वःगु २४ घन्टाया दुने नेपालय् थप १९१३ म्हेसित कोरोना संक्रमण पुष्टि जूगु दु धका स्वास्थ्य तथा जनसंख्या मन्त्रालयं धाःगु दु।

मन्त्रालयया कथं  थौं बिहीवाः थपे जुपि नापयाना आःतक कोरोना संक्रमितपि नेपालय् २ लाख ४२४२ म्ह थ्यःगु दु। वःगु २४ घण्टाया दुने १० हजार २२ म्हेसिगु पीसीआर परीक्षण याःगु दु।

थ्व नाप आःतक पीसीआर विधिपाखे १५ लाख ८४ हजार २१७ म्हेसिगु परीक्षण याये धुकुगु दु धका मन्त्रालयले धाःगु दु। वःगु २४ घन्टाया दुने कोरोनामुक्त जुपि २३४९ म्ह डिस्चार्ज जुगु दु।

थ्व नाप आःतक नेपालय् आःतक कोरोनामुक्त जूपि १ लाख ६४ हजार ५९२ म्ह थ्यःगु दु।

अथेहे नेपालय् आःतक सक्रिय संक्रमितपि ३८ हजार ४६१म्ह दु। 

वःगु २४ घण्टाया दुने स्वनिलय् थप ९७३ कोरोना संक्रमित खनेदुगु धका स्वास्थ्य तथा जनसंख्या मन्त्रालयं धाःगु दु।

बिहिवाः संक्रमित पुष्टि जूपि ४२८ मिसा व ५४५ म्ह मिजंपि खः।

थौं येँ जक ७६४ म्हेसित कोरोना सक्रमित जुगु धका मन्त्रालयं जानकारी बिःगु खः।

अथेहे ख्वपय् ८३ म्ह व यलय् १२६ म्हेसित कोरोना संक्रमित जुगु दु।

थौं देय् यकं १९१३ म्हेसित कोरोना सक्रमित जुगु दु। 

सरकारं नेवाः समुदायपिन्स हना वयाच्वंगु स्वन्ति नखःया ध्याना तया किजा पूजाया दिं मंसिर २ गते सार्वजनिक बिदा बिइगु निर्णय याःगु दु।

मन्त्रिपरिषदया कात्तिक २४ गतेया मुज्यां सार्वजनिक बिदा बिइगु निर्णय याःगु खः। गृह मन्त्रालयं छगू विज्ञप्ति जारीयासें देय न्यकं उगु दिं सरकारी कार्यालय, सार्वजनिक निकाय, संघ,संस्था, शिक्षण संस्था बिदा जुइगु खँ धाःगु दु।

कोभिड–१९ संकट व्यवस्थापन केन्द्र (सीसीएमसी) निर्देशक समितिया संयोजक नाप उप–प्रधानमन्त्री ईश्वर पोखरेल वं उपत्यका नगरपालिका फोरमया पदाधिकारी–सदस्य दथुइ प्रधानमन्त्री कार्यालय सिंहदरबारय् सहलह जुगु दु। छु दिं न्ह्यःनिसे स्वनिलय् अप्वोया वयाच्वंगु कोरोना संक्रमण व वयागु रोकथाम–नियन्त्रणय् यायेगु विषयय् सहलह केन्द्रित जुगु उपत्यका नगरपालिका फोरमया सचिव नाप मध्यपुर ठिमी नगरपालिकाका मेयर मदन सुन्दर श्रेष्ठं जानकारी बिःगु दु।

‘लिपागु इलय् स्वनिगलय् अप्वोया वयाच्वंगु कोरोना संक्रमणया रोकथाम गये याना याये फइ धइगु विषयय् केन्द्रित जुया सहलह जुगु धका,’ श्रेष्ठं धाःगु दु।मेयर श्रेष्ठ स्वन्ति, छठ लिपा कोरोना संक्रमण चक्र तोडे यायेगु कथं प्रभावकारी पला ल्ह्वनेगु विषय सहलह जुगु जानकारी बियादिगु खः। उकिया लागि संघ, प्रदेश व स्थानीय तह समन्वय याना न्ह्यने वनेगु धइगु विषय प्रभावकारी कथं सहलह जुगु धका धयादिगु दु।

उगु बैठकय् उपप्रधानमन्त्री पोखरेल, गृहमन्त्री रामबहादुर थापा, स्वास्थ्यमन्त्री भानुभक्त ढकालं उपत्यकाया मेयरपि नाप समन्वय याना न्ह्यने वनेत इनाप यानादिगु खः। लिपागु इलय्  देय् यकं पुष्टि जुपि संक्रमणपिनिगु तथ्याङ मध्ये करीब ५३ प्रतिशत स्वनिगलय् जुया वयाच्वइगु दु। स्वनिगलय् कोरोना रोकथाम व नियन्त्रणय् प्रभावकारी पलाः ल्ह्वने माःगु धारणा सीसीएमसीपाखे खँ ल्ह्वःगु खः।

आपुर्ति व्यवस्था सहज दयेकेगु, कोरोनाया निक्वगु तरङ्ग वयके मबिइत प्रभावकारी कुतः याये माःगु, समूदायया परिचालन याये माःगु, स्वनिगलय् कोरोनाया प्रभाव कम यायेत स्वनिगलय् दुहावयेगु थीथी नाकाय् हेल्थ डेक्स तये माःगु विषय बैठकय् न्ह्यसः ब्बलःगु खः। स्थानीय तहपाखे प्रभावकारी रुपं जनचेतना मुलक ज्या यायेगु, स्थानीय तह परिचालित याना घरदैलो ज्या यायेगु लगायतया विषय सहलह जुगु खः।

