Display Style:
Column Style
थेचोया नवदुर्गा प्याखं क्वचाल
लहनान्यूज | थिंलागा दुतिया ११३७ (डिसेम्बर १५ २०१६)
यलया थेचोय् वंगु यःमरि पुन्हिनिसें न्ह्याःगु नवदुर्गा प्याखं क्वचाःगु दु ।
थौं बालकुमार, गनेद्यः व भैरवया सिन्दुर जात्रालिसें थुगुसीया जात्रा क्वचाःगु खः । थुकिया लिसें च्वय्या लाछिया बालकुमारी व क्वयया लाछिया ब्रम्हायणी जात्रा नं क्वचाःगु दु ।
दँयदसं मार्ग शुक्ल चतुर्दशीनिसें न्ह्याइगु थुगु जात्रा प्यन्हु न्ह्यानाः क्वचाइगु खः । थुगुसी चतुर्दशि व पुन्हि छन्हुं हे लाःबलय् थुगुसी यःमरि पुन्हिनिसें जात्रा न्ह्याःगु खः ।
वंगु यःमरि पुन्हिकुन्हु जात्राया न्हापांगु दिनय् छ्वयला भू यानाः थुगुसीया जात्रा न्ह्याःगु खः । थुकुन्हु छेँखा छेँखाय् यचुपिचु यानाः बँ थिलाः च्वयया लाछिइ ४ व क्वयया लाछीइ ३ म्येय् पालाः थःथःगु गुथिया द्यःपिन्त बलिया प्रसादलिसें पूजा यानाः जात्राया औपचारी शुरुवात याइ ।
निन्हुगु दिंकुन्हु यःमरिलिसें पूजा ज्वलं तयाः गनेद्यः, नवदुर्गा, ब्रम्हायणी, बालकुमारी, लिसेंया पीठय् व कुल देवतायात पूजा यायेगु याइ । ब्रम्हायणी व बालकुमारीयात देगः पिने तयाः म्वःल्हु्काः तिसां छायेपियाः खटय् बिज्याकेगु याइ ।
बहनी खःयात देगः चाःहिकाः पीठय् यंकी । ब्रम्हायणी तता व बालकुमारी केहेँ खःगु जनविश्वास कथं निम्हं तःकेहेँ नापलाकेगु पीठय् नापं तयेगु याइगु खः ।
म्हिगः जात्राया स्वन्हुगु दिंकथं सुथ न्हापां द्यःगणपिन्सं प्यपू ल्हाःगु खः । नवदुर्गा देगलं द्यःगणपिं झ्वःलाक्क मू दबुलिइ वयाः प्याखं हूगु खः ।
व धुंकाः क्वयया लाछिया लसकुटी त्वाः चाःहिलाः भैरव, काली व बाराहिं प्याखं ल्हूगु खः । बाराहिं पाःताः ल्हातय् तयाः प्याखं हुलाः सहल द्यःगणपिन्त प्रसाद इनी ।
व हे बहनी नवदुर्गा भवानी गुथिं बलि बियाः पूजा यानाःलि दक्कले लिपा कालीं प्याखं न्ह्यब्वइ । थुगु दिंयात न्हि प्यांख धायेगु याः ।
बहनी सिन्दुर जात्रा यानाः ब्रम्हायणीयात पूजा यानाः देगःया मू ध्वाखां व खःया पौयात देगःया मू भ्यालं दुकायेगु परम्परा दु ।
मिसालिसे सम्बन्धित बुखँया नितिं आचारसंहिता
नृपेन्द्रलाल श्रेष्ठ | थिंलागा दुतिया ११३७ (डिसेम्बर १५ २०१६)
सञ्चार माध्यमय् मिसालिसे सम्बन्धित विषयस बुखँ अले बिचाः न्ह्यब्वयेबलय् छ्यलेगु भाषा, शैली अले प्रस्तुतीकरणयात मर्यादित दयेकेगु आज्जुं प्रेस काउन्सिल नेपालं बिस्कं हे आचारसंहिता दयेकेगु तयारी याःगु दु ।
थौं प्रेस काउन्सिल नेपालं छगू अन्तरक्रियाया ग्वसाः ग्वयाः आचारसंहिताया मस्यौदाय् सहलह यात । ज्याझ्वलय् काउन्सिलया नायः वोर्णबहादुर कार्कीं पत्रकारिताय् मिसा सम्बन्धी विषयवस्तुया प्रस्तुतीकरणयात मर्यादित, प्रोत्साहनवद्र्धक, सकारात्मक दयेकेत लिसें पत्रकारिता पेशाय् मिसातय् सङ्ख्यात्मक व गुणात्मक रुपं नं थकायेत बिस्कं हे आचारसंहिता आवश्यक दुगु धयादिल ।
