समाजवादी गणतन्त्र भियतनामया उपराष्ट्रपति भो थि आन सुआन नेपाःया स्वन्हुयंकंया औपचारिक भ्रमण पूवंकाः म्हिगः चान्हय् स्वदेश लिहांझाःगु दु। उपराष्ट्रपति रामसहायप्रसाद यादवया ब्वनाय् वय्कः नेपाः झायादीगु खः।

उपराष्ट्रपति सुआनयात त्रिभुवन अन्तरराष्ट्रिय विमानस्थलया अतिविशिष्ट कक्षय् संस्कृति, पर्यटन लिसें नागरिक उड्डयनमन्त्री बद्रीप्रसाद पाण्डे, परराष्ट्र मन्त्रालयया सचिव अमृतबहादुर राईं बिदाइ यानादिल। उगु झ्वलय् नेपाः सरकारया विशिष्ट श्रेणीया कर्मचारी, सुरक्षा निकायया पदाधिकारीपिनिगु उपस्थिति दूगु खः।

अथे हे, उपराष्ट्रपति सुआनं थःगु सम्मानय् नेपाली सेनां न्ह्यब्वःगु गार्ड अफ अनरया निरीक्षण यानादीगु खः। थ्वहे भदौ ७ गते नेपाः भ्रमणय् झायादीम्ह उपराष्ट्रपति सुआनं राष्ट्रपति रामचन्द्र पौडेल नाप म्हिगः नापलानादीगु खः। अथे हे उपराष्ट्रपति रामसहायप्रसाद यादव नाप प्रतिनिधिमण्डल स्तरीय बैठक यानादीगु खः। प्रधानमन्त्री केपी शर्मा ओली व परराष्ट्रमन्त्री डा आरजु राणा देउवा नं उपराष्ट्रपति सुआनं नापलानादीगु खः।

भियतनामया पाखें नेपालय् जूगु थ्व न्हापांगु उच्चस्तरीय भ्रमण खः। थुगुसी नेपाः व भियतनाम दथुइ कूटनीतिक स्वापू नीस्वंगु ५० दँया वार्षिकोत्सव नापं लाःगुलिं थ्व भ्रमणयात विशेष महत्वबिया स्वःगु दु।

श्री हल्चोक आकाश भैरब गुथिया नायः कथं शेरबहादुर पुतुवार व अर्जुन पुतुवारयात नियुत्ति यागु दु । गुथियारपिनिगु छगु भेलां वयकःपिन्त गुथिया न्हुपि नायः कथं ल्यःगु खः।

वंगु सावन ३१ गते शनिवाः छगु भेलाया दथुइ नियुत्ति यायेगु ज्या जुगु खः ।

गुथिया नायः शेरबहादुर पुतुवार २०५८ सालनिसे जात्राया इलय् हल्चोक आकाश भैरब द्यः जुया वयाच्वंगु खःसा अर्जुन पुतुवार २०६५ सालनिसे जात्राया इलय् हल्चोक आकाश भैरब द्यः जुया वयाच्वपि खः ।

शाक्य समुदाययात संगठित याना न्ह्याका च्वंगु शाक्य महाविहार संघया झिदँ बुदिं छगू ज्याझ्वः याना हंगु दु। बागमति प्रदेशया सांसद नुरज बज्राचार्य मूपाहाँ कथं झायादीगु उगु ज्याझ्वः संघया अध्यक्ष शुभकाजी शाक्यया सभाध्यक्षताय् जूगु खः।

ज्याझ्वलय् मूपाहाँ बज्राचार्यं झीगु बहाः बही धइगु बौद्ध धर्मया म्हसिका जक मखसे येँ देयया हे ज्वमदुगु म्हसिका खः धका धयादिसे बहाबहीया नापनापं बौद्ध धर्मया संरक्षण व प्रवद्र्दन यायेगु ज्याय् शाक्य महाविहार संघपाखें छिनाच्वंगु पलाःया तारीफ याना दिल। वयकलं शाक्य महाविहार संघ लगायत बुद्ध धर्मलिसे स्वापु दुगु संघ संस्थायात माःगु कथं ग्वाहालि यायेत थः गबलें लिचिले मखु धका धयादिल।

