Display Style:
Column Style
२४ घण्टाय् १४८३ म्ह कोरोनामुक्त, १४ म्ह मन्त
लहानान्युज | कछलागा नवमी ११४१, मंसिर २४ बुधवाः
स्वास्थ्य मन्त्रालयया कथं २४ घण्टाया दुने १ हजार ४८३ म्ह कोरोनामुक्त जुया छेँय् लिहावःगु दु।
नेपालय् थ्व नाप कोरोनामुक्त जुपि २ लाख ३० हजार ५३७ म्ह थ्यःगु दु।
अथेहे २४ घण्टाया दुने कोरोना संक्रमणं १४ म्ह मन्त ।
थ्व नाप नेपालय् सीपि १ हजार ६५१ म्ह थ्यःगु दु।
देयन्यकं १०५६म्हेसित कोरोना पुष्टि
लहानान्युज | कछलागा नवमी ११४१, मंसिर २४ बुधवाः
वःगु २४ घण्टाया दुने थौं बुधवाः देयन्यक थप १ हजार ५६ म्हेसित कोरोना संक्रमण पुष्टि जूगु दु धका स्वास्थ्य तथा जनसंख्या मन्त्रालयं धाःगु दु ।
संक्रमित जूपि ३८६ म्ह मिसा व मिजंपि ६७० म्हपिन्त पुष्टि जुगु दु। आःतक नेपालय् कोरोना संक्रमितपि २ लाख ४४ हजार ४३३ म्ह थ्यःगु दु।
मन्त्रालयया कथं आःतक पीसीआर विधिपाखे १८ लाख ५ हजार ९७२ म्हेसिगु परीक्षण याये धुकुगु दु। वःगु २४ घण्टाय् जम्मा ६ हजार २८६ म्हेसिगु पीसीआर परीक्षण याःगु खः।
देयन्यक सक्रिय संक्रमितपि आःतक १२ हजार २४५ म्ह दु सा क्वारेन्टाइनय् च्वना च्वंपि गु ५२५ म्ह दु।
कन्ह्यनिसे चिडिखाना चालिइगु
लहानान्युज | कछलागा नवमी ११४१, मंसिर २४ बुधवाः
वःगु चैत ७ गते निसे बन्द जुयाच्वंगु सदर चिडियाखाना कन्ह्यनिसे चाइगु जगु दु ।
सरकारं लागू याःगु स्वास्थ्य मापदण्ड पूर्ण रुपं पालना यासे चिडियाखाना खोले याये त्यनागु दु धका चिडियाखानाया प्रमुख डा. चिरञ्जीवि प्रसाद पोखरेले जानकारी बिःगु दु। अवलोकन यायेत अनिवार्य मास्क तयेमाःगु व भौतिक दूरी कायम याये माःः धका धयादीगु खः।
छकः न्ह्यसःनिसे च्यासः तक दर्शक चिडियाखाना दुने प्रवेश याये फइगु । दुवा वःगु निघौ निसे स्वघौ तक दुने पिहा वयेमाः धका धयादीगु खः । न्हिया न्हिथं निद्धः निसे स्वद्ध तक दर्शक पिन्स चिडियाखाना अवलोकन याना वयाच्वंगु खः।
ई सेवामार्फत थौ बहनिनिसे अनलाइन टिकट काय फइ धका धयादीगु दु । चिडियाखाना प्रवेशया लागि भाः १५० रुपैयाँया तयातःगु दु। विद्यार्थी व ज्येष्ठ नागरिकपिन्स ९० रुपैयाँ हे टिकट काये दइ। अथेहे ४ दँ निसे १२ दँ मचा तयेगु लागि टिकटया ५० रुपैयाँ तःगु दु।
लुँ तोला ७०० क्वहा वल
शोभा श्रेष्ठ | कछलागा नवमी ११४१, मंसिर २४ बुधवाः
छु दिंनिसे थहावना च्वंगु लुँया भाः थौं न्ह्यसः क्वहा वःगु दु ।
