Display Style:
Column Style
दान्यहिरा सिरपाः भजन शिरोमणि शाक्ययात
नृपेन्द्रलाल श्रेष्ठ | कौलागा दशमी ११३९ (अक्टुवर २३ २०१९)
नेपालभाषाया भजन शिरोमणि किरण शाक्ययात थुगुसिया दान्यहिरा सिरपाः लःल्हात । अथे हे, थुगुसिया दान्यहिरा हःपाः सिरपाः म्येच्वमि बंशीधर बज्राचार्य, लय् चिनामि गोविन्द ह्यूमत व म्ये हालामि पवित्र कसाःयात लःल्हाःगु दु ।
शताब्दी पुरुष डा. सत्यमोहन जोशीया मूपाहाँकथं झायादीगु उगु ज्याझ्वलय् नेवाः न्ह्यलुवा भाषासेवी उद्योगपति लक्ष्मीदास मानन्धरलिसें गोल्डेन भ्वाईस अफ नेपाल प्रेमध्वज प्रधान, प्रा.डा.चन्द्रमान बज्राचार्य, प्रा. प्रेमशान्ति तुलाधरपिं पाहाँकथं झायादीगु खः ।
नेपालभाषा एकेदेमिया कुलपति चित्तरञ्जन नेपालीया सभाध्यक्षताय् न्ह्याःगु उगु ज्याझ्वलय् साँस्कृतिक ज्याझ्वः नं जूगु खःसा ज्याझ्वलय् पवित्र कसाः, गोविन्द ह्यूमत, सानुबाबु महर्जन, सतीश महर्जन, निशा देशारलिसे कलाकारपिन्सं सांगीतिक ब्वज्या न्ह्यब्वःगु खः ।
ज्याझ्वलय् दान्यहिरा सिरपाः दाता यज्ञरत्न धाख्वाःया च्वसां पिज्वःगु निगू बाखं सफू नं सार्वजनिक जूगु दु । दँय्दसं बाखं सफू पिथनेगु झ्वलय् थुगुसी बाखं च्वमि धाख्वाः नं थःगु सफू ‘हिराया मू’ व ‘द कोवार्ड’ निगू बाखं सफू पिथनादीगु दु ।ज्याझ्वः साहित्यकार शशीकला मानन्धरं न्ह्याकादीगु खः ।
दान्यहिरा सिरपाः न्ययद्वः (५०,०००) तकालिसें हनापौ लःल्हाय्गु याना वयाच्वंगु खःसा दान्यहिरा हःपाः सिरपाः न्यय्छद्वः (५१,०००) तका व हनापौ (संगीतया पालय् बीगु स्वम्हेसित म्हतिं १७द्वः तका) व हनापौ लःल्हाना वयाच्वंगु दु ।
मरुसतः पुनःनिर्माणया ज्या बच्छि क्वचाल
नृपेन्द्रलाल श्रेष्ठ | कौलागा दशमी ११३९ (अक्टुवर २३ २०१९)
मरुसतः पुनःनिर्माणया ज्या थ्यंमथ्यं बच्छि क्वचाल । काष्ठमण्डप पुनःनिर्माण समितिं सोमवाः सार्वजनिक सुनुवाइ यासें पुनःनिर्माणया ज्या बच्छि क्वचाःगु जानकारी ब्यूगु खः । थ्व हे झ्वलय् उपभोक्ता समितिया नायः राजेन्द्र शाक्यं पुनःनिर्माणया नितिं धेबाया अभाव मजूगु नं धयादिल ।
वय्कलं येँ महानगरपालिकां बीगु धयातःगु न्यागूत्याः करोडतका मध्ये स्वंगू करोड जक खर्च जूगु नं जानकारी बियादिल ।
निदँया दुने ज्या क्वचाय्केगुकथं ज्या जुयाच्वंगुली सिँया अभावं समस्या जूगु नं उपभोक्ता समितिं जानकारी ब्यूगु दु । आःतक ४द्वः क्यूफिट सिँ छ्यलेधुंकूगु दुसा अझ नं १२द्व क्यूफिट सिँ माःगु नं धाःगु दु ।
न्हय्गूगु शताब्दीइ दय्कूगु धयातःगु उगु मरुसतः वि.सं. २०७२ सालया विनाशकारी भुखाचं पूवंक हे क्षति जूगुलिं थुगुसिनिसें उपभोक्ता समितिपाखें पुनःनिर्माणया ज्या जुयाच्वंगु खः ।
काष्ठमण्डप पुनर्निर्माण समितिया अध्यक्ष ३ नंबर प्रदेशया सांसद राजेश शाक्यं दयेकुगु स्वया आतकया प्रगति विवरण व आर्थिक प्रतिवेदन सार्वजनिक यानादिगु खः । येँ महानगरपालिकां ५ करोड अनुदानया ग्वाहालि काष्ठमण्डपया पुनर्निर्माण ज्या न्ह्याःगु खः । काष्ठमण्डप पुनर्निर्माणया अध्यक्ष सांसद शाक्यं आतक ३ करोड खर्च जुइ धुकगु दु धका जानकारी बियादिगु खः ।
उगुु सार्वजनिक सुनुवाइ ज्याझवलय् सम्पदा विज्ञ डा.सुर्दशन तिवारी, संघीय सांसद कृष्णगोपाल श्रेष्ठ, बिणा श्रेष्ठ, वडा अध्यक्षपिं चीनीकाजी महर्जन, मचाराजा महर्जन, बालकृष्ण श्रेष्ठ नाप सम्पदा विज्ञ कुलभक्त शाक्यपिन्स ब्बति कयादिगु खःसा ज्याझ्वः गौतम डंगोलं न्ह्याकादिगु खः ।
