Display Style:
Column Style
आईफा अवार्ड यायेगु निर्णयपाखे सरकार लिचिल
लहनान्युज | दिल्लाथ्व पारु ११३९ (जुलाइ ३ २०१९)
भारतीय फिल्म अवार्ड आईफा यायेगु निर्णयपाखे सरकार लिचिगु दु । प्यखेर विरोध लिपा सरकारं उगु अवार्ड ज्याझ्वः नेपालय् मयायेगु निर्णय याःगु खः ।
नेपाल पर्यटन बोर्डया प्रमुख कार्यकारी अधिकृत दीपकराज जोशीं थुगु दँय् आईफा अवार्ड नेपालय् मजुइगु पुष्टि जुगु दु ।
सरकारं असार ८ गते मन्त्रिपरिषद बैठकपाखे भारतीय फिल्म अवार्ड आईफा नेपालय् यायेगु निर्णय याःगु खः ।
उगु अवार्डया लागि येँ महानगरपालिकां ४४ करोड अनुदान बिइ त्यःगु खः ।
आईफा अवार्ड दिकेत सरकारयात संसदीय समितिया निर्देशन
लहनान्युज | तछलागा औंसी ११३९ (जुलाइ ३ २०१९)
ससदया अन्तराष्ट्रिय सम्बन्ध समितिं आईफा अवार्ड दिकेत सरकारयात निर्देशन बिगु दु ।
समितिया थौं मंगलवाः च्वंगु बैठकं तत्काल दक्को प्रक्रिया राके यायेत निर्देशन बिगु दु । ‘सरकारं सम्झौता याःगु मदुनि तर, मस्यौदा स्वया नेपालया स्वाधिनता, स्वतन्त्रता व आस्मिता यात आँच वइगु नि थ्व अवार्ड तुरन्त रोके यायेत निर्देशन बियागु खः’ समितिया सभापति पवित्रा निरौला खरेल अथे धकादिगु खः ।
इन्टरनेसनल इन्डियन फिल्म एकेडेमी अवार्ड (आईफा)–१९ या नेपालय् याये फइगु सरकारं सैद्धान्तिक सहमति बिगु खः । थुगु अर्वाड नेपाल पर्यटन बोर्डया नेतृत्वय् जुइ त्यःगु खः ।
विद्युतीय साझा बस ३० गः न्ह्याइगु
लहनान्युज | तछलागा आमै ११३९ (जुलाई २ २०१९)
साझा यातायातं स्वनिगःलिसेंया थी थी थासय् ३० गः विद्युतीय बस चले याइगु जूगु दु ।
थुगु विद्युतीय बस प्रदेश ३ या सरकार नाप येँ व यल महानगरपालिका छगु सम्झौता यासे उगु बस संचालन याये त्यःगु खः ।
उगु बस न्यायेगु लागि प्रदेश ३ सरकारं ३० करोड, येँ महानगरपालिकां १० करोड व यल महानगरं २ करोड ५० लख तका दां साझा यातायातयात लःल्हाःगु खः ।
उगु ज्याझ्वलय्, येँ महानगरं ५ करोड व यल महानगरं १ करोडया शेयर लगानीपाखे २० गः युरो ४ मापदण्डया २० गः सहरी सवारी सेवा नं न्हयाःगु दु ।
मुख्य मन्त्री डोरमणि पौडेल, आर्थिक मामिला तथा योजना मन्त्री कैलाश ढुङ्गेल, येँ महानगरया प्रमुख बिद्यासुन्दर शाक्य, यल महानगरया प्रमुख चिरीबाबु महर्जन, साझा यातायात प्रा. लि. सञ्चालक समितिया अध्यक्ष कनकमणि दीक्षित नाप प्रदेश सभा सदस्य व जनप्रतिनिधिपिन्स मंकाः रिवन चाना उगु सेवा न्ह्याकुगु खः ।
उगु ज्याझ्लय् प्रदेश ३ या मुख्य मन्त्री डोरमणि पौडेलं, बिद्युतीय रकम भुक्तानी (इपेमेन्ट) या लागि ‘यात्रा कार्ड’, येँ महानगरया प्रमुख बिद्यासुन्दर शाक्यं महानगरं जारी याःगु ‘काठमाडौँ महानगरपालिका सवारी तथा यातायात व्यवस्थापन ऐन, २०७५’ सार्वजनिक यानादिगु खः । थुगु ऐन वःगु चैत २४ गते क्वचाःगु महानगरया प्यक्वःगु नगर सभापाखे स्वीकृत जुगु खः ।
