प्रधानमन्त्री केपी शर्मा ओलीं तिब्बतया सीमालागाय् तसकं वा वःगुलिं रसुवाया ल्हेन्दे खुसिनापनापं भोटेकोशी व त्रिशूली खुसिइ वःगु खुसिबालं प्रभावित जूपिंत उद्धार यायेत सरकार युद्धस्तरय् ज्या यानाच्वनागु धयादीगु दु।

प्रधानमन्त्री ओलीं सामाजिक सञ्जालपाखें उद्धारय् सरकारया पाखें यायेमाःगु कुतलय् छुं नं कथं म्हो मजुइमा धकाः निर्देशन बियागु नापं धयादिल। “थ्व दुःखया इलय् अत्यावश्यक बाहेकं क्वःछिनातयागु ज्याझ्वःत स्थगित यानाः प्रभावित क्षेत्रय् जुया च्वंगु उद्धार ज्याबारे सुरक्षा निकायनाप मदिक्कं रिपोर्टिङ कायाच्वनागु दु”, प्रधानमन्त्री ओलीं धयादीगु दु, “विपद् सम्भावित क्षेत्रय् आपत्कालीन ग्वाहालि थ्यंकेत माःगु समन्वय यानागु दु।

सरकारी निकायतय्सं उद्धारया ज्या यानाच्वंगु दु। थुकी सकसिया ग्वाहालिया अपेक्षा यानाच्वना।” प्रधानमन्त्री ओलीं खुसिबालं गुलिखय् नागरिकया ज्यान वंगु दुसा गुलिखय् बेपत्ता जूगु दुःखया खँत वःगु व तःधंगु भौतिक क्षति जूगु थःत जानकारी वःगु धयादीगु दु। वय्कलं खुसिबालय् मदूपिं नागरिकप्रति श्रद्धाञ्जलि प्वंकादीसें विपदय् दुःखय् लानाःच्वंपिं नागरिकतय्त सहानुभूति प्वंकादीगु दु।

प्रधानन्यायाधीश प्रकाशमानसिंह राउतं सर्वाेच्च अदालतया निंतिं न्हूपिं नियुक्त जुयादीपिं स्वम्ह न्यायाधीशपिंत पद लिसें गोपनियताया शपथग्रहण याकादीगु दु।

सर्वाेच्च अदालतय् थौं ग्वसाः ग्वःगु ज्याझ्वलय् प्रधानन्यायाधीश राउतं न्हू नियुक्त जुयादीपिं न्यायाधीशपिं मेघराज पोखरेल, श्रीकान्त पौडेल व शान्तिसिंह थापायात शपथग्रहण याकादीगु खः। न्याय परिषदया सिफारिसय् संसदीय सुनुवाइ समितिं नां अनुमोदन याये धुंकाः राष्ट्रपति रामचन्द्र पौडेलं सोमबाः वय्कःपिंत सर्वाेच्चया न्यायाधीश नियुक्त यानादीगु खः।

शपथग्रहण लिपा थौं हे स्वम्हं न्यायाधीशपिंसं थःगु भाला कयादीगु दु। अथे हे, प्रधानन्यायाधीश राउतं न्हू नियुक्त जुयादीम्ह न्याय परिषदया दुजः महेशकुमार नेपालयात नं पद लिसें गोपनियताया शपथग्रहण याकादिल। परिषदया नायःया ल्याखं प्रधानन्यायाधीशं न्याय परिषदया दुजः नेपालयात शपथ ग्रहण याकादीगु खः।

रसुवाय् खुसिबाः वयाः बेपत्ता जुयाच्वंपिं १८ म्हेसिगु मालेगु ज्या जुयाच्वंगु दु। सुथय् थ्यंमथ्यं ३ ता इलय् नेपाः–चीन सीमाय् लाःगु ल्हेन्दे खुसिइ खुसिबाः वयाः १८ म्ह मनूत बेवारिस जूगु दु।

