Display Style:
Column Style
विषादी प्रकरणय् थःत झुके यात : प्रम ओलि
लहनान्युज | दिल्लाथ्व दशमी ११३९ (जुलाई ११ २०१९)
प्रधानमन्त्री केपी शर्मा ओलीं विषादी प्रकरणय् थःत झुके याःगु धका धयादिगु दु ।
भारतं वःगु पौं थःत सुचूका तया थःत मछालेपुगु अवस्था हःगु धका धयादिसे उकिइगु खोजबिन जुइ धका न धयादिगु खः ।
येँ जुगु छगु ज्याझ्वलय् प्रधानमन्त्री ओलीं अथे धयादिगु खः ।
प्रधानमन्त्री ओलीं नेपाःमिया भूतुलि विषादी नयेगु जुइ मज्यु धका धयादिसे शुद्ध नँसा जुइ माःगु सरकारया उद्देश्य खः धका धयादिसे सरकार विरुद्ध न्ह्याकुगु मिसन पूरा मजुइगु धका न धयादिगु खः ।
विषादीया विषयस मन्त्रीपरिषदया निर्णय कार्यान्वयन मयायेत सर्बोच्चया अन्तरिम आदेश
लहनान्यूज | ने.सं. ११३९ दिल्लाथ्व अष्टमि/नवमि (९ जुलाइ, २०१९), बुधवाः
नेपालय् आयात जुइगु तरकारी लिसें सिसाबुसाय् विषादी परीक्षण मयायेगु मन्त्रीपरिषदया निर्णय कार्यान्वयन मयायेत सर्बोच्चं अन्तरिम आदेश ब्यूगु दु ।
न्यायाधिस डा. आनन्दमोहन भट्टराईया एकल इजलासं मन्त्रीपरिषदया असार १८ गतेया निर्णय कार्यान्वयन मयायेत धाःगु खः ।
उद्योग, वाणिज्य तथा आपूर्ति मन्त्रालयं असार २गते नेपालय् आयात जुइगु तरकारीलिसें सिसाबुसाय् विषादी परीक्षण यायेकथं निकासी पैठारी सम्बन्धी आदेश राजपत्रय् पिथंगु खः । तर असार १८ गते सरकारं तयारी मगाःगु धासें विषादी परीक्षण यायेगु थःम्हेस्यां याःगु निर्णय लित काःगु खः ।
थ्व स्वयां न्ह्यः येँय् च्वंगु भारतीय दूतावासं विषादी परीक्षणया विरोध यासें मन्त्रालयस पौतकं छ्वःगु खः ।
गल्ती याःपिं त्रिविवि कर्मचारीयात कडा कारबाही : प्रम ओली
लहनान्यूज | ने.सं. ११३९ दिल्लाथ्व अष्टमि/नवमि (९ जुलाइ, २०१९), बुधवाः
प्रधानमन्त्री केपी शर्मा ओलीं गल्ती याःपिं त्रिभुवन विश्वविद्यालयया कर्मचारीयात कडा कारबाही यायेगु ख्याच्वः बियादीगु दु ।
त्रिभुवन विश्वविद्यालयया कूलपतितकं जुयादीम्ह प्रधानमन्त्री ओलीं विश्वविद्यालय थेंजाःगु पवित्र थासय् बेथिति दुतहःपिं नापं अनियमितता याइपिं सुं नं कर्मचारीयात कडा कारवाही जुइगु धयादिल ।
त्रिभुवन विश्वविद्यालयया ६०क्वःगु स्थापना दिवसया झ्वलय् थौं बुधवाः येँय् ग्वसाः ग्वःगु प्राज्ञसभाय् न्ववानादिसें ओलीं विश्वविद्यालयस गल्ती याइपिं कर्मचारीपिन्त सरकारं दण्ड व बांलाःगु ज्या याइपिं कर्मचारीपिन्त सिरपाः बीगु नं स्पष्ट यानादिल ।
प्रधानमन्त्री ओलीं देशया शिक्षा क्षेत्रयात हलिमय् हे प्रतिस्पर्धा यायेबहः जुइकथं दयेकेत सरकार प्रतिबद्ध जूगु नं धयादिल । वय्कलं आवश्यकताकथं दक्ष जनशक्ति दयेकेगु ज्याय् न्ह्यज्यायेत नं फुक्क विश्वविद्यालययात इनाप यानादिल ।
