरा लिसें तःधंगु सहरया ब्वनेकुथिइ संक्रमण अप्वःगु धासें मन्त्रालयं उच्च सतर्कता नालेत नं निर्देशन ब्यूगु दु ।
सार्वजनिक यातायातय् भीडभाड मयायेत, सपिङ मल, नाचघर, सिनेमा हल, पार्टी प्यालेस, हेल्थ क्लब, स्विमिङ पुल, देगःलिसेंया क्षेत्रय् जनस्वास्थ्यया मापदण्ड कडाइ लिसें लागू यायेत नं निर्देशन ब्यूगु दु ।
अथे हे, बहनी ९ ताः ई लिपा रेष्टुरेष्ट, होटेल लिसेंया रात्रीकालिन ब्यवसाय बन्द यायेत निर्देशन ब्यूगु दुसा तःधंगु सहरय् द्वःछि व चीधंगु शहरय् ५सः स्वयां अप्वः सक्रिय संक्रमित दत धाःस आवागमनय् कडाइ यायेत धाःगु दु ।
छेँय् नं पिने पिहां वयेबलय् मास्क अनिवार्य छ्यलेत नं मन्त्रालयं निर्देशन ब्यूगु दु । थ्व हे दथुइ, लिपांगु् २४ घौ दुने थप २सः व ९८म्हेसिके कोरोना भाइरसया संक्रमण पुष्टि जूगु दु । ४द्वः व सच्छिम्हेसिया पीसीआर परिक्षण याःगुलिइ २सः व ९८म्हेसिके संक्रमण पुष्टि जूगु स्वास्थ्य मन्त्रालयं न्ह्यथंगु दु ।
व मध्ये स्वनिगलय् सच्छि व ६३म्ह दु । ख्वपय् ५, यलय् २६ व येँय् सच्छि व ३२ संक्रमित अप्वःगु खः । आः देय्न्यंक २द्वः २सः व ५म्ह सक्रिय संक्रमित दुगु नं मन्त्रालयं न्ह्यथंगु दु । लिपांगु २४ घौ दुने कोरोनाया हुनिं निम्हेसिया ज्यान वंगु दु ।
नरभक्षी धुँयात सदर चिडियाखाना हल
चिल्लागा नवमी ११४१,चैत्र २४ मंगलवाः
बर्दिया राष्ट्रिय निकुञ्जय् गैडा ल्याखाय् ज्याय् जुम्ह मनुयात आक्रमण याइम्ह नरभक्षी धुँयात यलःया सदर चिडियाखानाय् हःगु दु ।
निकुन्जया टोलीं आइतबाः सनिलय् कजय् काःगु धुँयात थांै सुथय् यलःया जावलाख्यःलय् च्वंगु सदर चिडियाखनाय् हःगु खः । आइतबाः गैडा गणना याना लिहाँवय्गु झ्वलय् किसिया घाँय् लयाच्वंगु ईलय् हात्तीसारया कर्मचारी ३४दँया पुलिसराम थारुयात उम्ह हे धुँ आक्रमण याबलये ज्यान वंगु खः । निकुञ्जया कर्मचारीयात स्यायेधुंका धुँयात डार्टं कयेका कजय् काःगु खः ।
१०दँया मिजंम धुँयात बर्दिया निकुञ्जं गाडी तयार चिडियाखानाय् हःगु खः । उगु झ्वलय् जूगु ज्याझ्वलय् न्ववासें वनमन्त्री प्रेमबहादुर आलें जङ्गली जनावरया आक्रमणं जुइगु घटना हाकनं मजुइकेत राष्ट्रिय निकुञ्जय् पःखाः दयेकेगु वा विद्युतीय तारबार यायेमाःगु धयादिल । उकिया नितिं अर्थमन्त्रीलिे बजेटया बारे सहलह यायेगु धयादिल ।
बर्दिया राष्ट्रिय निकुञ्ज, मध्यवर्ति क्षेत्र व खाता जैविक मार्ग वरपर छुँ लानिसें छसिकथं धुँ मनुतय्त आक्रमण यानावयाच्वंगु दु । थ्वहे दँ जक १०म्ह मनुतय्त धुँ स्याबिइधुकूगु दु ।
बिस्का जात्रा न्ह्याकेगु धासें ख्वपय् ब्वज्याय्
लहानान्युज | चिल्लागा नवमी ११४१,चैत्र २४ मंगलवाः
ख्वपया तःमारीइ बिस्का जात्राया पक्षय् स्थानिय मनूतय्सं ब्वज्या याःगु दु । जिल्ला प्रशासन ज्याकू ख्वपं कोरोनाया त्वहःचिनाः जात्रा याकेमबीगु धायेवं स्थानिय मनूत उगु निर्णयया विरुद्धय् विरोध ब्वज्याय् कुहाँवःगु खः ।
छुं दिं न्ह्यः जिल्लास्तरीय कोभिड–१९ संकट व्यवस्थापन सञ्चालन केन्द्र, डिसिसिएमसीया मुँज्यां बिस्का जात्राय् प्रतिबन्ध तयाः औपचारिकता पूजाय् लिकुंकेगु निर्णय याःगु खः ।
