Display Style:
Column Style
येँ ११४१म्ह नाप स्वनिगलय् १४२०म्हेसित कोरोना सक्रमित
लहानान्युज | कौलागा दशमी ११४०,कार्तिक २५ मंगलवाः
वःगु २४ घण्टाया दुने स्वनिगलय् थप १ हजार ४२० म्हेसित कोरोना संक्रमित जूगु दु धका स्वास्थ्य तथा जनसंख्या मन्त्रालयं धाःगु दु।
थौं मंगलवाः संक्रमित पुष्टि जूपि ६०३ म्ह मिसापि व ८१७ म्ह मिजंपि खः। थौं येँ जक ११४१म्ह येँ जक कोरोना सक्रमित पुष्टि जुगु दु धका मन्त्रालयय् धाःगु दु।
अथेहे ख्वपय् ८६ म्ह व यलय् १९३ म्हेसित कोरोना संक्रमण जूगु दु। देय् यकं मंगलवाः संक्रमित पुष्टि जूपि २७३६ म्हेसित कोरोना सक्रमण जूगु दु।
बाँकेय् कोरोना स्वम्ह मन्त
लहानान्युज | कौलागा दशमी ११४०,कार्तिक २५ मंगलवाः
बाँकेय् वासः याना वयाच्वपि स्वहम्ह कोरोना संक्रमितपि मन्त। बर्दियाय् निम्ह व दाङय् छम्ह संक्रमितपि सीगु खः।
बर्दियाया ठाकुरद्वारा नगरपालिका–२ या २९ दँ दुम्ह मिजंम्ह नेपालगन्ज मेडिकल कलेज शिक्षण अस्पताल कोहलपुरय् मदुगु खः। कात्तिक २३ गते बहनि अस्पताल भर्ना जुम्ह सोमवाः न्हिनय् पौने २ बजे मदुगु खः। उगु हे दिं बहनि ६ बजे कोरोना पोजेटिभ रिपोर्ट वःगु खः।
अथेहे बर्दियाया हे बाँसगढी नगरपालिका ८ या ३५ दँ दुम्ह मिजंम्ह वेस्टर्न अस्पताल नेपालगन्जय् मदुगु खः। कात्तिक २३ गते बहनि अस्पताल भर्ना जुम्ह सोमवाःया बहनि ५ बजे कोरोना संक्रमण पुष्टि जुगु तीन घण्टा लिपा हे वःगु बहनि सवा ८ बजे मदुगु खः।
मेम्ह दाङया घोराही उपमहानगरपालिका–१५ या ६४ दँ दुम्ह मिजंम्ह भेरी अस्पताल नेपालगन्जय् मदुगु खः। सोमवाः सुथय् अस्पताल भर्ना जुम्ह वःगु चान्ह्य साढे ९ बजे मदुगु खः। वयागु कोरोना परीक्षण रिपोर्ट धाःसा चान्ह्य १० बजे मदुगु खः।
बाँकेया अस्पतालय् पिने जिल्लापाखे वासः यायेत वःपि कोरोना संक्रमितपि सीपि ३२ म्ह थ्यःगु दु धका कोभिड संकट व्यवस्थापन केन्द्र बांके जानकारी बिःगु खः।
वरिष्ठ भजन संगीतज्ञ भिमबहादुर नकःमि मन्त
लहानान्युज | कौलागा दशमी ११४०,कार्तिक २५ मंगलवाः
नेपाःया नांजाम्ह भजन संगीतय् म्ये च्वमि, संगीतकःमि, म्ये हालामि भिम बहादुर नकःमि म्हिगः सोमवाः सनिलया ८ बजे मदुगु खः।
वयकः ९२ दँय् आकाझाका मदुगु खः।
मदुम्ह भिमबहादुर नकःमिया काय् नेपाःया संगीत ख्यलय् नांजाम्ह संगीतकःमि मनराजा नकःमि व छ्यः संकिपा ख्यलय् नांजाम्ह आशिष्मा नकःमि खः।
वय्कःया सीम्ह सिथं यनेगु व सी उइगु ज्या थौं मंगलवाः सुथयसिया ९ बजे बलंबु दीपय् जुइगु दु।
मंसीर २ गते किजापुजाया दिं विदा बिइतः माग
लहानान्युज | कौलागा नवमी ११४०,कार्तिक २४ सोमवाः
