प्रधानमन्त्री केपी शर्मा ओलीं आधुुनिक, प्राविधिक व गुणस्तरीय शिक्षाया लक्ष्य निर्धारण याना शिक्षा बिइत मध्यपश्चिम विश्वविद्यालययात इनाप यानादीगु दु।

प्रधानमन्त्री निवास बालुवाटारय् जुगु ज्याझ्वलय् विश्वविद्यालयय् १५ क्वःगु सभाय् कुलपति ओलीं देशय् शैक्षिक उन्नयनय् माःगु योगदान बिइगु कथं ज्या यायेत इनाप यानादीगु खः।

प्रधानमन्त्री ओलीें नेपाःया राज्य प्रणालीया जग इतिहासनाप स्वागु कर्णाली प्रदेशयात न्हुगु जागरण बिइगु कथं थुगु विश्वविद्यालयं ज्या यायेमाः धका बः बियादीसे सरकारया दक्को ध्यान देय् सकारात्मक रुपान्तरण व विकास यायेगु धका स्पष्ट यानादीगु खः।

सभाय् न्ह्यब्बगु नीति, कार्यक्रम व बजेटलगायतया कार्यसूची सम्बन्धी प्रस्तावय् सहलहय् शिक्षा, विज्ञान लिसे प्रविधिमन्त्री नाप सहकुलपति विद्या भट्टराईया सभाध्यक्षताय् जुगु खः।

विश्वविद्यालयया उपकुुलपति प्रा डा ध्रुवकुुमार गौतमं १३१ शिक्षकया दरबन्दी स्वीकृतिया निति इनाप यानादीगु खः।

प्रधानमन्त्री केपी शर्मा ओलीं ‘समृद्ध नेपाल, सुखी नेपाली’ या राष्ट्रिय आकाक्षाय् ग्वहालि यायेगु कथं अनुसन्धान याना नीतिगत सुझाव बिइत नीति अनुसन्धान प्रतिष्ठानया पदाधिकारी तयेत इनाप याःगु दु।

प्रधानमन्त्री लिसे मन्त्रिपरिषदया कार्यालय, सिंहदरबारय् जुगु प्रतिष्ठानया पदाधिारीपि नाप जुगु सहलहय् प्रधानमन्त्री ओलीं सरकारया लक्ष्य व विकास नाप स्वागु मन्त्रालय व विश्वविद्यालय नाप संयोजन याना अनुसन्धान जुइ मागुलि बः बियादीसे प्रमाणया आधारय् जक नीति तर्जुमा यायेमाः धका धयादीगु खः।

अनुसन्धान प्रतिष्ठान थः याकचा जक ज्या याना लिच्वः वइ मखु व देशय् माःगु सम्बोधन जुइ मखुलि अनुसन्धान व उच्चतम् प्रविधिया नाप देशया विकास यायेत सरकारया प्राथमिकता दु धका धयादीगु खः।

प्रतिष्ठानया कार्यकारी अध्यक्ष डा लेखनाथ शर्मा न थीथी मन्त्रालयया समन्वयय् आःतक ५० गु अनुसन्धान याये धुकुगु जानकारी बियादीगु खः। प्रधानमन्त्री ओलीं न्हापागु कार्यकालय् उगु प्रतिष्ठानया स्थापना यानादीगु खः।

लुँया भाः आःतक हे दकलय् अप्पो थ्यःगु दु। लुँ तोलां च्यासः थहावना थौ १ लाख ५३ हजार १ सय तका थ्यःगु दु धका नेपाल सुनचाँदी व्यवसायी महासंघं धाःगु दु।

अथेहे वहः तोलां न्यातका थहावःगु दु। वहः तोलां न्यातका थहावना थौ १ हजार ८ सय ५५ तका थ्यःगु दु महासंघं धाःगु दु।

मुस्ताङय् हाकन हिमपहिरो वंगु दु। थासाङ गाउँपालिका–२ बोक्सीखोलाया च्वय् म्हिगः बहनि ६ बजे हाकन हिमपहिरो वंगु दु।

थासाङया बोक्सी खोला च्वय् छिप्लुङ लेक जूया धौलागिरि हिमालया फेदं चलः वःगु खः। मुस्ताङया प्रहरी नायब उपरीक्षक भोजराज पाण्डेय न न्हापा न चलः वगुलि मेगु हाकन वःगु धका जानकारी बिउगु दु।

थ्व स्वया न्ह्यः भदौ ६ गते न्हिनय् थासाङया बोक्सी खोलाया लेकय् हिमालया फेदपाखे हिमपहिरो वंगु खः। उगु चलः वसा अन च्वंगु बस्तीइ जोखिम मजुगु व अन च्वना च्वपिन्त सुरक्षित थासय् यकिइगु धका थासाङ गाउँपालिका अध्यक्ष प्रदिप गौचनं जानकारी बियादीगु दु।

नेपालभाषा मिसा खलःया स्वीन्यादँ बुदिं छगु ज्याझ्वः दथुइ तःजिक हंगु दु। उगु ज्याझ्वलय् थीथी व्यक्तिपिन्त सिरपाः व सम्मान याःगु दु।

मूपाहाँ कथं नांजाःम्ह पर्यटन व्यवसायी लिसें संरक्षणविद् कर्ण शाक्यं ज्याथम्ह साहित्यकार फणीन्द्र वज्राचार्य, भाषा आयोगया दुजः मा.सुरेश मानन्धर, स्वर्ण पदक विजेता कासामि केदारश्वरमान स्थापित, थँजिम्ह आजिवन जः जलेश्वरी श्रेष्ठ व निवर्तमान नायः मंगला कारंजितयात सम्मान याःगु खः।

अथे हे कमला लुमिन नेपालभाषा हःपाः सिरपाः दाता कमला लुमिन कुमारं च्वमि भवानी तुलाधरयात व रमा–कौशल्या लुमंति सिरपाः दाता मथुरा साय्मिं सिस्टर बिकुमाया कारंजित श्रेष्ठयात लःल्हानादीगु खः। मूपाहां शाक्यं नेवाः मिसापिंके नं अथाह शक्ति सुलाच्वंगु दु धासें थः मां व जहानपाखें प्राप्त जूगु प्रेरणाया प्रशंग कनादिगु खः।

लिसें वय्कलं ७५ दँया वैंशय् थःगु व्यवसाय फुक्क काय् म्ह्याय्पिंत त्वःताः थः न्हूगु चिन्तनय् लगे जुयागु व माल धाःसा उमेर वंसां नं ज्या यायेफु धइगु प्रेरणाया खँ नं कनादिगु खः। ज्याथम्ह साहित्यकार फणीन्द्ररत्न वज्राचार्यं नेपालभाषा मिसा खलः मिसापिनि संस्था खःसां थः मिजंम्ह मनूयात नं हंगुलिं लसता प्वंकादिल ।

मिसा खलःया नायः धर्मशोभा तुलाधरया सभाध्यक्षताय् जूगु उगु ज्याझ्वलय् नेवाः देय् दबूया नायः पवित्र वज्राचार्य, श्रद्धाचारी गुरुमां, मिसा खलःया पुलांम्ह नायः सुवर्णकेशरी चित्रकारपिन्स नं नुगँ खँ तयादीगु खः।