Display Style:
Column Style
वाङमय शताब्दी पुरुष सत्यमोहन जोशीयात जनस्तरं हन
लहनान्युज | ञंलागा दशमी ११३७ (सेप्तेम्बर १५ २०१७)
वाङमय शताब्दी पुरुष सत्यमोहन जोशी हनाया ग्वसालय् शुक्रवाः तःजिक जनस्तरं हना ज्याझ्वः याःगु दु । राष्ट्रपति विद्यादेवी भण्डारीं हनापौ लःल्हानादीगु उगु ज्याझ्वः याये न्ह्यः संस्कृतिविद जोशीयात यलंनिसें येँय् तक कलाकारपिंपाखें मोटर साइकल याना जात्रा याना हःगु खःसा येँया बसन्तपुलिइ थ्यंका जनस्तरं छगू कथं सिन्दुर जात्रा याना हे चाःहिइकूगु खः । सिन्दुर जात्रा क्वचाये धुंकाः राष्ट्रिय सभागृहलय् तःजिक अथे सामारोह याना हनेज्या याःगु खः ।
वाङमय शताब्दी पुरुष सत्यमोहन जोशी हनाया ग्वसालय् जूगु उगु समारोहया नायः हना ज्याझ्वःया कजि लक्ष्मीदास मानन्धर जुयादीगु खः । ज्याझ्वलय् सकलसित लसकुसयासें मानन्धरं वाङमय शताब्दी पुरुष सत्यमोहन जोशीया नामय् अक्षय कोषया घोषणा यानादीगु खः । उगु कोषया नितिं थीथी बैंकपाखें ध्यबा वःगु जानकारी नं बियादिल ।
ज्याझ्वलय् येँ महागनरपालिकया मेयर विद्यासुन्दर शाक्यं नं अक्षयकोषण नितिं न्यागू लख तका दां महानगरपालिकां तयेगु घोषणा यानादीगु खः । ज्याझ्वलय् न्वंवासें मूपाहां राष्ट्रपति विद्यादेवी भण्डारीं सत्यमोहन जोशी नेपाःया हे अमुल्य व मंकाः निधी खः धयादिसें वय्कःया अभिनन्दन यायेखंगु धइगु राष्ट्रया हे गौरव खः धयादिल । वय्कलं सत्यमोहन जोशी धयाम्ह जीवत ज्ञानया कोष खः धकाः तकं धयादिल ।
येँ महानगरपालिकाया मेयर विद्या सुन्दर शाक्य, नेवाः न्ह्यलुवाः मल्ल के सुन्दर, पत्रकार सुरेश किरण मानन्धर, निरञ्जनरत्न शाक्य लगायतपिन्सं न्वंवानदीगु उगु ज्याझ्वः नेवाः जागरण मञ्चया नायः सुजिप बज्राचार्यं न्ह्याकादीगु खः ।
सुभाय् न्वचू बिइगु झ्वलय् ग्वसाः खलःया दुजः नापं पुलांम्ह राज्यमन्त्री तिर्थराम डंगोलं सत्यमोहन जोशीं साहित्य ख्यलय् ज्वःमदुगु योगदान यानादीगुलिं वय्कःयात नोबेल पुरस्कारया नितिं राट्रपतिपाखें सरकारयात निर्देशन बिइत माग यानादीगु खः ।
ज्याझ्वलय् रक्षामन्त्री भिमसेनदास प्रधान, जनकवि दुर्गादाल श्रेष्ठ, येँ महानगरपालिकाया उप मेयर हरिप्रभा खड्गी, कृष्ण गोपाल श्रेष्ठपिं पाहां जुयादीगु खः । उगु सरामारोहलय् नेवाः ख्यःया थीथी ब्यक्तित्वपिं सहभागी जुयादीगु खः ।
शनिवाः तःजिक नेपालभाषा साहित्यक सम्मेलन जुइगु
नृपेन्द्रलाल श्रेष्ठ | ञंलागा नवमी ११३७ (सेप्तेबर १४ २०१७)
‘नेपालभाषा टाइम्स’ दैनिक व ‘सन्ध्या टाइम्स’ सन्चार सहकारीया मंकाः ग्वसालय् थ्व हे वइगु ज्ञंलागा एकादशी शनिवाः कुन्हु यलया केशवनारायण चुकय् नेपालभाषा साहित्य महोत्सव जुइगुु दु ।
उगु नेपालभाषा साहित्य महोत्सव वाङ्मय शताब्दी पुरुष डा.सत्यमोहन जोशीं छगु ज्याझ्वः दथुइ उलेज्या याइगु ज्याझ्वः दु ।
