Display Style:
Column Style
येँ महानगरपालिकां सम्पदा संरक्षण मदकि ज्या यानाच्वनागु दु, मेयर शाक्य
लहनान्युज | सिल्लाथ्व तृतीया ११४१, फागुन २ आइतवाः
चःमति नेवाः खलःया ग्वसालय् छगु लसता तुच्चा ज्याझ्वः नाप चःमति ज्याथ क्यबः नां या म्येचाया उलेज्या जूगु दु ।
खलःया नायः नाप कलाकार पूर्णकाजी ज्यापुया च्वसां पिदंगु चःमति ज्या क्यब नांया म्येचाया मू पाहाँ येँ महानगरपालिकाया मेयर विद्यासुन्दर शाक्यं व विशेष पाहाँ शहरी विकास राज्यमन्त्री रामबीर मानन्धरपिन्स पितब्वज्या यानादीगु खः । उगु ज्याझ्वलय् मूपाहाँ मेयर शाक्यं येँ महानगरपालिकाया विकास थःपिं मेयर जुइधुंका छसी कथं जुया च्वंगु दु धका धयादिसे लानिपुखु, कमलपूखु लगायतया महानगरपालिकां संरक्षण व जिर्णोद्धार यायेत स्वबले छथ्व मनूतसें विरोधया सः थ्वयेकुगुयात कुंखिना दिगु दु। विशेष पाहाँ मन्त्री मानन्धरं थःम्हेसिनं संगीतख्यःया नांया विश्व रेकर्ड दयेके खँगुलिं लसता प्वंकादिगु खः ।
अथेहे सिनेपत्रकार विजयरत्न असंबरें संगीतकःमि कलाकार पूर्णकाजि ज्यापुया कारणं चःमति त्वाःया नां सगीत व संकिपा ख्यलय् नं थ्वया वःगु खँ उल्लेख यानादीगु खः । ज्याझ्वलय् वहालवाला मन्त्रीपाखें म्येहाला विश्व रेकर्ड तायेत तालानादीम्ह शहरी विकास राज्य मन्त्री रामबीर मानन्धरयात ग्वसाः खलःपाखें मूपाहाँ मेयर शाक्यं हनापौ लःल्हानादीगु खः ।
ग्वसाः खलःया कजि ज्यापुया सभाधक्ष्यताय् जुगु उगु ज्याझ्वलय् खलःया छ्यान्जे राजेन्द्र महर्जनं लसकुस न्वचु तयादीगु खःसा नांजाम्ह म्येहालामि जुजुकाजी रन्जितं पितब्वज्या जूगु म्येचाया समीक्षा याना दिल । थीथी साँगितिक व साँस्कृतिक न्ह्यब्वया नं न्ह्यब्वःगु उगु ज्याझ्वलय् म्येहालामिपिं सतिश महर्जन, कल्पना श्रेष्ठ व पूर्णकाजी ज्यापु लगायतं म्येहाला न्यंकादीगु खःसा नेपाः डान्स एकेडेमीपाखें थीथी हुलाप्याखँ नं न्ह्यब्वःगु खः ।
निर्वाचन आचारसंहिताया मस्यौदा तयार, सरकार व राजनीतिक दललिसे सहलह याइगु
लहनान्यूज | सिल्लाथ्व तृतीया ११४१, फागुन २ आइतवाः
निर्वाचन आयोगं निर्वाचन आचारसंहिताया मस्यौदा तयार याःगु दु । मस्यौदाय् सहलह यायेत आयोगं सरकार व राजीतिक दलया प्रतिनिधितयेत सःतूगु दु ।
आचार संहिताय् उम्मेदवार वा राजनीतिक दलया दुजःया निजी जीवनयात लिच्वः लाइगु याना कुँख्यने मदइगु उल्लेख यानातःगु दु ।
सार्वजनिक निकाय वा छुं नं परियोजनाया श्रोत साधन व सम्पत्तिइ सुयागु पक्ष व विपक्षय् जुइगु याना छ्यलेगु वा छ्येय्के बिइ मदइगु , मतदातायात नगद वा जिन्सी इनेगु , भ्वँ नकेगु वा मादक पदार्थ सेवन याकेगु वा इनेगु याये मज्युगु व छुं नं मठ, द्यगः, गुम्बा मस्जिद, चर्च वा छुं नं धार्मिकस्थल, सार्वजनिक उद्यान छ्यला निर्वाचनसम्बन्धी प्रचारप्रसार यायेगु व याके बिइ मज्युगु उल्लेख यानातःगु दु ।
अथेहे उम्मेदवार वा राजनीतिक दलया निर्वाचन चिं अंकित छुं नं सामग्री उत्पादन व मिइ मदइगु खँ नं आचारसंहिताय् कःघानातःगु दु ।
उम्मेदवारया मनोनयन दर्ता जूगु मितिनिसें मत लिच्वःया घोषणा मजूतलेतक्क उम्मेदवार वा राजनीतिक दलया मत लिच्वःया खँय् मत सर्वेक्षण वा अज्यागु सर्वेक्षणया लिच्वः घोषणा यायेगु वा प्रकाशन यायेमज्युगु लिसेंया विषय उल्लेख यानातःगु दु ।
फुक्क दलतयेलिसेया सहलहलिपा आयोगं फागुन निगूगु वालंनिसें आचारसंहिता लागु यायेगु तयारी याःगु दु ।
कोरोनाविरुद्धया खोपया ३गूगु झ्वया अभियान न्ह्यात
लहनान्यूज | सिल्लाथ्व तृतीया ११४१, फागुन २ आइतवाः
थौं निसें कोरोनाविरुद्धया खोपया ३गूगु झ्वया अभियान न्ह्यागु दु ।
