Display Style:
Column Style
पत्रकार दबूया न्हुग नेतृत्वय् सुरजवीर
लहनान्युज | कछलागा षष्ठी ११४० (नोभेम्वर १८ २०१९)
नेवाः पत्रकार राष्ट्रिय दबूया स्वक्वःगु तःमुँज्यां न्हूगु नेतृत्व सर्वसहमतिं ल्यःगु दु ।
उगु तःमुँज्यां न्हूगु नेतृत्व सर्वसहमति कथं नायः सुरजवीर बज्राचार्य, बरिष्ठ न्वकू नृपेन्द्रलाल श्रेष्ठ, न्वकू संदिप श्रेष्ठ व रचना श्रेष्ठ, मूछ्याञ्जे सुनिल महर्जन, दांभरि सुरेन्द्रभक्त श्रेष्ठ, छ्याञ्जे केके मानन्धर, ल्यू छ्याञ्जे राजु नापित व प्रेरणा शाक्य, ल्यू दांभरी बाबुकाजी साःछेँ श्रेष्ठयात ल्यःगु दु ।
अथेहे मूदुजलय् नविन जोशी, विजयराम कर्माचार्य, भाइकाजी महर्जन, विराजकाजी राजोपाध्याय, प्रजीत शाक्य, पूर्णभक्त दुवाल, अनुच प्रधान, तेजनारायण महर्जन, विगेन तुलाधर, श्याम तण्डुकार, हसना लवजु, रुवि श्रेष्ठ, सुनिता महर्जन, मीना बज्राचार्य, अनिता डंगोल, निशा श्रेष्ठ, विनय प्रधान, भोजराज श्रेष्ठ, उत्तम श्रेष्ठयात ल्यःगु खः ।
अथे हे न्हापांगु केन्द्रीय समितिया पूर्ण वैठक हे चितवनय् च्वंवनेगु सहमति जूगु खः
नेपालभाषा साहित्य नखः किपुली जुल
लहनान्युज | कछलागा षष्ठी ११४० (नोभेम्वर १८ २०१९)
किपू नेपालभाषा साहित्य नखः सञ्चरवाः किपूलि जुल । वइगु मंसिर ६ व ७ गते निन्हुयंकं प्रज्ञाभवनया चकं दबुलिइ जुइगु नेपालभाषा साहित्य नखःयात प्रचार याय्गु झ्वलय् किपूया मंगल मा.वि.इ नेपालभाषा टाइम्स व ब्याँचुलि गुथिया पयर्टन विकासया अन्तरक्रिया व नेपालभाषा साहित्यय् चिनाखँ व बाखं वाचन याय्गु ज्याझ्वःजूगु खः ।
ज्याझ्वलय् लोककबि राजभाई जकःमि, कवयित्री रजनी मिला, राज सायमि, डा. चन्द्रमान बज्राचार्य, रमेशकाजी स्थापित, लक्ष्मीकुमार मर्हजन, दिलीप शाही, राजेन्द्र पुतालिसें किपूयान्हू पुस्ताया साहित्यकारपिन्सं थःथःगु साहित्य पाठ यानादीगु खः ।
रत्नताराया ‘उदाय् जातिया संस्कार ज्याःजंक्व’पितब्वज्या
लहनान्युज | कछलागा षष्ठी ११४० (नोभेम्वर १८ २०१९)
नेपालभाषायातःगु सफू च्वयादीधुंकुम्ह रत्नतारा ताम्रकारं च्वयादीगु ज्याःजंक्वबारेया सफू “उदाय् जातिया संस्कार ज्याःजंक्व” सफू पितब्वज्या जूगु दु ।
उदाय् समाजया ज्याथःम्ह १०६ दँ दुम्ह मोतिकृष्ण तुलाधर व त्रैलोक्यमान ताम्रकारं मंकाः कथं पितब्वज्या यानादीगु खः । ज्याझ्वलय् समाजसेवी नेवाः न्ह्यलुवा हितकरवीर सिंह कंसाकारं च्वमि ताम्राकारयात हनापौ लःल्हानादिल ।
विश्व शान्ति अभियानया ग्वसालय् जूगु उगु नेपाल प्रज्ञा प्रतिष्ठानया कुलपति गंगाधर उप्रेती मूपाहाँ कथं झायादीगु खः।
संस्थाया नायः प्रेम नाथ जोशीया सभाध्यक्षताय् जूगु ज्याझ्वलय् उदाय् समाजया पुलांम्ह नायः पञ्चवीर सिं तुलाधर, तवः समाज येँया नायः तेज रत्न कंसाकार, ताम्राकार समाज यलया नायः रविन्द्र ताम्राकार, प्रा. प्रेमशान्ति तुलाधर नुगःखँ तयादीगु खः ।
च्वमि ताम्राकारं थःगु सफू पिथनेगुया आज्जु व च्वय्गु नितिं यानागु अनुभव न्ह्यब्वसे सुभाय् देछानादीगु खःसा ज्याझ्वः सुशीलवीर सिंह कंसाकारं न्ह्याकादीगु खः ।
पत्रकार दबूया स्वक्वःगु तःमुँज्या क्वचाःल
लहनान्युज | कछलागा षष्ठी ११४० (नोभेम्वर १८ २०१९)
नेवाः पत्रकार राष्ट्रिय दबूया स्वक्वःगु तःमुँज्याया उलेज्या विशेष पाहांपिं प्रदेश नम्बर ३ या सांसदपिं राजेश शाक्य व जीवन डंगोल यानादीगु खः ।
