लुँया भाः थौं तोलां निसः क्वहावःगु दु।

म्हिगः तोलां ८७ हजार ४ सय रुपैयाँ कारोवार जुगु खःसा थौं निस क्वहावया तोलाया ८७ हजार २ सय रुपैयाँ कायम जुगु दु। अथहे वहःया भाः न थौं क्वहावःगु दु ।

म्हिगः तोलाया १२ सय ४० रुपैयाँ जुगु वहःया भाः न थौं तोला न्यातका क्वहा वया १२ सय ३५ रुपैयाँ कायम जुगु दु धका नेपाल सुनचाँदी व्यवसायी महासङ्घं धाःगु दु।

नेवाः पत्रकार राष्ट्रिय दबुलिं थ्व हे वइगु चैत्र २५ गते जुइगु नेपाल पत्रकार महासंघया निर्वाचनय् समावेशी सञ्चार व मातृभाषाया पत्रकारिताया विकासया मुद्दाप्रति प्रतिबद्ध पत्रकारतय्त निर्वाचन याकेत इनाप याःगु दु ।

पत्रकार राष्ट्रिय दबूया ९क्वःगु स्थापना दिवस व शुक्रबाः मध्यपुर थिमिइ क्वचाःगु च्याक्वःगु दँमुँज्याय् ल्ह्वंगु विषयया आधारय् घोषणापत्र जारी यासें महासंघया निर्वाचनय् नेवाः पत्रकारया सहभागिता सुनिश्चित याय्त पहल याय्गु धाःगु खः ।

नायः सुरजबीर बज्राचार्य व मू छ्यान्जे सुनिल महर्जनया ल्हाःचिं दुगु घोषणा पत्रय् धयातःगु दु, ‘आदिवासी जनजाति, महिला, मधेशी, दलित, अल्पसंख्यक व सीमान्तकृत समुदायया पत्रकारतय् सहभागीता अप्वय्केगु लिसें समावेशी सञ्चारया मुद्दाप्रति प्रतिबद्ध पत्रकारयात निर्वाचन याकेत फक्व पहल याय्त इनाप यानाच्वना ।’घोषणापत्रय् नेपाली सञ्चारमाध्यमया अन्तर्वस्तुइ नेपालया विविधता प्रतिविम्बित जुइमाःगु व उकिया लागिं समाचारकक्षय् नेवाः लगायत आदिवासी जनजाति समुदायया समानुपातिक प्रतिनिधित्व जुइमाःगु, जनजाति सञ्चारकर्मीया क्षमता विकासया लागिं आवश्यक ज्याझ्वःत न्ह्याकेमाःगु उल्लेख यानातःगु दु ।

अथे हे, उगु हे घोषणा पत्रय् प्रेस काउन्सिलया इतिहासय् न्हापांगु खुसी नेपालभाषा व मैथिली भाषां आचारसंहिता प्रकाशनं पत्रकार आचारसंहिताबारे सचेतना थनेत तिबः ब्यूगु धयातःगु दु ।

२०७२ सालया तःभुखाचं पाताः जुइक दुंगु मरुसतः अर्थात काष्ठमण्डप पुनर्निर्माण लिपांगु चरणय् थ्यंगु दु ।

चान्हि यानाः न्ह्यानाच्वंगु मरुसतःया पुनर्निर्माणया ज्या लक्षित इलय् धाःसा सिमधइगु जूगु दु । काष्ठमण्डप पुनर्निर्माण समितिं याःगु ज्याझ्वलय् पुनर्निर्माणय् झ्वलय् आःतक्कया प्रगति न्यंकुसें ज्या क्वचाय्त भचा लिबाइगु जानकारी ब्यूगु खः ।

समितिया कजि लिसें वागमति प्रदेश सांसद राजेश शाक्यं मरुसतः पुनर्निर्माणयात माःगु सिँ माक्व ल्याखय् आपुर्ति मजूगु हुनिं ज्या छुं भचा लिबाइगु जानकारी बियादिल ।

सिँ आपुर्ति अझ सहज जुइगु लकस दयावंसा पुनर्निर्माणया ज्या याकनं हे क्वचाइगु खँय् शाक्यं बः बियादिल ।

येँ महानगरपालिकाया हे ग्वाहालिं जुयाच्वंगु पुनर्निर्माणया झ्वलय् लकडाउन व निषेधाज्ञाया इलय् दथुइ ज्या द्यूसां स्वास्थ्य मापदण्डयात ध्यानय् तयाः ज्युतल्ले ज्या मदिकुसें ज्या न्ह्याकातयागु नं शाक्यं धयादीगु दु ।

येँ महानगरपालिका वडा १२ या ओन्दे सहयोगी हातहरु नांया पुचःपाखें विद्यार्थीतय्त ट्राय्कसुट सेट व टिसर्ट वितरण याःगु दु ।

समूहपाखें तेर्सेपानी (जीवनपुर), धादिङ्गस्थित त्रिकुटेश्वरी आधारभूत विद्यालयस ब्वनाच्वंपिं विद्यार्थीतय्त निःशुल्क ट्राय्कसुट सेट व टिशर्ट वितरण याःगु खः ।

ज्याझ्वलय् १६० विद्यार्थीतय्त वँचुगु रंगया ट्राय्कसुट सेट व म्हासूगु रंगको टिशर्ट वितरण याःगु खः । ट्राय्क सुट सेट व टिसर्ट वितरण ज्याझ्वलय् धुनिवेशी नगरपालिका वडा ३ या वडाध्यक्ष प्रकाश हमालं समाजय् थुकथंया ग्वाहालिमि ल्हाः मदय्कं मगाःगु धयादिल ।

विद्यालयया प्रधानाध्यापक कमल केसीं संस्था मसलन्दया सामान ग्वाहालि याय्त स्वःगु व लिपा विद्यालयया इनाप कथं ट्राय्कसुट सेट व टिसर्ट ग्वाहालि याःगु धासें सुभाय् देछानादिल । ज्याझ्वः कजि सन्तकुमार महर्जनं विद्यार्थीतय्के सकारात्मक सोचया विकास यानाः ब्वनेज्याय् उत्साह थनेत थुकथंया ज्याझ्वः यानागु धयादिल।