उपराष्ट्रपति रामसहायप्रसाद यादवलिसे नेपाःया निंतिं युरोपेली सङ्घया राजदूत भेरोनिक लोरेन्जों नापलानादीगु दु।

येँ लैनचौरय् च्वंगु उपराष्ट्रपतिया ज्याकुथिइ थौं नापलानाः निगूपक्षीय सम्बन्धया थी थी आयामबारे खँल्हाबल्हा जूगु उपराष्ट्रपतिया ज्याकुथिं धाःगु दु। उपराष्ट्रपति यादवं नेपाः व युरोपेली सङ्घ (इयु) दथुइ सन् १९७४ निसें स्थापित मैत्रीपूर्ण सम्बन्धयात नेपालं उच्च महत्त्व बियावयाच्वंगु खँ कनादिल।

“नेपाः व इयुदथुइया दीर्घकालीन मित्रता व सहकार्ययात अझ क्वातुकूगु भलसा कयाच्वनागु दु”, वय्कलं धयादिल, “इयु नेपाःया प्रमुख विकास साझेदार जुयावयाच्वंगु खः।” स्वास्थ्य, शिक्षा, खानेपानी, सुचुकुचुलिसें ग्रामीण विकासया ख्यलय् युरोपेली सङ्घ समर्थित ज्याझ्वःया उपयोगितायात च्वछानादिसें वय्कलं कर्णाली प्रदेशय् इयुया ग्वाहालि अन्तर्गतया आयोजनां दुर्गम थासय् च्वंपिं जनतातय्त तसकं फाइदा जूगु खँ कनादिल।

‘सगरमाथा संवाद’ या महत्त्वबारे खँ न्ह्यथनादिसें उपराष्ट्रपति यादवं ‘जलवायु ह्यूपाः, च्वापुगुँ व मानवया भविष्य’ बारे विश्वस्तरीय बहसया ताःतयाः स्थापना याःगु संवाद दबूया आः जुइगु संस्करणया आयोजना मे १६–१८, २०२५ य् येँय् जुइगु जानकारी नं बियादिल। नेपाःया निंतिं युरोपेली सङ्घया राजदूत भेरोनिक लोरेन्जों नेपाः व युरोपेली सङ्घदथुइया सम्बन्ध लिपांगु इलय् अझ क्वातुनावनाच्वंगु धकाः धयादिल।

“युरोपेली सङ्घ वातावरण व जलवायु ह्यूपालय् लगानी याये मास्ति वयेका च्वंगु दु”, वय्कलं धयादिल। राजदूत लोरेन्जों दूधकोशी हाइड्रोपावरय् इयु लगानी यायेत इच्छुक जूगु कनादिसें नेपाःया कर्णाली व मधेस प्रदेशय् नवीकरणीय ऊर्जा ख्यलय् लगानी यायेगु व मधेस प्रदेशया शिक्षा ख्यलय् ग्वाहालि यायेगु धकाः धयादिल।

यल महानगर प्रमुखयात युरोपेली युनियनया राजदूत भेरोनिक लोरेन्जों नापलानादीगु दु। महानगरया प्रमुख चिरीबाबु महर्जन व राजदूत लोरेन्जो दथुइ म्हिगः महानगरप्रमुखया ज्याकुथिइ नापलानादीगु खः।

यलया विकास निर्माण व युरोपेली युनियननापया स्वापूया बारेय् सहलह जूगु महानगर प्रमुख महर्जनं धयादिल। “राजदूत भेरोनिक लोरेन्जोनापया खँल्हाबल्हा तसकं सौहार्दपूर्ण जुल, महानगरय् जूगु ज्याया बारे वय्कलं ध्यानबियाः खँ न्यनादिल, जिमिसं सम्पदा संरक्षण, वातावरण संरक्षण, हरियाली प्रवद्र्धनया ख्यलय् यानागु थीथी ज्याया बारे मंतया न्यनादिल, थःथवंय्या हितया बिषय तसकं ज्यालगे जूगु सहलह जुल”, वय्कलं धयादिल।