उगु ज्याझ्वः खुगुगु ब्बःय् न्ह्याइगु ज्याझ्वः दु । ज्याझ्वलय् उपन्यासकार मल्ल के.सुन्दरया ‘द पोष्टर’ व कवि वसन्त चौधरया नेपालभाषाय् अनुवादित कविता संग्रह ‘वसन्त’या विमोचन याइगु ज्याझ्वः दु ।
न्हापांगु ब्बःय् प्राध्यापक प्रेमशान्ति तुलाधरं नेपालभाषा साहित्यया म्हसिका न्हयब्बयादी सा निगुगु ब्बःय् ‘भोलीको नेपालभाषा साहित्य’ नेपालभाषा विषयक अन्तरक्रिया जुइुगु ज्याझ्वः दु ।
स्वंगुगु ब्बःय् नेपालभाषाया नेवाः श्रष्टनाप सहलह ज्याझ्वः दु । सहजकर्ताया कथं कवि नवीन चित्रकारं नेपाल संगीत तथा नाट्य प्रज्ञा प्रतिष्ठानका कूलपति अन्तरक्रिया याइगु ज्याझ्वः दु ।
प्यंगुगु ब्बः य् जनकवि दुर्गालाल श्रेष्ठ, वरिष्ठ साहित्यकार पूर्ण वैद्य, मथुरा सायमी, नर्मदेश्वर प्रधान, राजभाई जकःमि, गणेशराम लाछि, शशिकला मानन्धर, सौरभ शाक्य, सुधीर ख्वबि, प्रतिसरा सायमी, केशरत्न शाक्यं पिनिगु थःथःगु साहित्य ब्बना दीं ।
दकलय् लिपागु ब्बःय् गायक पवित्र कसाः, गायिका रिता महर्जन पिन्सं सास्कृतिक ज्याझ्वः तया तंगु दु । नाप लोकव्हापि सांगीतिक पुचः कुटुम्बया सांगीतिक न्ह्यःब्बइगु ज्याझ्वः न दु ।
।
महोत्सवय् नेवाः नसा नाप सफू ब्बज्या नं दु धःका ग्वसाः खलकं धाःगु दु ।
न्ह्यःक्वःगु भूटान अन्तर्राष्ट्रिय व्यापार मेला शुरु
राजेश बज्राचार्य | ञंलागा नवमी ११३७ (सेप्तेबर १४ २०१७)
भूटानया अर्थमन्त्री ल्योन्पो नाम्गे दोर्जीया छगु ज्याझ्वः दथुइ न्ह्यःक्वःगु अन्तर्राष्ट्रिय व्यापार मेला राजधानी थिम्पुस्थित चाङलिङमिथाङ्ग मैदानय् थौ बिहिवार उलेज्या यानादीगु दु ।
अर्थमन्त्री नाम्गे दोर्जीं भूटान उद्योग बाणिज्य संघया ग्वसालय् अन्तर्राष्ट्रिय व्यापार मेलां छिमेकी मूलुकपिनिगु औद्योगिक सम्बन्ध नाप भूटानय् लगानीया सम्भावना अप्पो दइगु धःका भलसा कयादीगु दु ।
न्यान्हु तक न्ह्याइगु थुगुव्यापार मेलाय् भूटान, नेपाल, भारत व थाइल्याण्ड याना प्यंगु देशया २३४ थी थी स्टल दुथ्यागु दु ।मेलाय् नेपाल जकः १०२स्टल दुथ्यागु खः ।
मेलाय् ग्वसाखलः पाखे भूटान उद्योग बाणिज्य संघया महासचिव फूप छिरिङ्गं नेपाल व भुटानया बाणिज्य संघबनाप या सम्बन्धनय् विशेष जोड बियादीगु दु ।
ललितपुर उद्योग वाणिज्य संघया पहलय् सन २००९ निसे शुरु जुगु भूटान उद्योग बाणिज्य संघया सम्बन्धन पश्चात प्रत्येक वर्षय् औद्योगिक मेलाय् नेपाली तय्गु पहुँच सहज वया पनाच्वंगु द धःका अध्यक्ष सविन श्रेष्ठं धयादीगु दु ।
थौं बिहिवार भाद्र २९ गते निसे न्ह्याइगु थुगु अन्तर्राष्ट्रिय मेला असोज २ गते सोमवार क्वःचाइगु खः ।
‘युवराज कुनाल’ यात प्रेममोहन सिरपाः
अमिर मैया रञ्जित | ञंलाथ्व सप्तमी ११३७ (सेप्तेबर १२ २०१७)
