Display Style:
Column Style
देय्यक नेपालय् थप ३७९० म्हेसित कोरोना संक्रमण पुष्टि
कौलाथ्व तृतिया ११४०,कार्तिक ३ सोमवाः | कौलाथ्व तृतिया ११४०,कार्तिक ३ सोमवाः
वःगु २४ घन्टाया दुने नेपालय् थप ३७९० म्हेसित कोरोना संक्रमण पुष्टि जूगु धका स्वास्थ्य तथा जनसंख्या मन्त्रालयं धाःगु दु।
मन्त्रालयय् थौं सोमवाः याःगु नियमित प्रेस ब्रिफिङया झ्वलय् प्रवक्ता डा जागेश्वर गौतमया कथं आःतक कोरोना संक्रमितपि १ लाख ३६ हजार ३६म्ह थ्यःगु दु धका धाःगु दु।
थ्व नाप आःतक देय् यकं सक्रिय संक्रमितपि ४० हजार ७७८ म्ह थ्यःगु दु।
येँ २००८म्ह नाप स्वनिलय् २३८८म्हेसित सक्रमण
लहानान्युज | कौलाथ्व तृतिया ११४०,कार्तिक ३ सोमवाः
वःगु २४ घण्टाया दुने स्वनिगः दुने थप २३८८ म्हेसित कोरोना संक्रमण पुष्टि जूगु दु।
मन्त्रालयया नियमित प्रेस ब्रिफिङया झ्वलय् थौं सोमवाः प्रवक्ता डा जागेश्वर गौतमं येँ जक २००८ म्हेसित कोरोना सक्रमण जूगु दु धका धाःगु दु।
अथेहे यलय् २८१ म्ह व ख्वपय् ९९ म्हेसित कोरोना संक्रमित पुष्टि जूगु दु धका धाःगु दु।
टोखाया मेयर न कोरोना सक्रमण
नृपेन्द्रलाल श्रेष्ठ | कौलाथ्व तृतिया ११४०,कार्तिक ३ सोमवाः
टोखा नगरपालिकाया मेयर प्रकाश अधिकारीयात न कोरोना भाइरस संक्रमण जुगु दु।
छु दिं न्ह्यनिसे होम आइसोलेसनय् च्वना च्वंगुदिगु खः।
मेयर अधिकारीया रिपोर्ट म्हिगः पोजिटिभ वःगु खः। कोरोनायात त्याका याकन हे जनतायाःगु सेवाय् लिहा वयेगु धका न धयादिगु दु।
छु दिं न्ह्य टोखा नगरपालिकाया उप मेयर ज्ञानमाया डंगोल न कोरोना सक्रमित जुयादिगु खः। स्वनिगः दुने येँ महानगरपालिका धुका दकलय् अप्वो सक्रमित जुया वयाच्वंगु टोखा नगरपालिका खः।
जागरुकया न्याक्वःगु रक्तदान ज्याझ्वः क्वचाल
बिकाश | कौलाथ्व तृतीया ११४० (२०७७ कार्तिक ३) सोमबाः
कोरोना महामारीया अवस्थाय् विरामीया वासः याय्त हिया अभाव जुयावःगु धासें जागरुक युवा समाजं हिदान ज्याझ्वःयात तच्वयेकूगु दु ।
ब्लड डोनर्स एशोसिएसन नेपाल (ब्लोदान) या आव्हानय् समाजं य्ँ महानगरपालिका २४ वडा कार्यालयलिसेया मंकाः ग्वसालय् आइतबाः येँया बसन्तपुरस्थित महाःद्यः पार्वती देगःया दबुलिइ हिदान ज्याझ्वः याःगु खः ।
थुगु ज्याझ्वलय् हिदानय् मुक्कं २०म्हेसिनं हिदान याःगु खः ।
ज्याझ्वःया संयोजन समाजया ल्यू छ्यान्जे राजीव श्रेष्ठं यानादीगु खः ।
ज्याझ्वलय् केन्द्रीय रक्तसंचार सेवाया निर्देशक डा. मनिता राजकर्णिकार, ब्लोदानया दांभरिं मचाकाजी महर्जन, २४ वडाया सदस्यलिसें ब्लोदानया केन्द्रीय दुजः व समाजया सल्लाहकार विनोद तुलाधरलिसेंया उपस्थिती दुगु खः ।
राजोपाध्याय समाजया न्हूम्ह नायः संजय
लहानान्युज | कौलाथ्व तृतिया ११४०,कार्तिक ३ सोमवाः