‘सः छगू फरक अभिव्यक्ति’या झिंछगूगु श्रृंखला क्वचाल
लहनान्युज | कौलागा नवमी ११३९ (अक्टुवर २२ २०१९)
‘स छगू फरक अभिब्यक्ति’या झिंछगूगु श्रृंखला वंगु सञ्चरवाः जुल । लाःया न्हापांगु सञ्चरवाः स्वम्ह बाखं च्वमियात ब्वनाः न्ह्याका वयाच्वंगु थुगु ज्याझ्वलय् थुगुसी नेपालभाषाया नांजाःम्ह जासुसी उपन्यासकार राज साय्मि, बाखंच्वमि महेशमान डंगोल ‘लँजुवा’ व सुनील वज्राचार्यं थःथःगु बाखं न्यंकादीगु खः ।
साहित्यकार सुधीर ख्वबिं स्वांमाः क्वखाय्काः लसकुस यानादीगु ज्याझ्वलय् स्वम्हं च्वमिपिन्सं म्हतिं न्यापु न्यापु चिबाखं ब्वनाः न्यंकादीगु खः । ज्याझ्वलय् ब्वनाः न्यंकूगु चिबाखंयात कयाः साहित्यकार केदार ‘सितुं’ समीक्षात्मक टिप्पणी यानादीगु खः ।
बाखं ब्वनादीपिं व बाखं न्यनेत वःपिंमध्ये छम्हेसित गोलाप्रथाकथं रेणु श्रेष्ठयात संस्थाया सुधीर ख्वबिं मतिनाया चिं लःल्हानादिल । ज्याझ्वलय् मोक्षबहादुर अमात्यं स्वम्हं बाखं ब्वँमियात खादा क्वखाय्काः धेबा लःल्हानादीगु खः ।
जगत सुन्दरया १३७ क्वःगु बुदिं हन
अमिर मैया रञ्जित | कौलागा नवमी ११३९ (अक्टुवर २२ २०१९)
बिराट नेपालभाषा साहित्य सम्मेलन गुथिया ग्वसालय् ख्वपया खौमा त्वालय् पलिस्था यानातःगु झ्वाताय् नेपालभाषाया साहित्यकार, पत्रकार पिसं स्वांमाः क्वखायेकाः छगू सभा यासे नेपालभाषाया प्यंगः थां मध्ये छगःथां कथं म्हसीका वयाच्वंम्ह मास्तर जगत सुन्दर मल्लया १३७ क्वःगु बुदिं हंगु दु ।
लसकुस न्वचू तयेगु झ्वलय् नायः कर्माचार्यं मास्टर जगत सुन्दर मल्लं शिक्षा मदयेक सांसारिक सुख जुइमखु धासे दकलय् न्हापालाक्क मां भाषं अंग्रेजी ब्वनेगु ब्वनेकुथि चायेका थकूगु खँ कनादिल । अथेहे तिलक प्रकाश कायस्थं मास्टर जगत सुन्दर मल्ल ख्वपया खौमा त्वालय् बूगु हुर्कय् जूगु खःसानं व्यतिगत समस्याया हुनिं लिपा येँ वयाः च्वनाच्वंगु खःसानं सलगयाः ख्वपय् वया आखः ब्वंकाः शिक्षादिक्षा बियाः वंगु खँयात च्वछानादिल ।
उगु ज्याझ्वलय् नगेन्द्र हाडा, ओमचरण अमात्य, माइलाबाबु द्यःला, ध्रुव मधिकःमि, डा. योगेन्द्र प्रधान लगायत बुद्धिजीवि, समाजसेवी, जनप्रतिनिधि पिनिगु ब्वति दुगु खः । ज्याझ्वः प्रदिप शाक्यं न्ह्याकादीगु खः ।
किपा : राजेन्द्र रञ्जित
काष्ठमण्डपया निर्माणया बिषय सार्वजनिक सुनुवाइ
नृपेन्द्रलाल श्रेष्ठ | कौलागा अष्टमी ११३९ (अक्टुवर २१ २०१९)
२०७२ लिपा तः भुखाचं क्षति जुगु येँया काष्ठमष्डपया कन्ह्यः छगु ज्याझ्वः दथुइ निर्माण जुयाच्वंगुु बिषय खँय् सार्वजनिक सुनुवाइ ज्याझ्वः जुइ धका निर्माण कमितिया नायः प्रदेश न ३ या सांसद राजेश शाक्य लहनान्युजयात जानकारी बियादिगु दु ।
निर्माण कमितिया नायः सांसद शाक्यं बिउगु जानकारी कथं काष्ठमण्डप निर्माणया आतकया प्रगति बिवरण व आर्थिक बिवरणया बिषय सार्वजनिक सुनुवाइ जुइत्यःगु खः ।
उगु ज्याझ्वलय् ब्बति कया थःपिनिगु सल्लाह व सुझाव बियादिइत निर्माण कमितिया नायः सांसद शाक्यं इनाप न यानादिगु दु ।
काष्ठमण्डप निर्माण यायेगु लागि येँ महानगरपालिकाया मेयर बिद्यासुन्दर शाक्यं ५ करोड ५० लाख निर्माण कमितियात लल्हाःगु खः ।
