शेयर बजाःया लिपागु वाःया थौ बिहीवाः दक्को सूचक कुहावःगु दु। नेप्से परिसूचक म्हिगः स्वया थौ ३१.३१ ल्याखं कुहावना २६८० ल्याः थ्यःगु दु।

थौ कारोबार रकम धाःसा भचा थहावःगु दु। म्हिगः ७ अर्ब ९ करोडया कारोबार जूगुलि थौ ८ अर्ब २५ करोडया कारोवार जूगु खः। ४३ गु कम्पनीया भाः थहावंगुलि १९७ गु कम्पनीया भाः कुहावःगुलि प्यंगू कम्पनीया भाः स्थिर जूगु दु। फाइनान्स समूहया सूचक दकलय् अप्पो २.८६ प्रतिशतं कुहावःगु खः।

बैंकिङ ०.९०, विकास बैंक १.४७, होटल लिसे पर्यटन १.७३, हाइड्रोपावर ०.९०, लगानी ०.९०, जीवन बीमा १.३६, उत्पादन १.५४, माइक्रोफाइनान्स ०.६८, निर्जीवन बीमा १.१६, मेमेगु १.६७ व व्यापार समूह ०.९८ प्रतिशतं कुहावःगु खः। निगु कम्पनी सामुदायिक लघुवित्त व थ्रीस्टार हाइड्रोपावरया भाः १० प्रतिशतं थहावःगुलि माहुली लघुवित्तया ६.११, धौलागिरि लघुवित्तया ५.४९ व रिभर फल्स पावर ५.३३ प्रतिशतं थहावःगु खः।

जानाकी फाइनान्सया भाः १० प्रतिशतं कुहावःगु दु सा नारायणी विकास बैंक ७.२६, सुपरमाइ हाइड्रोपावर ७.१४, सपोर्ट माइक्रोफाइनान्स ७ प्रतिशतं भाः कुहावःगु दु। कारोबार रकमया आधारय् नेपाल फाइनान्स, ङादी ग्रुप पावर, रसुवागढी हाइड्रोपावर, हिमालय ऊर्जा विकास कम्पनी व कर्णाली विकास बैंक न्ह्यने वःगु दु।

प्रधान सेनापति अशोकराज सिग्देल व नेपाः भ्रमणय् वयादीम्ह भारतीय स्थल सेनाध्यक्ष उपेन्द्र द्विवेदी दथुइ निगू देय्या सैनिकदथुइ पारस्परिक साझेदारी व हितय् केन्द्रित जुयाः सैनिक मुख्यालय जङ्गी अड्डाय् निगुपक्षीय खँल्हाबल्हा जूगु दु।

खँल्हाबल्हाया झ्वलय् नेपाली सेनाया ज्याया जिम्मेवारी व सम्पादन यानावयाच्वंगु ज्याया बारे चीहाकःगु जानकारी न्ह्यब्वःगु सैनिक प्रवक्ता सहायक रथी गौरवकुमार केसीं कनादीगु दु। थ्व हे झ्वलय् भारतीय स्थल सेनाध्यक्षं सैनिक मञ्च टुँडिखेलय् च्वंगु वीर स्मारकय् स्वाँमाः क्वखायेकादिल।

राष्ट्रपति रामचन्द्र पौडेलं थौं स्थल सेनाध्यक्ष द्विवेदीयात नेपाःया सेनाया मानार्थ महारथीया दर्जा बियाः हनेगु ज्याझ्वः दु। वंगु १६ असारय् सेनाध्यक्ष नियुक्त जुयादीम्ह द्विवेदीया थ्व न्हापांगु औपचारिक नेपाः भ्रमण खः। कन्हय् प्रधानमन्त्री केपी ओली व रक्षामन्त्री मानवीर राईलिसे वय्कलं बिस्कंबिस्कं नाप लाइगु ज्याझ्वः दु।

सन् १९५० निसें नेपाः व भारतदथुइ निगुलिं देय्या सेना प्रमुखयात मानार्थ महारथीया दज्र्यानी चिं लःल्हाइगु परम्परा दु । थ्व स्वयां न्ह्यः भारतया राष्ट्रपति रामनाथ कोविन्दं नेपाःया उबलय्या प्रधानसेनापति प्रभुराम शर्मायात २०७८ कात्तिक २४ गते भारतीय स्थलसेनाया मानार्थ महारथीया दज्र्यानी चिं लःल्हाःनादीगु खः।

