Display Style:
Column Style
काठमाडौं मोडेल स्कुलय् हुलाप्याखँ धें धें बल्लाकासा
लहनान्युज | चिल्लागा सप्तमी ११३८ (मार्च ८ २०१८)
काठमाडौं मोडेल स्कुलया ग्वसालय् थौं काठमाडौं मोडेल एकल नृत्य प्रतियोगिता २०१८ जुगु दु ।
उगु कासाय् जुनियर झीम्ह व सिनियर च्याम्ह याना झींच्याम्ह कासामि पिन्सं ब्बति काःगु खः ।
काठमाडौं मोडेल एकल नृत्य कासाय् जुनियरय् दृष्टि महर्जन न्हाप, ल्यूः आरुषा महर्जन व लियांल्यूः भुमिका सेढाइ लाःगु खः ।
अथेहे सिनियरय् न्हाप सिम्रन महर्जन, ल्यूः रोशी दजी व लियांल्यू रितिशा महर्जन लाःगु खः ।
उगु ज्याझ्वलय् दसि—पौ रिना महर्जन सिरपाः सुदन मुनिकार व शिल्ड प्रिन्सिपल राजेन्द्र महर्जनं लःल्हानादीगु खः ।
कासाय् सुदन मुनिकार व रिना महर्जन निर्णायक मण्डलय् च्वना दीगु खः ।
शर्ट फिल्म कासा जुइगु
नृपेन्द्रलाल श्रेष्ठ | चिल्लागा षष्ठी ११३८ (मार्च ७ २०१८)
नेपालभाषा बिकास यायेगु तातुना ‘नेपालभाषा चीहाकःगु संकिपा (शर्ट फिल्म)’ कासा यायेत्यंगु दु ।थौं छगु ज्याझ्वः यासें थुगु खँया जानकारी बीयादीगु खः ।
थुगु संकिपा कासा महाकवि सिद्धिदास महाजुया १५० दँ बुन्हि व भाषानिभाः प्रेमबहादर कसाःया १०० दँ बुन्हिया लसता जुइगु धका थौं छगु मुँज्या यासें जानकारी सकिपा कासाया दुजः सुरेशकिरण मानन्धरं जानकारी बियादीगु खः ।
उगु सकिपा कासाय् ‘भाषा म्वाःसा जाति म्वाइ’, ‘झीगु भाषा मन्त धाःसा’ व ‘झीगु भाय् झीगु म्हसीका’ मध्ये न्ह्याग्गुसां छगू मू ‘थीम’ ज्वनाः दयेकेमाः धयादीगु खः
उगु संकिपा कासाय् दुहाँ वःगु शर्ट फिल्म मध्यय् न्हाप लाःगु शर्ट फिल्मयात ७५ द्धः, ल्यू लाःगु संकिपायात ५० द्धः व लियांल्यू लाःगु निगु संकिपायात २५ द्धः तका दां सिरपाः बिइग धकाया जानकारी बियादीगु खः ।
उगु ग्वसाः पुचलय् अमेरिकाया दुर्गालाल साहित्य प्रतिष्ठानपाखें प्रविण ताम्राकार, नेवाः नुगःपाखें सुमन श्रेष्ठ, सुरेशकिरण मानन्धर व पबित्र कसाः दुजः कथं च्वनादीगु दु ।
पत्रकारिताय् लैङ्गिक संवेदनशीलता ज्याझ्वः
नृपेन्द्रलाल श्रेष्ठ | चिल्लागा पंचमी ११३८ (मार्च २२ २०१८)
नेवाः पत्रकार राष्ट्रिय दबू, मिसा कवःया ग्वसालय् थौं छःगु १०८ क्वःगु अन्तर्राष्ट्रिय नारी दिवसया लसताय् मिसा तयेत जुइगु विभेदया अन्त्यया लागि पत्रकारिताय् लैङ्गिक संवेदनशीलताया बिषयलय् छगु अन्तरक्रिया ज्याझ्वः जुगु दु
उगु ज्याझ्वलय् नेपाल भाषा टाइम्सया सम्पादक नाप वरिष्ठ पत्रकार सुरेशकिरण मानन्धरं लैङ्गिक विभेद अन्त्यया लागि सञ्चारमाध्यमं महत्वपूर्ण भूमिका म्हिते फइगु धासेें लैङ्गिक संवेदनशीलताया विषयलय् सञ्चारमाध्यम उदाहरण जुया पिहा वये माःगु खँय् बःबियादील ।