कार्कीं काउन्सिलपाखें मचात व शारीरिक अपाङ्गता जूपिनिगु बुखँ च्वयेबलय् ध्यान बीमाःगु खँया विषयस आचारसंहिता दयेकाः लागू यायेगु तयारी जुयाच्वंगु जानकारी बियादिल ।
ज्याझ्वलय् काउन्सिलया दुजः शुभेच्छा विन्दु तुलाधरं पत्रकार आचारसंहिता–२०७३ या हे उप–आचार संहिताया रुपय् थुगु आचारसंहिता लागू यायेत्यंगु धयादिल । सञ्चार माध्ययमय् मिसाया विषयस नकारात्मक ढङ्गं बुखँ तइगु, मिसायात क्वह्यंकेगु कथंया खँग्वः छ्यलेगु ज्या अप्वया वनाच्वंगुलिं आचारसंहिता लागू यायेमाःगु धयादिल ।
व हे ज्याझ्वलय् सञ्चारकःमि मीरा राजभण्डारी अमात्यं पत्रकारिताय् ‘मिसा पत्रकार : अवस्था व चुनौती’ विषयस ज्यापौ न्ह्यब्वयादीगु खः ।
अमात्यं थःगु लछिया अध्ययनया लिच्वःया लिधंसाय् मिसामैत्री पत्रकारिता अभ्यासया अभाव जूगु लिच्वः पिकासें थुगु समस्यायात सम्बोधन यायेत सञ्चारगृह दुने जुइगु याइगु लैङ्गिक विभेद न्हंकेमाःगु, धयादिल ।
अमात्यया ज्यापतिइ गोरखापत्र न्हिपौया प्रधान सम्पादक पुष्कर माथेमां टिप्पणी यानादिल । थःगु टिप्पणीइ माथेमां पत्रकारिताय् मिसातयगु क्षमताय् आः न्ह्यसः तयाच्वने म्वाःलेधुंकूगु धासें मिसा पत्रकारिताया सशक्तीकरणया लागिं न्हूगु सम्भावना मालेमाःगु धयादिल ।
पत्रकार दबूया त्यःछिंत्यः ज्याझ्वः क्वचाल
लहनान्यूज | थिंलागा पारु ११३७ (डिसेम्बर १४ २०१६)
नेवाः पत्रकार राष्ट्रिय दबू, येँ जिल्लाया ग्वसालय् जूगु निन्हुयंकंया त्यःछिंत्यः ज्याझ्वः थौं क्वचाल ।
म्हिगः येँया दुनेया बस्तीइ थःने व क्वःने लागा चाःह्यूगु पत्रकार दबूया येँया पुचलं थौं धाःसा पिनेया नेवाः बस्तीइ वनाः त्यःछिंत्यः फ्वंगु खः । थौं येँया कुलेश्वर, खुसिबुँ, बहति लिसें गल्कोपाखाय् वनाः त्यःछिंत्यः फ्वंगु खः ।
थौं पुचलं कुलेश्वरय् नेवाः तीर्थराम डंगोल, बहतिइ डा. महेशमान श्रेष्ठ, गल्कोपाखाय् त्रिरत्न मानन्धरलिसेंयाथाय् त्यःछिंत्यः फ्वंवंगु खः । अथे हे खुसिबुँया मंकाः समाजपाखें त्यःछिंत्यः ब्यूगु खः ।
थौं विशेष रुपं थःपिन्थाय् नं त्यःछिंत्यः काः वयेत इनाप वःगु कथं त्यःछिंत्यः कायेत पिनेया बस्तीइ नं वनागु पत्रकार दबू, येँ जिल्लाया नायः नातीकाजी महर्जनं जानकारी बियादिल ।
थौं पत्रकार दबू, येँया त्यःछिंत्यः ज्याझ्वलय् संस्थाया पदाधिकारी, दुजःतलिसें पत्रकार दबू केन्द्रया प्रतिनिधि, बिज्यापूननि दाफा खलः पुचः व म्येहालामि किरण सायमिया नं ब्वति दुगु खः । दाफा खलः व सायमिया न्ह्यब्वायलिसें त्यःछिंत्यः ज्याझ्वः झः झः धाःगु खः ।
प्रधानमन्त्री प्रचण्डया सम्पत्ति विवरण सार्वजनिक
लहनान्यूज | थिंलागा पारु ११३७ (डिसेम्बर १४ २०१६)
