Display Style:
Column Style
ल्वहंकःमि समाजया दँमुँज्या जुल
नृपेन्द्रलाल श्रेष्ठ | थिंलाथ्व दशमी ११३८ (दिसेम्वर १७ २०१८)
ल्वहंकःमि (शिल्पकार) समाजया झिंप्यक्वःगु दँमुँज्या जोम्बहाः यलय् च्वंगु आगंछेँय् जुल ।
समाजया नायः मोतिलाल शिल्पकारया सभाध्यक्षताय् जूगु उगु ज्याझ्वलय् वय्कलं ज्या जंक्व क्वचाय्धुंकूपिं प्यम्हेसित हनादीगु खःसा थुगुसी एसइइ, प्लस टु व स्नातक उत्तीर्ण यानादीपिं स्वम्हेसित “मोति शिक्षा सिरपाः” लःल्हानादीगु खः ।
ज्याझ्वलय् नेपालभाषा मंकाः खलः, यलया नायः ऋषिप्रसाद श्रेष्ठ, यल महानगरपालिका वडा ल्याः १६या नायः निर्मलरत्न शाक्य, बाराही समाजया नायः पुष्परत्न बाराही, राजकर्णिकार समाजया नायःलिसें थीथी समाजया प्रतिनिधिपिं पाहाँकथं झायादीगु खः ।
हेराशोभा शिल्पकारं न्ह्याकादीगु उगु ज्याझ्वलय् उपस्थित जुयादीपिं सकलसित समाजया न्वकू अनिल शिल्पकारं सुभाय् देछानादीगु खः ।
संरक्षण अभियन्ता गणपतिलाल लगायत मेपि न ज्वन
लहनान्युज | थिंलाथ्व नवमी ११३९ (दिसेम्वर १६ २०१८)
सम्पदा संरक्षण अभियन्ता पिनिगु विरोध लिपा दिना च्वंगु पशुपतिया श्लेष्मान्तक क्षेत्रय् कंक्रिटया पदमार्ग निर्माण स्वला लिपा हाकनं न्ह्याःगु दु ।
थौं सम्बन्धित निकाययात ध्यानाकर्षण याकेत सम्पदा संरक्षण अभियन्ता पिनिगु छगू पुचलं पशुपति क्षेत्र विकास कोषया ज्याकुथि घेराउया झ्वलय् संजय अधिकारी, गणपतिलाल श्रेष्ठ, ललिमा श्रेष्ठ, आशा थापा, पूर्ण विक्रम राणा, अर्जुन राणा लिसेंया अभियन्तापिन्त गौशाला प्रहरीं गिरफ्तार याःगु खः ।
थथे अभियन्तापिन्त गिरफ्तार विरुद्ध सम्पदा संरक्षण अभियन्तापिन्सं छगू प्रेस वक्तव्य सार्वजनिक याःगु दु ।
पशुपति श्लेष्मान्तक क्षेत्र संरक्षणया यायेमाःगु धका पशुपति क्षेत्र विकास कोषं आः जुयाच्वंगु पुरातात्विक मान मर्यादाया उल्लंघन जुयाच्वंगु बारे कर्मचारीपिनिगु ध्यानाकर्षण यायेत अभियानया नागरिक पुचलं थौं आइतवाः कोषया ज्याकुथि घेराऊ याःगु खः ।
थ्व सिबें न्ह्यः पुरातत्व विभागं वःगु भाद्र २० गते कोषयात पौ छ्वयाः ज्या दिकेत निर्देशन ब्यूगु खः ।
कोषया सदस्य सचिव व नायः नाप मलाःसां सम्पदा अभियानता पुचलं कंक्रिटया पदमार्ग निर्माण जुयाच्वंगु थासय् वनाः ठेकेदार व ज्याकःमिपिन्त कानून अःखः जुयाच्वंगु निर्माण ज्या याकनं दिकेत तकं इनाप याःगु खः ।
मदन सेनयात करुणाकर सिरपाः