नायः श्रीकृष्ण महर्जनया सभाध्यक्षताय् जूगु उगु ज्याझ्वलय् मूपाहाँ येँ महानगरपालिकाया मेयर बिद्यासुन्दर शाक्यं नेवाः पत्रकार राष्ट्रिय दबूयानितिं थःम्हं फूकथंया ग्वाहालि याना वयाच्वनागु व लिपालिपा नं ग्वाहालि यायेगुु जुइधयादिसें नेवाः पत्रकारतसें बास्तविकता यात नाला अप्वः सकारात्मक समाचार च्वय्माः धकाः बः बियादिगु दु ।
अथे हे सांसद शाक्यं नेवाःपत्रकार राष्ट्रिय दबूया थःगु हे छेँ माःगु अवस्था दु धासें उकियानितिं थःम्ह ग्वाहालि यायेत तयार दुग ुधयादिगु खः । मेम्ह सांसद डंगोलं नं नेवाः पत्रकार तयेत माःकथं ग्वाहालि यायेत तयार दुगु धयादीगु खः ।
अथेहे पाहां प्रेस काउन्सिलया कार्यवाहक नायःकिशोर श्रेष्ठं पत्रकार तयेसं आचार संहिता नं पालना यायेमाः धयादिसें स्वतन्त्रता नापनापं कर्तब्ययात तकं ध्यान तया वनेमाः धयादिल । नेवाः नापं आदिवासी जनजातिया समाजय् तुतिज्वना सालेगु प्रबृद्धि दुगुलिं समस्या ब्वलना च्वंगु खँ न्ह्यथसें नेवाः पत्रकार राष्ट्रिय दबूलिसे जानाः वनेत थःतयार दु धयादिल । नेपाल आदिवासी जनजाति पत्रकार महासंघया वरिष्ठ न्वकू गजुरधन राई नं थःपिं न्ह्याबलें पत्रकार दबूया नापनापं दु धयादिसें नापं जाना वनेत तयार दुगु नं धयादिल ।
उगु ज्याझ्वलय् पत्रकारिताख्यलय् ज्वःमदुगु योगदान यानादीपिं नेवाः पत्रकारपिं न्याम्हेसित थीथी सिरपाःतकं लःल्हाःगु खः । सिरपाःत्याकादीपिं पत्रकारपिं वरिष्ठ पत्रकार नाप साहित्यकार मोहन दुवालयात वाङमय शताब्दीपुरुष सत्यमोहन जोशीपत्रकारिता सिरपाः ११४० व राष्ट्रिय समाचार समितिया फोटो पत्रकार रत्न श्रेष्ठयात बाबुराजाज्यापु फोटो पत्रकारिता सिरपाः हिमेशरत्न बज्राचार्ययात भिक्षु कुमार काश्यप लुमन्ति पत्रकारिता सिरपाः वरिष्ठ पत्रकार याम प्रधानयात ज्ञानदेवी स्थापित लुमन्ति पत्रकारिता सिरपाः नाप वरिष्ठ पत्रकार अमृतलाल श्रेष्ठयात ज्ञानदेवी लक्ष्मीप्रभा लुमन्ति पत्रकारिता लःल्हाःगु खः ।
सीमाय् सुरक्षा पोष्ट र सुरक्षाकःमि अप्वयेकेगु गृहमन्त्रीया धापू
लहना न्यूज | ने.सं. ११४० कछलाथ्व चतुर्दशि (११ नोभेम्बर, २०१९), सोमवाः
गृहमन्त्री रामबहादुर थापां भारत व चीनया सीमाय् सुरक्षा पोष्ट र सुरक्षाकःमि अप्वयेकेगु धयादीगु दु ।
थौं सोमवाः राज्य व्यवस्था लिसें सुशासन समितिइ सांसदपिन्सं तयादीगु जनच्यूताःया विषयया लिसः बियादिसें गृहमन्त्रीं थापां थौंकन्हय् निगुलिं देसया सीमानाय् सुरक्षाकःमि व पोष्ट म्हो जूगु धयादिल ।
मन्त्री थापां थुगु विषयस न्हापांनिसें हे सहलह जूसां नं कालापानीया विषय वयेधुंकाः दबाब अझ अप्वःगु नं धयादिल । वय्कलं धयादिल, ‘झीगु सीमा व नाकाय् सुरक्षाकःमि म्हो जक दु । पोष्ट नं म्हो दु । आः याकनं हे निगुलिं तनेगु जुइ ।’
समितिया दुजःपिन्सं सीमा सुरक्षा पोष्ट नं सीमाना स्वयां तसकं हे तापाक्क दुगु नं धाःगु खः । थुकिया लिसः बियादिसें गृहमन्त्री थापां धयादिल, ‘आः पोष्टत हे २०÷३०गू किलोमिटर थुखे हे दु । आः सीमानाया लिक्क यंकेमाः ।’
थौं सोमवाः च्वंगु समितिया मुँज्याय् कालापानीया विषयस सांसदपिन्सं खँ ल्ह्वंगु खःसा थुकी सरकारं तत्काल पलाः न्ह्याकेत नं इनाप याःगु खः ।
समितिया सभापति शशी श्रेष्ठं फुक्क सांसदपिंलिसे सहलह यानाः सरकारयात तत्काल राजनीतिक व कूटनीतिककथं वार्ता यायेत उजं बियादिल । वय्कलं सीमा स्तम्भयात तकं व्यवस्थित यायेत सरकारयात उजं बियादीगु खः ।
सभापति श्रेष्ठं उजं बियादिसें धयादिल, ‘काली खुसि पूर्व नेपाल व पश्चिम भारत धयातःगु दु । अथे मखु । काली खुसि हे सीमान खः । निगुलिं देसया बच्छि बच्छि काली खुसि खः । थुकियात स्थापित यायेमाः ।’