३गूगु झ्वया खोप अभियानय् सरकारी ज्याकु, सार्वजनिक संस्थान लिसें बैंकया कर्मचारी, पत्रकार, स्थानीय तगिंया निर्वाचित जनप्रतिनिधि, सीमा सुरक्षा पोस्टय् खटेजूपिं सुरक्षाकर्मी व न्हापा त्वफिउपिं स्वास्थ्यकर्मीयात खोप बिइगु स्वास्थ्य तथा जनसख्या मन्त्रालयं न्ह्यथंगु दु ।
पत्रकार व कूटनीतिक नियोगया कर्मचारीयात खोप बिइधुंका मेगु झ्वया खोप ज्याझ्व फागुन २ निसें ८ तक्क निर्धारण याःगु खः । फागुन २निसें जुइगु अभियानय् ३ गू लखम्हसित खोप बिइगु सरकारया योजना दु ।
उमित न्हापांगु झ्वया न्हापांगु प्राथकिताय् लाःपिं स्वास्थ्यकर्मीयात खोप बिउगु थासं खोप बिइत्यंगु खः ।
थ्वयान्ह्यः भारतं १०गू लख ल्याःखय् कोभिसिल्ड खोप अनुदानय् बिइधुंका न्हापांगु झ्वलय् माघ १४ निसें २४ तक्क खोप ज्याझ्व न्ह्याकुगु खः ।
गुकिइ छगू लख ८१ द्वः ८ सः व ५७म्हसिनं खोप काःगु खः । खोप ज्याझ्वलय् ८२ गू प्रतिशत स्वास्थ्यकर्मीं खोप काःगु मन्त्रालयं न्ह्यथंगु दु ।
मन्त्रालयं निर्धारण याःगु निगूगु प्राथमिकताया वेैंश पुचःयात लक्षित खोप ज्याझ्वः धाःसा कोभ्याक्सपाखें खोप वयेधुंका न्ह्याकेगु योजना दयेकुगु दु ।
नेपालय् १३म्हेसित न्हुगु कोरोनाभाइरस पुष्टि
शोभा श्रेष्ठ | सिल्लाथ्व तृतीया ११४१, फागुन २ आइतवाः
नेपालय् थप १३ म्ह कोरोना भाइरस न्हगु प्रजाति खनेदुगु दु।
इपिडिमियोलोजी तथा रोग नियन्त्रण महाशाखाया निर्देशक डा. कृष्ण पौडेलया कथं निवाः दुने मुक्तिनाथ दर्शन याना पोखरा जुया येँ वःपि छम्ह नेपालीयात न्हुगु प्रजातिया भाइरस खनेदुगुलि वनाप सम्पर्कय् दुपि १२ म्हेसिगु नमुना परीक्षण याःगु खः। शनिवाः १२ म्हेसित हे न्हुगु प्रजातिया भाइरस पुष्टि जुगु धका डा. पौडेलं धाःगु दु ।
नेपालय् न्हापागु पटक वःगु पुस २७ गते स्वम्हेसित युके भेरिएन्ट पुष्टि जूगु खः । उपि दक्को बेलायतं लिहा वःपि खः।
न्हुगु प्रजातिया कोरोना भाइरस पहिचानया लागि जिन सिक्वेन्सिङ याये माःगुलि थुुगु सेवा नेपालय् मदु थुगु भाइरसयात परीक्षण यायेत हङकङय् छ्वःगु खः।
थौं “भ्यालेन्टाइन्स् डे” अर्थात् मतिना दिवस
राम डंगोल | सिल्लाथ्व तृतीया ११४१, फागुन २ आइतवाः
थांै फेब्रुअरी १४, थौं हलिंयंक भ्यालेन्टाइन्स् डे अर्थात् मतिना दिवस हनाच्वंगु दु ।
विशेष याना ल्याम्ह ल्यासेपिन्स थ्व दिंयात विशेष नखःया कथं हनेगु या । नेपालय् लिपांगु छुं दँनिसें मतिना दिवस विशेष कथं हनावयाच्वंगु दु ।
थ्व दिं प्रेमिप्रेमिकां थीथी उपहार बिया मतिना न्ह्यब्वइगु अले थः यम्हेसित मतिनाया प्रस्ताव तयेगु न याई ।
भ्यालेन्टाइन्स् डे सन् २६९ निसें रोमन देय्पाखें न्ह्याःगु धाई । थ्वः दिवसया छगू म्हाइपुसेच्वंगु मतिनाया बाखँलिसे स्वापू दु । तत्कालीन रोमन सम्राट क्लाउडियस द्वितीयं थः सैनिकपिन्त मतिना व इहिपा यायेत रोक तःगु खः ।
मतिना व इहिपालं सैनिकपिं कमजोर जुइगु अले युद्धलिसेया गोप्य सूचं त पितवनेफइगु धापू सम्राट क्लाउडियसया दूगु हुनिं मतिना व इहिपा यायेत रोक तःगु खः ।
तर सम्राटया उगु नियम नालामकाइम्ह मध्ये छम्ह रोमनया पादरी सन्त भ्यालेन्टाइनं मतिनाया पक्षय सः थ्वयेकल । वय्कलं उगु प्रतिबन्ध उल्लंघन याना मतिनाय् दुपिं यक्वः सैनिकपिनिगु सार्वजनिककथं इहिपा यानाबिल ।
उगु खँ सिया सम्राटं पादरीयात ज्वना सन् २६९ या फेबु्रअरी १४ मृत्युदण्डया सजायँ बिल । सन्त भ्यालेन्टाइनं मतिनाया नितिं याःगु त्यागया लुमन्ति हलियंक दँय्दसँ १४ फेब्रुअरी यात मतिना दिवसया कथं भ्यालेन्टाइन्स् डे हनावयाच्वंगु दु ।
