Display Style:
Column Style
बुंगद्यःया रथ सालः
लहनान्युज | ञंलागा १ ११४०,भाद्र १८ बिहीवाः
ताः ई न्ह्यःनिसें अन्योलय् लानाच्वंगु बुंगद्यःया रथ स्थानीयपिन्स सालेगु ज्या आः याःगु दु ।थौ बुंगद्यःया रथ सालेमाः धका यलया पुच्वःय् धर्ना बिवःपि स्थानीयतय्सं हे रथ साःगु खः ।
बुंगद्यःया जात्राया बारे निर्णय यायेत सरोकारवाला पक्षपि मुँज्या च्वनेत्यंगुलिं जात्रा संचालन यायेमाः धकाः स्थानीयतपिन्स थौं सुथंय् पुच्वःय् धर्ना बिवःगु खः ।
निवाः लिपा मनमास क्यनीगु व मनमासया इलय् रथ सालेमज्यूगुलिं स्थानीयपिन्स धर्नाय् च्वनाच्वंगु खः ।
धर्ना च्वनाच्वंगु इलय् हे स्थानीयपिन्स रथ सालेगु कुतः याःगु खः ।
सरकार याना वयाच्वंगु ज्याया अनुगमन याइगु
शोभा श्रेष्ठ | ञंलागा १ ११४०,भाद्र १८ बिहीवाः
शिक्षा तथा स्वास्थ्य समिति अन्तर्गत गठन जूगु कोभिड–१९ या सम्बन्धय् सरकार याःगु ज्याया अनुगमन यायेत गठन याःगुस उपसमितिया बैठक माननीय जीवनराम श्रेष्ठया संयोजकत्वय् निगु निर्णय याःगु दु ।
उगु निर्णयु कथं छगु शिक्षा तथा स्वास्थ्य समितिया भाद्र ९ गते च्वंगु भर्चुअल बैठकपाखे कोरोना भाईरस (कोभिड १९) पिसिआर परिक्षण रिपोर्ट गुलिफु उलि याकन सम्वन्धीत मनूयात उपलव्ध यायेगु निर्देशन बिइगु । आःतक प्रगति जुगु खने मदुगु संक्रमितपिनिगु म्हसिका सम्वन्धित मनूयात समुदायपाखे अलग तया आईसोलेशनय् तयेगु ज्या व्यवस्थित यायेमाःगुलि पिसिआर टेष्ट याये धुका रिपोर्ट मवःतले छेँय् हे क्वारेन्टीनय् च्वनेगु ब्यवस्था मिले यायेगु ।
अथेहे मगु निर्णय कोरोना भाईरस (कोभिड १९) या सम्वन्धय् जुया च्वंगु ज्याय् स्थलगत अध्ययन अवलोकन यायेत कोभिड १९ ल्याब टेष्ट नाप सम्वन्धीत पदाधिकारीपिनिगु व उद्योग बाणिज्य तथा आपूर्ति नाप सम्वन्धीत प्रतिनिधि, जनस्वास्थ्यया पदाधिकारीपि नाप येँ यल व ख्वपया प्रमुख जिल्ला अधिकारीपि व उपत्यका नगरपालिका फोरमया प्रतिनिधिपि, स्वास्थ्य परिषद लगायतया पदाधिकारीपि नाप सहलह याना स्थलत अनुगमन यायेगु ।
कन्ह्य निसे खाद्य पसः ११ बजे तक चायेके दइ
लहनान्युज | ञंलाथ्व १५ ११४०,भाद्र १७ बुधवाः
स्वनिगलया स्वगूगु हे जिल्लाय् निषेधाज्ञा छवाःया लागि थप याःगु दु, तर वःगु निषेधाज्ञाय् स्वया छु भचा कम याःगु दु ।
येँ यल व ख्वप जिल्लाया प्रमुख जिल्ला अधिकारीपिनिगु मंकाः मुँज्यां थ्व हे वइगु भदौ २४ गते चान्ह्य तक लागू जुइ कथं निषेधाज्ञाया आदेश जारी याःगु दु ।
निषेधाज्ञा न्हापा स्वा छु भचा फरक याःगु दु । आः निषेधाज्ञाय् सुथय् ११ बजे निसे खाद्यवस्तु, दुरु व दूधजन्य पदार्थ, फलफूल, तरकारी, ला पसः चायेके दइ । वासः पसः व लः पसः न्हिच्छि चायेक दइ ।
अथेतु विकास निर्माणनाप सम्बन्धित पसः न्हिनय २ निसे बहनि ९ बजे तक चायेके दइ । चिहाकःगु दूरीइ ढुवानीया लागि प्रयोग जूइगु सवारी साधन न न्हिनय् २ निसे ९ बजे तक चले याये दइ ।
