राष्ट्रिय

Display Style:

Column Style

ख्वनाया सम्पदा ल्यंका फास्ट ट्र्याक दय्केमाः,राज्यमन्त्री रामबीर मानन्धर

नृपेन्द्रलाल श्रेष्ठ | गुंलाथ्व पारु ११४०,साउन ६ गते

थौंकन्हय् नेवाः समाजय् जक मखु, देय्न्यंक चर्चाया छगू विषय जुयाच्वंगु दु, येँ निजगढ स्वाइगु फास्ट ट्र््याक । ख्वनाया खुदोलं दय्केगु योजना दुगु फास्ट ट्र्याकया विरोध व समर्थनय् सः ताय् दयाच्वंगु दु । छखे विकास निर्माणया नामय् फास्ट ट्र्याकया नापं १३२ केभिए हाइटेन्सन लाइन, बाहिरी चक्रपथ, बागमति करिडोर, स्मार्ट सिटी, पेट्रोलियम भण्डार, काठमाडौं रेलवे लगायतका योजना हयाः थनया स्थानीय नेवाःतय्त विस्थापित याय्त राज्य जानाच्वंगु धासें विरोधया सः थ्वयाच्वंगु दु ।

थ्व हे झ्वलय् ख्वनामितय्सं खुदोल क्षेत्रय् स्वक्वःतक्क ला वा पिनाः सांकेतिक विरोध प्रदर्शन याय्धुंकूगु दु । मेखे धाःसा गुलिखे मनूतय्सं फास्ट ट्र्याकया विरोध याय्मज्यूगु व विकासयात पनेगु विकास विरोधी ज्या धकाः ख्वनामितय्गु आलोचना नं यात । छम्ह नेतां ला ख्वनामितय्सं विरोध यानाः फास्ट ट्र्याकया ज्या पनातःसा अनसन च्वनेगु तकंया ख्याच्वः बिल । थज्याःगु परिस्थिती दथुइ छम्ह मन्त्रीया धापुतिं धाःसा नेवाःतय् दथुइ हलचल हे हयाबिल । शहरी विकास राज्यमन्त्री रामवीर मानन्धरं ख्वनामितय् माग अनावश्यक धाल धकाः छगू बुखँ पिदन । छम्ह नेवाः जुयाः नेवाःतय् विरुद्ध नवात धकाः राज्यमन्त्री मानन्धरया आपालं आलोचना जुल । थुलि जुइधुंकाः थुगु विषयवस्तु हाकनं मेगु ट्वीस्ट वःगु दु । थम्हं ख्वनाया विषयस आःतक्क थथे छुं हे नवानागु हे मदुगु धयादीगु दु ।

शहरी विकास राज्यमन्त्रीं थम्हं गबलें नं ख्वनामितय् माग अनावश्यक धयागु हे मदुगु जक मखु, गनं नं सार्वजनिक थासय् अथवा संचारमाध्यमय् ख्वनाया बारे न हे मवानागु तकं धयादिल । वय्कलं थथे नमवानागु धाय्धुंकाः आः थ्व खँ गनं पिहांवल धइगु नं न्ह्यसः दनी । फय् हे मवय्कं हः गथे सनी धकाः धाइगु स्वाभाविक नं खः । थ्व खँय् संघीय सांसद पम्फा भुसालयात धाःसा छकः नापलानाबलय् ख्वनाया समस्या ज्यंकेत सहकार्य याय्नु धकाः खँ ल्हानागु दुगु वय्कलं धयादिल । थ्व हे खँ मथुयाः वा हीकाः समाचार दय्कल ला धइगु वय्कःया आशंका खः ।

थुकिया नापं ख्वनाय् अन्याय हे जूगु खःसा थुकिया विकल्पय् वनेफइगु तकं धयादिल । आःया योजनां ख्वनाया सम्पदायात लिच्वः लाइगु, ख्वनामिया जनजीवनय् लिच्वः लाइगु खःसा जिरो प्वाइन्छ ख्वनां मेथाय् यंकेफइगु तकं वय्कलं धयादिल । ‘आःतक्क फास्ट ट्र्याक द हे मन्त छुं पंगु मदुसा थुकियात भचा ल्यूने यंकां, योजनायात परिमार्जन यानाः न्हूकथं दय्केमाःसां छु पात ले ?’ मन्त्री मानन्धरं लहनालिसे खँ ल्हासें धयादिल । आःया योजनाय् ख्वनामितय्त मछिंकीगु खःसा प्यंगू किलोमिटर त्वःताः जिरो प्वाइन्टयात न्ह्यःने यंके का ।’

