स्वास्थ्य नापं जनसङ्ख्यामन्त्री प्रदिप पौडेल राष्ट्रसङ्घीय जनसङ्ख्या व विकास आयोगया ५८ क्वःगु सभाय् ब्वति कायेत आइतबाः न्यूयोर्क थ्यंकःझागु दु।

मन्त्री पौडेलयात संयुक्त राष्ट्र सङ्घया निंतिं स्थायी नियोग प्रमुख लोकबहादुर थापालिसें दूतावासया कर्मचारीतय्सं लसकुस यानादिगु दु। मन्त्री पौडेलया लसकुसया निंतिं जनसम्पर्क समिति अमेरिकाया सभापति आनन्द विष्ट नापं महासचिव मुनेन्द्र नेमवाङ विमानस्थल थ्यंकःझागु खः।

मन्त्री पौडेलं सोमबाः व मङ्गलबाः जुइगु उच्चस्तरीय बैठकय् ब्वति कयादित्यंगु धकाः संयुक्त राष्ट्र सङ्घया निंतिं स्थायी नियोगं धाःगु दु।

वरिष्ठ पत्रकार भैरव रिसाल म्हिगः मन्त। वय्कः ९७ दँय् मदूगु खः। नुगःचु व सों सम्बन्धी ल्वय्या वासः याका च्वनादीम्ह वरिष्ठ पत्रकार रिसाल बानेश्वरय् च्वंगु फ्रन्टलाइन अस्पतालय् वासः याकेगु झ्वलय् मदूगु वय्कःया किजा पुरु रिसालं धयादिगु दु।

वय्कःया जन्म १९८५ साउन २९ य् ख्वपया तिथलीइ जूगु खः। वरिष्ठ पत्रकार रिसालं थ्व स्वया न्ह्यः हे थः मदये धुंका थःगु सीम्ह अध्ययनया निंतिं पाटन अस्पतालयात बिइगु घोषणा यानादीगु खः। वरिष्ठ पत्रकार रिसालं मानवअधिकार सम्बन्धी, जगदम्बा श्री व वातावरण संरक्षणसम्बन्धी थी थी सिरपा कयादीगु दु। वय्कलं रेडियो सगरमाथाय् ताःई तक ‘उहिले बाजेको पालामा’ रेडियो श्रृङ्खला सञ्चालन यानादीगु खः।

वामपन्थी विचारधारा दुम्ह रिसाल २०४८ सालया आमनिर्वाचनय् नेपाल मजदुर किसान पार्टीया पाखें ख्वपं उम्मेदवार जुयादीगु खः। वरिष्ठ पत्रकार रिसालं राष्ट्रिय समाचार समिति (रासस) य् प्रमुख समाचारदाताया भाला नापं क्वबीनादी धुंकूगु खः। ताःई निसें पत्रकारिता व समाजसेवाय् स्वानादीम्ह वरिष्ठ पत्रकार रिसालं राससय् ज्या याये न्ह्यः तथ्याङ्क विभागय् च्वनाः ज्या यानादीगु खः।

रिसालया ‘साधुलाई सुली’ (जेल डायरी), ‘लोग्नेस्वास्नी’, ‘केही मित्रका चिठी’ कृति व ‘भैरव दाइ’ लिसेंया सपूmत प्रकाशित जूगु धुकुगु दु। वय्कःया तिरिमय्जु, निम्ह काय् व निम्ह म्ह्याय्पिं दी।

नेपाली काँग्रेसया सभापति शेरबहादुर देउवां चैत १५ गते तीनकुने–घटनाय् मदुम्ह पत्रकार सुरेश रजकया परिवारयात नापलावंगु दु।

सभापति देउवां थौ आइतवाः न्हिनय् रजकया छेँय् वना परिवारयात नापलागु खः। सभापति देउवां रजक सीउगु घटनाबारे सत्यतथ्य छानबिन याना दोषीयात कारबाही यायेगु आश्वासन ब्यूगु दु।

राष्ट्रपति रामचन्द्र पौडेलं जनबहाः द्यःया पुजा, आराधना नापं दर्शन यानादीगु दु। चैत्र शुक्ल अष्टमीया दिं जनबहाः द्यः सालाः असनय् थ्यने धुंका बहनी राष्ट्राध्यक्षं पुजा, आराधना व दशर्न यायेगु यानाः वयाच्वंगु दु।

व हे कथं राष्ट्रपति पौडेलं म्हिगः बहनी असनय् वनाः जनबहाः द्यःया पुजा, आराधना नापं दर्शन यानादीगु खः। शनिबाः निसें न्ह्याःगु जनबहाः द्यःयात खःतय् तयाः मच्छिन्द्र बहालं तीनधारा पाठशाला (जमः) थ्यंकाः अनं रथयात्रा यानाः जमः, रत्नपार्क, भोटाहिटी जुकाः असनय् थ्यंकूगु खः।

प्रधानमन्त्री केपी शर्मा ओलीं सकसितं राम नवमीया भिंतुना देछानादीगु दु। थौं सामाजिक सञ्जालपाखें वय्कलं रामनवमी व चैते दसैँया भिंतुना देछानादीगु खः।

“त्रैतायुगय् जन्मकयादीम्ह रामयात झीगु प्राचीन शास्त्र रामायणं शान्ति, न्याय, धर्म, सदाचार, सुव्यवस्था, सुशासन व कर्तव्यपरायनणया आदर्श चरित्र तायेका तःगु दु”, प्रधानमन्त्रीं भिंतुना सन्देशय् धयादीगु दु, “प्राचीन सभ्यताय् भिंगु शासन जूगु मुलुकयात रामराज्य धायेगु याइ। लोकंह्वाय्गु सिबें मर्यादाया लँपुइ वंम्ह जुयाः रामयात मर्यादा पुरुषोत्तमया चिं कथं कायेगु याः।”

चैत्र शुक्ल नवमीया दिं न्यायेकिगु राम नवमी नखः थौं श्रद्धा भक्तिं भगवान् श्रीरामचन्द्रया पुजा यानाः न्यायेका च्वंगु दु।