स्वनिगःया आदिवासी द्यःब्रम्हू राजोपाध्यायतय् कुसा संगठन राजोपाध्याय समाजया न्हूम्ह नायकय् कलाकार संजय शर्मा राजोपाध्याययात ल्यःगु दु । वंगु शन्चरबाः क्वचाःगु समाजया न्हय्क्वःगु दँमुँज्या व स्वक्वःगु तःमुँज्यां वय्कःयात समाजया न्हूम्ह नायकय् निर्विरोध ल्यःगु खः ।
व हे कथं स्वक्वःगु तःमुँज्यां ल्यःगु न्हूगु ज्यासना पुचलय् न्वकू रचना शर्मा राजोपाध्याय च्वनादीगु दुसा मू छ्यान्जेय् पत्रकार बिराजकाजी राजोपाध्याययात ल्यःगु दु । व हे कथं छ्यान्जेय् वन्दना राजोपाध्याय, दांभरिं उद्धव आचार्य राजोपाध्याय, ल्यू दांभरिंलय् चेतनादेवी शर्मा राजोपाध्याय च्वनादीगु दु ।
१३म्ह दुजः दुथ्याःगु ज्यासना पुचःया मू दुजः पदय् विजय शर्मा राजोपाध्याय, विरु सुवेदी राजोपाध्याय, सुजित राजोपाध्याय, श्रीमणी राज शर्मा राजोपाध्याय, रक्षण राजोपाध्याय, महेश बाबु शर्मा राजोपाध्याय व गिरिश शर्मा राजोपाध्याय दी ।
नायः ल्ययेधुंकाः नुगः खँ तयेगु झ्वलय् न्हूम्ह नायः संजयं समाजयात छधी छप्पँ दयेकाः समाजया सर्वाङ्गिण विकासया लागिं निरन्तर न्ह्यानाच्वनेगु प्रतिवद्धता प्वंकादिल ।
वयां न्ह्यः तःमुँज्याया उद्घाटन सत्रय् नेवाः देय् दबूया नायः नरेश ताम्रकारं राजोपाध्याय खँग्वलं स्वनिगःया नेवाःतय् गुरु पुरोहित कथं म्हसिका दुपिं द्यःब्रम्हूतय्गु विशिष्ट पहिचान कुबियाच्वंगु धासें सकल द्यःब्रम्हूतय्सं मेमेगु थर च्वःसां राजोपाध्याय नं तयेमाःगु खँय् बः बियादिल ।
अथे हे नेवाः न्ह्यलुवा लिसें मानवअधिकारवादी नेता मल्ल के. सुन्दरं द्यःब्रम्हू समाजयाके वाचन कला दुगु खँ न्ह्यथँसें थुगु हे कलायात व्यावसायिकीकरण यानाः आर्थिक उन्नतीपाखे न्ह्याःवनेमाःगु खँ कुलादिल ।
उगु हे ज्याझ्वलय् संक्रमणया जोखिमय् अग्रपंक्तिइ दनाः विरामीया वासः यायेगुलिइ खटेजुयाच्वंपिं राजोपाध्याय चिकित्सक, स्वास्थ्यकर्मीतय् सम्मानय् म्येया भिडियो नं क्यंगु खः । अमरराज शर्मां च्वयाः लय् तयादीगु लिसें अमरराज व रत्नशोभा महर्जनं हालादीगु उगु म्येया भिडियोस संक्रमणया अवस्था क्यनेगु लिसें वासः यायेगुलिइ खटेजुयाच्वंपिं राजोपाध्याय स्वास्थ्यकर्मी व चिकित्सकपिनिगु किपा दुथ्याकातःगु खः ।
लिसें महामारीया अवस्थाय् भौतिक रुपं उपस्थित याकाः सम्मान यायेमखंगु धासें थुगुसी एसईई पास जूपिं राजोपाध्याय विद्यार्थीपिनिगु सम्मान कथं विद्यार्थीतय् किपा ब्वयाः नां घोषणा याःगु खः ।
ज्याझ्वलय् राजोपाध्याय चिकित्सक व स्वास्थ्यकःमिलिसें एसईई पास जूपिं विद्यार्थीतयत लिपा ई स्वयाः भौतिक रुपं उपस्थित याकाः सम्मान यायेगु जानकारी ब्यूगु खः ।
संक्रमणया जोखिमया कारणं समाजं थुगुसी जुममार्फत भर्च्युअल रुपं ज्याझ्वः याःगु खः ।