निजगढय् अन्तर्राष्ट्रिय विमानस्थल दय्केगु योजना नं दुगु ल्याखं येँ निजगढयात स्वाय्माःगु आवश्यकता दुगु वय्कलं न्ह्यथनादिल । व्यवस्थित रुपं विकास याय्माःगु तर उकिं स्थानीय वासिन्दायात मर्का मजुइमा धइगु पक्षय् थः दुगु धयादिल । थुकिया नापं वय्कलं ख्वनामियात सम्वादया नितिं आव्हान नं यानादीगु दु । ‘जि मन्त्री जुयागु च्याला दत, ख्वनाया दाजुकिजापिन्सं जितः ग्वःकः खँ ल्हाय्धुन ले ?’ मन्त्री मानन्धरं न्ह्यसः तयादिल । ‘समस्या समाधान याय्त खँल्हाबल्हा सहलह जुइमाः कि म्वाः ? वय्कःपिन्सं ला जितः छकः नं नापलानादीगु मदुनि । मखुसा जितः सःतादिसँ, जि हे ख्वनाय् वय् । झीगु समस्या झी हे जानाः समाधान याय्का ।’ ख्वनाया समस्या समाधान याय्माः धइगु पक्ष थः दुगु व समस्या दुथाय् उकियात ज्यंकेत माःगु ज्या याय्गु प्रतिवद्धता नं वय्कलं प्वंकादिल ।

थनथाय् स्वय्गु खःसा नेवाः समस्याया सम्वोधनया खँय् राज्यं उदासिनता क्यन धयाच्वनेबलय् नेवाः अभियन्तापाखें नं कम्यूनिकेशन ग्याप जूगु खःला धइथें खनेदत । कमजोरी सुयापाखें जुल धइगु न्ह्यसः छखे त्वःताः समाधानया लँपुइ न्ह्याःवनेगु स्वय्माः । आःया समस्या धइगु थनया वा पी ज्यूगु बुँ ल्यंकेगु, थनया सम्पदा ल्यंकेगु खः । अन्याय जूथाय् विरोध याय् हे माः । विरोधया नापं समाधानया लँय् न्ह्याःवनेगु दक्कले तःधंगु पक्ष खः ।

किपूलि साया कुन्हु धेपां धे धे, तिरकूलारकू मन्योकिइगु

नृपेन्द्रलाल श्रेष्ठ | दिल्लागा आमै ११४०,साउन ५ गते

किपू नगरपालिकाय् नखःचखःलिसें सापारू (सायाः) यात गुकथं हनेगु धइगु बारे किपू नगरपालिकां सकल दाफा, भजन खलःया प्रतिनिधिपिनिगु दथुइ छगू सहलह ज्याझ्वः यागु दु ।

किपू, नगां, पाँगा, भाजंगः, यरवः,च्वबहाःया थीथी दाफा भजन खलःया प्रतिनिधिपिंसं ब्वतिकाःगु उगु सहलह ज्याझ्वलय् सकसिनं सायाः हनेगु खँय् थःथःगु त्वालय् जुयाच्वंगु खँ न्ह्यब्वयादीगु खः ।

गथां मुगःनिसें हे नेवाः तयेगु तजिलजि कथं पिहाँ वयेमाःगु लाखे तजिलजि ल्यंकाः तयेत जक पिकायेगु तर हूलमूल मयासे, सायाः कुन्हु मनू मदुगु छेँजःपिंसं साचा, गोसाईंचा छ्वयेगु, बाहाःचाः हिलेगु, फल्चाय् दाफा थायेगुयात सुरक्षाया उपाय् नालाः निरन्तरता बीगु तर पिने थासं समेत स्वःवया हूलमूल जुइगु मू जात्रा सायाः (धेपां धे धे, तिरकूलारकू, झ्याँय् झ्याँय् पापा) मयायेत इनाप याःगु दु ।

भदौ १ गते निसे आन्तरिक उडान सुरू जुइगु

लहनान्युज | दिल्लागा आमै ११४०,साउन ५ गते

सरकारं भदौ १ गते निसे आन्तरिक उडान याये त्यःगु दु ।

थौं सोमवाः च्वंगु मन्त्रिपरिषदया बैठकं भदौ १ गते निसे आन्तरिक उडान सुरू यायेगु निर्णय याःगु दु ।

आन्तरिक उडान सञ्चालनया लागि माःगु प्रोटोकल तयार यायेत संस्कृति पर्यटन तथा नागरिक उड्ययन मन्त्रालययात जिम्मा बिःगु दु ।

बाह्य उडान सम्बन्धी धाःसा छु न निर्णय याःगु मदु ।

१८६म्हेसित कोरोना भाइरसया सङ्क्रमण पुष्टि

लहनान्युज | दिल्लागा आमै ११४०,साउन ५ गते

नेपालय् वःगु २४ घण्टाय् १८६म्हेसित कोरोना भाइरसया सङ्क्रमण पुष्टि जूगु दु ।

स्वास्थ्य तथा जनसङ्ख्या मन्त्रालयया कथं २४ घण्टाय् १८६ म्हेसित कोरोना पुष्टि जुइवं आः नेपालय् सङ्क्रमितपि १७ द्धः व ८४४ म्ह थ्यःगु दु ।

देय् यकं सङ्क्रमित मध्ये ११ द्धः व ८६८ म्ह वासः याका छेँय् लिहा वःगु दु ।

वःगु २४ घण्टाय् १७३ म्ह डिस्चार्ज जूया छेँय् लिहा वःगु दु । नेपालय् सङ्क्रमण पुष्टि जूपि मध्ये ६६ दशमलव ५१ प्रतिशत वासः याना छेँय् लिहा वने धुकुगु दु ।