बेपत्ता जूपिं खुम्ह नेपाली कामदार, खुम्ह चिनियाँ कामदार, स्वम्ह प्रहरी व स्वम्ह चालक लाःगु रसुवा जिल्ला प्रशासन ज्याकुथिं जानकारी ब्यूगु दु। छम्ह नेपाल प्रहरी व छम्ह सशस्त्र प्रहरी व न्ह्य्यम्ह स्थानीय बासिन्दायात सकुशल उद्धार याःगु रसुवा जिल्ला प्रशासन ज्याकुथिं जानकारी ब्यूगु दु।

गृह मन्त्रालयया कथं मालेगु व उद्धारया नितिं हेलिकप्टर परिचालन याःगु दु। खुसिबाः वयाः नेपाः व चीन सीमा स्वानाच्वंगु मितेरी पुल पूवंक हे क्षति जूगु दु। प्रहरीया कथं विद्युतीय सवारी साधन चार्जिङ स्टेशनय् क्षति जूगु दुसा च्यागः विद्युतीय सवारी साधन खुसिं चुइकाः यंकूगु दु। अथे हे रसुवागढी जलविद्युत केन्द्रय् नं क्षति जूगु दु।

प्रधानमन्त्री केपी शर्मा ओलीयायात त्रिभुवन विश्वविद्यालयया खाली जुयाच्वंगु उपकुलपतिया सिफारिस यायेत नीस्वंगु समितिं म्हिगः स्वम्हेसिया नां सिफारिस याःगु दु।

शिक्षा, विज्ञान लिसें प्रविधिमन्त्री रघुजी पन्तया संयोजकत्वया उगु समितिं प्रधानमन्त्री लिसें कुलपति ओलीया न्ह्यने उगु नां सिफारिस याःगु खः। सिफारिस जूपिंखय् आःया निमित्त उपकुलपति प्रा डा खड्ग केसी, त्रिविया विज्ञान सङ्कायया पूलांम्ह डीन प्राडा विनिल अर्याल व जल लिसें मौसम केन्द्रीय विभागया पुलांम्ह प्रमुख प्राडा दीपक अर्यालया नां दुथ्याःगु दु।

उपकुलपति प्रा डा केशरजङ्ग बरालं बियादीगु राजीनामा वंगु चैत २८ गते स्वीकृत जुइ धुंकाः वंगु चैत ३१ गते कुलपति ओलीं शिक्षाध्यक्ष केसीयात पदपूर्ति मजूतले स्वला तक निंतिं उपकुलपतिया भाला बियादीगु खः।

कुलपति ओलीं वंगु जेठ ६ गते शिक्षामन्त्री पन्तया नायःसुइ राष्ट्रिय योजना आयोगया शिक्षा स्वइम्ह दुजः व शिक्षा मन्त्रालयया सचिव दूगु सिफारिस समिति नीस्वगु खः।

गृहमन्त्री रमेश लेखक व स्वीटजरल्याण्डया विदेशमन्त्री इग्नाजिओ डानियल जिओभान्नी क्यासिस थौं नापलानादीगु दु।परराष्ट्रमन्त्रीया नं भालाः कःघानाच्वनादीम्ह गृहमन्त्री लेखकलिसे स्वीटजरल्याण्डया विदेशमन्त्री क्यासिसलिसेंया प्रतिनिधि मण्डलं नापलानादीगु गृह मन्त्रालयया प्रवक्ता रामचन्द्र तिवारीं जानकारी ब्यूगु दु।

उगु झ्वलय् गृहमन्त्री लेखकं निगू देय् दथुइया मित्रवत् सम्बन्ध, नेपाःया विकास निर्माण व शान्ति प्रक्रियाय् स्वीटजरल्याण्डया ग्वाहालियात च्वछानादिल धकाः वय्कलं कनादिल। प्रवक्ता तिवारीं धयादिल, “उगु झ्वलय् निगू देय्या विकास, आर्थिक मुद्दा, जलवायु ह्यूपाः, विपद् जोखिम व्यवस्थापनय् साझेदारी यायेगुलिसें खँल्हाबल्हा जूगु खः।”

उगु झ्वलय् मेमेगु निगू पक्षीय च्यूताःया विषय नं सहलह जुल धइगु वय्कःया धापू खः।