सरकारं लुँ वहःया भावय् भन्सार महसुल घटे यायेवं थौ १५ हजार ९ सय तका घटे जूगु दु।

म्हिगः १ लाख ६७ हजार २ सय तका थ्यःगु खःसा थौ १५ हजार ९ सय तका घट जूया १ लाख ५१ हजार ३ सय तका कायम जूगु दु धका नेपाल सुनचााँदी व्यवसायी महासङ्घं धाःगु दु।

अथे हे वहः तोलां न १ सय १५तका घटे जूगु दु। वहः तोलां १ हजार ८ सय ४५ तका थ्यःगु दु धका महासङ्घं धाःगु दु।

सरकारं लुँ या भन्सार दर २० प्रतिशतं  १० प्रतिशत याःगु दु सा वहःया भन्सार महसुल दर १५ प्रतिशतं १० प्रतिशत याःगु खः।

सभामुख देवराज घिमिरें कम्बोडियाया प्रधानमन्त्री सम्देच हुन मानेट व च्वयागु सदन सिनेटया अध्यक्ष सम्देच हुन सेनयात नापालागु दु।

प्रधानमन्त्री सम्देच हुन मानेटनाप कम्बोडियाया पिस प्यालेसय् नापलाना निगु देय् दथुइ ऐतिहासिक सम्बन्धयात न्हुगु कथं महत्वपूर्ण विषय सहलह जुगु दु धका सभामुखया सचिवालयं धाःगु दु।

नापलायेगु झ्वलय् सभामुख घिमिरे न नेपाःया बुद्ध जन्म जुगु लुम्बिनी व कम्बोडियाया अंगकोरपाखे हिन्दू व बौद्ध सम्पदायात प्रवर्द्धन यायेगु कथं प्रत्यक्ष हवाई सेवा सुरु यायेमाःगुलि बः बियादीगु खः।

थुकियाना धार्मिक पर्यटन व सांस्कृतिक आदानप्रदान यायेत अझ प्रोत्साहन जुइ धका सभामुख घिमिरे न भलसा कयादीगु दु। नेपाः व कम्बोडिया दथुइ २०७५ सालय् हे हवाइ सम्झौता जुगु खः।

सभामुख घिमिरें नेपाः भ्रमणया निति कम्बोडियाया प्रधानमन्त्रीयात औपचारिक कथं ब्बनादीगु दु।

प्रधानमन्त्री केपी शर्मा ओलीं चीन भ्रमण वने न्ह्यः पूर्वप्रधानमन्त्री, पूर्वपरराष्ट्रमन्त्री व मन्त्रीपि नाप सहलह याइगु जुगु दु।

सहलह यायेगु निति थौ सुथय् ११ बजे प्रधानमन्त्री लिसे मन्त्रिपरिषदया कार्यालय सिंहदरबारय् याइगु जुगु द

। प्रधानमन्त्री ओली थ्व हे मंसिर १७ गते चीन भ्रमणमा वनिइगु जुगु दु। चीन भ्रमण वनेगु झ्वलय् अन तयेगु एजेण्डाबारे प्रधानमन्त्री ओलीं सहलह याइगु जुगु दु धका प्रधानमन्त्रीया सचिवालयं धाःगु दु।

न्यान्हुया कम्बोडिया भ्रमणय् झाःम्ह सभामुख देवराज घिमिरें अनया संसदलिसे स्वापू दुपिं नाप लायेगु ज्या न्ह्याकादिइगु दु।

सभामुख घिमिरें शनिबाः बहनी कम्बोडियन समकक्षी क्वय्या सदन नेसनल एसेम्ब्लीया नायः नाप लानादीगु सभामुख घिमिरेया सचिवालयं धाःगु दु। थुकी निगू पक्षया हित, नेपाःया शान्ति प्रक्रियाया प्रगति, संसदीय कालबिललिसें विषयकय् सहलह ब्याकेगु ज्या जूगु खः।

सभामुख घिमिरें शनिबाः हे कम्बोडियाया राष्ट्रियसभाया नायः सम्देच मोहा रथसपिथिकाथिपादेई खुऔन सुदारीलिसे खँल्हाबल्हा यानादिल। सभामुखं सहिष्णुता व शान्तिया निंतिं अन्तर्राष्ट्रिय संसद्या ११ क्वःगु पूर्ण सत्रया ग्वसाः ग्वयाः ब्वनादीगुलिं सुभाय् नं देछानादिल। सभामुख घिमिरें नेपाःया शान्ति प्रक्रियालिसें समावेशी व प्रगतिशील संरचना निर्माण जूगु खँ कनादीगु खः।

“नेपालय् सन् २००६ य् जूगु विस्तृत शान्ति सम्झौतां स्थायित्व हयेगु नापं संविधानसभापाखें सङ्घीयतालिसेंया समावेशी व प्रगतिशील संरचना दयेकेत माःगु योगदान जूगु दु”, सभामुखं धयादिल। नेपाःया शान्ति प्रक्रियाय् हासिल जूगु सफलता व संसद्पाखें आः नकतिनि थें हे सङ्क्रमणकालीन न्यायसम्बन्धी कानुन पारित याःगु धासें सभामुखयात कम्बोडियन संसदं ‘गार्ड अफ अनर’ देछाःगु दु।

