नेपाल संवतया न्हूदँया लसताय् प्रधानमन्त्री केपी शर्मा ओलीं न्हूदँया लसताय् भिंतुना देछागु दु।

नेपाल संवत् ११४१ या भिंतुना बियादिसे प्रधानमन्त्री ओलीं हलियकं महामारीया रुपय् ब्वलनाच्व.गु कोभिड १९ पाखें विशेष सतर्क जुयाः नेपाल संवतया न्हूदँ हनेत आह्वान यानादीगु दु ।

प्रम ओलीं बियादीगु भिंतुना सन्देशय् धयातःगु दु, ‘शंखधर साख्वाः न त्यासाय् दुनाः दासत्वया जीवन हनाच्वंपिं सर्वसाधारण जनातयात त्यासा मुक्त यानाः स्वतन्त्रता बिउगु न्हियात प्राचीन कालंनिसें नेपाल संवतया रुपय् न्यायेका वयाच्वंगु दु।

नेपाल संवत् न्हूदँया लसताय् तत्कालीन समाज सुधारया नेतृत्व याःम्ह नेपाल संवत्या प्रवर्तकयात विशेष कथं लुमंकाच्वना ।’ वयकलं राष्ट्रया समृद्धि व जनताया सुख प्राप्तिया निंतिं छप्पँ जुइत इनाप यासें धयादीगु दु, ‘झीसं समृद्ध नेपाल, सुखी नेपाःमिया राष्ट्रिय आकांक्षा पूवंके फयेमा ।’ 

नेपाल संवतया प्रवर्तक शंखधर साख्वाः व नेवाः न्ह्यलुवा नापं नेपाल संवतया न्हूदँ आन्दोलनया न्ह्यलुवाः नेता पद्मरत्न तुलाधरया झ्वाता थ्व हे वइगु मंसिर ६ गते उलेज्या याये त्यःगु दु।

थौं न्हुदँ समारोह समिति ११४१या ग्वसालय् जुगु ज्याझ्वलय् येँ महानगरपालिकाया मेयर बिद्यासुन्दर शाक्य उगु सभाय् लसकुस न्वचु तयेगु झ्वलय् अथे धयादिगु खः।

उगु झ्वाता येँ शंखधर पार्क (पुलांगु रत्न पार्क) दुने तयेगु धका कनादिगु खः।

मेयर शाक्य झ्वाता तयेगु लागिु ज्या दक्को पू  वने धुकुगु दु धका धयादिसे झ्वाता तयेगु लागि महानगरपालिका सर्वसम्मतं निर्णय जुगु धका धयादिगु खः।

न्हूदँ राष्ट्रिय समारोह समिति थौ येँया राष्ट्रिय सभागृहय् न्हुदँ नेपाल सवत ११४१या लसताय् छगु ज्याझ्वः याना च्वंगु दु।

उगु ज्याझ्वलय् मूपाहाँ कथं शहरी बिकास मन्त्री कृष्णगोपाल श्रेष्ठ मूपाहा कथं झायादिगु खः।

थौं जुगु ज्याझ्वलय् समारोह समितिया पुलाम्ह नायःपि सांसद भीमसेनदास प्रधान व तीर्थराम डंगोल नाप येँ महानगरपालिकाया मेयर बिद्यासुन्दर शाक्य उपमेयर हरिप्रभा खड्गी श्रेष्ठ बागमति प्रदेशया सांसद बिराजभक्त श्रेष्ठ नाप नेपालभाषा ख्यःया न्ह्यलुवापिन्स उगु ज्याझ्वलय् ब्बति कयाच्वंगु दु।

बन्द जुयाच्वंगु पायः (खड्ग) जात्रा व नव दुर्गा ( गःथुँ प्यांख ) नाच सञ्चालनया लागि उल्लेखनीय भूमिका म्हितूपि स्वम्ह पत्रकारपिन्त सम्मान याःगु दु। यल सांस्कृतिक पर्व संरक्षण समितिं थौं आईतवाः छगु ज्याझ्वःयासे स्वम्ह पत्रकारपि सुनील महर्जन, प्रशान्त माली व राजेश बज्राचार्य सम्मान याःगु खः।

