Display Style:
Column Style
शिक्षा समितिं पाठ्यक्रम अनुमोदन यात
गुंलागा ६ ११४०,साउन २५ आइतवाः
नेपालभाषा पाठ्यक्रम निर्माण समितिं छगू तगिं निसें च्यागू तगिं तकया नेपालभाषा पाठ्यक्रमयात बैधानिक रुपं मान्यता बिइगु नितिं शिक्षा समितियात लःल्हाःगु दु । शिक्षा समितिं उगु पाठ्यक्रम लागू यायेत अनुमोदनं याये धुंकूगु खँ निर्माण समितिं जानकारी ब्यूगु खः ।
पाठ्यक्रमयात स्तरीय जुइक निर्माण यायेगु झ्वलवय् दकले न्हापां शिक्षा नापं मेमेगु क्षेत्रय् ज्या याना च्वंपिं थीथी खलःपुचः लिसें आवश्यकता पहिचान यायेगु ज्या याःगु खः ।
अथेहे निगूगु चरणय् आवश्यकता पहिचानयात विस्तृत रुपं पाठ्यक्रम तयार यानाः प्रवोधीकरण यायेगु ज्यानं याःगु खः । निगूगु चरणं वःगु सुझावकथं स्वंगूगु चरणय् अन्तिम रुप वियाः पित ब्वज्या यायेया नितिं विज्ञतय्गु पुचः दथुइ सहलह ज्या पूवंके धुंकूगु दु ।
येँ महानगरपालिका शिक्षा समितिपाखें स्थानीय विषय नेपालभाषा पाठ्यक्रम तगिं १–८ तकया पाठ्यक्रम निर्माण समिति नीस्वंगु खः ।
उगु समितिइ प्रा.डा.चुन्दा बज्राचार्य, पूर्व प्रधानाध्यापक बरुणप्रसाद वैद्य, प्रा.मदन रत्न मानन्धर व नरेशवीर शाक्य नापं सदस्यसचिव मोती राज खनाल दुथ्याःगु खः ।
येँ महानगरपालिकाया उप मेयर हरिप्रभा खड्गीया संयोजकत्वय् सफू पिथनेगु व स्यनामि ल्ययेगु निगू समिति नीस्वने धुंकूगु नं जानकारी ब्यूगु दु ।
पोखराय् कोरोना संक्रमित छम्ह मन्त
लहनान्युज | गुंलागा ६ ११४०,साउन २५ आइतवाः
पोखराय् वासः याका च्वम्ह छम्ह मिजंम्ह कोरोना संक्रमित सीगु दु ।
पोखरा स्वास्थ्य विज्ञान प्रतिष्ठान अन्तर्गत कोभिड–१९ वासः याका च्वम्ह पोखरा महानगरपालिका–१९ ६२दँया मिजम्ह म्हिगः ११ः३५ मदुगु दु ।
उम्ह मनू साउन १७ गते अस्पताल याःगु खः । आईसीयूलय् तया वासः याका वयाच्वम्ह खः । उम्ह मनू चिनी ल्वय् दुम्ह खः ।
पोखरा स्वास्थ्य विज्ञान प्रतिष्ठानय् कोरोना संक्रमितम्ह सीइगु थ्व स्वम्ह म्ह खः ।
देय् यकं कोरोना संक्रमणपि ल्याः आः ७४ म्ह थ्यःन ।
पिसिआर कोरोनाया वासः मखूगु मेयर शाक्यया धापू
नृपेन्द्रलाल श्रेष्ठ | गुंलागा पञ्चमी ११४० (२०७७ साउन २४) शनिबाः
येँ महानगरपालिकाया प्रमुख विद्यासुन्दर शाक्यं आःया संक्रमणया इलय् आम सर्वसाधारण थः हे सचेत मजुइगु खःसा सरकारं याये धयां नं कोरोना नियन्त्रण याये मफइगु धयादीगु दु ।
