सुदूरपश्चिमया पहाडी जिल्लाय् भुखाय् ब्बःगु दु। शुक्रवाः बहनि ८ बजे जुया १० मिनेटय् भुखाय् ब्बःगु खः।

जाजरकोट केन्द्रबिन्दु जूया ५ दशमलव २ म्याग्नेच्युडया भुखाय् ब्बःगु दु धका राष्ट्रिय भूकम्प मापन लिसे अनुसन्धान केन्द्रं धाःगु दु।

भुखाय् ब्बया गुलि क्षति जुगु दु धका आः तक जानकारी वःगु मदुनि।

प्रधानमन्त्री केपी शर्मा ओलीं थाइल्याण्डया न्हापांगु औपचारिक भ्रमण ऐतिहासिक व बहुक्षेत्रीय प्राविधिक नापं आर्थिक ग्वाहालिया निंतिं बंगालया खाडीया कुतः (बिम्स्टेक)या खुक्वःगु शिखर सम्मेलन सफल जूगु धयादीगु दु।

थाइल्याण्डया औपचारिक भ्रमण व बिम्स्टेकया शिखर सम्मेलनया झ्वलय् बैंककय् झाया च्वनादीम्ह प्रधानमन्त्री ओलीं स्वदेश लिहाँवये छन्हु न्ह्यः थौं प्रिदीबानोमयाङय् च्वंगु नेपाःया राजदूतावासया ज्याकुथि अवलोकन यानादिसें थ्व भ्रमण सफल जूगु दु धका धयादिगु दु।

नेपाः व थाइल्याण्ड दथुइ कूटनैतिक सम्बन्ध जूगु ६६ दँया इतिहासय् नेपाःया प्रधानमन्त्रीं थाइल्याण्डया भ्रमण याःगु थ्व न्हापांखुसी खः। प्रधानमन्त्री ओलीं भ्रमण व शिखर सम्मेलनया झ्वलय् जूगु निगू पक्षीय खँल्हाबल्हां नं उगु देय्लसे सम्बन्ध चकंकेगुलिइ अझ तिबः जूगु न्ह्यथनादिल। प्रधानमन्त्री ओलीं थाइल्याण्डया प्रधानमन्त्री पेथोङथान शिनावात्रायात नेपाःया औपचारिक भ्रमणया ब्वना बियादीगु दु धाःसा निगूपक्षीय वार्ताया झ्वलय् संस्कृति, पर्यटनलिसें च्यागू विषयया सम्झौताय् ल्हाःचिं तयेगु ज्या जूगु खः।

प्रधानमन्त्री ओलीलिसें भ्रमण दलय् झाया च्वनादीम्ह न्हापांम्ह मिसा राधिका शाक्य, परराष्ट्रमन्त्री डा आरजु राणा देउवा, प्रधानमन्त्रीया मुख्य सल्लाहकार विष्णुप्रसाद रिमाल, आर्थिक विकास सल्लाहकार डा. युवराज खतिवडा, मुख्यसचिब एकनारायण अर्याल, परराष्ट्र मन्त्रालयया सचिब अमृतबहादुर राई, शिष्टाचार महापाल विष्णुप्रसाद गौतमलिसें तय्सं दूतावासया अवलोकन यानादीगु खः।

भ्रमण दलयात लसकुस यानादिसें थाइल्याण्डया निंतिं नेपाःया राजदूत धनबहादुर वलीं दूतावासया थःगु हे जग्गाय् भवन दःसां नं न्हूगु भवन दयेकेमाःगु व जग्गा नं अझ चकंकेमाःगु अवस्थाबारे जानकारी बियादिल। थौं सनिलय् दूतावासं प्रधानमन्त्री ओलीया हनाय् ग्वसाःग्वःगु लसकुस समारोहय् वय्कःलिसें भ्रमण दलया दुजःत व थन च्वंपिं नेपाली समुदायया प्रतिनिधितय्सं ब्वति काःगु खः।

शिखर सम्मेलनं थुगु लागाया बनेज्या चकंकेगु, सम्पर्क सञ्जाल व मानवीय सुरक्षायात केन्द्रय् तयाः सम्मेलनं समृद्धि, अनुकूलन व खुलापनया नारा अन्तर्गत बिम्स्टेक बैङ्कक भिजनलिसें खुगू बुँदाया प्रस्ताव पारित याःगु खः।

