नृपेन्द्रलाल श्रेष्ठ | दिल्लाथ्व चर्तुदशी ११३९ (जुलाई १५ २०१९)

यल महानगरपालिकाया समाज कल्याण महाशाखाया ग्वसालय् यल महानगर दुनेया उत्कृष्ट मचा पुचःया घोषणाया नापनापं सिरपाः लःल्हात ।

 

 

यल नगर दुने १२०गू बाल क्लब मध्ये ३५गू क्लबं ब्बति काःगु खः । उगु ज्याझ्वलय् मूपाहाँकथं झायादीम्ह यल महानगरपालिकाया सामाजिक समितिया संयोजक दिनेश कार्कीं त्रिपद्मा बाल क्लव न्हाप, नःत्वाः मचा पुचः ल्यू व भाष्कर बाल क्लव लियांल्यू लाःगुलिं दसिपौ, स्पीकर नापं मतिनाया चिं लःल्हानादिल ।

 

 

अथेहे, श्री चण्डी आदर्श सरल प्रकृति क्लव व श्रमिक शान्ति प्रकृति क्लबयात हःपाः सिरपाः लाःगु खः ।

 

 

समाज कल्याण महाशाखाया प्रमुख बाबुराजा महर्जनया सभाध्यक्षतायु जूगु उगु ज्याझ्वलय् प्रमुख प्रशासकीय अधिकृत प्रेमप्रसाद भट्टराई, सुप्रभा शाक्य, सरिता महर्जन व ज्ञानीशोभा महर्जनपिं पाहाँकथं झायादीगु खः ।

 

लहनान्युज | दिल्लाथ्व चर्तुदशी ११३९ (जुलाई १५ २०१९)

याताजः व कुतः प्रकाशनया मंकाः ग्वसालय् न्हुच्छेभक्त कवांया ‘क्वाःनाखं मिं नःगु छेँ’ पितब्वज्या व ‘चिबाखं परिचयात्मक गोष्ठी’ नगरकोटय् जुल ।

 

 

थःगु जःखःया सामाजिक घटनाया लिधंसाय् मुक्कं १८पु बाखं दुथ्याःगु उगु सफुतिइ २पु बाखं ख्वपया थःगु हे मौलिक भासं च्वयातःगु उगु सफू मूपाहाँ शिक्षाविद् वरिष्ठ साहित्यकार लक्ष्मण राजवंशीं पितब्वया यानादीगु खः । 

 

 

शौरभ शाक्यया सभाध्यक्षताय् कृष्णभक्त बोडें न्ह्याकादीगु उगु ज्याझ्वलय्सफूया दाता के.पिं सुवालं सफू दुनेया ‘आयोग’ नांया छपू बाखं ब्वना न्यंकादीगु खः ।

 

 

बाखंया च्वमि कवां नं सफू दुनेया मुक्कं बाखंया विषयवस्तु सामाजिक घटनाय् आधारित जूगु धासें ‘क्वाःनाखं मिं नःगु छेँ’ बाखं ब्वना न्यंकादीगु खः ।

 

 

मूपाहाँ राजवंशीं झीगु बाखं साहित्य सिर्जना धइगु देय् अनुकूलनापं सामाजिकीकरण, राष्ट्रियकरण व अन्तराष्ट्रियकरण यानायंकेमाःगु धयादिल ।

 

 

अथेहे ‘चिबाखं परिचयात्मक गोष्ठी’ प्रा. नर्मदेश्वर प्रधानं न्ह्यब्वयादीगु ‘चिबाखं बारे’ ज्यापौयात कयाः ध्रुब मधिकःमि, पुष्कर माथेमा, महेन्द्र गोपाल कर्माचार्य, सुधीर ख्वबि, राजेन मानन्धर व नरेशवीर शाक्यपिन्सं तयादीगु न्ह्यसःयात प्रा. प्रधानं स्पष्ट यानादीगु खः ।

 

 

वरिष्ठ साहित्यकार डा.योगेन्द्र प्रधान, वरिष्ठ समालाचक पूर्ण ताम्राकार पाहाँकथं झायादीगु उगु ज्याझ्वलय् ‘श्याम–विश्व सिरपाः’या दाता श्याम आशा, विमल ताम्राकारपिन्सं नुगःखँ तयादीगु खः ।

 

 

बुखँ अमिरमंंया रंजित

 

किपा नेवाः सुचना केन्द्र

 

 

लहना न्यूज | ने.सं. ११३९ दिल्लाथ्व द्वादसि (१३ जुलाइ, २०१९), सञ्चरवाः

रौतहटया सीमानाय् भारतं दयेकूगु बाँध खुसिबालं थुनाब्यूगु दु । बाँध तज्यानाः लः भारतपाखे बाः वनेवं रौतहटय् लःया सतह म्हो जुजुं वनाच्वंगु दु ।

 

 

बाँध तज्यायेवं खुसिवाः भारतीय बस्तिइ दुहांवंगु दु । लः भारतया बस्ति बैरगनिया, अशोगी, भकुरहर, सिन्धुलियालिसेंया थासय् दुहांवंगु खः ।

 

 

भारतया बैरगनिया व रौतहटया गौरया दथुइ दुगु भारतीय बाँधया हुनिं सदरमुकाम गौरलिसें रौतहटया अप्वः धइथें बस्ति डुबानय् लाःगु खः । बाँधय् दुगु लुखा चायेका मब्यूगुलिं संकट ब्वलंगु धासें रौतहटया प्रमुख जिल्ला अधिकारी व प्रहरी प्रमुखं भारतीय अधिकारीयात लःया निकास चायेकेत इनाप याना वयाच्वंगु खः ।