येँय् जूगु छगू ज्याझ्वलय् नवासें कामपा प्रमुख शाक्यं पिसिआर परिक्षण यायेमाल धकाः अनसन च्वनाः हुलमुल याःबलय् बरु व हे हुलं संक्रमण न्यनीगु खतरा अप्वःगु धयादिल ।
पिसिआर परिक्षण थकायेवं तुं संक्रमण नियन्त्रण जुइगु मखसें सरकारं जारी याःगु स्वास्थ्य मापदण्ड पालना यायेगुया विकल्प मदुगु वयकःया धापू खः । कोरोना संक्रमणया वासः मखूगु धयादीगु दु ।
‘पीसीआर परिक्षणय् प्रति व्यक्ति १०द्वः तका खर्च जुइ, परिक्षणयात माःगु सकतां ज्वलं विदेशं हयेमाः,’ मेयर शाक्यया धापू खः । ‘आः थन पीसीआर यानाः झी गनं वन व अन हे संक्रमितया स्वापुतिइ वल धाःसा कोरोना पुनेफु ।’
लकडाउनया इलय् स्वनिगलय् दुमकाः धकाः याःगु आलोचना लुमंकुसें मेयर शाक्यं लाःथेपाथे मनूत स्वनिगः दुकायेबलयया लिच्वः आः खनेदयाच्वंगु धयादिल ।
पिनं मनूत दुकाःबलय् थन संक्रमण अप्वयावंगु व थज्याःगु इलय् जुलुस पिकायेगु ज्या जूबलय् व हे जुलुसं संक्रमण न्यनीगु ग्याःचिकु नं अप्वःगु वयकलं धयादिल ।
उगु ज्याझ्वलय् शाक्यं येँ महानगरपालिका वडा नम्बर २५ या श्रीघःस्थित धर्मकीर्ति विहारय् वौद्ध परियति शिक्षाया विद्यार्थीयात सिरपाः लःल्हानादीगु ख ।
उगु इलय् मेयर शाक्यं येँ नगर दुने दुगु बुद्ध विहारया मुल भवन, लुम्बिनीया वज्रयान महाविहार, जनबहाःद्यःया दिगिछेँ, स्वयम्भूस्थित भजनछेँ नापं दुगु विहार, स्वयम्भूस्थित आनन्दकुटी विहार, किम्डोलस्थित आनन्दभुवन विहार, वानेश्वरस्थित अन्तर्राष्ट्रिय बौद्ध भावना केन्द्र दयेकेत ग्वाहालि यानाच्वनागु जानकारी नं बियादिल ।
येँ महानगरपालिकां उगु विहारयात वौद्ध परियति शिक्षाया लागिं ५ लख तका ग्वाहालि याःगु खः ।
औपचारिकता जक पूवंकुसें यलय् नृसिंह जात्रा क्वचाल
शिवेश शर्मा | गुंलागा पञ्चमी ११४० (२०७७ साउन २४) शनिबाः
कोरोना महामारी व संक्रमणया जोखिम दथुइ यलय् औपचारिकता जक पूवंकुसें यलय् नृसिंह जात्रा (उपाकलं सायाः) क्वचाःगु दु ।
यलया द्यःब्रम्हू राजोपाध्यायतय् उपाकर्म गुथिपाखें न्ह्याकावःगु उपाकलं सायाः थौं साधारण किसिमं नृसिंहलिसें लक्ष्मी सरस्वती अले प्रल्हादयात नगर परिक्रमा याकुसें क्वचाःगु खः ।
अप्सरागण, भजन खलः, धिमेय् पुचः आदि थुगुसी छुं हे मतःसे द्यःगणपिं जक यलया सायाः रुटय् चाःहिकूगु खः ।