अथेहे कोरोना संक्रमितपिनिगु मृत्युु दर घटे यायेगु, सामान्य लक्षण खनेदुपि संक्रमितपिन्त फयाफतले होमआइसोलेसन व गम्भीर विरामीपिन्त जक अस्पताल यंकेयेगु विषयय् दक्को स्थानीय तहपाखे समन्वय यायेगु विषय सहलह याना वनेयेगु धका मेयर श्रेष्ठं जानकारी बियादिगु खः।

गोर्खाली व किपू फौज दथुइ (१८१४ निसे १८२२ तक स्वक तक ) युद्ध जुगु ऐतिहासिक थाय् किपूलि ‘युद्ध स्मारक पार्क’ निर्माण जुया च्वंगु दु। करिब २६२ दँ न्ह्यः हताः जुगु खनेदइगु कथं किपू नगरपालिकां येँ महानगरपालिकाया आर्थिक ग्वहालि करिब ५४ रोपनी क्षेत्रफलय् पार्क निर्माणया ज्या न्ह्या वनाच्वंगु दु। आः पार्क निर्माणया ज्या न्ह्याना वयाच्वंगु दु।

नेपाः एकीकरण अभियानया झ्वलय् पृथ्वीनारायण शाह नं किपूलि पटक–पटक आक्रमण याःगु इतिहास दु । ‘ढाल व तरबार सहित पृथ्वीनारायण शाह, कालु पाण्डेसहितया गोर्खाली सेनां किपूलि स्वक तक आक्रमण याःगु, घमासान युद्ध जुगु खः। उगु युद्ध किपूवासीया लागि गर्विलो इतिहास जुगु खः,’ किपू नागरपालिकाया मेयर रमेश महर्जनं अथे धयादिगु खः, ‘थुगु युद्ध पार्कय् इतिहास जक मखु, नेवाः तयेगु कला व संस्कृति खने दइगु मूर्ति व संग्राहलय न निर्माण यायेगु योजना ।’ मेयर महर्जनं युद्ध खने दइगु कथं ‘युद्ध स्मारक पार्क मुर्त–अमूर्त स्मारक तयेगु जानकारी बियादिगु खः।

उगु थासय् आःतक ३० गु स्वया अप्वो मूर्ति व स्मारक निर्माण जुइ धुकुगु दु । ‘युद्ध स्मारक पार्क’ मार्फत किपूया इतिहास जीवन्त दयेकेइगु योजना दु,’ येँ महानगरपालिकाया मेयर विद्यासुन्दर शाक्य नाप निर्माणधिन पार्क अनुगमनया लागि किपू थ्यःगुलि कालु पाण्डेया छ्य ध्यःगु व कुतु वःगु ल्ह्वः न्ह्यने पतिचा येँ क्यःगु धका महर्जन धयादिसे,’ ‘निर्माणाधिन पार्क थुगु आधार खः।’

छु दिं न्ह्यः येँ महानगरपालिकया हे आर्थिक ग्वाहालि निर्माणाधिन तारकेश्वर धामया अनुगमन यानादिसे येँ महानगरपालिकाया मेयर बिद्यासुन्दर शाक्यं युद्ध पार्क अनुगमनया झ्वलय् पार्क निर्माणया ज्या अलपत्र जुइक मयायेत इनाप याःगु खः। मेयर शाक्य वइगु बजेट न थप ग्वाहालि यायेगु प्रतिवद्धता व्यक्त प्वकादिगु खः। ‘येँ महानगरपालिका थः जक मखु छिमेकी नगरपि नाप न साझेदारी याना न्ह्यने वनेगु योजना दु धका धयादिसे, ‘हरियाली विकास, खुला क्षेत्रया संरक्षण, संस्कृति संम्पदाया संरक्षण व ऐतिहासिक–धार्मिक नाप पर्यटकीय थाय् या विकास थे जाःगु परियोजनाय् जिमिसं याना वयाच्वनागु दु धका धयादिगु खः।’

मेयर शाक्य येँ १० गु व मध्यपुर ठिमी नगरपालिकायात न थज्यागु परियोजनाया लागि ग्वाहालि यानागु खँ न कनादिगु खः। अनुगमन टोलीइ सहभागी किपू नगरपालिकाया उपमेयर सरस्वती रिजाल खड्कां बाघभैरव द्यःया थाय् पाखाय् क्यना सञ्चारकमीपिन्त येँ महानगरपालिकाया आर्थिक ग्वाहालिया कारण युद्ध पार्क निर्माण यायेगु योजना न्ह्यने वने त्यनागु जानकारी बियादिगु खः। ‘येँ महानगरपालिकाया मेयर विद्यासुन्दर शाक्ययात पार्क निर्माणया लागि आर्थिक ग्वाहालि यायेगु प्रतिवद्धता नाप अभिभावकत्व कयामदिगु जुसा थुगु पार्कया योजना न्ह्यने थ्यनि मखु धका धयादिगु खः,’ वयकलं, ‘पार्क निर्माणया लागि करिब न्ह्यगु करोड मालिइगु अनुमान यानागु दु। येँ महानगरपालिकां बिःगु छगु करोड खर्च जुइ धुकुगु दु। प्रदेश सरकार व महानगरपालिका नाप जिमिसं अझ  न ग्वाहालि याइगु अपेक्षा यानागु दु धक धयादिगु खः।’