Display Style:
Column Style
पत्रकार महासंघपाखें आन्दोलनया ज्याझ्वः लित काल
लहनान्यूज | ने.सं.११३९ दिल्लाथ्व सप्तमि (९ जुलाइ, २०१९), मंगलवाः
सत्तारुढ नेपाल कम्युनिस्ट पार्टीया संसदीय दलया इनाप लिपा नेपाल पत्रकार महासंघं स्वंगूगु चरणया आन्दोलनया ज्याझ्वः लितकाःगु दु ।
मिडिया काउन्सिल विधेयक विरुद्ध आन्दोलनय् कुहांवःगु महासंघं थौं मंगलवाः नेकपा संसदीय दलया उपनेता सुवास नेम्वाङ्ग नेतृत्वया पुचःलिसे वार्ता यायेधुंकाः आन्दोलनया ज्याझ्वः लितकाःगु खः ।
कानून मन्त्री भानुभक्त ढकालया तकं उपस्थित दुगु नेकपा संसदीय दललिसेया वार्ताय् महासंघं ल्ह्वंगु फुक्क सरोकारयात संशोधनपाखें सम्बोधन यायेगु प्रतिबद्धता वःगुलिं स्वंगूगु चरणया ज्याझ्वः लित कयाः आन्दोलन स्थगित यानागु नायः गोविन्द आचार्यं धयादिल ।
सत्तारुढ नेकपाया राष्ट्रियसभाया प्रमुख सचेतक खिमलाल भट्टराईं वार्तालिपा महासंघया नायःयात सम्बोधन यासें स्वंगू बुँदाया पौ छ्वःगु खः । उकी मिडिया काउन्सिल विधेयकया खँय् महासंघलिसेंया काउन्सिल नीस्वनेगु, स्वायत्तता व जरीवाना यायेगु व्यवस्थालिसेंया ल्ह्वंगु च्यूताः व सरोकारयात सम्बोधन यायेगु प्रतिबद्धता न्ह्यथनातःगु दु ।
अथे हे, संघीय संसदय् न्ह्यब्वःगु मेमेगु सञ्चार सम्बन्धी विधेयकया हकय् संविधान व राष्ट्रिय आमसञ्चार नीति २०७३या लिधंसाय् महासंघलिसें सहलह यानाः संसदीय प्रकृयाकथं निष्कर्षय् थ्यंकेगु प्रतिबद्धतातकं नेकपां न्ह्यथंगु दु ।
थ्व हे झ्वलय् सत्तारुढ नेकपापाखें वःगु प्रतिबद्धता लसकुस यायेबहः जूगु महासंघया नायः आचार्यं धयादीगु दु ।
थौं जूगु बार्ताय् नेकपाया मूछ्याञ्जे विष्णु पौडेल, नेतात योगेश भट्टराई, दिनानाथ शर्मा, कृष्णगोपाल श्रेष्ठ, नवराज सिलवाललिसेंया ब्वति दुगु खः ।
राष्ट्रिय म्हसीका पौ इनेज्या न्ह्यात
लहना न्यूज | ने.सं. ११३९ दिल्लाथ्व सप्तमि (९ जुलाइ, २०१९), मंगलवाः
राष्ट्रिय परिचयपत्र तथा पञ्जीकरण विभागया महानिर्देशक दीपक काफ्लें प्रधानमन्त्री केपी ओलीयात राष्ट्रिय म्हसीका पौ लःल्हानादीगु दु ।
थौं मंगलबाः प्रधानमन्त्री निवास बालुवाटारय् ग्वसाः ग्वःगु छगू ज्याझ्वलय् महानिर्देशक काफ्लें प्रधानमन्त्री ओलीयात राष्ट्रिय म्हसीका पौ लःल्हाःगु खः ।
अथे हे, विभागं कन्हय् बुधवाः राष्ट्रपति विद्या भण्डारीयात राष्ट्रिय म्हसीका पौ लःल्हायेगु ज्याझ्वः दुगु नं न्ह्यथंगु दु ।
विभागया महानिर्देशक काफ्लें १गू लख १७द्वःम्ह नागरिकयात राष्ट्रिय परिचयपत्र इनेगु न्हापांगु चरणया ज्याझ्वः अन्तरगत प्रधानमन्त्री ओलीयात उकथं म्हसीक पौ लःल्हाःगु व कन्हय् राष्ट्रपतियात लःल्हायेगु ज्याझ्वः दुगु जानकारी बियादीगु खः ।
वय्कलं वइगु निदँया दुने फुक्क नागरिकपिन्त राष्ट्रिय म्हसीका पौ इनेगु ज्या क्वचायकीगु नं प्रतिबद्धता प्वंकादिल ।
संवैधानिक व्यवस्थाकथं मनूतय्गु म्हसीकायात सुनिश्चित यायेत व उमिगु सरकारी सेवाय् काइगु आधारकथं राष्ट्रिय म्हसीका पौ इनेगु ज्या सरकारं न्ह्याकूगु खः ।