ज्याझ्वलय् शिक्षा, विज्ञान तथा प्रविधिमन्त्री गिरीराजमणि पोखरेलं विश्वविद्यालयया छवि हे बुलुइगु कथं गल्ती मयायेत विश्वविद्यालयया पदाधिकारीपिन्त सचेत याकादिल । वय्कलं विश्वविद्यालय दुने कल्पनातकं यायेमफइकथंया बेथिति दुहांवःगु न्ह्यथनादिसें दुःख नं प्वंकादिल ।
मुँज्याय् विश्वविद्यालयया उपकूलपति प्राध्यापक डा. तीर्थराज खनियां विश्वविद्यालयपाखें नालीगु नीति व ज्याझ्वःयात कयाः जानकारी याकादिल ।
संघीय संसद प्रतिपक्षीपाखें अवरुद्ध
लहनान्यूज | ने.सं. ११३९ दिल्लाथ्व अष्टमि/नवमि (९ जुलाइ, २०१९), बुधवाः
नेत्रविक्रम चन्द समूहया सर्लाही इन्चार्ज कुमार पौडेल सीगु खँय् छानवीन यायेत संसदीय समिति नीस्वनेगु विषयस सत्तापक्ष व प्रतिपक्षी दल दथुइ खँ मिलय् मजुइवं प्रतिनिधिसभाया मुँज्या प्रभावित जूगु दु । पौडेल सीगु प्रहरीलिसे ल्वापु जुयाः मखुसे तप्यंक हे गोलिं कयेकूगुलिं जूगु दावी यासें प्रतिपक्षी दल नेपाली कांग्रेस व राष्ट्रिय जनता पार्टी, राजपा नेपालं संसदीय छानवीनया माग याना वयाच्वंगु खः ।
प्रतिपक्षीया अवरोधया हुनिं म्हिगः मंगलवाःया मुँज्या नं अवरुद्ध जूगु खः । न्हिनय् छताः ईया नितिं सःतातःगु थौंया मुँज्या थ्यंमथ्यं छघौत्या लिबाक्क न्ह्याःसा नं प्रतिपक्षी कांग्रेस व राजपा नेपालया नेतातसें बेल घेराउ यासें नारावाजी याःगु खः ।
नाराबाजीया दथुइ सभामुख कृष्णबहादुर महरां प्रतिनिधिसभाया सचिव गोपालनाथ योगीयात राष्ट्रियसभापाखें वःगु सन्देश न्यंकेत ई बियादीगु खः । सचिव योगीं नाराबाजीया दथुइ सन्देश न्यंकेवं सभामुख महरां वइगु सोमवाःतकया नितिं मुँज्या स्थगित यानादिल ।
संसदया कार्यव्यवस्था समितिया मुँज्याय् प्रतिपक्षी दलं संसदं हे छानवीन समिति दयेकेमाःगु अडानयात लिसा काःगु दु । प्रतिपक्षया मागयात कयाः असमति क्यंसें सत्तापक्षया सांसदं छानवीनया जिम्मा संसदीय समितियात बीमाःगु धया वयाच्वंगु खः । दल दथुइ सहमति जुइ मफयेवं प्रतिनिधिसभाया मुँज्या थौं निन्हुया दिनस नं प्रभावित जूगु खः ।
संसदया राज्य ब्यवस्था समिति घटनायात कयाः छानवीन यासें प्रहरीलिसेया ल्वापुइ हे पौडेल सीगु निष्कर्ष पिथंगु खः । गृहमन्त्री रामबहादुर थापां प्रतिनिधिसभाया म्हिगःया मुँज्यायात सम्बोधन यानादिसें ल्वापुइ हे पौडेल सीगु धयादीवं वय्कलं संसदय् मखुगु खँ ल्हाःगु धासें प्रतिपक्षी दलं रोष्ट्रम घेराउ याःसें विरोध याःगु खः । कार्यव्यवस्था परामर्श समितिया मुँज्याय् सभामुख कृष्णबहादुर महरां प्रतिपक्षी दलया मागयात कयाः सहलह यासें सहमतिया कुतः याःसां नं संसदया मुँज्या अवरुद्ध मयायेत इनाप याःगु खः ।
