Display Style:
Column Style
स्वािनगः दुने ६४५म्हेसित कोरोना पुष्टि
शोभा श्रेष्ठ | कछलाथ्व चतुर्दशी ११४१, मंसिर १४ आइतवाः
वःगु २४ घण्टाया दुने स्वनिगलय् ६४५ म्हेसित कोरोना संक्रमित थपे जूगु दु ।
संक्रमित जूपि २८५ म्ह मिसापि व ३६० म्ह मिजंपि धका स्वास्थ्य तथा जनसंख्या मन्त्रालयं जानकारी बिःगु खः।
थौं येँ जक ४८५ म्हेसित कोरोना सक्रमण जूगु दु धका मन्त्रालयं धाःगु दु।
अथेहे ख्वपय् ३६ म्ह व यलय् १२४ म्हेसित कोरोना संक्रमितपि थपे जूगु दु।
कोरोना २४ घण्टाय् २५म्ह मन्त
शोभा श्रेष्ठ | कछलाथ्व चतुर्दशी ११४१, मंसिर १४ आइतवाः
कोरोना भाइरस संक्रमणं वःगु २४ घण्टाय् २५ म्ह सीगु दु।
स्वास्थ्य तथा जनसंख्या मन्त्रालयं थौं आइतवाः बिःगु जानकारी कथं आःतक सीपि १४७९ म्ह थ्यःगु दु ।
अथेहे १२५५ म्ह कोरोना संक्रमण पुष्टि जुगु दु सा १४०४ म्ह कोरोनामुक्त जुगु दु धका मन्त्रालयया प्रवक्ता डा जागेश्वर गौतम धयादीगु खः।
आःतक संक्रमितपि २ लाख ३१ हजार ९७८ म्ह थ्यःगु दु ।
देय्यकं सक्रिय संक्रमितपि १७ हजार ९०९ म्ह दु ।
आःतक पीसीआर विधिपाखे १७ लाख २७ हजार ८३६ म्हेसित परीक्षण याये धुकुगु दु ।
क्वारेन्टाइनय् च्वनाच्वपि ६३२ म्ह दु ।
थप १२५५ म्हेसित कोरोना सक्रमण
लहानान्युज | कछलाथ्व चतुर्दशी ११४१, मंसिर १४ आइतवाः
वःगु २४ घण्टाया दुने थप १२५५ म्हेसित कोरोना भाइरस (कोभिड(१९) या संक्रमण पुष्टि जूगु दु ।
देय् यकं प्रयोगशालाया ८ हजार ८म्हेसिगु नमुना परीक्षण यागुलि उलि संक्रमण पुष्टि जूगु खः ।
थ्व नाप आःतक संक्रमितपिनिगु ल्याः २ लाख ३१ हजार ९७८ म्ह थ्यःगु दु ।
उकि मध्ये २ लाख १२ हजार ५९० म्ह संक्रमणमुक्त जुया छेँ लिहावने धुकुगु दु ।
अथेहे १४७९ म्ह सी धुकुगु दु धका स्वास्थ्य तथा जनसंख्या मन्त्रालयं धाःगु दु।
झिगु संस्कृति, जात्रापर्व संयमित जुया हनेमा : शताब्दीपुरुष जोशी
लहानान्युज | कछलाथ्व चतुर्दशी ११४१, मंसिर १४ आइतवाः
वाङ्मय शताब्दी पुरुष सत्यमोहन जोशीं कोरोना भाइरसया महामारीया इलय् झिगु संस्कृति, जात्रापर्व संयमित जुया हनेमा, धयादिगु दु । ‘थयागु महामारीयात हल्का कथं कायमज्यु । करं याय् मागु जात्रापर्वत विधि पूवंका ‘सर्टकर्टं क्वचाय्केमा । थुसिया कात्तिक प्याखँ निन्हु जक मञ्चन याना सिधय्कल, थ्वः बांलागु दसु खः– शताब्दी पुुरुष जोशीं धयादिल ।
नेवाः पत्रकार राष्ट्रिय दबु कोभिड १९ सचेतना कमिटीं शनिवाः फेसबुक लाइभ ज्याझ्वःया २५ ब्वः थ्यंगु लसताय् शताब्दी पुरुष सत्यमोहन जोशीनाप खँल्हाबल्हा यागु खः । हलिंयात आक्रान्त यागु कोरोना भाइरसया संक्रमण तब्यानां वंगुलिं पत्रकार दबूपाखेँ थ्वः महामारीबारे सर्वसाधारणतय्त सूचं बिगु लिसेँ, सचेत याय्त प्रजित शाक्यया संयोजकत्वय् कोभिड १९ सचेतना कवः गठन जुगु खः । थ्वः कमिटीइ दुजलय् रचना श्रेष्ठ, मिना वज्राचार्य, तेजनाराण महर्जन, अनूप प्रधान व हसना लवजूपि खः।
नेवाःतयसं थः मातृभाषं खल्हाय्गु म्हो जुया वंगुलि नं शताब्दी पुरुष जोशीं चिन्ता प्वंकादिगु दु। नेपाल भाषा निरन्तर जुइमाल । सच्छिमध्ये स्वीन्याम्ह नेवाःतय्स नेवाः भाय् नमवाय् धुंकल । थः मस्तय्त ‘बेसिक’ खँ सां स्यनेमाल । झिगु नखःचखः, जात्रापर्व बारे ज्ञान बिमाल । मखुसा झिगु भाषा नं संस्कृत व पालि भाषा थेँ मृतभाषा जुइफू– वयकया धापू दु ।अथेहे नेपाःया तथ्याङ्क विद्या म्हसिकानं दुम्ह जोशीं २०७८ सालया जनगणनाय् यथार्थ विवरणया लागि झी नेवाः त हे सचेत जुइमा धयादिल ।
अथेहे दबूया नायः सुरजवीर वज्राचार्यं कोभिड १९ सचेतना कवया ज्याझ्वया २५ ब्वःया ‘माइलस्टोन’या लसताया खँ खः धयादिसेँ निरन्तरताया कामना यानादिल ।
चीनया रक्षामन्त्री नेपाः थ्यन
लहानान्युज | कछलाथ्व चतुर्दशी ११४१, मंसिर १४ आइतवाः
नेपाल भ्रमणय् वःम्ह चीनया राज्यपरिषद् सदस्य नाप रक्षामन्त्री वेइ फेङ्हे नेपाली सेनाया जंगी अड्डा निरीक्षणया लागि थ्यःगु दु।
भद्रकालीया जंगीअड्डा थ्यःगु इलय् नेपाली सेनाया छगु टोलीं सम्मान गारद अर्पण याःगु दु ।
रक्षामन्त्री फेङ्हे २१ सदस्यीय प्रतिनिधिमण्डलया नेतृत्व यासे विशेष विमानपाखे थौ येँ वःगु खः । उगु प्रतिनिधिमण्डलय् जनमुक्ति सेनाया उच्च अधिकारीतक दुगु खः ।
थां आइतवाः हे राष्ट्रपति विद्यादेवी भण्डारी व रक्षा मन्त्रालयया समेत कार्यभार सम्हालेयाना च्वम्ह प्रधानमन्त्री केपी शर्मा ओली नाप अलग्ग अलग्ग हे शिष्टाचार भेटघाट नाप प्रधानसेनापति पूर्णचन्द्र थापानाप द्विपक्षीय वार्ता याइगु ज्याझ्वः दु।
किपा प्रविन महर्जन