महानगर प्रमुख महर्जनं सामाजिक विकासयात महानगरं प्राथमिकताय् तयाः ज्या यानागु धयादिसें विपद् व्यवस्थापनया ख्यलय् देय्या फुक्क नगरपालिका मध्ये यलं बांलाक्क ज्या यानाच्वनागु धयादिल। युरोपेली युनियनया राजदूत लोरेन्जों महानगर प्रमुख महर्जनं महानगरया विकासय् याःगु प्रगति, दूरदर्शिता व प्रतिबद्धता च्वछायेबहःगु बिचाः तयादिल।

वय्कलं समाजय् सकारात्मक ह्यूपाया नितिं सक्रिय जुयाः ज्या यानाच्वंगु महानगरया प्रमुखनाप नापलानाः खँ ल्हायेदयाः थः तसकं लय्तानागु धयादिल।महानगरया लुमूगु पाहाँसुया नितिं सुभाय् देछासें राजदूत लोरेन्जों थनया नागरिकया हित व समग्र विकासया नितिं ग्वाहालि यायेगु प्रतिबद्धता प्वंकादिल। वय्कलं नेपाः व युरोपेली युनियन दथुया स्वापूयात क्वातुकेत ग्वाहालि यायेगु बिचाः तयादिल।

नापलायेगु झ्वलय् ‘युरोप डे २०२५’या बारे नं सहलह जूगु खः। दँय्दसं मे ८ य् युरोप डे न्यायेकी। थुगुसिइ युरोप डेया दिं यल सङ्ग्रहालय् ज्याझ्वः ग्वसाः ग्वयेगु सन्दर्भय् सहलह जूगु महानगरया प्रमुख प्रशासकीय अधिकृत रेखा दास श्रेष्ठं धयादिल।

शिक्षा प्रेमी, समाजसेवी रविन्द्र महर्जनया अबु ज्ञानलाल महर्जन व मां सानुमाया महर्जनया जंक्वया लसताय् जूगु भ्वजय् प्रचलित नेपाल लिपि, भुजिंमोल लिपि नापं रञ्जना लिपिया वर्णमाला पिकायेगु नितिं लिपि थपू गुथि यलयात छगू लखया चेक लःल्हाःगु दु।

शनिवाः भ्वजया दथुइ जूगु ज्याझ्वलय् लिपि थपू गुथिाय नायः धर्मकृष्ण सिकःमियात रविन्द्र महर्जनं उगु चेक लःल्हानादीगु खः। लिपि थपू गुथियात रन्जना लिपि, प्रचलित लिपि व भुजिमोल लिपिया बर्णमाला सफू पिकायेगु नितिं उगु कथंया चेक लःल्हानागु खः धकाः रविन्द्र महर्जनं कनादीगु दु ।

सच्छिम्ह म्हो भ्वय् नका भ्वय् नकेगु इलय् जुइगु खर्चयात हे छगू लख कथं अथे लःल्हानागु खः धकाः महर्जनं कयादीगु दु ।

अथे चेक लःल्हाःगु ज्याझ्वलय् नेपाली काङ्रेसया केन्द्रीय दुजः माननिय मदन बहादुर अमात्य, केन्द्रीय दुजः अजयबाबु शिवाकोटी ,बागमती प्रदेश सभा दुजः माननिय राम कृष्ण चित्रकार, यल महानगरपालिकाया मेयर चिरिबाबु महर्जन, गोदावरी नगरपालिकाया प्रमुख गजेन्द्र महर्जन, महालक्ष्मी नगरपालिकाया उपप्रमुख लक्ष्मी महर्जन लगायत पत्रकारपिनिगु उपस्थितिइ गुथिया नायः धर्मकृष्ण महर्जनयात चेक लःल्हायेगु ज्या याःगु खः।

नेपाली कांग्रेसया सभापति शेरबहादुर देउवां येँ कांग्रेसया पूर्वसभापति तीर्थराम डङ्गोल मदुगु खबरं थःगु नुगः मछिंगु धयादीगु दु।

नेता डङ्गोल मदुगुलिं थौं शोक वक्तव्य पिकयादिसें वय्कलं “नेपाली कांग्रेस येँया पूर्वसभापति, पूर्वस्वास्थ्य राज्यमन्त्री, देय्या लोकतान्त्रिक आन्दोलनया योद्धा डङ्गोल मदुगु खबरं जि तसकं दुखित जुयाःगु दु। वय्कलं कांग्रेसया सङ्गठन निर्माण व देय्या लोकतान्त्रिक आन्दोलनय् म्हितादीगु नेतृत्वदायी भूमिका पार्टीं गबलें ल्वःबंकेफइ मखु ।”

