Display Style:
Column Style
मोहनि सु गन दु अन हे च्वना माने याये : प्रधानमन्त्री ओली
लहानान्युज | कौलाथ्व दशमी ११४०,कार्तिक १० सोमवाः
प्रधानमन्त्री केपी शर्मा ओलीं नेपाःमिपिनिगु तधःगु नखःया मोहनिया लसताय् सकल सकसित भिंतुना देछनादिसे फजूल खर्च मयासे व सु गन दु अने हे च्वना थुगुसि माने यायेत इनाप याःगु दु।
औचित्य व आवश्यकताया वास्ता हे मयासे थःगु सामर्थ्यया तक बिचाः मयासे मिखा तिसिना माने याना वयाच्वनागु नखः फजूल खर्च मयासे नखः हनेगु लागि प्रधानमन्त्री ओलीं नखः हनेगु लागि आह्वान यानादिगु दु।
थौंकन्ह्ये कोरोना महामारीया विषम परिस्थितिइ थुगुसिया नखः फरक ढंगं माने याये माःगु धाःसे प्रधानमन्त्रीं थःपिपिन्स माने यायेमाःपि पाखे न्हि टिया म्वाय्क म्वाय् मेपिना न्ह्यने मवसे सम्भावित संक्रमणया खतरा ख्याः यासे हनेत सुझाव बिःगु दु।
ज्येष्ठ नागरिक, मस्त व कमजोर स्वास्थ्य अवस्थाया मनू तयेत संक्रमणया सम्भावना अप्वो जुगुलि थुकियायात विशेष सजग जुया मोहनि हनेत इनाप याःगु खः। थुगु मोहनि झीपि सु गन दु अने हे च्वना मोहनि माने यायेत प्रधानमन्त्री ओलीं इनाप याःगु दु।
संक्रमणया सम्भावित खतरायात ध्यानय् तया प्रधानमन्त्री निवासय् जुइगु मोहनिया सिन्ह टिइगु ज्याझ्वः मतेय्गु लागि निर्देशन बियागु जानकारी न बियादिगु दु।
प्रधानमन्त्रीयात सिकाली द्यःया प्रसाद लल्हाःत
नृपेन्द्रलाल श्रेष्ठ | कौलाथ्व नवमी ११४०,कार्तिक ९ आइतवाः
एतिहासिक खोकनाया द्यः सिकाली जात्राया प्रसाद प्रधानमन्त्री केपी शर्मा ओलीया लल्हाःगु दु। प्रधानमन्त्री निवास वालुवाटारय् विशेष ज्याझ्वलय् द्यःखलः व स्थानीय गुठींं प्रसाद लल्हायेगु ज्या जुगु खः।
आइतवाः सुथय् करिब ९ बजे खोकनाया, रुद्रायणी, इन्द्रायणी लगायत द्यः खलः नं प्रम ओलीया तिरिमय्जु राधिका शाक्य व शहरी विकासमन्त्री कृष्णगेपाल श्रेष्ठयात प्रसाद लल्हाःगु खः।
उगु ज्याझ्वलय् खोकना् च्वपिपाखे स्थानीय स्वयम्भुराज डंगोल, यल जिल्ल्ला अध्यक्ष हरिकृष्ण ब्यञ्जनकार, यल महानगरपालिका वडा नम्बर २१ या सदस्य ज्ञानभक्त डंगोलसपिनिगु ब्बति दुगु खः।
खोकनाय् च्वपिपाखे द्यःखलकं सरकार प्रमुख व देय् या शान्ति कल्याणया कामना यासे नवमीया दिं प्रसाद लल्हायेगु परम्परा दुगु खः।
उगु परम्परायात ल्यका तयेगु कथं द्यः खलकं विशेष पुजा नाप प्रसाद प्रमयात लल्हागु खः। प्रसादय् हेँय् यात विशेष समा याना छम्ह हेँय् व तान्त्रिक विधिपाखे रुद्रायणीया प्रसाद सरकार
प्रमुखया हैसियतं प्रम ओलीपाखे वयकया तिरि मय्जु शाक्ययात लल्हागु खः।