अमिर मैया रञ्जित | थिंलाथ्व नवमी ११३९ (दिसेम्वर १६ २०१८)
लोक साहित्य परिषदया ग्वसालय् लोकसाहित्यविद् मदुम्ह करुणाकर वैद्यया लुमन्तिइ नीस्वना तःगु ‘करुणाकर सिरपाः’ पद्मकन्या क्याम्पस नेपालभाषाया सह प्रा. मदनसेन बज्राचार्ययात मूपाहाँ शताब्दीपुरुष सत्यमोहन जोशीं हनापौ लःल्हानादीगु दुःसा दिवाकर बैद्यं ३० द्वः तका दां लःल्हानादीगु खः ।
उगु ज्याझ्वलय् मदुम्ह पन्नाप्रसाद जोशीया ‘संक्षिप्त नेपालभाषा शब्दकोष’ निक्वःगु पिथना पितब्वज्या न जुगु खः । मदुम्ह जोशी ५० दँ न्ह्यः ‘बृहत नेपालभाषा शब्दकोष¬’ पिथनेत शिक्षा मन्त्री केदारमान व्यथितया थाय् आर्थिक ग्वहालि नितिं पाण्डुलिपि ज्वनाः नाप लाःवनेगु झ्वलय् मोटरसाइकल दुर्घटनाय् लाना मदुगु खँ लुमंकादिल ।
खँग्वः धुकू पिथनेत आर्थिक ग्वहालि यानादीपिं मदुम्ह वैद्यया छय् मयजुपिं शील मञ्जु जोशी श्रेष्ठ, पाटन संयुक्त कलेजया सह प्रमुख मञ्जुश्री जोशी श्रेष्ठ, मेरिना सिख्राकार व देवकी श्रेष्ठपिन्त हनापौ लःल्हागु खः ।
परिषदया नायः प्रा. प्रेमशान्ति तुलाधरया सभाधक्ष्याताय् उप प्रा. राजित बहादुर श्रेष्ठं न्ह्याकादीगु खःसा ज्याझ्वलय् नेपालभाषा केन्द्रीय विभागया पुलांम्ह प्रमुख तुल्सीलाल सिंहं लसकुस न्वचू तयादीगु खःसा धर्मकृष्ण श्रेष्ठं सुभाय् न्वचू तयादीगु खः ।
किपा नेवाः सूचना केन्द्र
बृहत स्वास्थ्य शिबिर क्वचाल
नृपेन्द्रलाल श्रेष्ठ | थिंलाथ्व नवमी ११३९ (दिसेम्वर १६ २०१८)
अरनिको समाजया ग्वसालय् झी नेवाः मिसा पुचः, मनमैजुया ग्वाहालिं मनमैंजुइ छगु स्वास्थ्य शिविर क्कचाःगु दु ।
उगु ज्याझ्वलय् चिनि ल्वय्, प्रेसर,अल्टासाउण्ड, गाइनो छ्यगु, मिखा नाप वा या निशुल्क स्वयेगु ज्या जुगु खः ।
स्वास्थ्य शिबिरया उलेज्या अरनिको समाजया नायः डा.सर्वोत्तम श्रेष्ठ उलेज्या यानादीगु खः । समाजया बरिष्ठ न्वकु डा.उर्मिला शाक्य व डा.सुशिल प्रजापति व स्थानीय समाजसेवी इन्द्रमान महर्जन न थःथःगु नुगः खँ तयादीगु खः ।
उगु स्वास्थ्य शिबिरय् समाजपाखे वासः सितिक बिइगु ज्या न जुगु खः ।
येँ महानगरपालिकां महानगर दिवस हन
नृपेन्द्रलाल श्रेष्ठ | थिंलाथ्व अष्टमी ११३९ (दिसेम्वर १५ २०१८)
येँ महानगरपालिकांया ग्वसालय् थौं महानगर दिवस तःजिक हंग दु । उगु ज्याझ्वलय् मूपाँहा उपप्रधान नाप रक्षामन्त्री ईश्वर पोखरेलं त्वाःदेवाय् मत च्याका उलेज्या यानादीगु खः ।