सभापति देउवां दुःखंकःपिं छेँजःपिंत हार्दिक समवेदना प्वंकादीगु दु। नेता डङ्गोल शुक्रबाः बहनी ७७ दँय् मदुगु खः।

वय्कःया सीम्हयात थौं सुथसिया ११ः०० ता इलंनिसें हे पार्टीया केन्द्रीय ज्याकुथिइ श्रद्धाञ्जलीया निंतिं तयातःगु खः। न्हिनेसिया १ः०० ता ईतक शव अन हे तइगु कांग्रेस केन्द्रीय ज्याकुथिया मुख्यसचिव कृष्णप्रसाद पौडेलं जानकारी बियादिल।

न्हिनेसिया २ः०० ता इलय् येँया टेकु दोभानय् वय्कःयात दाहसंस्कार याइ ।सभापति देउवां नेता डङ्गोलया सीम्हय् पार्टीया ध्वाँय् फायेकाः श्रद्धाञ्जली देछानादिल।

चन्द्रागिरि नगरपालिकाया दिगो विकास आज्जुया स्थानीय स्वैच्छिक मूल्याङ्कन प्रतिवेदन (नेपाली संस्करण) व कार्ययोजना ढाँचा सार्वजानिक याःगु दु।

चन्द्रागिरि नगरपालिकाया प्रमुख घनश्याम गिरीं ‘चन्द्रागिरि नगरपालिकाया ‘दिगो विकास आज्जुया स्थानीय स्वैच्छिक मूल्याङ्कन प्रतिवेदन’यात संयुक्त राष्ट्र सङ्घय् प्रस्तुत याय ेधुंकूगु दु । नगरपालिकां स्थानीय स्वैच्छिक मूल्याङ्कन प्रक्रियाय् दिगो विकास आज्जु मध्ये बांलाःगु स्वास्थ्य व समृद्धि, समावेशी नापं समानतामूलक गुणस्तरीय शिक्षाया सुनिश्चितता, लैङ्गिक समानता, स्वच्छ खानेपानी, सुचुकुचु व दिगो शहर व समुदायथेंजाःगु न्यागू ख्यःयात मुख्य प्राथमिकता बियातःगु खः।

थुगु प्राथमिकताय् लाःगु ख्यलं आज्जुइ थ्यंकेत नगरपालिकाया ज्याझ्वलं पाय्छिगु लँपुइ यंकूगु दु। नगरपालिकां दिगो विकास आज्जुलिसे तालमेल मिले यानातकःगु बजेट साङ्केतिकरणया अभ्यास न्ह्याके धुंकूगु दु। थ्व अभ्यास एशिया प्रशान्त लागाय् हे छगू नवप्रवर्तनीय अभ्यास कथं तायेकातःगु दु।

नगरपालिकाया सभाकक्षय् नकतिनि धइ थें ग्वसाः ग्वःगु ज्याझ्वलय् चन्द्रागिरि नगरपालिकाया प्रमुख घनश्याम गिरी, प्रमुख प्रशासकीय अधिकृत सुरेन्द्र थापा मगर, युएन ह्याविट्याटया प्रतिनिधि प्रज्ञा प्रधान लिसेंतय्सं ‘दिगो विकास आज्जुया स्थानीय स्वैच्छिक मूल्याङ्कन प्रतिवेदन’ (नेपाली संस्करण) व कार्ययोजना ढाँचा सार्वजनिक यानादिल।

उगु झ्वलय् नगरप्रमुख गिरीं समृद्धिया आधार भौतिक पूर्वाधारया नापनापं आर्थिक, सामाजिक व प्रविधियुक्त समाज जूगु धयादिल । वय्कलं धयादिल, “जिं चन्द्रागिरि नगरपालिकाया दिगो विकास आज्जुया स्थानीय स्वैच्छिक मूल्याङ्कन प्रतिवेदन संयुक्त राष्ट्र सङ्घय् प्रस्तुत यायेधुंनागु दु। दिगो विकासया थी थी आज्जुतमध्ये न्यागू ख्यलय् नगरपालिकां उच्च प्राथमिकता बियातःगु दु। आज्जुइ थ्यंकेत नगरया नीति, ज्याझ्वः व बजेट केन्द्रित जू।