नेपाया उपसंघनायक श्रद्धेय भिक्षु गुणधोष महास्थविरयात खुंतेसं तसकं दाया घाःपा याना ब्युगुलिं आसीयूलय् भर्ना याय्माःगु दु।

वंगु भाद्र ६ गते बिहीवाः बहनि नेपाःया उपसंघनायक नाप धुलिखेल पुर्वाराम विहारया विहार प्रमुख ८४ दँ दुम्ह श्रद्धेय भिक्षु गुणधोष महास्थविरयात याकचा च्वना च्वंगु इलय् वयकःयात तसकं दाया लुटपाट याना वंगु खः।

आः वस्पोलयात धुलिखेल अस्पतालया मेडिकल आसीयूलय् भर्ना याना वासः यानाच्वंगु दु।

८४ दँ दुम्ह भन्तेया ख्वालय् यकं नीलडाम व मिखाँय् तक लिच्वः लागु दु। छ्यनय् न यक्को घाः खने दुगु दुगु अस्पतालं जानकारी ब्युगु दु।

वस्पोल भन्तेयात आःतक सुयात नाप लाके मब्यु अवस्था गम्भिर जुगु धका धागु दु।

येँ महानगरपालिकां छगु सूचं जारीयासे बागमती व विष्णुमती खुसि सिथय् २० मिटर खाली यायेगु मापदण्ड हःगु दु।

सर्वोच्चया फैसलां उकी थप २० मिटर थप यायेमालीगु जूगु दु। येँ महानगरया जारीयाःगु उगु सुचंयात कया ब्यापक बिरोधया सः थ्वःगु दु।

येँ महानगरपालिकाया पुर्वमेयर बिद्यासुन्दर शाक्यं येँ महानगरया मेयरं यकःति निर्णय याना बागमती व विष्णुमती खुसि सिथय् जवं खवं २० मिटर खाली यायेमाःगु प्रावधानं यक्को नगरवासी त बिस्थापित जुइ। उकिइ थज्यागु निर्णय तत्काल लित कायेमाः धका धयादीगु खः। थुगु निर्णय न लाखौ स्थानियबासी बिस्थापित जुइफुगलि थुगु निर्णयय् बिचाः यायेत वडाध्यक्षपिन्त न इनाप यानादीगु खः।

अथे हे म्हिगः उपत्यकाव्यापी सडक बिस्तार पीडित संघर्ष समिति व खोला मापदण्ड पीडित तयस न मंकाः कथं छगु ज्याझ्वः याना बिरोध ज्याझ्वः याःगु दु।

उगु निर्णय सर्वोच्च अदालतया न्यायाधीश आनन्दमोहन भट्टराई व विनोद शर्माया मंकाः इजलासं यागु खः।

यलय थौ राजोपाध्याय देव व्राम्हणतय् उपाकर्म गुथिपाखें न्ह्याका वयाच्वंगु नृसिंह जात्रा पिहा वइगु जूगु दु। दँय्दसं गुंलागा पञ्चमि कुन्हु पिदनीगु थुगु नृसिंह जात्रा थौं न्हिनसिया १२ बजेलिपा पूर्णचण्डीं पिहां वइगु जुगु दु।

उपाकर्मया गुथिया गुथियारपिंसं पाः फयाः न्ह्याकीगु थुगु जात्रा थुगुसी मदुम्ह नृपेन्द्रराज शर्माया पाः लाःगु दु । थुगुसी संचारकःमि राजीव राजोपाध्यायय् नृसिंह जुइत्यःगु दु। थुगु जात्राय् पाःलाःम्हेसिया जिलाजं नृसिंह जुइमाःगु परम्परा दु।

पूर्णचण्डीं सुरुजुइगु जात्रा गाःबहाः, प्यंगःथां, पिम्बहाः, बालिफः, नकबही, क्वालखु, झटापोल, क्वन्ति, क्वबहाः, स्वथ, मंगलबजाः, हःखा, लुँहिति, ओकुबहाः, थैना, चक्रबही, टंगः, तिछुँगल्ली, इखालखु, जेनबहाः, वला जुयाः पूर्णचण्डी हे थ्यंकाः क्वचायेकी ।