म्हिगः तोलां झीन्यासः थहा वना ९४ हजार एक सय रुपैयाँ थ्यःगु खःसा थौं न्ह्यसः क्वहा वया तोलाया ९३ हजार ४ सय रुपैयाँ थ्यःगु दु धका नेपाल सुन चाँदी व्यवसायी महासंघं धाःगु दु।
अथेहे वहः तोलान नीतका क्वहा वःगु दु।
थौं वहः तोलां नीतका क्वहा वया १२१५ रुपैयाँ न कारोबार जुःगु दु धका महासंघं धाःगु दु।
चोभारय् जेष्ठ नागरिक भवनया शिलान्यास
शोभा श्रेष्ठ | कछलागा नवमी ११४१, मंसिर २४ बुधवाः
प्रधानमन्त्री केपी शर्मा ओलीं देशय् हाकनं राजनीतिक समस्या हयेगु कुतः जुयाच्वंगु दु धका धयादीगु दु। किपूया सुन्दरीघाट चोभारय् ‘शान्ति सुद्धम्मावासा’ जेष्ठ नागरिक आवास गृहया शिलान्यास यानादीसे सत्य स्वया स्वार्थ अप्वो जुयावःगु व उकिइ शान्ति कायम याये जुइ मफइ मखु धका धयादीगु खः ।
‘झी नेपाःमिपि बुद्धया अनुयायी खः, झीपि न्ह्यावलय् न स्वार्थी मजुसे सत्यया पुजारी जुइमाः’– धका वयकलं धयादीगु खः। वःगु इलय् देशय् अशान्ति अप्वोया वःगुयात इंकित यासे वयललं नेपाली समाज पद भ्रष्ट जुइत स्वया च्वंगु धका धयादीगु खः।
नेकपा विप्लब समुह न मोरङ मिक्लाजुङया शिक्षक राजेन्द्र श्रेष्ठयात डकैती शैलिइ स्याःगु धका धयादीसे अज्याःगु गतिविधि याइपिन्त सरकारं गु न हालतय् माफी बिइ फइ मखु धका धयादीगु खः ।
नेपाःया लिपाःगु इलय् राजनीति अवस्था स्यना वनाच्वइगुलि वयकलं–‘आः पंखा चले याना वाःफये वकेगु कुतः जुयाच्वःगु धका धयादीसे, अज्यागु कुतः सफल जुइ फइ मखू। पार्टी खनेदुगु अन्तरविरोधप्रति लक्षित यासे वयकलं पंखा चले याना वाःफये वइ मखु धका धयादीगु खः।
वयकलं नेपाः बुद्धभुमी जक मखु बुद्धदर्शनया मुहान खः धका धयादीसे–शान्ति, मेलमिलाप व एकताया प्रतिक बुद्धया वाणीपाखे नेपाल विश्वया हे शान्तिभुमी खः धका धयादीगु खः।
ज्याझ्वलय् न्ववादीसे किपू नगरपालिकाया मेयर रमेश महर्जनं न्ह्यदँया कुतलं थुगु भवन निर्माण जुइ त्यःगु धका धयादीगु खः । वयकलं नगरपालिकां भवन निर्माणय् ग्वाहालि यायेगु धका न धयादीगु खः। ज्याझ्वलय् विहारया प्रमु्ख नाप परियोजना प्रमुख डा अनुजा गुरुमा न करिब ३० करोड लागतय् निर्माण यायेगु उद्देश्य थुगु भवन दयेके त्यनागु धका धयादीसे थकिइ सकसिगु ग्वाहालि दइ धका धयादीगु खः।
उगु ज्याझ्वलय् प्रम ओली व वयकया जहान राधिका शाक्य व शहरी विकासमन्त्री कृष्णगोपाल श्रेष्ठ न भुमीपुजा यानादीगु खःसा संघनायक बोधिसेन महास्थवीरया उपस्थिति दुगु खः।
प्रम ओलीया जहान राधिका शाक्यं जेष्ठ नागरिक भवन निर्माण यायेत ५ लाख रुपिया ग्वाहालि न यानादीगु खः।