अथे हे भारतीय स्थल सेनाध्यक्ष मनोज पाण्डेयात उबलय्या राष्ट्रपति विद्यादेवी भण्डारीं २०७९ भदौ २० गते नेपाःया सेनाया मानार्थ महारथी पद लःल्हाःनादीगु खः। सन् १९५० य् भारतया सेनाध्यक्ष जनरल केएम परिअप्पायात न्हापांखुसी नेपाःया सेनाया मानार्थ महारथी लःल्हाःगु खः धाःसा २०२६ सालय् उबलय्या प्रधानसेनापति सुरेन्द्रबहादुर शाहयात नं न्हापांखुसी भारतीय सेनाया मानार्थ महारथी पद लःल्हाःनादीगु खः।

जःलाखःला देय्या सेना दथुइया थजाःगु हनेगु परम्परां सम्बन्धयात क्वातुकाः तयेत व सौहार्दता दयेकेत छगू महत्वपूर्ण कडीकथं भूमिका म्हितीगु भलसा याःगु दु। प्रधान सेनापति सिग्देलया औपचारिक ब्वनाय् भारतीय स्थल सेनाध्यक्ष द्विवेदी न्यान्हुया नेपाः भ्रमणया झ्वलय् बुधबाः न्हिनय् येँ थ्यंकझाःगु खः। (रासस)

मुस्ताङय् लोकंह्वाःगु धार्मिकस्थल मुक्तिनाथ द्यःया थाय् वइपि भक्तजनपिन्त तयेगु निति दयका तःगु धर्मशाला जीर्ण अवस्थाय् जुगु दु।

उगु धर्मशाला २१८ दँ दयका तःगु रानीपौवा धर्मशाला खः। संरक्षणया अभावमा उगु धर्मशाला जीर्ण जुजु वनाच्वंगु दु।

यलया बालकुमारीया छखा छेँय् मिँ न्वःगुलि फार्मेसी, जुम्बा डान्स सेन्टर व पसलय् क्षति जुगु दु।

स्वाभिमान श्रेष्ठया निगु तल्लाय् करेन्ट सर्त जुया मिँ न्वःगु खः।मिँ न्वया उगु छेँय् च्वंगु न्हापागु तल्लाय् ‘डगेरा फार्मेसी’ मिँ न्वःगु दु धका यलया प्रहरीं धाःगु दु।

श्रेष्ठया छेँय् च्वंगु ग्वाँ पसः व मःम पसलय् न क्षति जुगु दु सा नाप च्वंगु ‘जुम्बा डान्स सेन्टर’ तक क्षति जुगु दु। उगु घटनाय् गुलि क्षति जुल धइगु विवरण वःगु मदुनि धका प्रहरीं धाःगु दु।

न्यागः दमकलया ग्वाहालिं छ घौ लिपा मिँ स्याये फुगु खः।

थ्व हे वइगु मंसिर १६ गते जुइगु स्थानीय तह उपनिर्वाचनय् मनोनय याःपि मध्ये ३१ म्हेसिया उम्मेदवारी लितकाःगु दु। बुधवाः बहनि आयोगं पिकाःगु विज्ञप्ति कथं ३१ म्हेसिया थःगु उम्मेदवारी लितकाःगु दु।

अथेहे आयोगया कथं जिल्ला समन्वय समति प्रमुख, नगरपालिका प्रमुख, उपप्रमुख, वडा अध्यक्ष व गाउँपालिका अध्यक्ष, उपाध्यक्ष व वडा अध्यक्षया ४४ गु खालि जुयाच्वंगु पदय् थीथी राजनीतिक दलपाखे २८९ म्ह व १२१ म्ह स्वतन्त्र याना ४१० म्हेसिया उम्मेदवारी ब्यूगु दु।

अथेहे निर्वाचन जुइगु स्वंगु थासय् निर्विरोध निर्वाचित जूगु दु धका आयोगं धाःगु दु। आयोगया कथं ओखलढुंगा व कैलाली जिल्लाया जिल्ला समन्वय समिति प्रमुखय् नेपाली काँग्रेसया उम्मेदवार टेकराज भट्टराई व टीका कुमारी चौधरी (भुल) निर्विरोध निर्वाचित जुइ धुकुगु दु। अथेहे रुकुम (पूर्वी भाग) या पुथा उत्तरगंगा गाउँपालिका वडा नम्बर २ या वडा अध्यक्षय् नेपाल कम्युनिष्ट पार्टी माओवादी केन्द्रया उम्मेदवार जगत घर्ती निर्विरोध निर्वाचित जूगु दु धका आयोगं विज्ञप्तिपाखे धाःगु दु।

स्थानीय तह उपनिर्वाचनया निति दर्ता जूगुलि २५ गु राजनीतिक दलमध्ये हाम्रो नेपाल पार्टी, नेपाल कम्युनिष्ट पार्टी (माक्सवादी लेनिनवादी), नेपाली कांग्रेस (वी.पी.), नेपाली जनता दल व आम जनता पार्टी याना न्यागु दलं छु न खालि  पदय् उम्मेदवारी दर्ता याःगु मदु धका आयोगं धाःगु दु।(रासस)