किपू नगरपालिका नं थःगु नगरपालिका दुने स्थानीय विषयय् नेपालभाषं हे ब्वंकीगु जूगु दु । उकिया निति पाठ्यक्रम व पाठ्यसफू तयार यायेगु ज्या जुइ धुकुगु दु धका किपू नगरपालिकाया उपमेयर सरस्वति खड्का रिजालं लहानान्युजयात जानकारी बियादीगु दु।  किपुलिइ अप्वो थे वसोवास नेवाःतय्गु दुगुलि व नेपालभासं हे ब्बकेगु तयारी याये त्यःनागु खः धका उपमेयर खड्का धयादीगु खः ।

स्थानीय भासयात मान्यता बिःगु कथं न स्थानीय विषय ब्वंकेगु व्यवस्था यायेत्यनागु धका धयादिगु खः । याकन हे शिक्षक व विद्यार्थीपिन्त नेपालभासं च्वयेगु व ब्वंकेगु तालिम समेत बीइगु तयारी यानाच्वंगु दु। न्हापा किपू नगरपालिकां स्थानीय पाठ्य–क्रम नेपाली भाषां न तयार याना तःगु खःसा आः नेपालभासं न  तयार यायेगु ज्या जुयाच्वंगु दु धका धयादीगु दु ।

नेपालभासया निति किपू नगरपालिकया शिक्षा समितिया दुजःपिं डा. धर्मराज डंगोल, वज्रमुनि वज्राचार्य व जुजुभाइ महर्जनपिन्स पाठ्यसफू तयार याना च्वंगु दु । किपु नगरपालिकाय् निजी व सामुदायिक स्कूल ४० गू स्वयां अप्वः दुगु खँ उप–मेयर सरस्वती खड्कां कनादिगु दु ।

येँ महानगरपालिका नेपालभासं पाठ्यसफू तयार याना ब्बकेगु सुरु यायेव मेमेगु नपाय् नं नेपाल–भाषां ब्वंकेगु तयारी जुयाच्वंगु दु ।

येँ महानगरपालिकां थःगु महानगर दुने सरकारी व निजी स्कुलय् ब्वंकेगु लागि तयार याःगु पाठ्यसफू ‘झीगु येँ देय्’ या १ व २ तगिंया पाठ्यसफू छपाई क्वचाये धुकुगु दु ।

अथेहे मेमेगु तगिंया सफू नं छपाईया लागिं तयारी जुयाच्वंगु दु । थुगु पाठ्यसफू ब्वंकेगु लागिं येँ महानगरं शिक्षकत नं भर्ना यायेगु तयारी यानाच्वंगु जूगु दु । येँ महानगरपाखे सामुदायिक स्कुलय् थुगु पाठ्यसफू ब्वंकेगु लागिं शिक्षकपि कायेत्यंगु खः ।

येँ महानगर दुने ९६ गू सामुदायिक स्कुलया लागिं १७० म्ह शिक्षक भर्ना यायेगु तयारी महानगरपाखे यानाच्वंगु दु । महानगर शिक्षा विभागपाखें जानकारी बिःगु कथं थौंकन्हय् दुने हे शिक्षकया लागिं सुचं पित बीइगु धका धाःगु दु ।

भारतीय आयल निगमं पेट्रोलियम पदार्थया भाः थकाय्वं नेपाल आयल निगमं पेट्रोलियम पदार्थया थकाःगु दु।

निगमं वःगु १२ बजेनिसे लागू जुइगु कथं जा थुइगु ग्यासया भाः नीतका थकाःगु दु । आः नीतका थकाय्वं १४०० तका थ्यःगु दु।

निगमं म्हिगः छगु विज्ञप्ति जारी यासे पेट्रोल, डिजेल व मचिकनय् छगु लिटरय् नितका थकाःगु दु।

न्हुगु भाः कथं आः पेट्रोल  छगु लिटर ११२ रुपैयाँ, डिजेल व मचिक छगु लिटरया ९५ रुपैयाँ कायम जूगु दु ।

निगमं हवाई इन्धनया भाः यथावत् कायम याःगु दु ।

नेकपा प्रचण्ड–माधव समूहया नेता जनार्दन शर्मा न शान्तिपूर्ण सः मन्यसा जनता छु न इलय् न विद्रोहय् क्वहा वइ धका धाःगु दु ।

प्रतिनिधिसभा विघटनया विरोधय् प्रचण्ड–माधव समूह न थौं बुधवः येँ याःगु आमसभाय् शर्मा न धयादीगु दु, ‘यदि जनताया सः मन्यंसा थौं जुगु शान्तिपूर्ण आन्दोलन गुगु न इलय् विद्रोहय् क्वहा वयेफु ।’ संघीयता लागू याये मबिइकेत व संविधानयात उखे थुखे यायेत स्वःगु धाःसे शर्मा न जनतां विद्रोहपाखे संघीयता व गणतन्त्र विरोधीपिन्त सिधयेकी धका धयादीगु दु।

ओलीया असीमित अधिकार दुगु कारण थौंया अवस्था वःगु धका धयादीसे वयकलं, ‘केपी ओली तयार जुगु ग्राउण्ड गन खः ? अन याःगु समीक्षा यायेमाः।’ समीक्षा मयासा हाकन महेन्द्र व केपी ओली जन्मय् जुइफु धका शर्मा धाःगु दु।