वय्कलं सञ्चारमाध्यमय् मिसा तयेगु बुखँ कम जक थाय् दइगु धयादीसे सम्पादक मानन्धरं मिसा तयेगु बुखँ दुव्र्यवहार, बलात्कार व घरेलु हिंसा बांमलाःगु बुखँ जक सञ्चारमाध्यम थाये बियाच्वंगु, बांलागु बुखँय् अपेक्षा याये थें थाय् बिया च्वंगु मदुगु धका न धयादीगु खः ।
राससया पूर्व महाप्रबन्धक नाप क्रियाशील महिला पत्रकार मञ्चया उपाध्यक्ष निर्मला तुलाधर आचार्यं मिसा तयेत समाजं स्वइगु मिखा व मिसा पिन्त पेशागत संवेदनशीलता यात थुइके मफया हे पत्रकारिता त्वःता वनेत बाध्य जुया वनाच्वंगु धका धयादील ।
मिसा कवःया कजि रचना श्रेष्ठया सभाधक्ष्य जुगु उगु ज्याझ्वलय् रुबि श्रेष्ठं न्ह्याकादीगु खः ।
रत्नवत सिरपाः बिइगु
नृपेन्द्रलाल श्रेष्ठ | चिल्लागा पंचमी ११३८ (मार्च २२ २०१८)
ज्ञानमाला भजन खलकं छगु पत्रकार सम्मेलनयासें थ्व हे वइगु चिल्लागा अष्टमी शनिवाः फागुन २६ गतें भिक्षु थानसेठ्ठ महास्थवीर, युवक वौद्ध मण्डल नेपाल यल व वरिष्ठ म्येहालामि लिसें संगीतकार रत्न बेहोसीयात थुगुसीया रत्नवत सिरपाः बीगु जूगु दु ।
उगु पत्रकार सम्मेलनय् खलःया न्वकू पूर्णकाजी ज्यापुं थ्व हे वइगु शनिवाः महामन्जुश्रीया पूजा यासें रत्नवत सिरपाः नाप झिद्धः तका ध्यबा न लःल्हाइगु ज्याझ्व दु धका जानकारी बियादिगु खः ।
मचा चिनाखँ ब्वनेज्या व सहलह मुँज्या जुल
लहनान्युज | चिल्लागा तृतिया ११३८ (मार्च ४ २०१८)
नेवाः देय् दबूया भाषा, साहित्य व संस्कृति कवः, नेवाः स्यनामि दबू व नेवाः वस्ती नेवाः स्कूल अभियानया मंकाः ग्वसालय् लोककवि राजभाइ जकःमिया मचा चिनाखँ ब्वनेज्या व सहलह मुँज्या येँया जगतसुन्दर ब्वनेकुथि लखुतीर्थय् जूगु दु ।
उगु ज्याझ्वलय् मूपाहाँ कथं जनकबि दुर्गालाल श्रेष्ठ झायादीगु खः । च्वमि जकःमिं थ्यंमथ्यं ४० पु चिनाखँ ब्वनाः न्यंकादीगु खः ।
ज्याझ्वलय् विशेषपाहाँ कथं नेवाः देय दबूया नायः नरेश ताम्राकार, पाहाँ कथं नेवाः स्कुल नेवाः वस्तीया सह संयोजक नविन थेच्वमिं, नेवाः स्यनामि दबूया काय बहादुर नेपाली ब्यञ्जनकार, जगतसुन्दर ब्वनेकुथिया प्रिन्सिपल सुनिता मानन्धर, साहित्यकार मोहन दुवाल लगायतपिं झायादीगु खःसा ज्याझ्वः पवित्र कसाः नं न्ह्याकादीगु खः ।
ज्याझ्लय् जगतसुन्दर ब्वनेकुथि वकिलाघः सांस्कृतिक पुचः पाखें हुलाप्याखंत न्ह्यब्वःगु व रिता महर्जन पाखें म्य न्ह्यव्वयादीगु खः ।
बुखँ नेवाः सुचना केन्द्र
किपा राजेन्द्र रंजित