सभामुखं प्रधानमन्त्री सम्देच हुनमानेटया नेतृत्वय् कम्बोडियां सामाजिक–आर्थिक विकास याःगुलिं लसता प्वंकादिल। वय्कलं धयादिल, “वंगु दशकय् कम्बोडिया अधिराज्यं ताःलाकूगु आर्थिक समृद्धिइ नेपाः सरकार, नेपाःया संसद् व नेपाःमितय्सं च्वछायेगु याइ।” सभामुख घिमिरें नेपाः व कम्बोडिया सरकारदथुइ नकतिनि धैथें जूगु हवाई सेवा सम्झौतां निगुलिं देय्या जनतातय्गु सम्बन्ध व सम्पर्कयात धिसिलाकेत ग्वाहालि जुइगु भलसा कयादिल।

सभामुख घिमिरें सुथय् प्रधानमन्त्री हुनमानेटलिसे अनौपचारिक कथं नाप लानादीगु दु। न्याम्ह दुजःया प्रतिनिधिमण्डलया नेतृत्व यासें कम्बोडियाया राजधानी नोम पेन्ह झाःम्ह सभामुखं सहिष्णुता व शान्तिया निंतिं अन्तर्राष्ट्रिय संसदया ११ क्वःगु पूर्ण सत्रय् संबोधन याइगु ज्याझ्वः दु। सभामुख वइगु मङ्सिर ११ गते मङ्गलबाः देय् लिहाँझाइ। (रासस)

सहरी विकास मन्त्रालयं स्वनिगःया फोहर व्यवस्थापनय् खनेदूगु समस्या ज्यंकेत सरोकार दुपिंलिसे सहलह ब्याकूगु दु।

मन्त्रालयय् जूगु ‘बन्चरेडाँडा स्यानिटरी ल्याण्डफिल साइट सञ्चालनय् अःपुकेत, समन्वय व अनुगमन यायेत दयेकूगु उच्चस्तरीय समिति’या मुँज्यां स्वनिगःया फोहर व्यवस्थापनय् खनेदूगु समस्या ज्यंकेत थी थी निर्णय यात।मुँज्याय् उपप्रधानमन्त्री नापं सहरी विकासमन्त्री प्रकाशमान सिंहं स्वनिगःया फोहर व्यवस्थापनय् खनेदूगु हाथ्या व समस्या सकसिगु नं सरोकारया विषय जूगुलिं ज्यंकेत सकलें मिले जुयाः न्ह्याःवनेमाःगु धयादिल।

विसं २०७८ फागुन २६ गतेया मन्त्रिपरिषद्या मुँज्यां उगु समिति नीस्वंगु खः। उपप्रधानमन्त्री सिंहं धयादिल, “फोहर व्यवस्थापनय् सकसिनं माःगु मापदण्ड नालेमाः। फोहरया ब्वथला, हाकनं छ्यलेगुलिसेंया विषयकय् सकसिनं ध्यान बिइमाः । थुकिइ मन्त्रालयं माःगु ग्वाहालि व समन्वय याइ।” उपप्रधानमन्त्री सिंहं ल्याण्डफिल साइटया स्थानीयतय्सं तःगु माग संबोधन यायेत उकिया विकल्पया बारे सहलह यानाः न्ह्याःवने फइ धयादिल।

थुकिइ खनेदूगु समस्या ज्यंकेत स्वंगुलिं तगिंया सरकार मिले जुयाः न्ह्याःवनेमागुलिं वय्कलं बः बियादिल। उगु सहलह बारे खँ कनादिसें मन्त्रालयया सचिव मणिराम गेलालं स्वनिगःया फोहर व्यवस्थापनया नेतृत्व येँ महानगरपालिकां काइगु न्ह्यथंसें स्थानीयतय्गु जायज माग व्यवस्थापन यायेत थी थी न्वाखँत वःगु धयादिल।

फोहर ल्ह्ययेत मेगु लँ निर्माण, ल्याण्डफिल साइटया जग्गा अधिग्रहणया बारे खँ चकंकेमाःगु, ध्वगिइगु फोहर स्वनिगलय् हे विसर्जन यानाः साः दयेकेगुलिसेंया विषयकय् क्वःछ्यूगु वय्कलं धयादिल। मुँज्याय् प्रधानमन्त्री नापं मन्त्रिपरिषदया ज्याकुथिया सचिव राजकुमार श्रेष्ठ, सङ्घीय मामिला नापं सामान्य प्रशासन मन्त्रालयया भरतमणि सुवेदी, यल महानगरपालिया प्रमुख नापं स्वनिगः मेयरर्स फोरमया नायः चिरीबाबु महर्जन, थी थी नगरपालिकाया प्रमुख नापं प्रशासकीय अधिकृतलिसें ब्वति कयादीगु खः। (रासस)