Display Style:
Column Style
येँय् १८८८म्हेसित कोरोना सक्रमण, स्वनिगलय् २२८३
मनिष | अनलागा १० ११४०,असोज २६ सोमवाः
वःगु २४ घण्टाया दुने स्वनिगलय् २२८३ म्हेसित कोरोना संक्रमित जूगु दु।
स्वास्थ्य तथा जनसंख्या मन्त्रालयय् थौं सोमवाः याःगु पत्रकार सम्मेलनय् प्रवक्ता डा.जागेश्वर गौतमं येँ जक १८८८म्हेसित कोरोना सक्रमण जुगु द् धका धाःगु खः।
अथेहे यलय् २७७ म्ह व ख्वपय् ११८ म्हेसित कोरोना संक्रमण जूगु दु धका धाःगु दु।
२४ घण्टाय् १४ हजार ५३०म्हेसिगु पीसीआर परीक्षण याःगु खः। देय् यकं याःगु परिक्षणय् सोमवाः ४०४७ म्हेसित कोरोना संक्रमण जुगु खः। आःतक देय् यकं सक्रिय संक्रमितपि ३३ हजार ८८० म्ह थ्यःगु दु। होम आइसोलेसनय् च्वना च्वपि १९ हजार ९५७ म्ह दु।
२४ घन्टाय् १४७३म्ह डिस्चार्ज, गुम्ह मन्त
लहानान्युज | अनलागा १० ११४०,असोज २६ सोमवाः
वःगु २४ घन्टाया दुने कोरोनामुक्त जूपि १४७३ म्ह थौं डिस्चार्ज जूगु दु।
थ्व नाप नेपालय् आःतक कोरोनामुक्त जूपि ७७ हजार २७७ म्ह थ्यःगु दु।
वःगु २४ घन्टाय् जक नेपालय् थप गुम्ह कोरोना संक्रमणंसीगु दु धका स्वास्थ्य तथा जनसंख्या मन्त्रालयं धाःगु दु।
थ्व नाप नेपालय् कोरोना संक्रमणं सीपि ६४५ म्ह थ्यःगु दु।
नेपालय् ४०४७ म्हेसित कोरोना संक्रमण पुष्टि
लहानान्युज | अनलागा १० ११४०,असोज २६ सोमवाः
वःगु २४ घन्टाया दुने नेपालय् थौं थप ४०४७ म्हेसित कोरोना संक्रमण पुष्टि जूगु दु धका स्वास्थ्य तथा जनसंख्या मन्त्रालयं धाःगु दु।
मन्त्रालयया नियमित प्रेस ब्रिफिङय् थौं सोमवाः प्रवक्ता डा जागेश्वर गौतमया कथं न्हुपि थपे जुपि कोरोनाया संक्रमितपि नेपालय् आः १ लाख ११ हजार ८०२ म्ह थ्यःगु दु धका धाःगु दु।
राष्ट्र बैंकं मोहनिया इलय् न्हुगु नोट महिलिइगु
लहानान्युज | अनलागा १० ११४०,असोज २६ सोमवाः
नेपाल राष्ट्र बैंकं थुगु दँय् मोहनिया इलय् न्हगु नोट महिलिइगु जुगु दु।
कोभिड १९ संक्रमण जोखिमया कारण न्ह्याबलय् थे थुगुसि न्हुगु नोट महिलिइगु निर्णय जूगु धका नेपाल राष्ट्र बैंकं धाःगु दु। राष्ट्र बैंकया प्रवक्ता डा. गुणाकर भट्टं मोहनि इलय् न्हुगु नोट
हिलेगु इलय् ताहाकं लाइन च्वने मालिगु व हुलमुल जुइगुलि संक्रमणया जोखिम अप्वइगुलि थुगु पटक मोहनिया इलय् न्हुगु नोट महिलिइगु निर्णय यानागु खः धका धाःगु दु।
अथेहे मेमेगु बैंक न संक्रमणया जोखिम जूगुलि मोहनिया इलय् न्हुगु नोट हिलेइगु व्यवस्था मयायेगु धका धाःगु दु।
थ्व स्वया न्ह्यः वःगु मोहनि इलय् लाइनय् तया न्हुगु नोट हिलिइगु व्यवस्था राष्ट्र बैंक याना वयाच्वंगु खः। अथे लाइन च्वना राष्ट्र बैंकय् न्यातका, झींतका, नीतका, न्यतका व सच्छि वःगु नोट हिलेइगु याना वयाच्वंगु खः। थुगु दँय् राष्ट्र बैंकयाके न्हुगु नोट मौज्दात दुगुसा कोभिड संक्रमणया जोखिमया कारण नोट हिलिइगु असम्भव जुगु खः।
जागरुकया प्यक्वःगु हिदान ज्याझ्वः क्वचाल
लहानान्युज | अनलागा १० ११४०,असोज २६ सोमवाः
जागरुक युवा समाजं येँय् प्यक्वःगु खुसी हिदान ज्याझ्वः याःगु दु । समाजं येँ महानगरपालिका २४ वडालिसेया मंकाः ग्वसालय् येँया इतुम्बहालय् हिदान ज्याझ्वः याःगु खः । ब्लड डोनर्स एशोसिएसन नेपाल (ब्लोदान) या आह्वानय् समाजं हिदान ज्याझ्वः याःगु खः । हिदान ज्याझ्वलय् मुक्कं २१म्हेसिनं हिदान याःगु खः ।
लिपांगु इलय् जागरुक युवा समाज विशेष यानाः येँया पुलांगु वस्तीइ फुटपाथ पसः चीकेगु अभियानय् सक्रिय जुयावःगु दु । आः महामारीया इलय् सुं नं विरामीं हिया अभावया हुनिं ज्यान मवनेमा धकाः समाजं हिदानयात नं प्राथमिकताय् तयाः हिदान ज्याझ्वः यानावयागु समाजया सह सचिव लिसें हिदान ज्याझ्वःया कजि राजीव श्रेष्ठं धयादिल ।
सामाजिक दुरी कायम यासें स्वास्थ्य सुरक्षा मापदण्डयात लिनाः हिदान ज्याझ्वः याःगु खः । ज्याझ्वःयात सुरक्षित ढङ्गं क्वचायेकेत ब्लोदानया लागिं व्यक्तिगत सुरक्षा उपकरण (पिपिई), मास्क व सेनिटाइजर लिसेंया सुरक्षा ज्वलंत येँ महानगरपालिका २४ वडाया वडाअध्यक्ष बालकृष्ण श्रेष्ठं ग्वाहालि यानादीगु ग्वसाः खलकं जानकारी ब्यूगु दु ।
हि मालीगु अवस्थाय् सकसिनं अःपुक हि कायेखनेमा धकाः थःपिन्सं हिदान ज्याझ्वः मदिक्क न्ह्याकाच्वनागु २४ वडाया सदस्य लिसें ब्लोदानया केन्द्रीय दुजः व जागरुकया सल्लाहकार विनोद तुलाधरं धयादिल । मेगु शनिबाः येँया वसन्तपुरस्थित महाःद्यः पार्वती देगःया दबुलिइ हिदान जुइत्यंगु तुलाधरं जानकारी बियादिल ।