भारतीय प्रधानमन्त्री नरेन्द्र मोदीं नेपाःलिसेया सम्बन्धयात भारतं तःजिक प्राथमिकता बियाच्वंगु दु धकाः धयादीगु दु।

थाइल्याण्डया बैङ्ककय् च्वंगु होटल माडारिन ओरियन्टलय् प्रधानमन्त्री केपी शर्मा ओलीलिसे जूगु खँल्हाबल्हा फलदायी जूगु धकाः धयादिल। “जिमिसं भारत–नेपाः मित्रताया थी थी पक्षत विशेष यानाः ऊर्जा, कनेक्टिभिटी, संस्कृति व डिजिटल प्रविधि थेंजाःगु ख्यलय् सहलह याना”, सामाजिक सञ्जाल एक्सय् प्रधानमन्त्री मोदीं धयादिल।

वय्कलं थुगुसीया बिम्स्टेक शिखर सम्मेलनं वःगु छुं छुं प्रमुख सकारात्मक लिच्वः विशेष यानाः विपद् व्यवस्थापन व समुद्री यातायातया बारे नं खँल्हाबल्हा याना धकाः धयादिल।

प्रधानमन्त्री ओली व वय्कःया भारतीय समकक्षी निम्हेसिया दथुइ थ्यं मथ्यं ४५ गू मिनेट खँल्हाबल्हा जूगु खः।

बहुक्षेत्रीय प्राविधिक नापं आर्थिक ग्वाहालिया निंतिं बङ्गालया खाडीया कुतः (बिम्स्टेक)या खुक्वःगु शिखर सम्मेलन बैङ्कक बिचाःपौ, २०३० पिथनाः क्वचाःगु दु।

थुगु लागाया बनेज्या चकंकेगु, सम्पर्क सञ्जाल व मानवीय सुरक्षायात केन्द्रय् तयाः सम्मेलनं समृद्धि, लचिलोपन व खुलापनया नाराअन्तर्गत बिम्स्टेक बैङ्कक भिजनलिसें खुगू बुँदाया प्रस्ताव पारित याःगु खः। पारित प्रस्तावबारे जानकारी बिइत ग्वसाःखलः देय् थाइल्याण्डया प्रधानमन्त्री पेथोङ्थान शिनावात्रां थन पत्रकार सम्मेलन यानादीगु खः।

प्रस्तावय् बिम्स्टेकयात प्रभावकारी जुइकेत कार्यमुखी संयन्त्र गठन, थुकिया भविष्य क्वःछीत प्रबुद्ध व्यक्तितय्गु पुचः (इपिजी) गठन, म्यारिटाइम ट्रान्सपोर्ट सम्झौता, भूखाचं प्रभावित म्यान्मार व थाइल्याण्डयात ग्वाहालि यायेगु विषयलिसेंया मंकाः वक्तव्य, पर्यटन व संस्कृतियात प्राथमिकता बियाः जनता–जनताया सम्पर्क चकंकेगु विषयत दुथ्याः।

थाई प्रधानमन्त्री शिनावात्रां शिखर सम्मेलनया सम्मुखय् नेपाःया प्रधानमन्त्री केपी शर्मा ओलीया न्हापांगु औपचारिक थाइल्याण्डया भ्रमण यानाः निगू देय्दथुइया सम्बन्धय् न्हूगु आयाम दयेकूगु धयादिल। 

प्रधानमन्त्री ओलीया औपचारिक भ्रमणया छन्हुलिपा भारतया प्रधानमन्त्री नरेन्द्र मोदीं नं औपचारिक थाइल्याण्ड भ्रमण याःगु खः। शिखर सम्मेलनय् प्रधानमन्त्री ओलीलिसें दुजः देय्तय् सरकार प्रमुखतय्सं संबोधन यानादिल।

राष्ट्रपति रामचन्द्र पौडेलयात कार्यवाहक प्रधानमन्त्री प्रकाशमान सिंहं नापलानादीगु दु। राष्ट्रपति भवन शीतल निवासय् थौ शुक्रवाः नापलानादीगु खः।

समसामयिक विषय खँ जुगु धका राष्ट्रपति पौडेलया सचिवालयं धाःगु दु।