थ्व हे दथुइ, संघीय संसदं वइगु आर्थिक वर्षया पूर्ण बजेट पारित याःगु दु । प्रतिनिधिसभाय् सचिव योगीं बजेट आश्रित प्यंगू विधेयक राष्ट्रियसभापाखें पारित जूगु सूचं न्ह्यब्वसें आर्थिक वर्ष शुरु जुइगु छवाः ल्यं दनिबलय् पूर्ण बजेट पारित जूगु खः । प्रतिनिधिसभां पारित याना छ्वःगु विनियोजन, आर्थिक, राष्ट्र ऋण म्हयेगु व ऋण नापं जमानत २३क्वःगु संशोधन विधेयक राष्ट्रियसभां विना संशोधन पारित जूगु खः ।
धिम्बा डान्सया निन्हुया कार्याशाला गोष्ठी क्वचाल
लहनान्युज | दिल्लाथ्व नवमी ११३९ (जुलाई १० २०१९)
हलिमय् नांजाम्ह नृत्यगुरु चरण प्रधान, ६२दँया अन्तगर्राष्ट्रिय लोक नृत्यगुरु ज्याकलिन स्टिनवर्ग व नांजाम्ह नृत्यगुरु सुरोज महर्जनपाखें धिम्बा डान्स एण्ड मोर, यलया ग्वसालय् निन्हुयंकं जूगु नृत्य कार्याशाला गोष्ठी क्वचाःगु दु ।
अन्तर्राष्ट्रिय स्तरया गुरुपिं चरण प्रधान व ज्याक्लिन स्टिनवर्गलिसे वयकःया पुचःयात ढाका तपुलिं पुइका मौलिक पहलं लसकुस यासें न्ह्यागु नृत्य कार्यशाला गोष्ठीइ न्हापांगु ब्वय् नेपाली मौलिक धिमे प्याखं स्यनेगु ज्या गुरु सुरोज महर्जनपाखें जूगु खः ।
अनलि ज्याक्लिन स्टिनवर्गजु पाखे डच प्याखं सहभागीपिन्त स्यानादीगु खः । लिपांगु ब्वय् गोष्ठीया मूगुरु चरण प्रधानपाखें हुलाप्याखं नापनापं म्हयात गुकथं ल्वय्पाखें तापाके फइ अले झीगु म्हय् हे ल्वयलिसे ल्वायेगु अनेकन शक्ति दु उकियात झीसं सञ्चालन याये सयेकेमागु खँ कनादिसें प्रशिक्षण बियादीगु खः । उगु गोष्ठी ५३ म्ह प्रशिक्षार्थीपिंन्सं ब्वतिकागु खः ।
“थः, छेँ जः व समाजया निम्ति धिम्बा हुलेनु, स्वस्थ जीवन म्वायेनु” धैगु मू नारा तया पलिस्था जूगु संस्था धिम्बा डान्स एण्ड मोरसंस्थां भिं उसाँय्या निम्ति न्हिन्हि प्याखंया नापनापं शारीरिक अभ्यास यायेगु ज्याभ्mवः न्ह्याका वयाच्वंगु खः । इलय् ब्यलय् साँस्कृतिक सहभागीता क्यनेगु कथं याकःमिसा भुज्या, जाह्वला जात्रा व घिन्तांग किसि थेंजागु जात्राय् ब्वति कायेगु नापं धिमे बाजं प्रशिक्षण समेत बिइधुंगु दु ।
निन्हुयंकं न्ह्यागु नृत्य कार्यशाला गोष्ठीस मतिनाया चिं कालबिल जूगु खः । विशेषयाना अन्तर्राष्ट्रिय लोकनृत्य गुरुं धिम्बा डान्स एण्ड मोर संस्थाया ज्याभ्mवः व सक्रियता खना वयकया पुचलं ५०० युरो तका ग्वहालि लल्हानादीगु खँ ज्याभ्mवःया कजि सुरज ब्यञ्जनकारं कनादिगु खः ।