 

 

तर, लःया बहाव चायेकेगु पलेसा बाँधय् सुरक्षाकःमि तैनाथ याःगु धासें रौतहटबासीं सामाजिक सञ्जालपाखें भारतयात कुंखिनेगु ज्या जूगु खः ।

 

 

फेसबुक छ्यलीपिन्सं भारत विरोधी स्टाटसया नापनापं ‘गो ब्याक इण्डिया’ ह्यासट्याग नं छ्यःगु खः ।

लहना न्यूज | ने.सं. ११३९ दिल्लाथ्व द्वादसि (१३ जुलाइ, २०१९), सञ्चरवाः

छुं दिं न्ह्यःनिसें मदिक्क वा वःगुलिं वःगु खुसिबाः व चलखं यानाः लिच्वः लाःपिन्त केन्द्रीय सरकारं स्थानीय सरकारपाखें राहत इनेगु क्वःछ्यूगु दु ।

 

गृहमन्त्री रामबहादुर थापाया अध्यक्षताय् थौं सञ्चरवाः च्वंगु केन्द्रीय विपद् व्यवस्थापन कार्यसमितिया मुँज्यां प्रदेश सरकारलिसे समन्वय यानाः जिल्ला व्यवस्थापन समितिपाखें स्थानीय तगिंमं फुक्क राहत इनेगु क्वःछ्यूगु खः ।

 

मदिक्क वा वयाच्वंगु हुनिं देसया थीथी जिल्ला डुबानय् लाःगु दु ।

 

कार्यसमितिया मुँज्यां राहत इनेगु ज्यायात व्यवस्थित व प्रभावकारी दयेकेत प्रदेश सरकारया समन्वय दइकथं स्थानीय सरकारपाखें हे राहत इनेगु क्वःछ्यूगु गृहसचिव प्रेमकुमार राईं जानकारी बियादीगु दु । खुसिवाः व चलःया हुनिं दकलय् अप्वः क्षति जूगु प्रदेश नं. १ व २ स उद्धारया नितिं हेलिकप्टर तयारी अवस्थाय् तयातःगु गृहसचिव राईं जानकारी बियादिल । वा वयेगु मद्यूसा अझ अप्वः क्षति जुइफइगुलिं माःकथं सजगता नालेत नं सरकारं इनाप याःगु दु ।

 

भारतं सीमा क्षेत्रय् दयेकूगु बाँधया हुनिं दँय्दसं नेपाःया अप्वः धइथें जिल्ला डुबानय् लायेगु याः । भारतया हे हुनिं दँय्दसं वइगु तराईया जिल्ला डुबानय् लाःसां नं समस्या ज्यंकेगु दीर्घकालीन उपाय धाःसा नालाकाःगु मदुनि ।

 

प्रदेश व स्थानीय तगिंपाखें सर्भेतकं मयासे लाथेपाथे सतक विस्तार याइगु हुनिं नं थीथी थासय् दुगु लँय् चलः वनीगु नं राईं धयादिल । छुं नं संरचना दयेकेगु इलय् अनया भौगोलिक अवस्थायात ध्यानय् तयाः दिगो जुइकथंया संरचना दयेकेगु खँय सम्बन्धित निकायपाखें बिचाः यायेमाःगु वय्कःया धापू खः ।

 

खुसिबालं पूर्व–पश्चिम राजमार्गया महोत्तरीया ताँ चुइका यंकूगु इलय् यातायात पूवंक हे प्रभावित जूगु दु । अथे हे, ओखलढुङ्गा, खोटाङ, भोजपुर, तेह्रथुम, म्याग्दी, बेनी, जोमसोम, मनाङलिसेंया लँ अवरुद्ध जूगु दु । अथे हे, रौतहटया अप्वः धइथें थाय् स्वापू त्वाःदःगु दु ।

 

लहना न्यूज | ने.सं. ११३९ दिल्लाथ्व द्वादसि (१३ जुलाइ, २०१९), सञ्चरवाः

मदिक्क वा वगुलिं सप्तकोशीइ लःया बहाब तसकं थाहां वंगु दु । १गू लख ५०द्वः क्यूसक लःया मापनलिपा खतरकाकथं काइगु थौं सञ्चरवाः न्हिनसिया २ताः इलय् याःगु मापनकथं २गू लख ७४द्वः ६५गू क्यूसेक लःया बहाव दुगु कोसी ब्यारेजय् च्वनादीम्ह प्रहरी सहायक निरीक्षक ईश्वरी दाहालं जानकारी बियादीगु दु ।

 

आः ५६गू लुखा मध्ये ३६गू लुखा चायेकूगु दु । भारतया विहार जलमग्न जुइवं भारतं लुखा बन्द यायेत दबाब बियाच्वंगु सशस्त्र प्रहरी निरीक्षक सुरेन्द्र भण्डारीं धयादीगु दु ।

 

मदिक्क वा वयाच्वंगुलिं सप्तकोसीइ लःया बहाब अझ अप्वया वनेफूगु न्ह्यथसें प्रशासनं कासी खुसिया तटीय क्षेत्रय् च्वंपिन्त सतर्क अवस्थाय् च्वनेत तकं अपील याःगु दु ।

 

थ्व हे दथुइ थौं प्रदेश नं. १या आन्तरिक मामिला तथा कानून मन्त्री हिक्मत कार्कीं कोशी ब्यारेज व सुनसरीया खुसिवालं लिच्वः लाकूगु लागाया अवलोकन यानादीगु दु ।

Pages