क्षत्रपाति निःशुल्क चिकित्सालययात छगु ज्याझ्वः दथुइ एम्बुलेन्स लःल्हाःगु दु। बागमती प्रदेशया सांसद लिसें पुलांम्ह प्रदेशमन्त्री बसन्त मानन्धरं थःगु विकास बजेट कथं थथे चिकित्सालययात एम्बुलेन्स लःल्हागु खः।

म्हिगः शुक्रवाः क्षत्रपाति निःशुल्क चिकित्सालयय् छगू ज्याझ्वःया दथुइ उगु एम्बुलेन्स सांसद मानन्धरं चिकित्सालयया अध्यक्ष डा. मनोजमान श्रेष्ठयात लःल्हानादीगु खः।

उगु ज्याझ्वलय् चिकित्सालयया व्यवस्थापन पुचः नाप थीथी व्यक्तित्वपिनिगु उपस्थितिइ दुगु खः।

एसइइ निसें एमए तगिमय् नेपालभाषा विषय कया ब्बपि मध्ये दकलय् अप्वो ल्याः हःपिन्त छगु ज्याझ्वः दथुइ मोतिलानि सिरपा लःल्हायेगु ज्या जुगु दु

नेसं ११४१ निसें ११४३ तकया खुम्ह ब्वनामिपिंत दसिपौ लःल्हायेगु ज्या जुगु खः। उगु ज्याझ्वलय् मूपाहाँ ये महानगरपालिकाया पूर्व मेयर विद्यासुन्दर शाक्य झायादीगु खः। थुगु दँय् एसइइ, बिए व एमएय् नेपालभाषाय् उत्कृष्ट जूपिं विद्याथपिंत दां सिरपाःसहित दसिपौ लःल्हाःगु खः।

ने.सं. ११४१ य् एसइइ जगतसुन्दर ब्वनेकुथिया पूर्णिमा तुलाधर, बिएय् सोमी डंगोल, एमएय् राकेशमान मास्के उत्कृष्ट जूगु खःसा ने.सं. ११४२ इ एसइइ आर्दश मावि थिमिया निकेश बसी श्रेष्ठ व एमएय् अनिल स्थापित उत्कृष्ट जूगु खः। अथेहे ने.संं ११४३ य् एसईइ जगतसुन्दर ब्वनेकुथिया रविना श्रेष्ठ उत्कृष्ट जूगु खः।

उत्कृष्ट जूपिं विद्यार्थीपिंत मूपाहाँ येँ महानगरपालिकाया पुलांम्ह मेयर विद्यासुन्दर शाक्य व विशेष पाहाँ नेपालभाषा केन्द्रीय विभागया प्रमुख सह प्रा. राजनलाल जोशीं दसिपौ, मोतिलानि सिरपाःया अध्यक्ष प्रा. प्रेमशान्ति तुलाधरं स्वां, सरोज तुलाधरं मतिनाया चिं व सिरपा दाता मोतिलानी ताम्राकारया तःधिकःम्ह म्ह्याय् सीता ताम्राकारं दां सिरपाः लःल्हानादीगु खः।

प्रा. तृुलाधरया सभापतित्वय् जूगु ज्याझ्वलय् मूपाहाँ लिसें पाहाँपिंसं मदुम्ह ताम्राकारया किपाय् स्वांमाः देछासें श्रद्धाञ्जली प्वंकादीगु खःसा सिरपा समितिया स्थापनाकालंनिसें दांभरि जुयाः ज्या यानादीम्ह मदुम्ह करुणामान शाक्यया लुमंति छगू मिनेट मौन धारण याःगु खः।दिव्या ताम्राकारं लसकुस यानादीगु ज्याझ्वलय् रमिता वज्राचार्यं सिरपाः दाता मोतिलानी ताम्राकारया म्हसीका न्ह्यब्वयादीगु खः।

अथेहे ताम्राकारया चीधिकःम्ह म्ह्याय् व सिरपाःया संरक्षक सरोज तुलाधरं सुभाय् देछायादीगु खः।