Display Style:
Column Style
राससया प्रधान सम्पादक शाक्य सम्मानित
नृपेन्द्रलाल श्रेष्ठ | थिंलाथ्व एकादशि ११३७ (डिसेम्बर १० २०१६)
१३ वडा ग्वाहालि पुचःया ग्वसालय् थौं येँय् न्हूदँ नेपाल सम्वत ११३७या लसताय् भिन्तुना कालबिल ज्याझ्वः जूगु दु ।
भिंतुना ज्याझ्वलय् १३ वडा दुनेया विशिष्ट व्यक्तित्वपिन्त हंगु खः । उकिया झ्वलय् राष्ट्रिय समाचार समितिया प्रधान सम्पादक राजु शाक्ययात हंगु दु ।
शाक्ययालिसें अन्तर्राष्ट्रिय धावक वैकुण्ठ मानन्धर व समाजसेवी बेदराज शर्मा रुपाखेतीयात नं हंगु खः । सम्मानित व्यक्तित्वपिन्त ज्याझ्वःया मू पाहां जनकवि दुर्गालाल श्रेष्ठं हनापौ लःल्हानादिल ।
ज्याझ्वलय् जनकवि श्रेष्ठया लिसें समाजसेवी प्रा.डा.तुलसीनारायण श्रेष्ठ, आदिवासी जनजाति वकिलपिनिगु संस्था लाहुर्निपया छ्यान्जे शंकर लिम्बु, राजनैतीक विश्लेषक सीके लाल, कृष्णभक्त हाछेथुं राज्यं आदिवासी जनजातिया अधिकार सुनिश्चित यायेमाःगु खँय् बः बियादीगु खः ।
ज्याझ्वःया उलेज्या जनकवि श्रेष्ठं त्वाःदेवाय् मत च्याकाः यानादिल । ज्याझ्वः पुचःया नायः जीतबहादुर मानन्धरया सभानायकय् जूगु खः ।
स्वनिगलय् नेवाःत अल्पमतय् मलाः
लाहुर्निपया छ्यान्जे शंकर लिम्बुं सरकारं देशया जनताया नयेगु नसा, च्वनेगु बाय् व पुनेगु लंया सुनिश्चिता यायेमाःगु अवस्थाय् सडक विस्तारया नामय् राज्य हे स्वनिगःया आदिवासी नेवाःतयगु बाय् लाका कयाच्वंगु धयादिल । वर्तमान संविधानं नेवाःलिसें थारुतयगु अस्तित्वयात संकटय् लाकूगु लिम्बुया धापू खः ।
अथे हे जनकवि दुर्गालाल श्रेष्ठं नेवाःत च्यः बुद्धि जुयाः झं झं ल्यूने लानावनाच्वंगु धयादिल । आः नं च्यः बुद्धि त्वःताः अधिकार प्राप्तिया नितिं न्ह्यज्याःसा थःगु अधिकार कायेफइगु खँ श्रेष्ठं कुलादिल ।
व हे कथं, राजनैतीक विश्लेषक सीके लालं मोहनिया इलय् सकलें थःथःगु छेँय् वनीगु इलय् स्वनिगःया वास्तविक जनसंख्या खनेदइगु धयादीगु खः । भाजु सीके लालं नेपालया जनगणनाया तथ्यांक स्वयेबलय् स्वनिगलय् नेवाःत अल्पमतय् लाःगु खनेदुसां मतदाता नांधलः व नागरीकताया आधारय् स्वयेबलय् नेवाःत अल्पमतय् खनेमदुगु प्रष्ट यानादिल ।
क्षेत्रपाटिइ आपतकालीन उपचार तालीम न्ह्यात
लहनान्यूज सम्वाददाता | थिंलाथ्व षष्ठी ११३७ (डिसेम्बर ५ २०१६)
नेपाल एम्बुलेन्स सर्भिसया ग्वसालय् क्षत्रपाटी निःशुल्क चिकित्सालय (अस्पताल)य् आपतकालिन स्वास्थ्य उपचार तालिम न्ह्याःगु दु ।
अमेरिकाया स्टेन फोर्ड युनिभर्सिटी इमरजेन्सी मेडिकल डिपार्टमेन्टपाखें उगु तालिम ब्यूगु खः । इन्टरनेश्नल मेडिकल कोप्र्सं ग्वाहालि याःगु थुगु तालिमय् न्ययम्हेस्यां ब्वति काःगु खः ।
थुगु तालिम स्वला तक न्ह्याइ ।
गद्यगुरु निष्ठानन्दया १६०क्वःगु बुदिं हन
लहनान्यूज सम्वाददाता | थिंलाथ्व चतुर्थी ११३७ (डिसेम्बर ३ २०१६)
नेपालभाषा साहित्यया गद्यगुरु प. निष्ठानन्द बज्राचार्यया १६०क्वःगु बुदिं थौं येँय् हंगु दु ।
