नेपाल संवत् न्हूदँ राष्ट्रिय समारोह समिति ११४१ या ग्वसालय् थुगु दँय् कोरोना संक्रमणया कारण बसन्तपुरय् सभा मयाइगु जुगु दु।

अथेसा कन्ह्य दँय् दसं सभा याइगु थासाय् शंखधरया झ्वाता व किपाः धाःसा ब्वइगु जूगु दु।

समारोह समितिं ब्यूगु जानकारी कथं कन्हय् सोमवाः सुथसिया ७ ता इलय् बसन्तपुरय् ब्वइगु शंखधर साख्वाःया झ्वाता व किपातय् समारोह समितिया नायः रमेश महर्जनलिसें दुजःपिन्सं स्वांमाः क्वखायेकाः न्हूदँ हने त्यःगु दु।

बसन्तपुरय् जुइगु उगु ज्याझ्वःया भाला झ्वःछेँ सामुदायिक, लकस भालासाला पुचः, न्हू पुचः व काष्ठमण्डप ब्वनेस्यने कुथियात ब्यूगु दु । समारोह समितिं कन्हय् थीथी लागाय् थथे शखंधरया किपाः ब्ययेत इनाप याःगु दु।

न्हूदँ राष्ट्रिय समारोह समितिं न्हूदँ ने.सं. ११४१ थुगु दँय् कोरोना संक्रमणया कारणं बसन्तपुरय् दँय् दसं जुयाच्वंगु भिंतुना सभा व जुलुस स्थगित याःगु दु।

न्हुदँ पारु कन्हये सामाजिक दूरी कायम यासें सुथसिया ९ः३० ताः इलय् येँया राष्ट्रिय सभागृहय् भिंतुना सभा याइगु जूगु दु। समारोह समितिं ब्यूगु जानकारी कथं कन्हय्या ज्याझ्वलय् सदां थें प्रधानमन्त्रीयात मूपाहाँ कथं ब्वनातःगु दुसा पाहाँ कथं न्हूदँ समारोह समितिया सल्लाहकारपिं व प्रतिष्ठित व्यक्तित्वपिन्त ब्वनातःगु दु ।

उगु सभाय् येँया सांसदपिं, प्रदेशसभाया सांसदपिं, मेयर उपमेयर, वडाध्यक्ष, नेवाः आन्दोलनया सक्रिय व्यक्तित्वपिं, न्हूदँ समारोह समितिया सल्लाहकारपिं, मूल समारोह समितिया दुजःपिं, पत्रकारपिंलिसें विशिष्ट व्यक्तिपिन्त ब्वनातःगु दु । कन्हय्या ज्याझ्वलय् दकले न्हापां नेपाःया राष्ट्रिय म्ये, नेवाःतय्गु मंकाः म्ये, जनकवि दुर्गालाल श्रेष्ठं च्वयादीगु न्हूदँया भिंतुना म्ये हायेकाः लसकुस यायेत्यंगु दुसा मूपाहाँपाखें न्हूदँया लसताय् त्वाःदेवा च्याकाः न्हूगु दँयात लसकुस यायेगु ज्याझ्वः तयातःगु दु ।

अथेहे, न्हूदँया सांस्कृतिक जुलुस स्थगित जूगु हुनिं यानाः कन्हय् भिंतुना सभाय् नेवाःतय्गु स्वथ्वः सांस्कृतिक बाजं थ्वयेकेगु ज्याझ्वः तयातःगु दु । अथेहे, न्हूदँ समारोह समितिं दँय् दसं पिथनाच्वंगु तिथि पौ मूपाहाँपाखें सार्वजनिक यायेगु ज्याझ्वः तयातःगु दु । उगु ज्याझ्वः हलिंन्यंकं च्वनाच्वंपिं दथुइ थ्यंकेगु नितिं टेलिभिजन, एफएम, यूट्युब, अनलाइनपाखें प्रत्यक्ष प्रसारण यायेत्यंगु दु।

खड्गी ग्वाहाली पुचः येँ महानगरपालिका १५ वडां उगु वडा दुने च्वना थीथी ज्या याना वयाच्वपिन्त छुगु ज्याझ्वः दथुइ हने ज्या याःगु दु।

उगु ज्याझ्वःया मूपाहा कथं नेपाल ओलम्पिक कमिटीया अध्यक्ष संघीय सांसद जीवनराम श्रेष्ठ सम्मानीत जुयादिपिन्त हनापौ लल्हानादिगु खः।

अथेहे पाहाँ कथं कामपा १५ वडाध्यक्ष नाप महानगर प्रवक्ता ईश्वरमान डंगोल वडासदस्यपि निमा घ्याम्चो, आनन्द गौतम, मैयाँलक्ष्मी महर्जन व थीथी पार्टीया प्रतिनिधिपिं न उपस्थिति दुगु खः।

स्वयम्भुया भुयुख्यलय् जुगु उगु ज्याझ्वलय् नेवाः पत्रकार राष्ट्रिय दबू येँ जिल्लायात नं कदर पत्र व मतिना या चिं लः ल्हाःगु खः।

वःगु २४ घण्टाया दुने थौं आइतवाः थप १४७७ म्हेसित कोरोना संक्रमण पुष्टि जूगु दु धका स्वास्थ्य तथा जनसंख्या मन्त्रालयं धाःगु दु।

थ्व नाप आःतक नेपालय् २ लाख ९ हजार ७७६ म्ह संक्रमितपि थ्यःगु दु।

अथेहे २४ घण्टाया दुने २ हजार ७९८ म्हेसित कोरोना संक्रमणपि डिस्चार्ज जूगु दु। थ्व नाप १ लाख ७३ हजार ४३० म्ह डिस्चार्ज जुगु दु।

अथेहे देय् यकं सक्रिय संक्रमितपि ३५ हजार १२५म्ह दु।

वःगु २४ घण्टाया दुने स्वनिगलय् थप ८०७ म्हेसित कोरोना संक्रमित पुष्टि जुगु दु धका स्वास्थ्य तथा जनसंख्या मन्त्रालयं जानकारी बिःगु दु।

थौं आइतवाः संक्रमण पुष्टि जूपि ३५२ म्ह मिसा व ४५५ म्ह मिजंपि खः।

मन्त्रालयया कथं थौं येँ जक ६३२ म्हेसित कोरोना सक्रमण जुगु दु धका मन्त्रालयं धाःगु खः।

अथेहे, यलय् १३३ म्ह व ख्वपय् ४२ म्हेसित कोरोना सक्रमण जुगु दु धका धाःगु खः।

देय् यकं कोरोना सक्रमण पुष्टि १ हजार ४७७ म्हेसित जुगु खः।