Display Style:
Column Style
ज्यापु दिवस तःजिक हनेत सहलह
लहनान्यूज सम्वाददाता | कछलागा पंचमि ११३७ (नोभम्बर १९ २०१६)
१३क्वःगु ज्यापु दिवस तःजिक हनेगु नितिं थौं येँय् ज्यापु संस्कृति विकास कोषया ग्वसाः व कमलादी गणेश जमःमि गुथिया कजिसुइ छगू सहलह ज्याझ्वः जुल ।
जमःमि गुथिया नायः लिसें थुगुसीया ज्यापु दिवसया कजि राम महर्जनया अध्यक्षताय् जूगु ज्याझ्वःया उलेज्या पूर्वमन्त्री लिसें नेवाः न्ह्यलुवा तीर्थराम डंगोलं त्वाःदेवाय् मत च्याकाः यानादिल ।
लसकुस यासें १३क्वःगु ज्यापु दिवसया ल्यू कजि रविन महर्जनं थुगुसीया ज्यापु दिवसया नितिं तयारीया विषयस कनादिल । ल्यू कजि महर्जनं ज्यापु दिवसया तयारी लिसें प्रचार प्रसारया झ्वलय् सुकुन्दा र्याली, साइकल र्याली थुज्वःगु ज्याझ्वःत नं जुइगु जानकारी बियादिल ।
जमः मिसा पुचःया नकिं बिमला महर्जन, ज्यापु संस्कृति विकास कोष, मखंया निमित्त नायः मंगलकृष्ण सिं, नारायण परीवार क्लबया का.नायः प्रचण्डमान बज्राचार्य, ज्यापु महागुथि, येँ महानगर समितिया नायः बाबुराजा महर्जन, श्री ज्यापु महागुथिया नायः सन्तु महर्जन, १२क्वःगु ज्यापु दिवसया संयोजक तीर्थमान महर्जन लिसें पूर्वमन्त्री तीर्थराम डंगोलं १३क्वःगु ज्यापु दिवसया सफलताया भिंतुना ब्युसें ज्याझ्वःयात झःझः धायेकेत थीथी सल्लाह सुझाव नं बियादीगु खः ।
मोतिलानी सिरपाः लःल्हात
लहनान्यूज सम्वाददाता | कछलागा पंचमि ११३७ (नोभम्बर १९ २०१६)
ने.सं. ११३५ व ११३६ स एस.एल.सीं निसें स्नातकोत्तर तगिंतक्क नेपालभाषा बिषय कयाः दक्कले अप्वः ल्याः हयाः छक्वलं ताःलाःपिं विद्यार्थीपिन्त थौं येँय् मोतिलानि सिरपाः लःल्हाःगु दु ।
मोतिलानि सिरपाः गुथिया ग्वसालय् थौं येँय् जूगु ज्याझ्वलय् नेवाः बस्ती नेवाः स्कूल अभियानया अभियन्ता दिपक तुलाधरं विद्यार्थीपिन्त सिरपाः लःल्हानादिल । अथे हे मदुम्ह मोतिलानि ताम्राकारया म्ह्याय् लिसें मोतिलानि सिरपाःया संरक्षक ज्ञानुशोभा तुलाधरं तका सिरपाः लःल्हानादिल ।
एस.एल.सी. परीक्षाय् नेपालभाषा कयाः दक्कले अप्वः ल्याः हःम्ह कथं ने.सं. ११३५या नितिं कन्या मन्दिर मा.वि.या सरिना महर्जनयात व ने.सं. ११३६ या नितिं आदर्श मा.वि. थिमिया अनिता प्रजापतियात हन । अथे हे १०.२ तगिमय् ने.सं. ११३६ या नितिं मंगलोदय उच्च मा.वि.या निशा प्रधानयात सिरपाः लःल्हाःगु ख ।
व हे कथं स्नातक तगिंया नितिं ने.सं. ११३६ या नितिं पाटन संयुक्त क्याम्पसया बसन्त राज शाक्ययात सिरपाः ब्यूग खः । स्नातकोत्तर तगिमय् ने.सं. ११३५ या नितिं दिपा महर्जनयात व ने.सं. ११३६ या नितिं भरत महर्जनयात सिरपाः लःल्हाःगु खः ।
दिपक तुलाधरं त्वाःदेवाय् मत च्याकाः उलेज्या यानाद्यूगु ज्याझ्वलय् सिरपाः गुथिया दुजः दिव्या ताम्राकारं लसकुस यानाद्यूगु खः ।
थःगु मांभासं शिक्षा काःसा याकनं व बांलाक थुइके सयेके फइगु खँय् सिरपाः त्याकामि विद्यार्थीपिन्सं बः ब्यूगु खः ।
नुगः खँ तयेगु झ्वलय् नेवाः बस्ती नेवाः स्कूल अभियानया अभियन्ता लिसें मोडर्न नेवाः इंगलिस स्कूलया नायः दिपक तुलाधरं मातृभाषा शिक्षाया अधिकारया खँ संविधानय् हे सुनिश्चित याकेमाःगु खँय् बः बियादिल । राज्यं हे स्थानीय ब्वनेकुथिइ स्थानीय मातृभाषा शिक्षा लागू याकेमाःगु तुलाधरया धापू खः ।
त्रिशुलिया लक्ष्मण नेवाःयात येँय् हन
लहनान्यूज सम्वाददाता | कछलागा पंचमि ११३७ (नोभम्बर १९ २०१६)
