Display Style:
Column Style
नेपालय् ८३०म्ह कोरोना सक्रमित
कछलागा चःह्रे ११४०, मंसिर २८ आइतवाः | कछलागा चःह्रे ११४०, मंसिर २८ आइतवाः
नेपालय् थप ८३० म्हेसित कोरोना संक्रमण पुष्टि जुगु दु ।
वःगु २४ घण्टाय् थीथी जिल्लाया प्रयोगशालाय् याःगु परीक्षणय् ८३० म्ह संक्रमितपि जुगु दु धका स्वास्थ्य तथा जनसंख्या मन्त्रालयं जानकारी बिःगु दु।
थ्व नाप संक्रमितपि नाप नेपालय् कोरोना संक्रमितपि आः २ लाख ४८ हजार ४२३ म्ह थ्यःगु दु ।
नेकपाया बैठक पुस १ गते
लहानान्युज | कछलागा चःह्रे ११४०, मंसिर २८ आइतवाः
नेकपा स्थायी कमिटी बैठक पुस १ गते च्वनेगु कथं थौं क्वचाःगु दु ।
नेकपाया केन्द्रीय सदस्य कमानसिंह लामा मदुगु शोक प्रस्ताव पारित यासे स्थायी कमिटी बैठक क्वचाःगु दु।
मेगु बैठक पुस १ गते च्वनेगु कथं थौंया बैठक क्वचाःगु दु धका नेकपाया प्रवक्ता नारायणकाजी श्रेष्ठं जानकारी बिःगु दु ।
‘जलस्येँ बचे याये नु’ घोषणायासे महानगर दिवस हनिइगु
सुरेन्द्रभक्त श्रेष्ठ | कछलागा चःह्रे ११४१, मंसिर २८ आइतवाः
येँ महानगरपालिकां २६ क्वःगु महानगर दिवस न्यायेकेगु तयारी पूरा याःगु दु । कन्हय् राष्ट्रिय सभागृहय् छगू ज्याभ्वःया दथुइ यासें महानगर दिवस हनेत्यंगु खः। येँ महानगरपालिकांं थौं छगु पत्रकार सम्मेलनयासे येँ महानगरया मेयर विद्यासुन्दर शाक्यं जानकारी बियादीगु खः।
थौं कन्ह्य कोरोना महामारीया कारणं सार्वजनिक रूपं तःधंक ज्याझ्वः याये मजिउगुलिं राष्ट्रिय सभागृहय् सीमित मनूतय् दथुइ थुगु दिवस हनेत्यंगु खः । कन्ह्य जुगु ज्याझ्वलय् ज्यापु समुदायया ६३ गू परम्परागत गुथि, खड्गी समुदायया ६० गू परम्पराग गुथिया बाजं गुरु, २३ गू गुंला बाजं खलः, येँयाःबलय् पिहां वइगु लाखे, पुलुकिसि, दीप्याखं, सवःद्यः लिसें जनबहाःद्यःया पँय्ताः बाजंयात नं सम्मान याइगु ग्वसाः दु । थुगुसी बाजं गुरुपिंत म्हतिं ३० द्वः तका दां लिसें हनापौ लःल्हाइगु ग्वसाः दु।
उगु ज्याझ्वलय् हे येँ महानगरया न्हापांम्ह जननिर्वाचित सभापति मदुम्ह जनकमान श्रेष्ठया नामं स्वनातःगु ‘जनकमान श्रेष्ठ स्वशासन पुरस्कार’, ज्याय् खटे जुयाच्वंपिं न्याम्ह जनप्रतिनिधि व न्याम्ह कर्मचारीयात उत्कृष्ट सम्मानया लिसें उत्कृष्ट वडा घोषणा याइगु नं ज्याझ्वः दु । अथे हे झिम्ह पत्रकारतय्त सुशासन सिरपाः बीगु नं ग्वसाः दु। लिसें कन्हय् हे महानगरया म्ये नं सार्वजनिक यायेत्यंगु दु । थुगुसीनिसें ‘मेयर अवार्ड’ बीगु ज्याझ्वः नं दयेकूगु दु।
अथे हे थौंकन्हय् यक्वसित पीडित यानाच्वंगु जलस्येँ (किड्नी) सम्बन्धी ल्वचं बचे जुइगु बारे जनचेतना ब्वलंकेत ‘जलस्येँ बचे याये नु’ अभियान नं घोषणा यायेत्यंगु दु ।
महानगर दिवसया लसताय् महानगरपाखें यानाच्वंगु ज्याखँ बारे जनताया राय कायेगु लागिं म्हिगःनिसें महानगरया थीथी ३० गू थासय् बूथ तयाः फाराम भरे याकाः सुझाव मुंकेगु यानाच्वंगु दु।
पेट्रोलियम पदार्थया भाः थहावन
लहानान्युज | कछलागा चःह्रे ११४१, मंसिर २८ आइतवाः
नेपाल आयल निगमं पेट्रोलियम पदार्थया भाः थकाःगु दु । म्हिगः शनिवाः चान्ह्यया १२ बजे निसे लागू जुइ कथं पेट्रोलय् छतका, डिजेल व मचिकनय् नितका थकाःगु दु धका निगमं धाःगु दु। भारतीय आयल कर्पाेरेशनं डिसेम्बर १ य् भाः थकाःगुलि निगम थन न भाः थहावःगु खः धका निगमं धाःगु दु । भारतं डसेम्बर १ य् पेट्रोल व डिजेलय् प्यतका प्यतका थकाःगु खः।
आः न्हुगु भाः कथं पेट्रोल खुद्राय् १०८ तका थ्यःगु दु सा डिजेल व मचिकं ९१ तका थ्यःगु दु।
१३५९ म्ह डिस्चार्ज, १५म्ह मन्त
लहानान्युज | कछलागा त्रयोदशी ११४१, मंसिर २७ सनिवाः
स्वास्थ्य तथा जनसंख्या मन्त्रालयया कथं थौं नियमित प्रेस ब्रिफिङय् प्रवक्ता डा. जागेश्वर गौतमं वःगु २४ घण्टाय् १३५९ म्ह डिस्चार्ज जूया छेँ लिहावःगु दु धका जानकारी बियादीगु दु ।
थ्व नाप आःतक डिस्चार्ज जुपि २ लाख ३४ हजार २३१ म्ह थ्यःगु दु।
अथेहे सक्रिय संक्रमितपि ११ हजार ६७३ म्ह थ्यःगु दु। पीसीआर परीक्षण आःतक १८ लाख २५ हजार ८६० म्ह थ्यःगु दु।
देयन्यकं ५१९ म्ह क्वारेन्टीनय् च्वनाच्वंगु दु। वःगु २४ घण्टाय् १५ म्ह कोभिड १९ संक्रमणया कारण मन्त।
आःतक कोभिड संक्रमणया कारण सीपि १६८९ म्ह थ्यःगु दु।