निष्ठानन्द स्मृति गुथिया ग्वसालय् येँया ओमबहालय् छगू ज्याझ्वः यासें गद्यगुरु बज्राचार्यया बुदिं हंगु खः । गुथिया नायः प्रा. सुवर्ण शाक्यया सभानायकय् जूग ज्याझ्वलय् मू वक्ता नेवाः न्ह्यलुवा नरेशबीर शाक्यं गद्यगुरुया नेपालभाषा साहित्य व बौद्ध धर्म ख्यलय् योगदानया बारे चर्चा यानादीगु खः ।
नेवाः न्ह्यलुवा शाक्यं ललितविस्तरलिसें थीथी बौद्ध ग्रन्थयात गद्यगुरुं आम सर्वसाधारणं थुइगु भासं पिकयाः थुकिया शिक्षायात सकसिगु छेँय् छेँय् थ्यंकेत तःधंगु ग्वाहालि जूवंगु धयादिल । ललितविस्तर धयागु वुद्ध लीला खःगु शाक्यया धापू खः ।
ज्याझ्वलय् ओमबहालय् दुगु गद्यगुरुया झ्वाताय् स्वांमाः नं कोखायेकूगु खः । गुथिया नायः शाक्य, नेवाः न्ह्यलुवा शाक्यं गद्यगुरुया झ्वाताय् स्वांमाः देछायेधुंकाः ज्याझ्वmलय् उपस्थित सकसिनं स्वां देछाःगु खः ।
ज्याझ्वलय् लसकुस लिसें सुभाय् न्वचु नं प्रा. शाक्यं तयादिल ।
पत्रकार दबू मिसा विभागया न्हापांगु मुँज्या
लहनान्यूज सम्वाददाता | थिंलाथ्व चतुर्थी ११३७ (डिसेम्बर ३ २०१६)
नेवाः पत्रकार राष्ट्रिय दबू, केन्द्रीय ज्यासना पुचःया मिसा विभागया न्हापांगु मुँज्या च्वंगु दु ।
मुँज्यां दुजलय् यलपाखें पूर्णिका शाक्य, येँय् नं रेणुका श्रेष्ठ, ख्वपं रमिता त्वायनाबासु व रीता दुवालयात मनोनित याःगु दु ।
अथेहे मिसा विभागया सल्लाहकारय् राष्ट्रिय समाचार समितिया महाप्रबन्धक निर्मला तुलाधर, प्रेस काउन्सिल नेपालया दुजः शुभेच्छा बिन्दु तुलाधर, नेपाल आदिवासी जनजाति महिला महासंघया सिर्जना प्रधान, नेपाल आदिवासी जनाजाति पत्रकार महासंघया सल्लाहकार रमिता लामायात मनोनित याःगु दु ।
व हे कथं गोरखापत्र न्हिपौया सम्पादक पुष्करभक्त माथेमा व नेपालभाषा टाइम्स न्हिपौया सम्पादक सुरेशकिरण मानन्धरयात नं सल्लाहकारय् ल्यःगु दु ।
‘पांगाया विष्णुदेवी बालकुमारी जात्रा’ विमोचन
लहनान्यूज सम्वाददाता | थिंलाथ्व चतुर्थी ११३७ (डिसेम्बर ३ २०१६)
नांजाःम्ह म्येहालामि दीपा महर्जनं च्वयादीगु अनुसन्धामूलक ‘पांगाया विष्णुदेवी बालकुमारी जात्रा’ सफू थौं विमोचन जूगु दु ।
थौं ज्यापु महागुथि किपू नगर समितिया ग्वसालय् किपुलिइ जूगु छगू ज्याझ्वलय् सफूया विमोचन जूगु खः । नेपालभाषा केन्द्रिय विभागया प्रमूख प्रा.डा.चन्द्रमान बज्राचार्ययालिसें पांगा दिख्यःया बाजं गुरु गोविन्द महर्जन, ज्यापु महागुथि किपू नगर समितिया नायः नजरराम महर्जन व ज्यापु महागुथिया केन्द्रिय नायः राजभाई जकःमिं मंकाः कथं सफू विमोचन यानादीगु खः ।
ज्याझ्वलय् ज्यापु महागुथि, किपू नगर समितिया आजीवन दुजःपिन्त दसिपौ नं लःल्हाःगु खः ।
ज्याझ्वलय् न्हूदँ ने.सं.११३७ व येँया पश्चिम लागाया न्हयगां जात्राया झ्वलय् हनीगु न्हयगां जात्राया नं भिंतुना कालबिल याःगु खः ।
ज्याझ्वलय् साहित्यकारलिसें थीथी ख्यःया ब्यक्तित्वपिनिगु नं उपस्थिति दुगु खः ।