गृह मन्त्रालय अन्तरगतया राष्ट्रिय म्हसीका पौ नापं पञ्जीकरण विभागयात सरकारं उगु ज्या वइगु निदँया दुने क्वचायेकेत कार्यादेश ब्यूगु दु ।
गृहमन्त्री रामबहादुर थापां वंगु मंसीर ३ गते पाँचथरया फिदिम नगरपालिका, शान्तिपुरया १०१दँ दुम्ह भगवती भण्डारीयात राष्ट्रिय म्हसीका पौ लःल्हानाः इनेगु ज्या न्ह्याकूगु दु ।
प्यंगू देसया नितिं राजदूतया नां संसदीय सुनुवाइ समितिपाखें अनुमोदन
लहनान्यूज | ने.सं. ११३९ दिल्लाथ्व षष्ठि (८ जुलाइ, २०१९), सोमवाः
संसदीय सुनुवाइ समितिपाखें प्यंगू देशया नितिं सिफारिस जूपिं राजदूतपिनिगु नां अनुमोदन याःगु दु ।
समितिं थौं सोमबाः अष्ट्रेलिया, कतार, स्पेन व बङ्गलादेशया राजदूत सिफारिस जूपिं प्यम्हेसिगु सुनुवाइ याःगु खः ।
समितिं अष्ट्रेलियाया नितिं महेशप्रसाद दाहाल, कतारया नितिं नारद भारद्वज, स्पेनया नितिं दावाफुटी शेर्पा व बङ्गलादेशया नितिं डा. वंशीधर मिश्र सर्वसम्मतकथं राजदूत अनुमोदन याःगु समितिया सभापति लक्ष्मणलाल कर्णं जानकारी बियादिल ।
सत्तारुढ नेपाल कम्युनिष्ट पार्टीया नायः नापं प्रधानमन्त्री केपी शर्मा ओली, मेम्ह नायः पुष्पकमल दाहाल व वरिष्ठ नेता माधवकुमार नेपाल दथुइ भागबण्डाय् सरकारं परराष्ट्र सेवा पिनेया प्यम्हेसित राजदूतकथं सिफारिस याःगु खः ।
सुर्दशन ‘इण्डियन बेष्टिज अवार्ड–२०१९’पाखें हनीगु
लहनान्युज | दिल्लाथ्व षष्ठी ११३९ (जुलाई ८ २०१९)
स्वंगू दशक न्ह्यःनिसें संगीत साधनाय् न्ह्यज्यानाच्वनादीम्ह कलाकार सुदर्शन राजोपाध्याययात भारतय् सम्मान याइगु जूगु दु । राजोपाध्याययात एन.आर.बी. फाउण्डेशन व भब्या ईन्टरनेशनलं ‘इण्डियन वेस्टिज अवार्ड २०१९’पाखें सम्मानित याय्त्यंगु रिपोर्टस क्लबल् ग्वसाः ग्वःगु पत्रकार सम्मेलनय् जानकारी ब्यूगु दु ।
थ्व हे झ्वलय् वरिष्ठ सरोद बादक, संगीतकार, गायकलिसें च्वमि राजोपाध्यायं संस्थां दँय्दसं बिया वयाच्वंगु संगीत व साहित्यपाखेंया सम्मानपाखें थःत ल्यःगुलिं ग्वसाः खलःयात आभार प्वंकादिल ।
नापं वइगु जुलाई १४तारिखय् राजस्थानय् जुइगु उगु सम्मानपाखें सम्मानित जुइदुगुलिं थःम्हेस्यां संगीत लागाय् यानागु ज्याया उच्च मूल्यांकन जूगु नं वय्कलं धयादिल ।
स्वनिगलय् भुखाय् ब्वल, केन्द्र विन्दु ख्वप
लहना न्यूज | ने.सं. ११३९ दिल्लाथ्व चतुर्थि (६ जुलाइ, २०१९), सञ्चरवाः
स्वनिगलय् थौं सञ्चरवाः सनिलया प्यताः ई जुयाः झिंन्यागू मिनेटय् भुखाय् ब्वःगु दु ।
ख्वपयात केन्द्र विन्दु दयेकाः ब्वःगु उगु भुखाय् ४गू फुति ६गू रेक्टर स्केलया जूगु खानी तथा भूगर्भ विभागया महानिर्देशक सोमप्रसाद सापकोटां जानकारी बियादीगु दु । तर भुखाय्या केन्द्रविन्दु ख्वप जिल्ला धाःसा नं गुगु थासय् धइगु सीमदुनि ।
भुखाय् ब्वयेवं मनूत छेँपाखें पिहां वःगु खः । आः स्वनिगलय् वा वयाच्वंगु दु । नापं गुलि क्षति जूगु धइगु सीमदुनि ।
वि.सं. २०७२ सालय् गोरखाया बारपाक केन्द्र दयेकाः विनाशकारी भुखाय् लिपा पराकम्पत वयाच्वंगु दु ।