केन्द्रया कजि व प्रमुख जिल्ला अधिकारी प्रेमप्रसाद भट्टराईया कजिसुइ जिल्ला समन्वय समिति, नेपाली सेना, नेपाल प्रहरी, सशस्त्र प्रहरी, राष्ट्रिय अनुसन्धान विभाग, गुठी संस्थान, जिल्ला स्वास्थ्य ज्याकूया प्रतिनिधिपिन्त दुथ्याकाः निर्णय याःगु खः ।
तर उगु मुँज्याय् स्थानिय गुथि व खलः पुचःया प्रतिनिधिपिन्त दुमथ्याकू । जात्रा पर्व यायेमाःपिन्त दुमथ्याकूसें एकती ढंगं निर्णय याःगु धासें स्थानिय मनूत आक्रोशित जूगु खः । स्वस्फूर्त ब्वज्याय् कुहाँवःपिन्सं सभा, जुलुस व रङ्गशालाय् कासा म्हितकीबलय् कोरोन मपुनीगु तर जात्राय् जक गथे पुनी धकाः न्ह्यसः थंगु दु ।
स्थानिय प्रशासनं नियोजित ढंगं जात्रा पर्व न्हंकेत निर्णय याःगु न धागु दु । ब्वज्याय् कुहाँवःपिं ख्वप व थिमिया स्थानिय मनूतय्सं जात्रा मयाकेगु प्रशासनया निर्णय स्वीकार मयायेगु धागु दु ।
थौं जनआन्दोलन दिवस
लहानान्युज | चिल्लागा नवमी ११४१,चैत्र २४ मंगलवाः
थौं चैत २४ गते जनआन्दोलन दिवस खः । ३० दँ न्ह्यः निर्दलीय पञ्चायती व्यवस्थायात क्वथला ऐतिहासिक आन्दोलनयात लुमकुसे चैत २४ गते जनआन्दोलन दिवस हना वयाच्वःगु खः।
०१७ सालय् जुगु महेन्द्रं न्ह्याकूगु पञ्चायती व्यवस्थायात क्वथला २०४६ सालय् कांग्रेस नेता गणेशमान सिंहया नेतृत्वय् पञ्चायती व्यवस्थाविरुद्ध राजनीतिक दलतयेस आन्दोलन याःगु खः ।
मरिचमान सिंह नेतृत्वया मन्त्रिमण्डलं २०४६ सालया जनआन्दोलन दमन याःगु खः। नारायणहिटी दरबार न्ह्यने जुजु महेन्द्रया शालिकय् आन्दोलनकारीपिन्स तोडफोड याःगु खः ।
२५ व २६ गते देयन्यक आन्दोलन जुइवं जुजु वीरेन्द्रयात राष्ट्रिय÷अन्तर्राष्ट्रिय दबाब अप्वयाःगु खः। उकिइ चैत २४ गतेयात राजनीतिक ह्यूपाः हयेगुलि छगु महत्वपूर्ण नाप ऐतिहासिक दिं कथं कायेगु याः ।
कलाकःमि रवि महर्जनया अबुयात बिचा हायेकल
लहानान्युज | चिल्लागा नवमी ११४१,चैत्र २४ मंगलवाः
नेपालभाषाया संकिपाख्यलय् ताः ई न्ह्यःनिसें छम्ह कलाकारिता व निर्देशनय् सकृय जुया वया च्वंम्ह कलाकःमि रवि महर्जनया अबु श्याम महर्जन मदुगु दुखय् थीथी ख्यलं दुख प्वंका बिचा हायेकुगु दु ।
छम्ह सन्चारकःमि या रुपय् नं ज्या याना वया च्वंम्ह रवि महर्जन थौंकन्हे बोधि टिभि लिसे स्वापु दुम्ह सन्चारकःमि खः । रविया अबु मदुगु दुखय् विचाः हायेकेत नेवाः संकिपा पत्रकारिता ख्यःया न्ह्यलुवा विजयरत्न असंबरें, नेवाः संकिपा मतिनामि पुचःया राजु राजदेव बज्राचार्य, बोधि टिभि या पासापिं रत्नकाजी महर्जन लुनिभा व राजेन मानन्धरपिं छेँय् वना विचाः हायेकुगु खः ।
कलाकःमि रवि महर्जन या ८७ वर्ष अबु श्याम महर्जन वंगु शुक्रबार २० गते आकाझाकां मदुगु खः । मदुम्ह श्याम महर्जनया तधिकःम्ह काय् रवि महर्जन नापं याना निम्ह काय् व जहान छम्ह दु ।
रवि महर्जनया अबुजु श्याम महर्जन मत्यवं मदुगु दुखय् नेवाः पत्रकार राष्ट्रिय दबू येँपाखें दुख प्वंकुसे वयकया आत्मा सुखावति भुवनस बासं च्वनेमा धका प्रार्थना यासे बिचाः हायेका च्वना धका शोक वक्तव्य पिकागु दु ।