थौंया ज्याझ्वलय् प्रदेश न. ३ या मुख्यमन्त्री बिशेष पाँहा कथं झायादीगु खःसा प्रतिनिधि सभाया सांसदपिं जीवनराम श्रेष्ठ, रामबीर मानन्धर पुलाम्ह मेयर नाप प्रदेश सभाया सांसद केशब स्थापित पाँहा कथ झायादीगु खः ।
थौंया ज्याझ्वलय् येँया न्हापाम्ह मेयर कसभापति जनकमान श्रेष्ठ नाप बहाल करपाखें वडा २६ या दयाकुमारी पाण्डे व लक्ष्मी चपलिया पाण्डेयात व व्यवसाय करपाखें वडा २२ या मार्ट बटु व वडा ११ या पि एशोशिएसनयात करदाता सम्मान याःगु खः ।
येँ परम्परागत बाजा संरक्षण याय्गु ताःतुना १२१ गु बाद्य गुरुपिन्त २५ द्धः नगद नाप हना पौ बिया सम्मान न यागु खः । अथेहे झीम्ह संचाकःमिपिं ५० द्धः तका नगद नाप “महानगर शुशासन प्रवर्धन पुरस्कार २०७५” न बिइगु दु ।
थौं पुरस्कृत जुयादीपि नागरिक दैनिकया खिलक बुढाथोकी, कान्तिपुर दैनिकया दीपेन्द्रबहादुर बिष्ट, अन्नपूर्ण पोष्ट दैनिकया छेटु शेर्पा, नयाँ पत्रिका दैनिकया पुष्प ढुङ्गाना, अनलाइन खवरया रविन्द्र घिमिरे, १२ खरी अनलाइनया सुरञ्जन घिमिरे, एभिन्युज टेलिभिजनया रामशुभक महतो, उज्यालो एफ. एम.या सिल्भिया राजोपाध्याय व सम्यक वाःपौया सुगतरत्न सिन्धुराकार नाप संस्थागत पाखें नेवाः एफ एमयात न हःगु खः ।
नाप महानगरया २५ दँ तक सेवायाम्ह निर्देशक शिवराज अधिकारी, नायब सुब्बा सुरेन्द्र शाक्य व मेकानिक विकास गुरुङ्यात दीर्घ सेवा पदक लःल्हागु खः ।
थौंया ज्याझ्वलय् महानगर दुनेया ब्बनेकुथि “उत्कृष्ट विद्यालय पुरस्कार” सामुदायिक विद्यालयपाखे जनजागृति ज्ञानरश्मी माद्यमिक बिद्यालय, बालाजयात १ लाख ५० द्धः नगद न्हाप गीतामाता माद्यमिक बिद्यालय, बिजेश्वरीयात ल्यु व श्रम राष्ट्रिय माद्यमिक बिद्यालय, चावहिलयात ल्युयाल्यु पुरस्कार ७५ द्धः व ५० द्धः तका लःल्हागु खः । हे संस्थागतपाखे नयाँ बानेश्वरया भ्याली भ्यू स्कूल न्हाप, केएमसि स्कूल, बुद्धनगर ल्यु व द एक्सेल्सियर स्कूल, स्वयम्भूयात लियाल्यु लाःगु खः ।
थौं निसे स्वन्हु यकं काठमाडौं महोत्सव न न्ह्याःगु दु । काष्ठमण्डप, यट्खा बहाः, न्यत, टेगः, क्षत्रपाटी, थँबहि, ज्याठा, थँहिटी, ध्वाकाबहाः, असं, न्हायकंत्वाः बाँगेमुढा, भेडासि मछिन्द्र बहाः, किलागः, इटुम्बहाः, वघः, मखं, हनुमानध्वाका, बसन्तू, ओम बहाः, लगः, ब्रम्हत्वाः, जैशी देवल, कोहिटी, भीद्यःत्वालय् थुुगु महोत्सव न्ह्याइ ।