त्रिशुलिया भाषासेवी लिसें समाजसेवी लक्ष्मण नेवाःयात थौं येँय् त्रिकास बचत तथा ऋण सहकारी संस्थां हंगु दु ।
ज्याझ्वलय् भाजु श्रेष्ठयात हनापौ लिसें दोसल्लां न्ययेकाः हंगु खः । जनकवि दुर्गालाल श्रेष्ठं सम्मानित भाजु श्रेष्ठयात हनापौ लःल्हानादिल ।
त्रिशुलिइ नेपालभाषा व नेवाः तजिलजिया संरक्षण, सम्वद्र्धन व प्रवद्र्धनय् बियादीगु योगदानया नितिं भाजु नेवाःयात हंगु खः । श्रेष्ठयात त्रिशुलिया लिसें येँया थीथी संघसंस्थां नं खादां न्ययेकेगुया लिसें हनापौ लःल्हानाः हंगु खः ।
ज्याझ्वलय् शाक्य सुरेनं सम्मानित श्रेष्ठया म्हसिका न्ह्यब्वयादिल । अथे हे जनकवि दुर्गालाल श्रेष्ठ, नेवाः न्ह्यलुवा मल्ल के. सुन्दर, वरिष्ठ संगीतकःमि रामकृष्ण दुवाल, संस्कतिविद् चुन्दा बज्राचार्य लिसें नं श्रेष्ठया भाषिक, सामाजिक व सांस्कृतिक लिसें शैक्षिक ख्यलय् योगदानया बिषयस चर्चा यानादीगु खः ।
नवदुर्गा बचतया न्हयक्वःगु दँमुँज्या क्वचाल
लहनान्यूज सम्वाददाता | कछलागा पंचमी ११३७ (नोभम्बर १९ २०१६)
थेचोस्थित नवदुर्गा वचत तथा ऋण सहकारी संस्थाया बज्रबाराही नगरपालिका थेचोस्थित वेलुवनाराम विहारय् न्हयक्वःगु वार्षिक साधारण सभा क्वचाल ।
सभाय् १ लख तका शेयर रकम थ्यंकूपिन्त सम्मान नं याःगु खः । सम्मानित जूपिंलय् रजन महर्जन, कृष्ण गोविन्द, ऋषि, न्हुच्छेराम, शान्ति महर्जन, शंख नारायण माली, रामदेवी, कृष्णमान, वीणा, बसन्त, रत्नकाजी, बेखालाल, राजेश, मखन, बुद्ध, छत्रमान, चन्देवी व हेराबहादुर माली खः ।
उत्कृष्ट आवधिक निक्षेप कर्ताय् सीरीमाया महर्जन, विषेश बचतय् रजन महर्जन, सामुहिक जमानी त्यासाय् श्यामबहादुर महर्जन, व्यापारिक कर्जाय् राम माली व उत्कृष्ट शेयर दुजलय् रामदेवी मालीयात तकालिसें मतिनाया चिं लःल्हाना हन ।
सभाय् लसकुस न्वचु संस्थाया न्वकू न्हुच्छेराम महर्जन, प्रगती प्रतिवेदन नायः राजु माली, आर्थिक प्रतिवेदन दांभरिं अजय मालीं, लेखा समितिया प्रतिवदेन लेखा कजि बैकुण्ठ मालीं तयादिल । ज्याझ्वःया विषेश अतिथी नेपाल माली समाजया केन्द्रिय सभापति अमर नारायण माली व सुभाय् न्वचु छ्यान्जे बसन्त मालीं बियादिल ।
सभाया मूपाहां कथं संस्थाया ज्याथःम्ह दुजः हरि मालीयात ब्वनातःगु खः ।
एसएसपि सर्वेन्द्र खनाल सम्मानित
लहनान्यूज सम्वाददाता | कछलागा दुतिया ११३७ (नोभम्बर १६ २०१६)
११क्वःगु महानगरीय प्रहरी दिवसया लसता लाकाः महानगरीय अपराध महाशाखाया प्रमुख, एसएसपि सर्वेन्द्र खनाल सम्मानित जूगु दु ।
महानगरीय प्रहरी दिवसया लसताय् थौं येँय् ग्वसाः ग्वःगु ज्याझ्वलय् प्रहरी महानिरिक्षक उपेन्द्रकान्त अर्यालं एसएसपी खनालयात सम्मान लःल्हानादिल । खनालयात अनुसन्धान ख्यलय् ज्वः मदुगु योगदान ब्यूगु धासें सम्मान याःगु खः ।
सम्मानित एसएसपी खनालं लहनान्यूजलिसे खँ ल्हासें थुगु सम्मान समग्र प्रहरी संगठनया सम्मानया रुपय् थम्हं कयागु धयादिल । लिसें थुगु सम्मानं थःत तँसा जिम्मेवारी ब्यूगु तायेकागु नं वयकःया धापू खः ।
अथे हे मेम्ह एसएसपी विक्रमसिंह थापायात नं उगु हे ज्याझ्वलय् हंगु दु । थापायात ज्वः मदुगु कार्यसम्पादन याःगु धासें हंगु खः ।
उगु हे ज्याझ्वलय् एसएसपी सरद चन्द, डिएसपी सन्तोष सिंह राठौर मनोहरी थापा, हवल्दार चेतबहादुर चौलागाईं व प्रहरी जवान सन्तोष सापकोटायात नं हंगु खः ।
