प्रधानमन्त्री केपी शर्मा ओलीं सुशासनया निंतिं दृढ अठोट यानाः जनतायात पवित्रभावं सेवा बियाः लोकतान्त्रिक गणतन्त्रयात सुदृढ याये माःगुलिइ बः बियादीगु दु।

मधेस प्रदेशसभायात थौं संबोधन यानादिसें प्रधानमन्त्री ओलीें जनताया न्हापांगु अधिकार गरिबीपाखें मुक्त जुइगु जूगुलिं गरिबीया न्ह्यःने मेगु अधिकारया छुं नं अर्थ मदुगु धयादिसें विकास व समृद्धिया लँय् मिले जुयाः न्ह्याः वनेत आह्वान यानादिल। “सङ्घीय लोकतान्त्रिक गणतान्त्रिक व्यवस्था तःधंगु उपलब्धि खः। थ्व उपलब्धियात राजनीतिक उपलब्धि कथं जक मखु जनताया सङ्घर्षपाखें वःगु उपलब्धि कथं कायेमाः।

उकिं झीगु कुतः जनताया सेवा यायेगुलिइ समर्पित जुइमाः। परिपूर्ण लोकतन्त्रया निंतिं झीसं ज्या यायेमाः,” प्रधानमन्त्री ओलीं धयादिल, “जनतां ह्यूपाःया उपलब्धि थःगु प्वाः, थःगु म्ह व सन्ततिया हित जुइकेत स्वइ। उकिं झीसं जनतायात लोकतान्त्रिक अधिकार छ्यलाबुला याके बिइमाः। दक्व सामाजिक जीवनय् लोकतन्त्र ह्वयेकेमाः। उकिया निंतिं समाजयात विकास व सुशासनयात गतिइ यंके हे माः।” प्रधानमन्त्री ओलीं मधेस प्रदेशया सामाजिक, सांस्कृतिक ऐक्यबद्धता, सहिष्णुता व सद्भाव तसकं बांलाःगु पक्ष जूगु धयादिसें थनया अनुशासित, चेतनशील नापं विकासप्रेमी नागरिकतय्सं नेपाःया स्वतन्त्रता, सार्वभौमिकता, भौगोलिक अखण्डता, राष्ट्रिय एकता, स्वाधीनता व स्वाभिमान दयेकातयेत ब्यूगु योगदानयात च्वछानादिल।

संविधानं मधेस प्रदेशयात स्वायत्तता प्रदान याःगु व थ्व स्वायत्तताया पाय्छिकथं छ्यलेगु सकसिगुं दायित्व जूगु धयादिसें प्रधानमन्त्रीं सङ्घ, प्रदेश व स्थानीय तहदथुइया समन्वय, नीति निर्माण व विकासया ज्यायात प्रभावकारी जुइकेत प्रदेश सरकारया विशेष भूमिका जुइ धकाः धयादिल। प्रधानमन्त्री ओलीं मधेस प्रदेश सम्भावनां जाःगु उर्वर भूमि, कृषिया निंतिं पाय्छिगु चुरेक्षेत्र जडीबुटी, जङ्गलनिसें लःया तःधंगु स्रोत दूगुलिं थनया विकासयात सकसिगु नं ग्वाहालिं न्ह्याकेमाःगुलिइ बः बियादिल। वय्कलं सुनकोशी मरिन डाइभर्सन आयोजनां मधेसय् सिँचाइ जुयाः राष्ट्रिय उत्पादन व उत्पादकत्व वृद्धि यायेगु व थुकिं पहाड व तराई दथुइया एकताभाव सृजना याइ धकाः धयादिल।

प्रधानमन्त्री ओलीं औद्योगिक ख्यः, पेट्रोलियम पाइपलाइन, रेलमार्ग, हुलाकी सतक, दू्रतमार्ग, रामराजाप्रसाद सिंह अस्पताल मधेसया विकास व समृद्धिया आधार जूगुलिं एकीकृत जाँच चौकी नापं प्रमुख भन्सार नाका वीरगञ्जयात आर्थिक केन्द्र नापं प्राचीन शहर जनकपुरधामयात सांस्कृतिक पर्यटनया आधार कथं विकास यायेफइ धकाः धयादिल।

वय्कलं राजर्षि जनक, मां सीता, महर्षि परशुराम, महाकवि विद्यापति थेंजाःपिं विभूति व विद्वान नापं छिन्नमस्ता, गढीमाईलिसें द्यःतय्गु भूमि मधेस प्रदेशय् उगु पुर्खाया ज्ञान व गौरवयात लुमंकाः आः विकासया लँपुइ न्ह्यावनेमाःगुलिइ बः बियादिल।