नेपाल संवत् राष्ट्रिय न्हूदँ समारोह समिति ११४१ या नायः रमेश महर्जनया नेतृत्वय् शहरी विकासमन्त्री कृष्णगोपाल श्रेष्ठयात नाप लाःगु दु ।
थौं सोमवाः सुथय् मन्त्री निवासय् वय्कःयात नापलानाः समारोह समितिपाखें भिन्तुना देछाःगु खःसा लिसें कोरोना महामारीया हुनिं थुगु दँया न्हूदँ न्यायेकेगु सम्बन्धय् सहलह यायेगु ज्या जुगु दु।
समारोह समितिया नायः महर्जनं थुगुसीया न्हूदँ सामाजिक संजालपाखें हलिंन्यंकं थ्यं केगु नितिं थीथी कथंया तयारी जुयाच्वंगु खँ कनादीगु खः । लिसें वय्कलं समारोह समितिया ग्वसालय् स्वनिगःन्यंकं न्हूदँ न्यायेकेत नीस्वनातःगु समारोह समितिनाप मंकाः मुँज्या च्वनाः न्हूदँ कछलाथ्व पारु (मंसीर १ गते) न्यायेकेगु निर्णय जूगु व थ्वया लिपा मंकाः वक्तव्य पिथनेगु जानकारी नं
बियादिल ।
नायः महर्जनं नेवाःतसें मंसीर २ गते किजापुजा याइगु जूगुलिं उगु दिं सरकारपाखें सार्वजनिक विदा बिइमाःगु माग यानादीगु खः ।
अथेहे, दँय् दसंथें नेपाल सरकारपाखें न्हूदँयात कयाः यायेमाःगु ज्या सकतां यायेत नं इनाप यानादिल ।
शहरी विकासमन्त्री श्रेष्ठं कोरोना भाइरस संक्रमणया इलय् थुगु संक्रमणपाखें बचेजुयाः न्हूदँ न्यायेकेमाःगु खँय् बः बियादिसें थःपिन्सं मंसीर २ गते नेवाःतय् किजा पुजाया दिं लाःगुलिं थौं हे च्वनेगु मन्त्रिपरिषदया मुँज्याय् प्रस्ताव यंकेगु खँ कनादीगु दु ।
दक्को मिले जुया समस्या समाधानया मालेमाः मेयर शाक्य
नृपेन्द्रलाल श्रेष्ठ | कौलागा नवमी ११४०,कार्तिक २४ सोमवाः
येँ महानगरपालिकाया मेयर विद्यासुन्दर शाक्यं येँ ज्या याना नइपिनिगु म्हगसया सहर खः धका धयादिगु खः। उद्योग तथा वाणिज्य व श्रम तथा उपभोक्ता हित समितिं थौं बैठकय् सांसदपिनिगु न्ह्यसःया लिसः बियादिसे अथे धयादिगु खः।
‘सतकय् सुना नं फ्वना नयेमाःगु अवस्था वःसा उपि सकसित व्यवस्थापन यायेगु दायित्व येँ महानगरपालिकाया खः धका धयादिसे मेयर शाक्यं ‘जिमिसं वहे जिम्मेवारी निर्वाह यायेगु कुतः यानावय च्वनागु खः धका धयादिगु खः। थज्यागु अवस्थाय् छम्ह मेम्हेसित द्धपः बिया वनेयेगु स्वया झी दक्को मिले जुया न्ह्या वनेमाः थ्व हे सकसिगु मंकाः दायित्व खः।’
मेयर शाक्यं खुलामञ्चय् निशुल्क खाना नकाच्वंगु विषय सकसिगु सरोकार दुने लाः उकिया व्यवस्थापन याना हे त्वतेयेगु प्रतिवद्धता व्यक्त यानादिगु खः। ‘जिगु जानकारी कथं करीब बाःगु