ज्यााझ्वलय् बिजुली बस सञ्चालन यायेगु सम्बन्धय् प्रदेश सरकार, येँ व यल महानगर व साझा यातायात प्रा. लि. दथुइ सहमति पत्रय् हस्ताक्षर यानादिगु खः । उगु सहमति पत्रय् प्रदेश सरकारका पाखे आर्थिक मामिला तथा योजना मन्त्री कैलाश ढुङ्गेल, येँं महानगरया प्रमुख बिद्यासुन्दर शाक्य, यल महानगरया प्रमुख चिरीबाबु महर्जन व साझा यातायातया अध्यक्ष
कनकमणि दीक्षितं ल्हाःचिं तयादिगु खः ।
उगु ज्याझ्वलय् येँ महानगरया प्रमुख शाक्यं थुगु ज्याय् प्रदेश सरकारं ग्वाहालि याःगुनि थःगु योजना अप्वो बल्लागु बिचाः तयादिगु खः ।
मिखा दान ज्याझ्वः जुल
नृपेन्द्रलाल श्रेष्ठ | तछलागा चर्तुदशी ११३९ (जुलाई १ २०१९)
यल महानगरपालिका वडा ल्याः ८ स्वास्थ्य कार्यान्वयन समिति गुईत्वाःया ग्वसालय् मोतिबिन्दु ल्वय्या निःशुल्क शल्यक्रिया व मिखा परीक्षण शिविर जुल ।
तिलगंगा आँखा अस्पतालया प्राबिधिक ग्वाहालिलिसें आँखादान समाजया संयोजक मोतिशान्ति शाक्यया ग्वाहालिपाखें जूगु उगु ज्याझ्वलय् २५२म्हेसिया मिखा परिक्षण याःगु खःसा २१म्हेसिया मिखाया शल्यक्रिया याय्माःगु जानकारी ब्यूगु दु । अथे हे ३५म्हेसित फलो–अपय् सःतूगु नं जानकारी ब्यूगु दु ।
समाजसेवीलिसें समाजया संयोजक मोतिशान्ति शाक्यं छम्ह मनुखं मिखा दानयात कि प्यम्ह मनुखं खनिगु जूगुलिं मिखादानया ज्याझ्वः जनमानसय् चेतनामूलक न्ह्याकावयाच्वनागु धयादिल ।उगु ज्याझ्वःयात ‘इनर ह्वील क्लब अफ पाटन’पाखें ग्वाहालि याःगु खः ।
त्वाःया गुरूपिन्त सम्मान व साँस्कृतिक ज्याझ्वः
लहनान्युज | तछलागा चर्तुदशी ११३९ (जुलाई १ २०१९)
‘जीवन्त संस्कृति ल्यंकातय्, नेवाः म्हसीका म्वाका तय्’ धइगु नारालिसे नःबहिल त्वाःया गुरुपिन्त हनाबना यासे थीथी बाजंखलःया न्हूपिं ल्याय्म्ह पुचलं नेपाःया थीथी परम्परात बाजंत थानाः साँस्कृतिक ज्याझ्वःत न्ह्यब्वल ।
जीवन्त संस्कृति संरक्षण समाजया ग्वसालय् जूगु उगु ज्याझ्वलय् प्रदेश नं. ३या सांसद अष्टलक्ष्मी शाक्य मूपाहाँकथं झायादीगु खःसा विशेष पाहाँकथं येँ महानगरपालिकाया प्रमुख विद्यासुन्दर शाक्य झायादीगु खः ।
समाजया नायः किरण साय्मिया सभाध्यक्षताय् जूगु उगु ज्याझ्वलय् २३ वडाया पुलांम्ह नायःलिसें समाजसेवी पवित्र बज्राचार्य, सभासद राजेश शाक्य, २३ वडाया नायः मचाराजा महर्जनलिसें त्वाःया हनेबहःपिं व्यक्तित्वपिन्सं पाहाँकथं ब्वति कयादीगु खः ।
बुखँ नेवाः सुचना केन्द्र किपाः राजेन्द्र रंजित