भाषानिभा प्रेम बहादुर कसाःया लुमन्तिइ नीस्वना तःंगु प्रेममोहन थौं मंगलवाः सिरपाः ऐतिहासिक बाखँया लिधंसाय् च्वयातःगु पुधाः प्याखँ ‘युवराज कुनाल’ या च्वमि मदुम्ह परमानन्द बज्राचार्य जहान कृष्ण देवी बज्राचार्ययात न्यय्द्व तका नापं हनापौ मूपाहाँ जनकवि दुर्गालाल श्रेष्ठं लःल्हानादीगु दु ।
अथेहे उगु सिरपाः गुथिया थीथी ज्याझ्वःयात ग्वाहालि यानादीगुलिं नेपाः बाय्ङ्क्वेटया मचाराजा महर्जनयातनं हंगु दु । उगु सिरपाः पुरस्कार निदँय् छकः उपन्यास व नाटक विधायात पालंपाः बीगु यानावयात्वंगु खः ।
अथेहे सिरपाःया दाता स्व. ई.मोहन कृष्ण डंगोलया स्वंगूगु व लिपांगु उपन्यास ‘विकल्प’ उपन्यास व नेपाल भाषाया पुधाः प्याखँ भृकुटी साहित्यकार शशिकला मानन्धरं खस भाषं भाय् ह्यूगु सफू ‘भृकुटी’ मूपाहाँ दुर्गालाल श्रेष्ठ व विशेष पाहाँ गीता डंगोलं मंका पितब्वज्या यानादीगु दु ।
पुरस्कृत नाटकय् नेपाःया अजम्बर प्रेमदर्शन दुगु धासें मूपाहाँ श्रेष्ठं उगु प्याखं राणा शासनं नेपालभाषायात दमन यानाच्वंगु इलय् थीथी यातना फयाःनं सफू पिथने फुगु धैगु मदुम्ह च्वमिया जहान कृष्णदेवी बज्राचार्यया स्यल्लाःगु ग्वाहालि खः धयादिल ।
वरिष्ठ साहित्यकार नापं सिरपाः गुथिं नायःराजा शाक्यया नायःसुइ जुगु खः।उगु ज्याझ्वःपवित्र कसाः नं न्ह्याकादीगु खः। ज्याझ्वलय् निगुलिं सफूया बारे वरिष्ठ साहित्यकार मथुरा सायमिं कुलादीगु खःसा रेणुका बासुकला, पवित्र बज्राचार्यपिसंनं नुगःखँ तयादीगु खः । उगु भृकुटी नाटक शिल्भिया राजोपाध्यायं अंग्रेजी भाषं भाय् हिले धुंकूगु दु ।
भुटानया व्यवसायीत नेपालय्
लहनान्युज | ञंलाथ्व द्धादशी ११३७ (सेप्तेबर २ २०१७)
ललितपुर उद्योग वाणिज्य संघया ब्वनाय् भुटानया २३गू जिल्लाया ४३म्ह ब्यापारीत व्यावसायिक भ्रमणया नितिं नेपाः वःगु दु ।
नेपाः व भुटान दथुइ वाणिज्य सम्झौता मजूगुलिं निगू देय् दथुइ व्यापार प्रवद्र्धनया समस्या जूगु भुटानया ब्यवसायीतय्गु धापू दु । नेपालय् उत्पादन जुइगु हस्तकलाया हलंज्वलंत भुटानीतय्सं यक्व यय्काच्वंगु खःसां नं नेपाःया हलंज्वलं भारत जुयाः भुटान वनीगुलिं उगु हलंज्वलंया भाः तसकं थिके जुइगु खः ।
भुटानी पुचलं यलया लामाटारय् अग्र्यानिक खेती, लुभुया टेक्सटाइल, पाटन औद्योडिक क्षेत्रया अवलोकन याःगु दु । ललितपुर उद्योग वाणिज्य संघ व भुटान उद्योग वाणिज्य संघ दथुइ सन् २००७ निसें हे बांलाःगु स्वापू दयावयाच्वंगु दुसा भुटानं सन् २००९ निसें ग्वसाः ग्वया वयाच्वंगु अन्तर्राष्ट्रिय मेलाय् ललितपुर उद्योग वाणिज्य संघं नेपाःया प्रतिनिधित्व याना वयाच्वंगु दु ।
थुगुसी नं १४–१८ सेप्टेम्बरतक जुइगु मेलाय् नं ललितपुर उद्योग वाणिज्य संघं ब्वति काइगु जूगु दु ।