संघया महासचिव संघरत्न शाक्यं लसकुस नुगःखँ तया न्ह्याकदीगु उगु ज्याझ्वलय् संघया सल्लाहकार तेजरत्न शाक्य व कानून सल्लाहकार ज्ञानकुमार शाक्य पिन्सं नं नुगः खँ तयादीगु खः।

हिन्दु धर्मालम्बि पिनिगु महान पर्व हरितालिका तिजया लसताय् उपमा सञ्चार प्रा. लि. व तेज नेपाल मल्टिमिडिया प्रा.लि. मंकाः ग्वसालय् चलचित्र विकास बोर्डय् जूगु “तीज विशेष नारी सम्मान तथा सांस्कृतिक कार्यक्रम–२०८२“ तजिक क्वचाल। भूमि व्यवस्था सहकारी लिसे गरिबी निवारण मन्त्री माननीय बलराम अधिकारी मूपाहाँ कथं झायादीगु उगु ज्याझ्वः उपमा सञ्चार प्रालिया अध्यक्ष आशा गौतम सभाध्यताय् जूगु खः।

ज्याझ्वलय् विशिष्ट पाहाँ कथं प्रतिनिधि सभा सदस्य मनरुपा शर्मा’ झायादीगु खः।ज्याझ्वलय् संकिपा, संगीत, कला, साहित्य, शिक्षा, खेल राजनीति, व्यवसाय व सामाजिक सेवाया क्षेत्र ज्वमदुगु योगदान बियादीपिं निगु दर्जन नारी सर्जकपिन्त “तीज विशेष नारी सम्मान–२०८२“ देछागु खः।संगीतख्यःया न्ह्यलुवाः नांजाम्ह गायिका ज्ञानु राणा, विशिष्ट अभिनेत्री मिथिला शर्मा, विशिष्ट अभिनेत्री लक्ष्मी गिरि, विशिष्ट अभिनेत्री रमा थपलियायात तिज विशेष नारी दीर्घ सम्मानपाखे सम्मानित याःगु खःसा। अथेहे कलाकार पल्पसा डंगोल व पत्रकार मीना बज्राचार्ययात नं उगु सम्मान देछागु खः।

ज्याझ्वलय् म्येहालामिपिं पबित्रा रसाइली, शर्मिला गुरुङ, लक्ष्मी न्यौपाने, माया निरासी, पुष्पा पौडेल, सरिता भारती, अभिनेत्री हिउँवाला गौतम, सुनिता गुरुङ पत्रकार भाषा शर्मा, पुनम पौडेल, प्रतिमा सैजु, गीता अधिकारी, सिर्जना खतिवडा अले अभियन्ता जलु गुरुङ, पुर्व प्रहरी निरीक्षक, राष्ट्रिय जनसास्कृतिक महासंघ नेपाःया न्हापांम्ह महिला अध्यक्ष व कलाकार भुमिका सुब्बा, पुर्व प्रहरी स ई नृत्याङ्गना कल्पना गुरुङ, राष्ट्रिय खेलाडि नेपालया न्हापांम्ह मिसा रेस्लर भगवती खडका, रेस्लर मुना श्रेष्ठ, व्यवसायी मञ्जु तिमिल्सिना लगायतयात तीज विशेष नारी सम्मानपाखें सम्मानित याःगु खः।

उगु ज्याझ्वलय् संकिपा सेन्सर बोर्डया नवनियुक्त सदस्य सम्पन्न श्रेष्ठ, भिमा मैनाली व कुबेर गिरी, चलचित्र बिकास बोर्डया नवनियुक्त सदस्य बिरेन्द्र प्रसाद भट्ट, सन्तोष लोहनी, व गणेश प्रसाद सुवेदीयात बधाई पत्रपाखें सम्मानित याःगु खः। तेज नेपाल मल्टि मिडिया या अध्यक्ष सुमनकुमार श्रेष्ठं लसकुस न्वचु तयादीगु उगु ज्याझ्वलय् सम्मानितपाखें विशिष्ट अभिनेत्री मिथिला शर्मा व न्ह्यलुवाः गायिका ज्ञानु राणा नं नुगः खँ तयादीगु खः।

