येँ महानगरपालिकां खुलामञ्चयात खुला यायेगु अभियान सुरु याःगु दु । राष्ट्रिय महत्वया संरचना दरबार हाइस्कुलया निर्माण सम्पन्न जुगु व वीर अस्पतालया तक पुनर्निर्माणया ज्या क्वचाःगु दु ।

उगु संरचना पुनर्निर्माणया लागि तया तःगु निर्माण सामग्री व संरचना हटे याना महानगरपालिकां खुला याये त्यःगु खः । ‘राष्ट्रिय महत्वया संरचना दरबार हाइस्कुल व वीर अस्पतालया पुनर्निर्माणया झ्वलय् अन प्रयोग जुइगु निर्माण सामग्री व अन ज्या याइपि कामदार तयेत तयेगु लागि सहमति बिःयागु खः’, येँ महानगरपालिकाया मेयर विद्यासुन्दर शाक्यं धयादीगु दु,‘वीर अस्पताल व दरबार हाईस्कुलया पुननिर्माण सम्पन्न जुइगु चरणय् थ्यःगु जिमित जानकारी वःगुलि खुलामञ्चयात खुला यायेगु अभियान यानागु दु।’ मेयर शाक्यं विस्तारै बसपार्क न खुला यायेगु जानकारी बियादीगु दु।

‘येँ महानगरपालिका सार्वजनिक जग्गाया संरक्षण अभियानय् यायेगु पक्षय् दु,’ शाक्य धयादीगु दु, ‘खुलामञ्च जक मखु महानगर दुने मेमे थाय् न अतिक्रमित सार्वजनिक जग्गा मालेगु ज्या जुया च्वंगु दु। अज्यागु थाय् पार्क दयेकेगु, खुला तयेगु थे अभियान न्ह्याकेयेगु ज्या जुइ। अतिक्रमणबारे गन दुगु जानकारी दु जिमित बिइत न इनाप याःगु दु ।’

महानगरपालिकाया प्रमुख प्रशासकीय अधिकृत राजेश्वर ज्ञवालीं न मेयर शाक्यया निर्देशन कथं हे खुलामञ्च खुला यायेगु अभियान न्ह्याकाःगु दु धयादीगु दु । वयकलं धयादीगु दु, ‘कोभिड–१९ या कहर लगायतया कारण संरचना निर्माणय् छु भचा ढिला जुगुलि खुलामञ्चय् तयातःगु निर्माण सामग्री हटे यायेत छु भचा ढिला जुगु खः।’ दरबार हाइस्कुल निर्माण सम्पन्न जुया हस्तान्तरण तक जुइ धुकुगु दु अथेहे वीर अस्पताल न निर्माण सम्पन्नया चरणय् थ्यःगु दु । प्रमुख प्रशासकीय अधिकृत ज्ञवालीं धयाीगु दु आः छु ई लिपा हे खुला जुइ धका धयादीगु दु ।

वयकलं थौंकन्ह्य सडकय् जुइगु विरोध प्रदर्शन, ¥याली, आमसभा लगायतं महानगर दुने सडक अस्तव्यस्त जुगु व उकिया मार महानगरवासीपिन्त लागुलि थप ध्यानाकर्षण जुया महानगरपालिकां याकन हे खुलामञ्च खुला यायेगु कुतः यानागु दु धका धयादीगु दु। छु दिं न्ह्यः चिकित्सा विज्ञान राष्ट्रिय प्रतिष्ठान (न्याम्स) या उपलकुलपति टीएन शाह न ठेकेदार कम्पनीं बिगु प्रतिवेदन कथं वीर अस्पताल निर्माणय् ९० प्रतिशत स्वया अप्वो ज्या क्वचाये धुकुगुलि गुलिफु उलि याकन हे खुलामञ्च खुला यायेत कुतः यायेगु जुइ धका धयादीगु दु।

नेवाः न्ह्यलुवाः, वरिष्ठ साहित्यकार नाप वाम बुद्धिजीवी प्रो. माणिकलाल श्रेष्ठ तच्वः जुयाः हानं अस्पताल भर्ना जुयादीगु दु ।

प्रो.श्रेष्ठयात मेडिसिटी अस्पतालय् भर्ना याःगु खः । आः होश मदयाच्वंम्ह वय्कःयात भेन्टिलेटरय् तयातःगु दु ।

वंगु छुं ई न्ह्यवंनिसें वय्कः छेँय् हे च्वनाः वासः याकाच्वनादीगु खःसा वय्कःया उसाँय् नं बांलाना वयाच्वंगु खः ।

