महानगरपालिकाया मेयर विद्यासुन्दर शाक्यं येँ महानगरपालिका दुने सम्पदा निर्माण–पुननिर्माणया ज्या सम्पन्न याना विदा जुइगु प्रतिवद्धता व्यक्त याःगु दु।

येँ महानगरपालिकां थ्व हे वइगु शैक्षिक सत्रनिसे ‘येँ देय् म्हसीके’ (काठमाडौं चिनौँ) पाठ्यक्रम निर्माण याना आधारभूत पठन–पाठनया सुरुवात याःगु साहसिक ज्याया लागि व उकिया नेतृत्व मेयर शाक्ययात नेवाः देय् दबू येँ जिल्ला समितिं सम्मान याःगु दु । ‘मुर्त–अमुर्त सम्पदा संरक्षण यायेगु येँ महानगरपालिकाया प्राथमिक योजना खः,’ शाक्यं धयादीगु दु, ‘सम्पदा निर्माण–पुननिर्माणया ज्या गन त्वःफूगु दुसा जानकारी बिया जिमित ग्वाहालि यायेत इनाप न यानादिगु दु ।’ शाक्यं न्यादँया दुने दक्को सम्पदा निर्माण–पुननिर्माणया ज्या सम्पन्न यानाजक विदा जुइगु प्रतिवद्धता यानादीगु दु ।

मेयर शाक्यं  काष्ठमण्डप येँ महानगरपालिकाया आर्थिक ग्वाहालिं १८ करोडया लगानीइ निर्माण जुयाच्वंगु धका जानकारी बियादीगु दु। मेयर शाक्यं धयादीगु दु थःगु संस्कृति, संस्कार व नखः चखःयाबारे गौरव जुइगु कथं व उकिया संरक्षण यायेगु कथं स्थानीय भाषाय् ब्बने दइगु ब्यवस्था यानागु धका धयादीगु दु । 

‘झीत विदेशया बारे सिइ तर, झी च्वना थाय्, झीसं हना वयाच्वनागु नखः, चखः संस्कृति–संस्कारया बारे व्याख्या याये फइ मखु,’ शाक्यं धयादीगु दु, ‘कन्ह्यया पुस्तां येँ महानगर दुनेया थीथी जात्रा, पर्व, ल्ह्वहिति, फल्चा, सतः, येँया मू जाति, थनया जनजीवन, कला, नसाँ च्वसाँ, नखः चखः, भाषा, लिपि, परम्परागत कासा विषयया जानकारी याइगु कथं थुगु पाठ्यपुस्तकय् दुथ्याकःु धका धयादीगु खः।

नेवाः देय् दबू येँ जिल्ला समितिया अध्यक्ष मचाराजा महर्जनां समितिपाखे मेयर शाक्ययात येँ महानगरपालिका दुने कक्षा १ निसे ८ तकया ब्बनेकुथिइ स्थानीय पाठ्यक्रमपाखे स्थानीय पहिचान स्थापित जुइगु कथं साहसिक ज्याया कदर यासे उगु सम्मान यानागु जानकारी बियादीगु खः । 

नेवाः पत्रकार राष्ट्रिय दबूया च्याक्वःगु वार्षिक साधारणसभा वइगु चैत २० गते स्वम्ह सञ्चारकर्मी नाप छगु संस्थागतपाखे बोधी टेलिभिजनयात पत्रकारिता पुरस्कार घोषणा जुगु दु ।

उगु सिरपा वरिष्ठ पत्रकार राजेन्द्र स्थापितयात ज्ञानज्योति लक्ष्मीप्रभा स्मृति पत्रकारिता पुरस्कार, बुद्ध सम्बन्धित विषयवस्तुयात प्राथमिकता बियावयाच्वगु बोधी टिभीयात ’भिक्षु कुमार कास्यप स्मृति पत्रकारिता पुरस्कार’, नागरिक दैनिकय् आवद्ध पत्रकार कृष्ण किसीयात ’ज्ञानदेवी मणिरत्न स्मृति पत्रकारिता पुरस्कार’ व फोटो पत्रकार रेखा शाक्ययात ’बाबुराजा ज्यापु फोटो पत्रकारिता पुरस्कार’ बिइगु क्वछिगु दु।

उगु सिरपाया दातापि छसिकथं ज्ञानज्योती कंसाकारया म्ह्याय्, भिक्षु कौडन्य, मोतीशान्ति शाक्य, बाबुराजा ज्यापुपि खः।