संयुक्त राष्ट्र संघया  CEPA सत्रय् सार्क पत्रकार मञ्चया अध्यक्ष राजु लामां ब्बति काइगु जुगु दु। उगु सभाय् दक्षिण एसियाली सः तयेगु जुइ धका मञ्चया अध्यक्ष लामां लहनान्युजयात धयादीगु दु।

अन्तर्राष्ट्रिय मिडिया नेतृत्व व विश्वव्यापी शासनय् दक्षिण एसियाली प्रतिनिधित्वया महत्वपूर्ण मान्यता कथंसार्क पत्रकार मञ्चया अन्तर्राष्ट्रिय अध्यक्ष लामां सन् २०२६ अप्रिल १३ निसे १७ तारिख तक संयुक्त राष्ट्र संघया मुख्यालय, न्यूयोर्कय् जुइगु उगु ज्याझ्वलय् सार्वजनिक प्रशासन सम्बन्धी संयुक्त राष्ट्र संघीय विशेषज्ञ समिति ( CEPA) या २५ क्वःगु सत्रय् ब्बति काइगु जुगु दु।

CEPA सत्र विश्वव्यापी सार्वजनिक प्रशासन, सुशासन नवप्रवर्तन नाप दिगो विकास लक्ष्य (SDGS) या कार्यान्वयन याकेत प्रवद्र्धन यायेगु संयुक्त राष्ट्र संघया छगु महत्वपूर्ण उच्चस्तरीय मञ्च खः ।

उगु सत्रय् हलियकंया प्रतिष्ठित विज्ञ, वरिष्ठ नीति निर्मातापि नाप संस्थागत नेतृत्वकर्ता तयेगु ब्बति दइगुलि अन्तर्राष्ट्रिय नीति ढाँचा नाप शासन मापदण्ड निर्माणय् योगदान जुइ याइ।

राष्ट्रियसभाया नवनिर्वाचित न्वकू लीलाकुमारी भण्डारीं निष्पक्षता व तटस्थता न्यंकाः ज्या यायेगु प्रतिबद्धतालिसें थःम्हेस्यां न्हापांनिसें कया वयाच्नादीगु दलीय राजनीतिक जिम्मेवारीपाखें ब्यागलं च्वनादीगु जानकारी बियादिल।

न्वकू भण्डारीं थौं छगू विज्ञप्ति पिथनादिसें उगु जानकारी बियादीगु खः। नेकपा (एमाले)पाखें निर्वाचित भण्डारी उगु पार्टीया केन्द्रीय दुजः जुयाच्वनादीगु खः। वय्कः वंगु चैत २३ गते राष्ट्रियसभाया न्वकूकय् निर्विरोध निर्वाचित जुयादीगु खः।

येँ महानगरपालिकां निसः दँ पुलांगु गगनेश्वर देगःया पुनर्निर्माणया ल्यंगु ज्या पूवंकीगु जूगु दु।प्रदेश सरकारपाखें वःगु ध्यबां निर्माण न्ह्याकूगु खःसां ध्यबा मगाःगुलिं जगय् हे ज्या दिनाच्वंगु येँ महानगरं वडा नं ३२ य् लाःगु गगनेश्वर महाद्यःया देगःयात स्वतजालिसें पूवंकेत्यंगु खः।

येँ महानगरं सम्पदा लिसें पर्यटन समितिया कजि आशामान सङ्गतया कथं थ्यंमथ्यं निसः दँ पुलांगु उगु देगः १९९० सालया तःभुखाचं पूवंकं क्षति जूगु खः। थुकिया पुनर्निर्माणया सन्दर्भय् पुरातत्व विभागपाखें इलय् हे निर्णय जुयाः मफुगु विषय ल्ह्वने धुंकाः सम्पदा लिसें पर्यटन समितिया कजि सङ्गतं लिखित दस्तावेज मदुसा गुठियार, जनश्रुति, कथन, सामाजिक विश्वास लिसें मान्यतायात लिधंसा कयाः दयेकाः पुरातत्व विभागं निकास बिइमाःगु धयादिल।