निषेधाज्ञाया इलय् थ्व स्वया न्ह्य तःगु प्रतिबन्ध टेक अवे व उपभोग्य वस्तुया होम डेलिभरी सेवा याये दइ जुगु दु । होम डेलिभरी सेवाया मापदण्ड धाःसा जिल्ला प्रशासन कार्यालयं याकन हे जारी याइ । होम डेलिभरी व टेक अवे सेवा बिइम्ह मनूयाःगु पीसीआर परीक्षणय् रिपोर्ट नेगेटिभ वयेमाः व उमिसं नाप लाइपि मनू तयेगु अभिलेख तयेमाः ।
निषेधाज्ञाय् राष्ट्रिय प्राथमिकता लागु आयोजनाया निर्माणय् ज्याय् सञ्चालन याये दइ । तर थज्यागु आयोजनाया कामदार व कर्मचारीपिन्त आयोजनास्थल हे क्वारेन्टिनय् तयेमाः ।
आ अत्यावश्यक ज्याया लागि स्वनिगलय् दुहा वयेत पीसीआर रिपोर्टय् कोरोना संक्रमण मजुगु पुष्टि जुइमा ।
हवाई उडानपाखे विदेश वनिपिनिगु पासपोर्ट, भिसा, स्वीकृत हवाई टिकट दुपिन्त तपिक एयरपोर्ट वनेगु सवारी साधन चले याये दइ । तर पीसीआर परीक्षण सुविधा मदुपिन्स येँ सुरक्षित रुपं च्वनेगु थाय् सुनिश्चितता व सम्बन्धित जिल्ला प्रशासन कार्यालयया सिफारिस अनिवार्य पेश यायेमाः ।
कोरोना संक्रमितपिनिगु ल्याः अप्वोया वगुलि भदौ ३ गतेनिसे स्वनिगलय् छवाःया लागि निषेधाज्ञा तगु खः । वया लिपा भदौ १० निसे १७ तक थप याःगु खः । आः स्वक्वःगु पटक हाकन निषेधाज्ञा छवाया लागि थप याःगु खः ।
कोरोना संक्रमणं थप १२म्ह मन्त
लहनान्युज | ञंलाथ्व १५ ११४०,भाद्र १७ बुधवाः
वःगु २४ घण्टाय् नोभेल कोरोना भाइरसया संक्रमणपाखे थप १२ म्ह मन्त ।
स्वास्थ्य तथा जनसंख्या मन्त्रालयया प्रवक्ता डा. जागेश्वर गौतमया कथं वःगु २४ घण्टाय् कोरोना संक्रमणपाखे सीपि खुम्ह मिसा व खुम्ह मिजंपि मदुगु दु।
थौं मदुपि चितवनया ५५ व १८ दँदुपि मिसा, येँ ८९ दँ दुम्ह, यलया ७० दँ, तनहुया २०दँ, कपिलवस्तुया ६०दँ दुपि खः।
अथेहे बाराय् ९७ दँ, चितवनया ६५ दँ, ख्वपया ४० दँ, येँया ७० व ७५ दँ व धादिङया ४७ दँ दुम्ह कोरोना संक्रमणं मदुगु खः।
आःतक कोरोना संक्रमणं सीपि २५१ म्ह थ्यःगु दु।
स्वनिगः दुने छवाःया लागि निषेधाज्ञा थपे जुल
लहनान्युज | ञंलाथ्व १५ ११४०,भाद्र १७ बुधवाः
स्वनिगः दुनेया लागि जारी जुया च्वंगु निषेधाज्ञा छवाः थपे याःगु दु । गृह मन्त्रायलनाप सहलह लिपा स्वनिगःया दुने स्वम्ह जिल्ला अधिकारीपिन्स निषेधाज्ञा थपे यायेगु निर्णय याःगु दु ।
तर, आः छु भचा सेवाय् सञ्चालनया लागि छुट बिइत्यःगु दु ।
वासः, खाद्यवस्तु व अत्यावश्यकीय वस्तु न्यायेगु लागि थ्व स्वया न्ह्य न रोक याःगु मदु । अय्न, छेँय् न पिहा वयेत मास्क अनिवार्य तयेमाः धका धाःगु दु ।
नियमित सेवा प्रदान यायेमाःपि कर्मचारी सुथय् ९ बजेनिसे १०ः३० बजे तकव न्हिन ३ः३० निसे ५ बजे तक वये वने धाःगु दु ।
होटल, रेष्टुरेन्ट, बँ पसः आः न बन्द याःगु दु । बैंक लगायतया निकायया न्यूनतम कर्मचारी तया स्वास्थ्य सुरक्षाय् मापदण्ड पालना याना सेवा बिइ फइ धका धाःगु दु ।
स्वनिगलय् कोरोना भाइरसया संक्रमण अप्वोया वःगुलि स्वगू हे प्रमुख जिल्ला अधिकारीपिन्स भदौ ३ गतेनिसे छवाःया लागि निषेधाज्ञा आदेश जारी याःगु खः ।
तर, १० भदौमा पुनः न्ह्यन्हु या लागि निषेधाज्ञा तःगु खः उगु थौं क्वचायेत्यःगु खः ।
