Display Style:
Column Style
थौं न्याक्वःगु निर्वाचन दिवस
लहनान्युज | सिल्लाथ्व सप्तमी ११४१, फागुन ७ शुक्रवाः
‘निर्वाचनय् दक्वं, न्ह्याबलें, नापं’ धइगु नारालिसें निर्वाचन आयोगं थौं न्याक्वःगु निर्वाचन दिवस हनाच्वंगु दु ।
वि.सं. २०१५ फागुन ७ गते आम चुनाव न्ह्यानाः बालिग नेपालीं मताधिकार छ्लयेखंगु दिंयात लुमंकाः २०७३ सालनिसें फागुन ७ गतेयात निर्वाचन दिवसया रुपं हनेगु याःगु खः ।
दिवसया झ्वलय् प्रमुख निर्वाचन आयुक्त दिनेशकुमार थपलियां आः जुइत्यंगु प्रतिनिधिसभा दुजःया चुनावय् सक्रियता लिसें ब्वति कायेत आह्वान यानादीगु दु ।
आयोगं चुनावया व्यवस्थापनया ६त्या दशक ताःहाकःगु अनुभव व संवैधानिक निकायया हैसियतय् थःगु स्थापनाया ५४ दँ पूवंकेधुंकूगु दु । प्रमुख आयुक्त थपलियां निर्वाचनया यात्राय् संवैधानिक गतिशीलता कथं आयोगयात निरन्तर न्ह्याःवनेत योगदान, हःपाः, ग्वाहालि व हौसला ब्यूपिं अग्रजया मेहनत, परिश्रम, साहस व दृढताया सम्मान अले प्रशंसा यानादीगु दु । सरकारं वइगु वैशाख १७ गते व २७ गतेया लागिं निर्वाचनया मिति क्वःज्यूगु दु ।
निर्वाचनया लागि झण्डं १ क्वःति ६३ लख मतदाता अद्यावधिक जूगु व २०द्वः मतदान केन्द्र दइगु न्ह्यथंगु दु ।
थौं प्रजातन्त्र दिवस, निषेधया राजनीति मयायेत पूर्व जुजु ज्ञानेन्द्र शाहया हसना
लहनान्युज | सिल्लाथ्व सप्तमी ११४१, फागुन ७ शुक्रवाः
थौं प्रजातन्त्र दिवस स्वदेश अले विदेशस्थित थीथी नियोगय् थीथी ज्याझ्वः यानाः हनाच्वंगु दु ।
जनक्रान्तिया माध्यमं राणाशासन न्हंकाः देशय् प्रजातन्त्र घोषणा जूगु दिंया हनाय् थीथी ज्याझ्वः यानाः थुगु दिवस हनी ।
प्रजातन्त्रया हे जगय् लोकतन्त्र जुयाः देशय् आः संघीय लोकतान्त्रिक गणतन्त्रात्मक शासन व्यवस्था स्थापना जूगु दु ।
२००७ सालय् जुजु त्रिभुवन व राजनीतिक दलतय् मंकाः कुतलय् सच्छि व ४ दँया जहाँनिया राणाशासन न्हंकाः प्रजातन्त्र स्थापना जूगु खः ।
प्रजातन्त्र स्थापनाया लागिं जूगु संघर्षय् शुक्रराज शास्त्री, दशरथ चन्द, धर्मभक्त माथेमा व गङ्गालाल श्रेष्ठं विसं १९९७ माघय् बलिदानी बियादीगु खः ।
प्रजापरिषद् नामं राजनीतिक दल भूमिगत रूपं स्थापना यानाः प्रजातन्त्र स्थापनाया लागिं जनताय् जागरण हःगु द्वपनय् वय्कःपिन्त तत्कालीन राणा शासकतय्सं मृत्युदण्ड ब्यूगु खः ।
नेपाली राष्ट्रिय कांग्रेस व नेपाल प्रजातन्त्र कांग्रेसया २००६ सालय् एकीकरण धुंकाः दयेकूगु नेपाली कांग्रेसया संस्थापक नेता बिपी कोइरालाया नेतृत्वय् जूगु सशस्त्र व निर्णायक आन्दोलनं नेपालय् २००७ साल फागुन ७ गते प्रजातन्त्र स्थापना जूगु खः ।
थ्व हे दथुइ, प्रजातन्त्र दिवसया लसताय् राष्ट्रपति विद्या भण्डारी, उपराष्ट्रपति नन्दबहादुर पुन, प्रधानमन्त्री केपी शर्मा ओली लिसें थीथी दलया नेतातय्सं भिंतुना बियादीगु दु ।
वय्कःपिन्सं जनताया संघर्षया बलिदानीं चूलाःगु उपलब्धीयात सकसिनं संरक्षण यायेमाःगु धयादीगु खः ।
