नेपालभाषा स्नातकोत्तर ब्वँमिपिन्त छगू ज्याझ्वःया दथुइ सत्यहेरा अनुसन्धान सिरपाः, पुष्पादेवी छात्रबृत्ति व योगवीरसिंह अनुसन्धानबृत्ति सिरपाः लःल्हाःगु दु । नेपालभाषा केन्द्रीय विभागय् जूगु उगु ज्याझ्वलय् मूपाहां यल महानगरपालिकाया उप–प्रमुख गीता सत्यालं उगु सिरपाः लःल्हाःगु खः ।

ज्याझ्वलय् ‘नेवाः लोकबाखंया अभिप्राय  छगू अध्ययन’ शोध प्रबन्धया नितिं सृष्टि श्रेष्ठ व ‘सिंहसार्थबाहु अवदान ने.सं. ९४६’या अभिलेख सम्पादनया नितिं राजेन्द्र शाक्ययात अनुसन्धान सिरपाः, अथेहे ‘नेपाल साहित्य मन्दीरया योगदान’ शोधप्रबन्धया नितिं सुमा श्रेष्ठ बनेपालीयात योगवीरसिंह अनुसन्धानबृत्ति सिरपाः लःल्हाःगु दुसा नेपालभाषा केन्द्रीय विभागय् स्नातकोत्तरया न्हापांगु सेमेष्टरया ब्वँमिपिं सिल्भा प्रधान व कविना नेपाली अथेहे निगूगु दँया ब्वँमिपिं केशरी प्रधान व राकेश महर्जनयात पुष्पादेवी छात्रबृत्ति सिरपाः लःल्हाःगु खः ।

सिरपाः त्याकादीपिन्त मूपाहां उप–प्रमुख सत्यालं दसिपौ व सिरपाःया दातापिन्सं नगद सिरपाः लःल्हानादीगु खः । थ्वहे झ्वलय् सिरपाःयात कयाः विभागया पुलांम्ह प्रमुख प्रा. प्रेमशान्ति तुलाधरं बःचा हाकलं जानकारी बियादिसें उजेली डंगोलं थः मां अबु सत्यमान व हेरामायाया नामं ‘सत्यहेरा अनुसन्धान सिरपाः’या नितिं प्यंगू लखतका अक्षयकोष तयाब्यूगु व अनुसन्धानात्मक शोध प्रबन्धया नितिं निम्हेसित म्हतिं झिद्वः तकाः सिरपाः बियावयाच्वंगु नं जानकारी बियादिल ।

अथेहे पञ्चवीरसिंह तुलाधरं थः जहान पुष्पादेवी तुलाधरया नामं निगू लखतका अक्षयकोष तयाः नेपालभाषा स्नातकोत्तर ब्वनाच्वंपिं प्यम्ह ब्वँमिपिन्त ‘पुष्पादेवी छात्रबृत्ति’ व कमलवीरसिंह तुलाधरं थः अबु नापं नेपालभाषाया प्यंगः थां मध्ये छम्ह योगवीरसिंह कसाःया नामय् ‘योगवीरसिंह अनुसन्धानबृत्ति’ ग्यसुलाक्क अनुसन्धान शोध प्रबन्धयात बिया वयाच्वंगु नं जानकारी बियादिल । 

देय्न्यंकंया नेवाः पत्रकार तयेगु राष्ट्रिय संगठन नेवाः पत्रकार राष्ट्रिय दबूया भदौ १७ शनिबाः  सास बैंक्वयेट टेकुइ जुइगु न्याक्वःगु दँमुज्याय् न्याम्ह पत्रकार तयेत सिरपाः लःल्हायेगु निर्णय याःगु दु ।
 

पत्रकार दबुलिं बिउगु जानकारी कथं वाङमय शताब्दी पुरुष सत्यमोहन जोशी पत्रकारिता सिरपाः बरिष्ठ पत्रकार रमेशकाजी स्थापितयात, भिक्षु कुमार कास्यप स्मृति पत्रकारिता सिरपा क्रियाशिल युवा पत्रकार राजेन्द्र मानन्धरयात बिइगु निर्णय याःगु दु ।
 

अथेहे उगु ज्याझ्वलय् ज्ञानदेवी स्थापित स्मृति पत्रकारिता सिरपाः हटौंडा वाःपौया सम्पााक मोहनमान सांगामीयात, बाबुराजा ज्यापु फोटो पत्रकारिता सिरपाः बरिष्ठ फोटोपत्रकार राजेन्द्र चित्रकारयात व पुरुषोत्तम–निरादेवी पत्रकारिता सिरपाः न्हापांम्ह नेवाः कार्टुनिस मोहन श्याम खोकनायात लःल्हायेगु नेवाः पत्रकार राष्ट्रिय दबूया केन्द्रीय सचिवालया बैठकं निर्णय याःगु दु ।

नेवाः पत्रकारतयेत हःपाः बिइगु नापं सम्मान यायेगु कथं अथे सिरपाः बिइगु निर्णय यानागु खः धकाः धाःगु दु । थुगुसीया दँमुँज्या नापं कार्यकारिणी सभाय् नेवाः पत्रकारतय्गु नितिं ग्वहालि यायेत पत्रकारिता कल्याणकारी कोष तकं घोषणा याइगु जूगु दु ।

उगु दँमुँज्याय् स्वनिगः नापं स्वनिगः पिनेया थीथी जिल्लापाखें पत्रकार दबूया जिल्ला कचापाखें नं ब्वति कयादी धकाः नं धाःगु दु ।