विश्व सम्पदा धलखय् लानाच्वंगु यलया लायकू लागाय् मल्लकालीन इलय् निर्माण यानातःगु छगः ऐतिहासिक गं दु।

विसं २०७२ सालया भुखाचं क्षति याःगु गंंयात पुननिर्माण मयागुलिं आः जीर्ण जुजुं वनाच्वंगु व आः वयाः गं थायेके तकं मबिइ धुंकूगु दु। स्वनिगःया लायकूलि तयातःगु गं मध्ये यलया थ्व गं दकसिबे तग्वःगु तायेकातःगु दु। स्थानीयया कथं भुखाचं क्षति याये धुंकाः थ्व पूर्वपाखे धेचूया वंगु दु। जीर्ण अवस्थाय् लानाच्वंगु थ्व गं न्ह्यागु नं इलय् क्वःदयेपूmगु अवस्थाय् दु।

ऐतिहासिक गं जीर्ण अवस्थाय् दूगुलिं पुननिर्माणया माग तसें पुरातत्व विभाग व युनेस्कोयात पौ छ्वये धुंकूगु पाटन दरबार स्क्वायर टोल सुधार समितिया नायः किरणमान प्रधानं धयादिल। वय्कलं धयादिल, “जिमिसं पुननिर्माणया निंतिं सम्बन्धित निकाययात ध्यानाकर्षण याकागु दु। आः तक छुं पहल धाःसा जूगु मदु।” मल्लकालीन इलय् पलिस्था याना तःगु उगु गं १७६९ सालय् निर्माण जूगु तायेकातःगु दु।

विसं २०७२ या भुखाय्या इलय् थ्व गं मन्यागु धका स्थानीय उपेन्द्रकुमार श्रेष्ठं धयादिल। विशेष कथं दँय् दसं मोहनीया नःलास्वां तइकुन्हु निसें चालं तक थ्व गं थानाः पुजा यायेगु याइ। वय्कःया कथं राणाकालीन इलय् यलया सकल मनूत द्यनेमाः धइगु मान्यता कथं चान्हसिया १२ः०० ताः इलय् थ्व गं थाइगु खः। गं थाये धुंकाः चान्हय् १२ः०० ताः ई लिपा सुं नं छेँनं पिहां वनेमज्यु। अले सुथसिया ४ः०० ताः इलय् हाकनं गं थाइ, उकिया लिपा सकलें दनाः थःथःगु ज्याये वनी। गंया जगय् सतलय् पसः तयातम्ह छम्ह स्थानीयया कथं वय्कःया बाज्यां १९५८ सालनिसें थन पसः तयातःगु खः।

वय्कलं धयादिल, “सच्छि दँ न्ह्यःनिसें बनेज्या याना वयाच्वनागु दु। थ्व गं भुखाचं यानाः जीर्ण अवस्थाय् थ्यंगु दु। यल लायकूया फुक्क धयाथें सम्पदा महानगर व पुरातत्व विभागं पुननिर्माण याये धुंकूगु दु।” ऐतिहासिक गंया जगय् पसः पिकानाः स्थानीयतय्सं पुस्तौँनिसें व्यापारिक प्रयोजनया निंतिं छ्यलावयाच्वंगु दु। उगु पसः चिइका मछ्वतले ऐतिहासिक गं पुननिर्माण याये फइगु खनेमदु । थुकिया संरक्षणया निंतिं यल महानगरपालिका, पुरातत्व विभागलिसें सम्बन्धित निकायया ध्यान मवंगु स्थानीयया ध्याचू दु। गुठी संस्थान यलया कार्यकारी प्रमुख जितेन्द्र चित्रकारया कथं यल लायकू लागाय् छुं स्थानीयतय्सं नं पुस्तौँनिसें बनेज्या याना वयाच्वंगु दु।

वय्कलं धयादी, “बनेज्यामि तय्सं पुस्तौँन्ह्यःनिसें बनेज्या याना वयाच्वंगुलिं सम्झौता कथं जिमिसं बनेज्या यायेदयेमाः धकाः धयाच्वंगु दु। व्यापारिक प्रयोजनया निंतिं दयेकातःगु थाय् चिइके मफुतले ऐतिहासिक गं पुननिर्माण यायेगु सम्भव मजू।”