Display Style:
Column Style
येँ १२२५म्ह नाप स्वनिगलय् १५३५ म्ह कोरोना संक्रमित
शोभा श्रेष्ठ | कौलाथ्व नवमी ११४०,कार्तिक ९ आइतवाः
वःगु २४ घण्टाया दुने स्वनिगलय् १५३५ म्हेसित कोरोना संक्रमित थपे जूगु दु। उकि मध्ये ६२९ म्ह मिसा व ९०६ म्ह मिजंपि खः।
स्वास्थ्य तथा जनसंख्या मन्त्रालयया कथं थौं आइतवाः येँ जक १२२५ म्हेसित कोरोना सक्रमण जूगु दु धका धाःगु दु।
अथेहे ख्वपय् १६३ म्ह व यलय् १४७ म्हेसित कोरोना सक्रमण पुष्टि जुगु दु धका धाःगु दु।
थौं आइतवाः देय् यकं २८५६ म्हेसित कोरोना संक्रमण पुष्टि जुगु खः।
कोरोना न्याम्ह मन्त
लहानान्युज | कौलाथ्व नवमी ११४०,कार्तिक ९ आइतवाः
नेपालय् वःगु २४ घन्टाया दुने थप न्याम्ह कोरोना संक्रमणं सीगु दु धका स्वास्थ्य तथा जनसंख्या मन्त्रालयं धाःगु दु।
मन्त्रालयया आधिकारिक वेबसाइटय् थौं कोरोना सक्रमणं न्याम्ह सीगु दु धाःसो थ्व नाप आःतक नेपालय् कोरोना संक्रमणं सीपि ८४७ म्ह थ्यःगु दु।
कोरोना संक्रमणं सुनसरीइ प्यम्ह मन्त
लहानान्युज | कौलाथ्व नवमी ११४०,कार्तिक ९ आइतवाः
कोरोना संक्रमणपाखे सुनसरीइ थप प्यम्ह सीगु दु। इनरुवा स्वास्थ्य कार्यालयया कोभिड–१९ संयोजकया कथं सीपिं धरान उपमहानगरपालिका व बराहक्षेत्र नगरपालिकाया संक्रमितपि खः धका धाःगु दु।
बीपी कोइराला स्वास्थ्य विज्ञान प्रतिष्ठानय् च्वगु कोभिड १९ अस्पतालय् प्यम्ह शनिवाः सीगु धका जानकारी बिःगु खः।
बीपी कोइराला स्वास्थ्य विज्ञान प्रतिष्ठानया सहप्रवक्ताया कथं असोज २० गते कोरोना पुष्टि जुम्ह धरान–१७ या ६२ दँ दुम्ह मिसा शनिवाः मदुगु खः।
कात्तिक ७ गते प्रतिष्ठानया कोभिड अस्पताल भर्ना जुम्ह वयात न्हापानिसे जँलास्येँया ल्वय् दुम्ह खः।अथेहे धरान–१५ बाझगराया ५६ दँ दुम्ह कोरोना संक्रमणं सीगु दु।
स्वास्थ्यमन्त्री ढकालं स्वास्थ्यया मापदण्ड पालना याना मोहनि हनेत इनाप
लहानान्युज | कौलाथ्व नवमी ११४०,कार्तिक ९ आइतवाः
स्वास्थ्यमन्त्री भानुभक्त ढकालं स्वास्थ्यया मापदण्ड पूर्णरुपं पालना याना मोहनि माने यायेत इनाप याःगु दु।
थुगु दँय् कोरोना महामारीया कारण जनस्वास्थ्यया मापदण्ड पूर्ण रुपं पालना याये माःगुलि मोहनि सीमित रुपं माने याये माःगु बाध्यकारी अवस्था सिर्जना जूगुलि मन्त्री ढकालं परिस्थितिया थुगु बाध्यता कथं नखः हनेत इनाप यानादिगु खः।
न्ह्या वलय् थे झींस स्वास्थ्यय् ध्यान बिइगु, पासान्ति ध्यान बिइगु, सामाजिक शान्तियात ध्यान बिइगु, जलाखलापिन्त असर मजुइ कथं मोहनि हनेत इनाप याःगु खः। थुगु दँय् कोरोना महामारीया कारण अप्वो ध्यान बिइ माः धका धयादिसे मोहनिया लसताय् भिंतुना देछानादिगु खः।
मन्त्री ढकालं झीसं नेपाल सरकार स्वास्थ्य तथा जनसंख्या मन्त्रालयं जारी याःगु स्वास्थ्य मापदण्ड कथं व्यवहार याःसा कोरोना पाखे बचे जुइत ग्वाहालि जुइ धका धयादिगु खः। उकि दक्कोसिया अझ अप्वो ध्यान बिइत इनाप याःगु खः।
स्वास्थ्य तथा जनसंख्या मन्त्रालय दक्को नागरिकया जीवन रक्षाया लागि सदैव प्रतिबद्ध व सरकार न्ह्या वलय् नागरिकपिनिगु ग्वाहालि दइगु भलसा कासे मन्त्री ढकालं थुगु महामारी विरूद्धया लडाइँलय् राज्य व जनताया दथुइ विश्वासिलो एकता स्थापित याये माःगुलि जोड बियादिगु दु।
दक्को तहया सरकार, राजनीतिक दल, समूदाय, नागरिक समाज, निजी क्षेत्रबपाखे निरन्तर ग्वाहालिया अपेक्षा यासे मन्त्री ढकालं थुगु एकतां महामारी विरुद्ध झी त्याइ धका विश्वास प्वकादिगु दु।
मोहनिया लसताय् येँ महानगरया मेयर शाक्य भिंतुना देछानादिल
नृपेन्द्रलाल श्रेष्ठ | कौलाथ्व नवमी ११४०,कार्तिक ९ आइतवाः
नेपाःमि तयेगु तधःगु नखः मोहनिया लसताय् सकल नेपाःमिपिन्त ये महानगरपालिकाया मेयर बिद्यासुन्दर शाक्यं भिंतुना देछानादिगु दु।
मेयर शाक्य नेपाःमिपिनिगु तधःगु नखःया लसताय् येँ महानगरवासी नाप स्वदेश व विदेशय् च्वपि सकल दाजु किजा व तँह केँहपिनिगु भिं उसाँय्, सुख, शान्ति, समृद्धि, सुस्वास्थ्य,दीर्घायू नाप उत्तरोत्तर प्रगतिया भिंतुना देछानादिगु दु।
आत्मीयता, पारिवारिक मेलमिलाप, भातृभाव व स्नेही भावनाया जाःगु मोहनि सकल नेपाःमिपिनिगु मौलिक नखः खः।
असत्यया विरुद्ध सदा सत्यया विजय जुइ आत्यात्मिक दर्शनयात आत्मसाथ याना माने याइगु थुगु नखःया लसताय् सत्य, त्याग, बलिदान व निष्ठाया लँय् वनेगु प्रेरणा दय्मा धका कामना यासे मेयर शाक्यं सकल नेपाःमिपिन्त भिंतुना देछानादिगु खः।