सरकारं प्रधानमन्त्री पुष्पकमल दाहाललिसें बहालवाला मन्त्रीतयगु सम्पत्ति विवरण सार्वजनिक याःगु दु ।
सार्वजनिक विवरण कथं प्रधानमन्त्री पुष्पकमल दाहालया नामं छुं छकू नं सम्पत्ति मदु । पैतृक सम्पत्तिइ ३ तोला लुँ व चितवनय् १ख कट्ठा बुँ जक दु ।
थुगु सम्पत्ति विवरणया कथं प्रधानमन्त्री दाहाल सुशील कोइराला धुंकाः नेपाःया निम्हम्ह गरीब प्रधानमन्त्री जूगु दु । स्वंगः मोबाइल फोन जक सम्पत्ति दुगु धाःम्ह सुशील कोइरालायात हलिंया हे गरीब प्रधानमन्त्री धाःगु खः ।
व हे कथं, उपप्रधान अले गृहमन्त्री विमलेन्द्र निधिया थीथी बैंकय् सेयर, ख्वप व धनुषा जिल्लाय् बुँ अले लुँ दुगु मन्त्रिपरिषदया ज्याकुथिं न्ह्यथंगु दु । ज्याकूया कथं गृहमन्त्री निधियाके ६० तोला लुँ, १५० तोला वहः व १० लाख ९६द्वः स्वयां आपाः धेबा दु ।
मेम्ह उपप्रधान अले अर्थमन्त्री कृष्णबहादुर महराया रोल्पाय् ८ रोपनी बुँ व एभरेस्ट बैंकय् ८०द्वः तका दुगु न्ह्यथंगु दु ।
सहरी विकासमन्त्री अर्जुन नरसिंह केसी, भौतिक पूर्वाधार अले यातायातमन्त्री रमेश लेखक, ऊर्जामन्त्री जनार्दन शर्मा, परराष्ट्रमन्त्री डा. प्रकाशशरण महतलिसें २७ मन्त्रीया नं सम्पत्ति विवरण सार्वजनिक याःगु खः । अथे हे, १४ राज्यमन्त्रीया नं सम्पत्ति विवरण सार्वजनिक यानागु मन्त्रिपरिषदया ज्याकुथिं न्ह्यथंगु दु ।
पत्रकार दबूया त्यःछिंत्यः झःझः धाल
लहनान्यूज | थिंलाथ्व पुन्हि ११३७ (डिसेम्बर १३ २०१६)
नेवाः पत्रकार राष्ट्रिय दबू येँ जिल्ला कचाया ग्वसालय् थौं त्यःछिंत्यः ज्याझ्वः झःझः धायेक क्वचाःगु दु ।
थौं येँया इतुम्बहालं न्ह्याःगु त्यःछिंत्यः पुचलं येँया थःने व क्वःनेया थीथी लागा चाःहिलाः त्यःछिंत्यः फ्वँसें असनय् थ्यंकाः क्वचाःगु खः । त्यःछिंत्यः ज्याझ्वलय् नेवाः पत्रकार राष्ट्रिय दबू येँ जिल्लाया दुजःपिंलिसें केन्द्रिय नायः व दुजःपिं, इमेज च्यानलया समयबजि ज्याझ्वः पुचः व बिज्यापूननि (थँहिति) दाफा खलः, म्येहालामि पवित्र कसाःलिसें आम सर्वसाधारणया नं ब्वति दुगु खः ।
पुचलं बाजं लिसें त्यःछिंत्यःया लसय् थीथी म्ये हालाः त्यःछिंत्यः फ्वंगु खः । नेवाःतय् दथुं तना वनाच्वंगु त्यःछिंत्यः थौं येँया सतकय् वःगु खनेदुबलय् आम नेवाःत तसकं लयताःगु व उत्साहित खनेदुगु खः ।
त्यःछिंत्यः फ्वंवःगु पुचःयात ज्यापु महागुथिया नायः राजभाई जकःमि, संघीय समाजवादी फोरम नेपालया ल्यू नायः राजेन्द्र श्रेष्ठ, क्षेत्रपाटि निशुल्क चिकित्सालय अस्पताल संचालक समितिया नायः बिजय माली, व्यवसायी लिसें समाजसेवी लक्ष्मीदास मानन्धरं त्यःछिंत्यः ब्यूगु खः ।
दबुलिं थौं येँया दुनेया बस्तीइ त्यःछिंत्यः फ्वनेगु ज्या याःगु खःसा कन्हय् नं पिनेया बस्तीइ त्यःछिंत्यःयात निरन्तरता बीगु धाःगु दु ।
