प्रधानमन्त्री केपी शर्मा ओली न्ह्यःने प्यालेस्टाइनयात इजरायलं यानाच्वंगु हमलाविरुद्ध दनेमाःगु माग यासें थी थी राजनीतिक दल व नागरिक संस्थातय्सं थौं ध्यानाकर्षण पौ लःल्हाःगु दु।

नेपाल कम्युनिष्ट पार्टी (माओवादी केन्द्र) या वरिष्ठ उपाध्यक्ष नापं पूर्व उपप्रधानमन्त्री नारायणकाजी श्रेष्ठलिसें थीथी दल व नागरिक संस्थाया प्रतिनिधितय्सं थौं प्रधानमन्त्री निवास, बालुवाटारय् प्रधानमन्त्री ओलीयात नाप लानाः इजरायलं प्यालेस्टाइन व लेबनानयात मद्दिक बल छ्यलाः हमला यानाः च्वंगुलिं उकिया विपक्षय् नेपाल सरकार अन्तर्राष्ट्रिय मञ्चय् वनेमाःगु धकाः इनाप यानादिल।

ध्यानाकर्षण पतिइ नेपाःया तटस्थ परराष्ट्र नीतिया मान्यताय् ह्यूपाः हयेत व अन्याय जूपिनि पक्षय् संयुक्त राष्ट्रसङ्घ थेंजाःगु मञ्चय् मत बिइत माग यानातःगु दु। ज्ञापन पतिइ हमासं ज्वनातःपिं नेपाःया विपीन जोशी व इजरायलय् दुपिं द्वलंद्वः नेपाःया ल्याय्म्हतय्गु जीवन रक्षा यायेत युद्धकाल दुने नेपाः हयेत कुतः यायेमाःगु नं माग न्ह्यथनातःगु दु।

प्रधानमन्त्री ओलीं नेपाः विश्वशान्ति, मानव अधिकार व न्यायया पक्षय् च्वनेगु धयादिल। वय्कलं तटस्थता धइगु बल्लाम्हेसिनं दायाच्वनेगु व बःमलाम्हेसिनं सह यानाः च्वनेगु धइगु मखु धासें ध्यानाकर्षण पतिइ न्ह्यथंगु विषयया अःखः सरकार मवनेगु धयादिल। “झीपिं विश्वशान्तिया पक्षय् दु। छुं नं शक्ति विरुद्ध थः हे ल्वाः वनेगु मखु।

छुं नं सैन्य गठबन्धनय् च्वनेगु मखु तर अन्याय सह यानाः च्वनेगु मखु”, प्रधानमन्त्री ओलीं धयादिल, “झीसं हलिमय् निरीह शान्ति मखु, न्यायपूर्ण शान्ति व मानव अधिकारया रक्षा यायेगु खः।”

थ्व हे ज्याझ्वलय् माओवादी केन्द्रया महासचिव देवप्रसाद गुरुङ, राष्ट्रिय जनमोर्चाया नेत्री दुुर्गा पौडेल, नेकपा (एकीकृत समाजवादी) या सचिव शेरबहादुर कुँवर, क्रान्तिकारी कम्युनिष्ट पार्टीया वरिष्ठ नेता सिपी गजुरेल, जनता समाजवादी पार्टी नेपालया विदेश विभाग प्रमुख अर्जुन थापा, प्रगतिशील रुपान्तरण आन्दोलनया न्ह्यलुवा श्याम श्रेष्ठपि ब्वति काःगु खः।(रासस)

राष्ट्रपति रामचन्द्र पौडेलं समाजय् ल्यूने लाःगु ख्यः व वर्गया हित व आम नागरिकया जीवनस्तर भिंकाः थ्व हे व्यवस्थाय् जक जिगु भविष्य बांलाइ धइगु जनतायात भलसा याकेमाःगु सङ्घीय लोकतान्त्रिक गणतन्त्रया आज्जु जूगु धयादिल।

राष्ट्रपति भवन शीतल निवासय् थौं जूगु महेन्द्रनारायण निधिया सङ्घर्षमय जीवनीइ आधारित ‘नेपाःया निधि’ नांया सफू चिकिफ्यनाः वय्कलं सङ्घीय लोकतान्त्रिक गणतन्त्रया थ्व आज्जु पूवंकेत न्यायपूर्ण, समावेशी व समृद्ध आधुनिक नेपाः दयेकेगु ज्याय् सकलें वनेमाःगु धयादिल। राष्ट्रपति पौडेलं जनताय् भलसा थनेत शासन प्रणाली पारदर्शी जवाफदेही व सुशासन न्हापांगु सर्त जूगु न्ह्यथनादिल।

वय्कलं धयादिल, “सत्ता व शक्तिइ च्वनीपिनि कमजोरीं लोकतन्त्रया शाश्वत मूल्यमान्यता व पवित्रतायात स्यंकेगु अवस्था वयेके बिइ मज्यू। थ्व खँय् ध्यान बिइ फःसा हे लोकतन्त्रया मूया सुनापनं सम्झौता मयाइम्ह निधिजी लिसेंया अग्रजतय्त धात्थें हनेगु जुइ धइगु नं तायेका।’ राष्ट्रपति पौडेलं महेन्द्रनारायण निधिया बहुआयामिक व्यक्तित्व, नेपालय् लोकतन्त्र नीस्वंगु व पुनस्र्थापना नापं सामाजिक, सांस्कृतिक जागरण बारे सिइकेगु व थुइके यःपिंत नं सङग्रहणीय सामग्री जुइगु धयादिल।