नेपाल बार एशोसियसनया अध्यक्षय् बिजय प्रकाश मिश्र न्ह्यने लानाच्वंगु दु। मत गणना जुयाच्वंगु न्हापागु आधिकारिक विवरण कथं मिश्रं २२६ मत हया न्ह्यने लानाच्वंगु दु सा रमण श्रेष्ठं १३० मत हःगु दु।

अथेह, मेमेगु पदय् न मिश्रया प्यानल दोब्बर मतं न्ह्यने वया च्वंगु दु धका मत गणनास्थल जुयाच्वंगु थासं च्वम्ह छम्ह प्रतिनिधिं जानकारी ब्यूगु दु।

येँ महानगरपालिकाया जनप्रतिनिधि व कर्मचारी तयेगु तलब वःगु दु।

वंगु स्वला निसे रोके जुयाच्वंगु तलब थौ सोमवाः सकसिगु खाताय् वःगु दु धका महानगरया प्रवक्ता नवीन मानन्धरं धयादीगु दु।

प्रमुख प्रशासकीय अधिकृत मदुगुलि महानगरया कर्मचारी व जनप्रतिनिधि तयेगु स्वला निसे तलब रोके जुयाच्वंगु खः।

वंगु पुस ७ गतेनिसे बिदाय् च्वनाच्वम्ह प्रमुख प्रशासकीय अधिकृत सरोज गुरागाईं कार्यालय हाजिर जुगु दु।

नेपाल राष्ट्र बैंकया वरिष्ठ डेपुटी गभर्नर निलम ढुङ्गाना तिम्सिनायात कायममुकायम गभर्नरया भाला ब्यूगु दु। गभर्नर नियुक्तया निंतिं गठित सिफारिस समितिं नाः सिफारिस यायेत लिबाकाब्युबलय् अर्थ मन्त्रालयं तिम्सिनायात उगु भाला ब्यूगु खः।

नेपाल राष्ट्र बैङ्क ऐन २०५८ या दफा २७ बमोजिम उपप्रधानमन्त्री लिसें अर्थमन्त्री विष्णुप्रसाद पौडेलं ढुङ्गानायात कायममुकायम गभर्नरया भाला ब्यूगु धकाः वय्कःया सचिवालयं धाःगु दु।

गभर्नर नियुक्ति सिफारिस यायेया निंतिं अर्थमन्त्री पौडेलया संयोजकत्वय् पूलांम्ह गभर्नर विजयनाथ भट्टराई व अर्थविद् विश्व पौडेल लिसेंया स्वम्ह दुजःतय् समिति गठन जूगु दु।

प्रधानमन्त्री केपी शर्मा ओलीं वरिष्ठ पत्रकार भैरव रिसाल मदूगुलिं दुःख प्वंकादीगु दु।

प्रधानमन्त्री ओलीं वरिष्ठ पत्रकार रिसालया ९६ क्वःगु बुदिंया लसताय् थगुने वय्कःया हे छेँय् नापलानादीबलय्या किपा सामाजिक सञ्जाललय् पोष्ट यानादिसें वय्कः मदूगुया बुखँ यानाः थःत तसकं दुःख ताःगु धयादिसें वरिष्ठ पत्रकार मदुम्ह रिसालप्रति बिचाः हायेकाःदीगु दु।

“परोपकारी पासा भैरव रिसालनाप वंगु फागुन २१ गते नापलानागु खः, थ्व हे लिपांगु इलय् नापलानागु जू वन, वय्कः म्हिगः मदूगु बुखँ तसकं नुगः मछिंगु दु, वरिष्ठ पत्रकार भैरव रिसालयात दुनुगलंनिसें श्रद्धाञ्जली प्वंकुसें वय्कःया छेँजःपिंत बिचाः हायेका च्वनाः”, प्रधानमन्त्री ओलीं च्वयादीगु दु।

राष्ट्रिय समाचार समिति (रासस)या पुलांम्ह प्रमुख समाचारदाताया भालालिसें मानवअधिकार व वातावरण संरक्षणया ख्यलय् योगदान बियादीम्ह ९७ दँ याम्ह वरिष्ठ पत्रकार रिसाल बानेश्वरय् च्वंगु फ्रन्टलाइन अस्पतालय् म्हिगः बहनी मदूगु खः। वय्कः ताःई न्ह्यःनिसें नुगःचु व सोंया ल्वचं पीडित जुयाच्वनादीगु खः।