उपाकर्म गुथि यलया दुजःपिनि दथुइ ज्येष्ठताया आधारय् पाः बियाः न्ह्याकीगु जात्राया थुगुसीया पाः मदुम्ह कुमारधर शर्मायागु खः । पाःवाला शर्मा मदयावंगुलिं वयकःया काय् शौरभकुमार शर्मां जात्रा न्ह्याकूगु खः ।
पाः लाःम्हेसिया छेँय् नं जात्रा पिकयाः अन हे क्वचायेकेगु परम्परा कथं पाःलाःम्ह शर्माया छेँय महाःद्यःननिइ जात्रा पिकयाः यलया सायाः रुट चाःहिकाःलि महाःद्यःननिइ हे जात्रा क्वचायेकूगु खः ।
संक्रमणया जोखिमयात ध्यानय् तयाः द्यःया दर्शन याकेबीगु व थायथासय् पूजा कायेगु ज्या नं थुगुसी मजू ।
जात्राय् भीड नियन्त्रण यायेत च्वंपिं स्वयमसेवतयसं नं पिपिई, मास्क, पञ्जालिसेंया सुरक्षाया उपाय ल्यूगु खः ।
थुगुसी जात्रा हे जुइला मजुइला धइगु अलमलया दथुइ सरकारपाखें जात्रापर्व न्ह्याकेत निर्देशिका जारी जूगुलिसें उगु हे निर्देशिकायात लिनाः जात्रा याःगु खः ।
थुगु जात्रा सुथांलात कि देशय् प्राकृतिक प्रकोप, महामारी आदिं दुःख मजुइगु जनविश्वास दु ।
न्हापा श्रीधर नारायणया जात्रा न्ह्यानावःगुलिइ दथुइ छुं कारणं उगु जात्रायात दिकाः नृसिंहया जात्रा न्ह्याकूगु धयातःगु दु ।
ताःई न्ह्यवःनिसें न्ह्यानावःगु धयातःगु थुगु जात्राया लिखित ईतिहास धाःसा सिद्धिनरसिंहया शासनकालनिसेंया जक लूगु दु ।
३७८ म्ह कोरोना संक्रमण पुष्टि
लहनान्युज | गुंलागा ५ ११४०,साउन २४ सनीवाः
वःगुु २४ घण्टाय् ३७८म्हेसित कोरोना भाइरस (कोभिड(१९) या संक्रमण पुष्टि जूगु दु । देय् यकं याःगु प्रयोगशालायय् ७ हजार ७८८ म्हेसिगु नमुना परीक्षणय् ३७८ म्हेसित संक्रमणया पुष्टि जूगु खः ।
थ्व नाप कुल संक्रमितपि २२ हजार ५९२ म्ह थ्यःगु दु । उकि मध्ये ७३ म्ह सी धुकुगु दु । अथेहे १६ हजार ३१३म्ह वासः याका छेँ लिहा वने धुकुगु दु ।
थौं येँ ६२म्ह, यल व ख्वपय् स्वम्ह स्वम्हेसित संक्रमण पुष्टि जूगु दु ।
अथेहे पर्साय् ५५म्ह, बाँकेय् ४९म्ह, मोरङय् ३७म्ह, सर्लाहीइ ३६ म्ह, धनुषाय् २० म्ह, महोत्तरी १७ म्ह, बाग्लुङय् १३ म्ह, सुनसरी १० म्ह, काभ्रे, स्याङ्जा व बाराय् न्ह्य न्ह्यम्ह व मकवानपुरय्
खुम्हेसित संक्रमण पुष्टि जूगु अः ।
रामेछाप न्याम्ह, रौतहट, कञ्चनपुर व कैलालीइ प्यम्ह प्यम्ह, यल, ख्वप, कास्की, सुर्खेत, बझाङय् स्वम्ह स्वम्ह, चितवन, सिन्धुली, धादिङ व दोलखाय् निम्ह निम्ह नाप नुवाकोट, म्याग्दी, रुकुम पश्चिम, बर्दिया व जाजरकोटय् छम्ह छम्हेसित संक्रमण पुष्टि जूगु धका स्वास्थ्य तथा जनसंख्या मन्त्रालयं धाःगु खः ।