वय्कलं महेन्द्रनारायण निधि बिपी कोइराला व समाजवादी नेता डा राममनोहर लोहियाया बिचाःपाखें प्रभावित जुयादीम्ह महेन्द्रनारायण निधि नेपाःया लोकतान्त्रिक आन्दोलनया न्ह्यलुवा जूगु कनादिसें वय्कलं देय्या राजनीति, आर्थिक व सामाजिक ह्यूपाया निंतिं थःगु जीवन ब्यूगु लुमंकादिल। वय्कलं धयादिल, “जहानियाँ राणाशासन व छगूदलीय पञ्चायत जक मखु रूढीवादी, पछौटेपन नापं कुसंस्कारपाखें मुक्त यानाः नेपाःया समाजया ह्यूपाःया लँय् न्ह्याकेत निधिजीं यानादीगु भूमिका न्ह्याबलें अनुकरणीय जुइ।

राजनीतिक जीवनया यक्व थथ्याःक्वथ्याः जूगु इलय् जिं निधिजीयात तसकं धैर्यवान्, सरल, सादगी नेताकथं म्हसिकेगु व थुइकेगु मौका लुइका।” (रासस)

प्रधानमन्त्री केपी शर्मा ओलीविरुद्ध मखुगु खँ ल्हागु द्धपनय् ज्वनातःम्ह मेडिकल व्यवसायी दुर्गा प्रसाईयातन्यान्हु हिरासतय् तइगु जुगु दु।

न्यायाधीश माधवप्रसाद अधिकारीया इजलासं प्रसाईंयात न्यान्हु तक हिरासतय् तया अनुसन्धान यायेत अनुमति ब्यूगु दु। प्रहरीं थौ सुथय् प्रसाईंयात म्याद थपया निति अदालतय् यकूगु दु। सीआईबी न प्रसाईंयात मंगलवाः सुथय् ख्वपय् वयागु छेय् ज्वंगु खः।

सीआईबी न थप अनुसन्धान व कानुनी प्रक्रियाया निति प्रसाईयात साइबर ब्यूरोय् छ्वःगु खः। प्रहरीं विद्युतीय अपराध नियन्त्रण ऐन, २०६३ अःखः कसुर याःगु धासे वयात ज्वंगु खः।

महान्यायाधीवक्ताया कार्यालयं धासा विद्युतीय अपराध नियन्त्रण ऐन नाप मुलुकी फौजदारी संहिताय् उल्लेखित बेइज्जती याये मजुगु कसुर, मखुगु प्रमाण दयेक मज्युगु, राष्ट्रपति वा सांसद् यात धम्की बिइ मज्युगु लगायतया कसुरय् न अनुसन्धान जुइफुगु राय बिउगु दु।

प्रसाईं न सोमवाः प्रधानमन्त्री केपी शर्मा ओलीं कम्बोडियाय् एक्जिएटा कम्पनीइ लगानी दुगु खँ ल्ह्वंगु खः।

माइतीघर मण्डलाय् प्रहरी व सहकारी पीडित दथुइ ल्वापू जुगु दु। थापाथलीपाखे वःगु सहकारी पीडितया जुलुसयात प्रहरीं नेपाली सेनाया मुख्यालय दुहावनेगु लुँखा न्ह्यने रोके याःगु खः।

तर जुलुस न्ह्यने वनेत स्वयेवं ल्वापु जुगु खः। उगु ल्वापूइ प्रदर्शनकारीत घाःपाः जूगु दु। सहकारीइ वचत याना तःगु ध्यवा लित कायेमफुगुलि थःपिन्त ध्यवा लितः कायेगु मागः यासे प्रदर्शन याःगु खः।

यलया पूच्वय् मुना सहकारी पीडितपि नाराबाजी यासे फिब्बः ख्यलय् वःगु खः। फिब्बः ख्यलय् निषेधित क्षेत्रय् दुहावनेत स्वयेवं प्रहरीें बल प्रयोग याःगु खः।

भारतीय स्थल सेनाया प्रमुख उपेन्द्र द्विवेदी येँ थ्यक वःगु दु। प्रधानसेनापति अशोकराज सिग्देलया ब्बनाय् वयकः न्यान्हु चाःहिलेत येँ वःगु खः।

त्रिभुवन अन्तर्राष्ट्रिय विमानस्थलय् द्विवेदीयात नेपाली सेनाया युद्धकार्य विभागया महानिर्देशक उपरथी प्रेमध्वज अधिकारीं लसकुस याःगु खः।

अधिकारी नेपाःया पाखे संयुक्त राष्ट्र संघया सल्लाहकार पदया निति उम्मेदवार तक जुयादी। द्विवेदीं १ नोभेम्बर २०२४ निसे भारतीय स्थल सेनाया २९ गु प्रमुखया जिम्मेवारी कयादीम्ह खः।