महर्जन नेवाःपत्रकार राष्ट्रिय दबूया केन्द्रीय महासचिव, माली पत्रकार राष्ट्रिय दबू ललितपुर शाखाया उपाध्यक्ष व बज्राचार्य शाखाया पूर्व सचिवपि खः। उगु ज्याझ्वलय् पाटन दरबार क्षेत्र पाटन संग्रहालयय् उगु ज्याझ्वः जुगु खः। ज्याझ्वलय् ललितपुर उद्योग वाणिज्य संघया अध्यक्ष नाप समितिया संयोजक कृष्णलाल महर्जनं न्यका वाग्मती प्रदेशया सासंद् शोभा शाक्य व यल महानगरपालिकाया मेयर चिरिबाबु महर्जनं पत्रकारपिन्त सम्मान पत्र लल्हाःगु खः।

मोहनिया इलय् यल लाय्कूलिं जुइगु पायः जात्रा व गथु प्याँख हाकन सञ्चालनया लागि सञ्चार ख्यलं उल्लेखनीय भूमिका निर्वाह यागुलि अथे सम्मान यानागु धका समितिया संयोजक कृष्णलाल महर्जन धाःगु खः। लिच्छिविकालीन संस्कृति, धार्मिक व ऐतिहासिक महत्वया पायः जात्रा २३ दँनिसे रोके जुया वयाच्वंगु खः। अथेहे ठेचाया नवदुर्गा प्याखं मोहनिया चालं कुन्हु पट्काय् वःगु ४० दँनिसे व यल लाय्कूलि न्यादँ निसे रोके जुयावयाच्वंगु खः।

उगु प्याखं पुनः सञ्चालन यायेत नाप समस्या समाधान, सरोकारवाला व गुठीयार दथुइ समन्वय, स्थानीय निकायय् निरन्तर पैरवीया लागि तत्कालीन वाणिज्य संघया अध्यक्ष सविन श्रेष्ठ संयोजनय् यल सांस्कृतिक पर्व संरक्षण समिति गठन याःगु खः। समितिं २०७३ चैत्रय् जिल्ला विकास समितिया ग्वाहालि बृहत सरोकार भेला ग्वसाः ग्वःया उगु प्याखं संञ्चालनया लागि सरोकारवाला नाप संवाद याना भेला, डेलिगेशन व ज्ञापनपत्र बुझे यायेगु नीष्कर्ष पिकाःगु खः।

उगु ज्याझ्वलय् गुथियार, सञ्चार क्षेत्र, नेवाःपत्रकार राष्ट्रिय दबू, उद्मी व्यवसायी व महानगरपालिका लगायत सकसिगु कुतलं २०७४ य् यलया लाय्कूलि नवदुर्गा प्याखं हाकन संञ्चालन यायेगु धका संघया महासचिव मनोजबहादुर न्याछ्यो न धयादिगु खः। उगु ज्याझ्वलय् पत्रकार प्रशान्त मालीं च्वयादिगु खड्ग पायः जात्रा सफूया न पितब्बज्या जुगु खः। उगु सफूतिइ उगु प्याखंया धार्मिक, सांस्कृतिक, ऐतिहासिक पक्ष व प्याखं संञ्चालनया लागि माःगु योजनाबद्ध भूमिका व कुतःया दस्तावेज दुगु धका च्वमि माली धाःगु खः।

ज्याझ्वलय् यल क्षेत्र नं २ या सांसद् कृष्णलाल महर्जनं संस्कृति पर्व संरक्षणया लागि दक्को छप्प जुया न्ह्यावने माःगु खँय् बःबियादिगु खः। उगु ज्याझ्वलय् थीथी गुठीया गुठीयार, बाजंखलः जातीय समाजया प्रतिनिधि व उद्मी व्यवसायी अजरमान जोशी लगायतपिन्त न सम्मान याःगु खः। महानगरपालिकाया मेयर महर्जन, संघया वरिष्ठ उपाध्यक्ष भरतलाल जोशीं संस्कृति संरक्षणया लागि सकसिया कुतलं थुगु ज्या ताःलागु धका धयादिगु खः।

किपाः किर्तन जोशी