Display Style:
Column Style
थौं हे येँय् स्वम्ह संक्रमित मन्त
शोभा श्रेष्ठ | गुंलागा ७ ११४०,साउन २६ सोमवाः
नेपालय् कोरोना संक्रमणया वर्तमान अवस्थायात स्वयेगु खःसा संक्रमित नं न्हियान्हिथं हे थहां वनाच्वंगु दुसा लिपांगु इलय् न्हिं न्हिं हे संक्रमितया मृत्यु नं मदिक्क हे जुयाच्वंगु दु ।
थ्व हे झ्वलय् थौं नं प्यम्हेसिया मृत्यु स्वास्थ्य तथा जनसंख्या मन्त्रालयं पुष्टि यायेधुंकल सा हाकनं मेम्ह छम्ह संक्रमितया मृत्यु किस्ट अस्पतालय् जूगु दु ।
मन्त्रालयं ब्यूगु जानकारी कथं कोरोना संक्रमणया कारणं बाँके व पर्साय् छम्ह/छम्ह मिसा सीगु दुसा मृत्यु जूपिं मेपिं निम्ह येँ जिल्लायापिं खः ।
येँया बानेश्वरय् च्वंम्ह ७६दँया मिजं छम्ह थौं सुथय् मन्त ।
मेडिकेयर अस्पतालय् वासः याकेगु झ्वलय् थौं सुथय् १०ः१५ताः इलय् वयकः मदुगु खः ।
अथे हे येँ जिल्ला किपू नगरपालिकाया ट्याङ्ग्लाफाँटय् च्वंम्ह ६४दँया छम्ह मिजं नं थौं हे मन्त । वयकः थौं सुथय् ५ः४२ ताः इलय् मदुगु खः ।
अथे हे यलया किस्ट अस्पतालय् छम्ह ५० दँया मिसाया नं मृत्यु जूगु दु ।
काभ्रे पाँचखालया मिसा निमोनियाया वासः याकेत म्हिगः अस्पताल थ्यंगु खः । संक्रमणया आशंकाय् स्वाब नमूना परिक्षण यानास्वःगुलिइ वयकःयाके कोरोना पोजेटिभ खनेदुगु खः ।
मन्त्रालयं प्यम्हेसिया मृत्यु जूगुलिसें कोरोना संक्रमणया हुनिं सीपिनिगु ल्याः ७९ थ्यंगु पुष्टि याःगु खःसा किस्ट अस्पतालय् हाकनं छम्ह मदुगुलिसें थुगु ल्याः ८० थ्यंगु दु ।
येँय् ३६ लिसें स्वनिगलय् ४४ संक्रमित थप
शोभा श्रेष्ठ | गुंलागा ७ ११४०,साउन २६ सोमवाः
नेपालय् कोरोना भाईरस (कोभिड १९) पाखें संक्रमित जूपिनिगु ल्याः २३द्वः थ्यंगु दु ।
थौं ३सः व ३८म्हे न्हूपिं संक्रमित खनेदुगु लिसें कोभिड १९ पाखें संक्रमित जूपिनिगु ल्याः २३द्वः ३सः व १० थ्यंगु खः ।
थौं संक्रमण पुष्टि जूपिं ३सः ३८ मध्ये स्वनिगलय् ४४ दु ।
येँ जिल्ला दुने ३६म्हेसिके संक्रमण पुष्टि जूगु दुसा यल व ख्वप दुने ४/४ न्हूपिं संक्रमित लूगु दु ।
म्हिगः म्हीगःया तुलनाय् थौं स्वनिगः दुने संक्रमितया ल्याः म्ह्वः खनेदु । अथेखःसां लिपांगु इलय् न्हिं न्हिं हे थन न्हूपिं संक्रमित लुया हे च्वंगु दु ।
लिपांगु २४ घौ दुने सच्छि व ४० संक्रमित ल्वय् लंकाः छेँय् लिहांवंगु लिसें कोरोनायात त्याकूपिनिगु ल्याः १६द्वः ४सः व ९६ थ्यंगु दु ।
थौंतक्क पिसिआर विधिं ४ लख ५२द्वः २सः व ३६म्हेसिया परिक्षण जूगु दु । लिपांगु २४ घौ दुने ८४सः व ३२ नमूना परिक्षण जूगु दु ।
देयन्यंक क्वारेन्टीनय् च्वंपिनिगु ल्याः १०द्वः ७सः व ५९ दुसा आइसोलेसनय् उपचाररत संक्रमितया ल्याः ६७सः व ३८ दु ।
थौं थप प्यम्ह संक्रमित मदुगु लिसें कोरोना संक्रमणया हुनिं मदुपिनिगु ल्याः ७९ थ्यंगु दु ।
प्रहरी कन्ट्रोलय् ज्यायाइपि स्वम्हेसित कोरोना संक्रमण पुष्टि