स्थानीय डंगोल व द्यः खलकं प्रधानमन्त्री ओली व शहरी विकासमन्त्री श्रेष्ठयात एतिहासिक खोकनाया मू जात्रा जुइगु रुद्रायणी देगःया पुननिर्माण यायेत इनाप याःगु खः। उमिसं भुखाचं
क्षतिग्रस्त सम्पदा पुननिर्माण यायेत सरकारया ध्यानाकर्षण याःगु खः।
उगु ज्याझ्वलय् प्रम ओलीं शहरी विकास मन्त्री श्रेष्ठयात खोकनाया सम्पदा पुननिर्माण यायेगु विषय याकन हे अध्ययन यायेत इनाप याःगु दु। मन्त्री श्रेष्ठं देय् या तजिलजि ल्यका तयेत खोकना च्वपिनिगु तधःगु भुमिका अविष्मरणीय जुगु खँ उल्लेख यासे उकिया लागि सरकारं माःगु ग्वाहालि यायेगु प्रतिबद्धता प्वकादिल।
नेवाः तयेगु इतिहास ल्यका तयेगु लागि खोकनाय् च्वपिनिगु तधःगु भुमिका दु धका धयादिसे मन्त्री श्रेष्ठं सरकारपाखे माःगु ग्वाहालि यायेगु प्रतिवद्धता प्वकादिगु खः। प्रम निवास वने न्ह्यः द्यः खलः न शहरी विकास मन्त्री श्रेष्ठया निवासय् नाप लागु खः ।
पूर्वमन्त्री जनार्दन शर्मायात कोरोना सक्रमित
लहानान्युज | कौलाथ्व नवमी ११४०,कार्तिक ९ आइतवाः
पूर्वमन्त्री जनार्दन शर्मा नाप वयकःया तिरिमय्जु यात न कोरोना संक्रमित जूगु दु।
पूर्वमन्त्री शर्मां थःगु सामाजिक सञ्जाल फेसबुक पेजय् थः नाप तिरिमय्जुयात कोरोना पोेजेटिभ जूगु जानकारी ब्यूगु खः।
थौं आइतवाः सुथय् सामाजिक संजालय् वयकलं परीक्षण यानाबलय् थःपिन्त संक्रमण पुष्टि जूगु धासें शर्मा लिपांगु छुं दिनय् थःपिनिगु सम्पर्कय् दुपिन्त सतर्क जुइत व समस्या खनेदुसा परीक्षण याकेत इनाप याःगु दु ।
३३३६ म्ह कोरोनामुक्त
शोभा श्रेष्ठ | कौलाथ्व नवमी ११४०,कार्तिक ९ आइतवाः
वःगु २४ घन्टाया दुने कोरोनामुक्त जुपि ३३३६ म्ह डिस्चार्ज जुया छेँ लिहा वःगु दु। थ्व नाप नेपालय् आःतक कोरोनामुक्त जूपि १ लाख ८३३४ म्ह थ्यःगु दु।
आःतक नेपालय् आइसोलेसनय् च्वनाच्वपि कोरोना संक्रमित ४५ हजार ५७२ म्ह दु। ३०६४ म्ह क्वारेन्टाइनय् च्वना च्वंगु दु धका मन्त्रालयं धाःगु दु।
स्वास्थ्य तथा जनसंख्या मन्त्रालयया कथं आःतक पीसीआर विधिपाखे १३ लाख ९३ हजार १७३ म्हेसिगु परीक्षण याये धुकुगु दु।
२४ घण्टाय् जम्मा १२ हजार ३११ पीसीआर परीक्षण याःगु खः।
देय् यकं २८५६ म्हेसित कोरोना संक्रमण पुष्टि
शोभा श्रेष्ठ | कौलाथ्व नवमी ११४०,कार्तिक ९ आइतवाः
वःगु २४ घन्टाया दुने नेपालय् थप २८५६ म्हेसित कोरोना संक्रमण पुष्टि जुगु दु धका स्वास्थ्य तथा जनसंख्या मन्त्रालयं धाःगु दु।
मन्त्रालयया आधिकारिक वेबसाइटय् थौं आइतवाः तक नेपालय् कोरोना संक्रमितपि १ लाख ५८०८९ म्ह थ्यःगु दु। थ्व नाप देय् यकं सक्रिय संक्रमितपि आःतक ४५ हजार ५७२ म्ह थ्यःगु दु।