दर्जन संस्थां अन निशुल्क खाना नकाच्वंगु दु धका धयादिसे, ‘सकसित छथाय् खाना नकेयेगु आवश्यक मदु। जिमिसं निशुल्क भोजनया व्यवस्था याना वयाच्वंगु संघ–संस्था व मनूपिके उमिस भोजन यायेगु पायक जुगु फरक–फरक थासय् बन्द थासय् छनोट यानादिस धका धयाःगु खः। जिमिसं उगु थासय् भाडा पुला बिइत तयार दु। उलि जक मखु। खाना नकेयेगु न आर्थिक अभाव जूसा जिमिसं खाद्यन्न तक व्यवस्थापन यायेत तयार दु। तर, थज्यागु कोरोना कहरया इलय् स्वास्थ्य मापदण्ड तक बिचाः मयासे खुला थासय् खाना नकेय मज्य् धइगु जिमिगु चाहना मखु।’
मेयर शाक्य खाना नकेयेगु लागि थीथी विदेशी संस्था व स्वदेशपाखे तक आर्थिक ग्वाहालिया निति चन्दा काये म्वाःगु धयादिसे थुकिया लागि माःगु ग्वाहालि महानगरपालिका यायेत तयार दुगु जानकारी यानादिगु खः।
मेयर शाक्यं छु माननीयपिन्स खुलामञ्च वना आर्थिक ग्वाहालि यानाच्वंगु संकेत यासे– ‘याये मफुपिन्त जिमिसं स्वया व राज्यया दायित्व दुने लाः। तर, याना नये फुसन्सि खुलामञ्चय् वना आर्थिक ग्वाहालि याना महानगरपालिकायात असहयोग याना प्रचार याना समस्या समाधान जुइ मखु। दक्को मिले जुया समस्या समाधानया उपायय् मालेमाः धका धयादिगु खः।’
अथेहे मेयर शाक्य स्थानीय, प्रदेश व केन्द्र सरकारया समन्वयय् व्यवस्थापन या मेगु विकल्प मदु धका धयादिगु दु।अस्पताल थ्यनिकि हे आइसियु हे माःगु धका माग सरकारं पूरा याये मफुगु थकियात जनतापिन्त थुइके मफया हे छु समस्या वःगु धका धयादिगु खः।
‘आःया अवस्थायात स्वयेगु खःसा यक्को नागरिक होम आइसोलेसनय् च्वनाच्वंगु दु। भेण्टिलेटर व आइसियुया बेडया अभाव जूसा आइसोलेसन वेडया अभाव खनेमदु धका धयादिसे, ‘वइगु दिं थप भयावह अवस्था जूसा व्यवस्थापनय् कठिन जुइफु। थुकिया लागि सकसिया समन्वय आवश्यक दु ।’
उद्योग तथा वाणिज्य व श्रम तथा उपभोक्ता हित समितिया सभापति विमल प्रसाद श्रीवास्तवं आःतक स्थानीय तह न याःगु ज्या सकारात्मक जूगु मेगु थप समन्वय याना न्ह्यने वनेमाःगुलि बःबियादिगु खः। सांसद भिमसेन दास प्रधानं समन्वयया अभावय् समस्या जुगु धका धयादिसे समन्वय न्ह्यने वनेत इनाप यानादिगु खः। सांसद प्रधानं खुलामञ्चय् निशुल्क खाना नका वयाच्वंगु व्यवस्थापन यायेगु नामय् याउक ेत्वने मज्यु धका धाःस समन्वय याना थाय् तोके याना खाना नकेत्यः इनाप याःगु खः।
अथेहे सांसदपि विन्दा पाण्डे, अभिषेक प्रताप शाह, देवेन्द्र पौडेल, माया ज्ञवाली, सोमप्रसाद पाण्डे, एलपी साँवा लिम्बू, प्रकास रसाइली, श्रम मन्त्रालयया सहसचिव, वैदेशिक रोजगार विभागया महानिर्देशक कुमार प्रसाद दहाल लगायतपिन्स कोभिड १९ महामारीया मारय् लापि श्रमिकपिन्त व्यवस्थापनया लागि मन्त्रालय व स्थानीय तह न याःगु व्यवस्था, याये माःगु कुतःया बारय् मेयरपिन्त सुझाव बिःगु खः।