लहनान्युज | गुंलागा ७ ११४०,साउन २६ सोमवाः
महानगरीय प्रहरी कार्यालय रानीपुखूया प्रहरी कन्ट्रोलय् ज्या याइपि स्वम्हेसित कोरोना भाइरस संक्रमण पुष्टि जूगु दु ।
संक्रमित नाप स्वापू दुपि मनू तयेत न पीसीआर परीक्षणया तयारी याना च्वंगुु दुु ।
प्रहरीया ग्वाहालि वा प्रहरी नाप छु न सूचना काये माःसा १०० नम्बरय् फोन याये वयलय् प्रहरी कन्ट्रोलय् ल्हनिगु खः । थुगु थासय् प्रहरीपि २४ घण्टाय् दइगु थाय् खः ।
थ्व स्वया न्ह्य न रानीपुखूलि ज्या याइम्ह छम्हेसित कोरोना संक्रमण खने दुगु खः ।
थ्व नाप नेपाल प्रहरीया पहरा गण सामाखुसी व नगर प्रहरी छम्हेसित न कोरोना संक्रमण खने दये धुकुगु खः ।
नगर प्रहरीयात ज्वरो वःगुलि परीक्षण याःगु इलय् कोरोना संक्रमण पुष्टि जूगु खः ।
वीरगञ्जय् कोरोना संक्रमण छम्ह मन्त
लहनान्युज | गुंलागा ७ ११४०,साउन २६ सोमवाः
वीरगञ्जय् कोरोना संक्रमण मेम्ह छम्ह मन्त । वीरगञ्ज महानगरपालिका–१५ भेडियाहीयाम्ह ४५ दँया छम्ह मिसा मदुगु दु ।
उम्ह मनू सीइ धुका नारायणी अस्पतालया पीसीआर प्रयोगशालाय् याःगु परीक्षणय् वयागु रिपोर्ट पोजेटिभ वःगु खः ।
थ्व नाप साउनय् जक पसार्यय् सीपिनिगु ल्याः १८म्ह थ्यःगु दु ।
उम्ह मनूयाके न्हापा निसे उच्च रक्तचाप व थाइराइडया ल्वगि खः ।
वयात सासः ल्हाये थाकुगु समस्या वये वः अस्पताल भर्ना जू वःगु खः ।
किपूया मेयरं नगरपालिका दुने थीथी वडाय् अबलोकन
नृपेन्द्रलाल श्रेष्ठ | गुंलागा ७ ११४०,साउन २६ सोमवाः
विदायु दिनय् न किपू नगरपालिकाया मेयर रमेश महर्जनं नगरया विकास निर्माण ज्याय् थथिी थासय् जुया च्वंगु ज्याय् निरीक्षण यानादिगु दु ।
किपू नगरपालिका वडा नंं ७ य् दक्को थासय् सञ्चालन जुया च्वंगु योजनाया जानकारी कयादिसे सम्बन्धित थासय् आवश्यकता कथं न्हुगु योजनाया बारे सहलह यानादिगु खः ।
मेयर महर्जनं भाजंगाः (नगां मसानया च्वय्) थौं कन्ह्ये स्थापना जुया च्वंगु भगवान गौतम बुद्धया प्रतिमाया न अबलोकन यानादिगु खः ।
थुगु प्रतिमा दयेकेगु लागि वडापाखे न्यागु लाख ध्यवा ग्वाहालि याःगु व उगु प्रतिमाया क्वय् छगू कोठा दयेकागु दु धका वडा अध्यक्ष राजकुमार मालीं जानकारी बिःगु खः । मेयर महर्जनं भाजंगालय् महर्जन समुदायया दाहसंस्कार गुथिया अबलोकन यानादिसे उगु थासय् विष्णुदेवी द्यः, यरवःचा जुया स्टील ट्यांकी तक लँ तब्याः याये माःगु, ढः दयेके माःगु व सतक पेटी दयेका च्वइगु थाय् या न अबलोकन यानादिगु खः ।
नगरपालिका वडा नं. ७ य् दुने लागु उज्ज्वल स्कूल निसे ११ मिटर चौडाइ दहन वनेगु लँ दयेकेइगु योजना सञ्चालन जुया च्वइगु उगु लँय् थौंकन्ह्ये रिटेलिङ्क वाल (पःखाः ) दयेकेइगु ज्या जुया च्वंगु खः ।
उगु निरीक्षण भ्रमणय् किपू नगरपालिका वडा नंं १ या अध्यक्ष हर्ष महर्जन, ७ या अध्यक्ष राजकुमार माली नाप सदस्यपि राजकुमार महर्जन, प्रकाश महर्जन नाप स्थानीयपि न ब्बति दुगु खः ।