नेपाल आयल निगमं वाःया दुने हे निक्वः पेट्रोलियम पदार्थया भाः थकाःगु दु ।

थौं मंगलवाः चान्ह्यः १२ बजेनिसे लागू जुइ कथं डिजेल, पेट्रोल, मचिकंया व आन्तरिक हवाई इन्धनया भाः लिटरं नितका थकाःगु दु धका निगमं धाःगु दु ।

भाः थहावनेवं स्वनिगः दुने पेट्रोल छगु लिटरया ११४, डिजेल व मचिकं  ९७ व आन्तरिक हवाई इन्धनया भाः ६७ रुपैयाँ कायम जुगु दु धका निगमया प्रवक्तां धाःगु दु ।

लोकसाहित्य परिषद् भवन थौं मंगलवाः श्री पञ्चमी कुन्हु मूपाहाँ पुर्व प्रतिनिधि सभा सांसद कृष्णलाल महर्जनं उलेज्या यानादीगु दु।

शताब्दीपुरुष सत्यमोहन जोशीं २ आना २ पैसा जग्गा लोकसाहित्य परिषद् भवनया नितिं लल्हाःगु खः । उगु छेँ दयेकेया नितिं १ करोड ५० लाख खर्च जुइगु अनुमान ई. सुशिल व्यञ्जनकारं यानादीगु खः । सांसद कोषं सांसद महर्जनं ५० लाख आर्थिक ग्वाहालि याना न्ह्याःगु उगु भवन दयेकेया नितिं बागमती प्रदेश सांसद ज्ञानेन्द्र शाक्य, वल्र्ड नेवाः अर्गनाइजेशनलगायत जनसहभागितापाखें करिब ८८ लाख आर्थिक ग्वाहालि याःगु धका जानकारी परिषदया दांभरिं वासुदेव श्रेष्ठं धयादीगु खः।

आजीवन नेपालभाषा साहित्य बिकासया नितिं थःगु श्रीसम्पत्ति भाषिक संस्थाया निति बियादीपिं अग्रजपिं कविकेशरी चित्तधर हृदय नेपालभाषा परिषद्, भाषा निभाः प्रेम बहादुर कंसाकार आशा सफू कुथि व च्वसापासाया छेँ लुमंकुसें मल्ल के सुन्दरं संस्था नीस्वनेत गुलि थाकु संस्थायात मदिक्क न्ह्याकेगु अझ अप्वः थाकुगु खँ कनादिल । बहुभाषिक, बहु संस्कृतिया धनी देय् नेपाःया कला, कृतियात लोकसाहित्य मार्फत दक्वः जनतायात छधीछप्पं यानाः परिषद्यात देय्या ग्यालरी कथं विकास यायेगु लक्ष्य जूगु जोशीं कनादिल । अथेहे प्रा. प्रेमशान्ति तुलाधरया सभाधक्ष्यताय् जुगु ज्याझ्वः राजित बहादुर श्रेष्ठं न्ह्याकूगुलि शोभा शाक्यं लसकुस न्वचू तयादीगु खः ।

उगु हे ज्याझ्वलय् ने.सं. १०६४ या हस्तलिखित लयपौ ‘नेपाल’ या बिश्लेषणात्मक अध्ययन याना उपप्रा. निर्मला श्रेष्ठं तयार यानादीगु शोधग्रन्थ ‘नेपाल’ मूपाहाँ सांसद महर्जन, प्रदेश सांसद शाक्य, शताब्दी पुरुष सत्यमोहन जोशी व प्रा. प्रेमशान्ति तुलाधरं मंकाः कथं पितब्वज्या यानादीगु खः ।

बुखँ अमिर मैया रञ्जित, किपा नेवाः सूचना केन्द्र 

छत्रपाटी निःशुल्क चिकित्सालयया थौं ६४ क्वःगु दँमुज्या क्वचाःगु दु । उगु ज्याझ्वलय् येँ महानगरपालिकाया मेयर बिद्यासुन्दर शाक्यं चिकित्सालयया स्वर्ण महोत्सव भवनय् लिफ्टया उलेज्या यानादीगु दु।

उगु लिफ्ट तयेगु लागि येँ महानगरपालिकां ३० लाख ग्वाहालि याःगु खः। येँ महानगरपालिकाया ग्वाहालि छगु न्हुगु भवन दयेकेत्यःगु दु ।

न्हुगु दयेकेत्यःगु भवनया लागि ५ करोड बजेत बिनियोजन याये धुकुगु दु । अथेहे उगु ज्याझ्वलय् चिकित्सालय २५ दँ तक निरन्तर सेवा याःपि नाप ग्वाहालि याःपिन्त हने ज्या न जुगु खः।

चिकित्सालयया अधक्ष्य डा. मनोजमान श्रेष्ठया सभाधक्ष्यताय् जुगु खः।