थ्वहे लसताय् पूर्व जुजु ज्ञानेन्द्र शाहं निषेधया राजनीति याइपिन्त चेतावनी बियादीगुदु ।
७१क्वःगु प्रजातन्त्र दिवसया लसताय् हसना जारी यासें पूर्व जुजु शाहं नेपाल जनता व जुजुया सहमतिं खडा जूगु व थुकिया अस्तित्व रक्षा नं सहमतिं जक जुइगु यथार्थया अवज्ञां निषेध व विभेदया राजनीति जुयाच्वंगु धयादिल ।
वय्कलं देय् न्हियान्हिथं जटिलताय् तक्यनावंगु महसुस आम नेपाःमिं यानाच्वंगु धासें सकसिनं मातृभूमिया पवित्र चा छातीइ तयाः आत्म समीक्षा यायेगु ई वःगु न्ह्यथनादिल ।
पूर्व जुजु शाहं जनताया आस्था, मनंतुना व जनभावना अन्ततः अमर जुइगु धासें थुकियात हुइत स्वयां हुइ मफइगु नं धयादीगु दु ।
भागरथी भट्टया थैं अन्तिम संस्कार यायेगु तयारी
लहनान्युज | सिल्लाथ्व सप्तमी ११४१, फागुन ७ शुक्रवाः
बलात्कार याना हत्या याःगु १७ गु दिं लिपा डोटीया भागरथी भट्टया थैं अन्तिम संस्कार यायेगु तयारी याःगु दु ।
गोठलापानीपाखे शवयात्रा सुरु याना सेरास्थित महाकाली घाटय् अन्तिम संस्कार यायेगु तयारी दु । बैतडीया दोगडाकेदार गाउँपालिका–७ चडेपानीया १७ दँ दुम्ह भट्टयात वःगु माघ २१ गते बलात्कार लिपा हत्या याःगु खः ।
छेँ जःपिन्स दोषी पत्ता लगे मजुतले व माःगु कानुनी कारवाही याये माःगु माग शव उठे याये माने मजुगु खः । प्रहरीं बुधवाः चडेपानीयाम्ह दिनेश भट्टयात आरोपित धाःसे सार्वजनिक याःगु खः ।
दिनेशं न भागरथीया छेँ जःपिन्त थःपिन्स हे हत्या यानागु स्वीकार यायेवं भागरथीया परिवार दाहसंस्कार यायेत सकारात्मक जुगु खः ।
येँ थीथी थासय् मत मवइगु
लहनान्युज | सिल्लाथ्व सप्तमी ११४१, फागुन ७ शुक्रवाः
थौं येँ थीथी थासय् मत मवइगु जुगु दु ।
फुटुङ, पद्मसाल, चिम्बर पोखरी, साङ्लाफाँट, जरङ्खु, काभ्रेस्थली, देवीस्थान, ठूलो इनार, खुलालटार, थापागाउँ, नागपोखरी, संगमफाँट लगायतया थासय् सुथय् १० बजेनिसे १२ बजे तक मत मवइगु धका नेपाल विद्युत प्राधिकरणं धाःगु दु।
बालाजु वितरण केन्द्रं लागु धर्मस्थली फिडर मर्मत याये माःगुलि उगु फिडरपाखे मत सप्लाइ जुइगु थासय् मत मवइगु धका धाःगु दु । तोके याःगु इलय् ज्या सिधःगु अवस्थाय् न्हिनय् १२ बज न्ह्यः हे मत वइ धका प्राधिकरणं धाःगु दु।
बृहत् नागरिक आन्दोलनं टुनिख्यलय् याइगु
लहनान्युज | सिल्लाथ्व सप्तमी ११४१, फागुन ७ शुक्रवाः
नागरिक समाजं थौं शुक्रवाः टुनिख्यः घेरे याइगु ज्याझ्वः दु ।
बृहत् नागरिक आन्दोलनं टुनिख्यः घेरे याना घोषणापत्र जारी याइगु ज्याझ्वः दु । बृहत् नागरिक आन्दोलन घोषणापत्र २०७७ नां बिया घोषणापत्र टुनिख्यलय् जुइगु आन्दोलनपाखे सार्वजनिक यायेत्यःगु खः ।
अथेहे समाजं टुनिख्यलय् जुइगु मार्चय् सहभागी जुइत सकसित इनाप याःगु दु । नागरिक आन्दोलन रत्नपार्क सुरु जुया भद्रकाली सहिदगेट जुया मार्च पश्चिम गेटपाखे टुनिख्यलय् दुहावनिइ ।
वया लिपा ज्याझ्वलय् मन्तव्य व चिनाखँ ब्बनान्यकिइ धका समाजं धाःगु दु।