“जिमित निकास माःगु खः। ध्यबा खर्च यानाः जिमिसं ज्या याये, अथे खःसां पुरातत्व विभागं बाय् थ्व त्वः तयाः पनेगु बाय् दयेके मबीगु यायेमज्यु। भचा भचा ई पियाः प्रक्रिया पूवंकेत जिपिं तयार दु। अथे खःसां प्रक्रिया पूवंकेगु नामय् लांलांतक बाय् दंबदंतक प्रक्रिया अवरुद्ध जुइगु अवस्था जिमित मान्य जुइमखु”, सङ्गतं धयादिल। वडा नं ३२ या वडाध्यक्ष नवराज पराजुलीं, विवाद दूगु छुं नं योजना कार्यान्वयनय् मयंकेगु धयादिल। खँ मिले जुइ, सकसिया सहमति जुइसा जिपिं ज्या न्ह्याकेत तयार दु। जनतां पुलातःगु कर खःगु थासय् छ्यलेमाःगु वय्कलं धयादिल।

सम्पदालिसें पर्यटन विभागया प्रमुख कुमारी राईया कथं समितिं गगनेश्वरया देगःयात स्वतजाःया दयेकेगु निर्णय याःगु दु। थ्व विषय पुरातत्व विभागयात जानकारी याकेगु व साझेदार लिसें सरोकारवाला दथुइ विभागय् थप सहलह यायेगु समितिं याःगु निर्णय खः। देगः आः न्हापांगु चरणय् निर्माण जूगु दु।

थ्वहे संरचनाय् निर्माण न्ह्याके फइगु मफइगु विषयय् सहलह यानाः बैठकं जमिनय् खनेदूगु ब्वःया प्राविधिकतय्सं अध्ययन यानाः प्रतिवेदन बिइगु, जमिनतले खनेमदुगु ब्वःया सन्दर्भय् थ्व ज्या याकीगु ज्याकुथि व ज्या याइगु उपभोक्ता समितिपाखें लिखित प्रतिवेदन कयाः न्ह्याः वनेगु निर्णय जूगु दु। येँमपां हे कोटेश्वर महाद्यः देगः पुनर्निर्माणया मागया सम्बन्धय् सहलह यानाः सामान्य भिंकेगु ज्यायात निरन्तरता बिइगु बाय् पुनर्निर्माण यायेमाःगु आवश्यकता अध्ययन याइगु जूगु दु।

राष्ट्रियसभाया प्यंगू विषयगत समितिया सभापतिं पद लिसें गोपनीयताया शपथ कयादीगु दु। सङ्घीय संसद् सचिवालयय् थौं ग्वसाः ग्वःगु छगू ज्याझ्लय् राष्ट्रियसभाया नायः नारायणप्रसाद दाहालं वय्कःपिंत शपथ कायेकादीगु खः।

सार्वजनिक नीति लिसें प्रत्यायोजित विधायन समितिया सभापति पूजा चौधरी, सङ्घीयता सबलीकरण लिसें राष्ट्रिय सरोकार समितिया सभापति जयन्तीदेवी राई, विकास, आर्थिक मालिमा लिसें सुशासन समितिया सभापति कृष्णप्रसाद पौडेल व विधायन व्यवस्थापन समितिया सभापति कृष्णबहादुर रोकायांं पद लिसें गोपनीयताया शपथ कयादीगु खः।

लेखनाथ सफू कुथिं नेपाली भाषा व साहित्यय् झर्रो शैलीया छ्यलाबुलाय् योगदान बियादीम्ह साहित्यकार जीवनाथ सुवेदीयात थुगु दँया ‘चुडामणि रेग्मी भाषा साहित्य पुरस्कार’ लःल्हायेत्यंगु दु।

भाषाविद् चुडामणि रेग्मीया हनाय् पलिस्था यानातःगु उगु सिरपाःया दां २५ द्वः जूगु पुस्तकालयया नायः नवराज घिमिरें जानकारी बियादिल।