Display Style:
Column Style
चित्तधर ‘हृदय’ बुदिंया लसताय् थीथी सिरपां हन
लहनान्युज | तछलागा षष्ठी ११३९ (जुन २३ २०१९)
कविकेशरी चित्तधर ‘हृदय’ या ११३ क्वःगु बुदिंया लसताय् नेपालभाषा परिषदया ग्वसालय् नेपाल प्रज्ञा प्रतिष्ठानय् छगु ज्याझ्वः याःगु दु ।
उगु ज्याझ्वलय् भाषाथुवाः, चित्तधर सिरपाः व पूर्ण–हीरा सिरपाः पाखे हना ज्याझ्वः नाप चित्तधर हृदयया चिनाखँ व म्ये सफू पितब्वज्या जूगु दु ।
चित्तधर ‘हृदय’ या ११३ क्वःगु बुदिंया लसताय् जुगु ज्याझ्वलय् फणिन्द्र रत्न बज्राचार्य मूपाँहा कथं झायादीगु खः । उगु ज्याझ्वलय् प्रा.डा. तेजरत्न कंसारकारयात ‘ने.सं. ११३९ मानार्थ
‘भाषाथुवाः’ उपाधि, नागार्जुन पब्लिकेशनयात ‘चित्तधर सिरपाः’ व ‘पूर्ण–हीरा सिरपाः’ साहित्यकार शान्तराज शाक्ययात हनापौ नापं नगद लःल्हानादिगु खः ।
अथेहे, ज्याझ्वलय् चित्तधर ‘हृदय’या चिनाखँ व म्ये सफू मूपाहाँ बज्राचार्य छत्रबहादुर कायस्थं मंकाः कथं पितब्वज्या यानादीगु खः । उगु सफूया समालोचक पूर्णकाजी ताम्राकारं समीक्षा यानादिगु खः ।
छत्रबहादुर कायस्थया सभाधक्ष्यताय् जुगु उगु ज्याझ्वः प्रतिसरा साय्मिं न्ह्याकादीगु खः ।
बुँखः नेवाः सुचना केन्द्र किपाः राजेन्द्र रंजित
यलय् साहित्यिक ज्याझ्वलय् स्वम्हेस्या ब्बन बाखं
लहनान्युज | तछलागा षष्ठी ११३९ (जुन २३ २०१९)
सः छगू फरक अभिव्यक्तिया ग्वसालय् यलय् छगु चिबाखं साहित्यिक मुँज्या जूगु दु ।
उगु चिबाखं साहित्यिक मुँज्या ज्याझ्वलय् शरद कसाः, श्याम आशा कायस्थ, निजिरोस श्रेष्ठ स्वम्हस्या न्यापु न्यापु चिबाखं ब्वनाः न्यंकादीगु खः ।
अथेहे उगु ज्याझ्वलय् डा. पुष्प राज राजकर्णिकारं थःगु नुगःखँ तयेगु झ्वलय् बाखं च्वमि शरद कसाःया बाखं न्ह्यब्वयेगु इलय् कलाकारिता नं खने दु धका धयादिसे श्याम आशाया बाखनय् धायेय् माःगु थःगु सकतां खँ चीहाकलं न्ह्यैपुक्क न्ह्यब्व दु धयादिसे निजिरोस बाखं च्वयेगु ब्यागलं पहः दुगु खँ कनादिगु खः ।
सुनिल बज्राचार्यं न्ह्याकादीगु उगु ज्याझ्वलय् नरेश अमात्यं लसकुुस यानादीगु खःसा सुधिर ख्वविं स्वम्ह बाखं च्वमिपिन्त मतिनाया चिं लःल्हानादीगु खः ।
बुँखः नेवाः सुचना केन्द्र किपाः राजेन्द्र रंजित
थौं ब्ल्यायक आउट जुल
नृपेन्द्रलाल श्रेष्ठ | तछलागा पंचमी ११३९ (जुन २२ २०१९)
थौं येँ व यलया थी थी थासय् गुथि बिधेयकयात खारेजया माग यायेगु ज्याझ्वः कथं ब्ल्यायक आउट ज्याझ्वः जुगु दु ।
थौंया ज्याझ्वः राष्ट्रिय पहिचान संरक्षण सयुक्त संघर्ष समितिया ग्वसालय् शनिवाः बहनिं ७ः३० बजे निसें ७ं४५ बजे तक ब्ल्यायक आउटया ज्याझ्वः याःगु दु ।
दबुलि नेपालया स्मारिका पितब्वज्यालिसें थीथी ब्यक्तित्वपिन्त हन
जुजुमान महर्जन | ने.सं. ११३९ तछलागा पञ्चमि (२२ जुन, २०१९), सञ्चरवाः
स्वनिगःया ऐतिहासिका न्यागू शहरया न्याम्ह ब्यक्तित्वपिन्त हनेज्यालिसें नेवाःतय्गु पहिचानया नितिं थगुने दबुलि नेपालपाखें जूगु ज्याझ्वःयात कयाः पिदंगु स्मारिका ‘दबुलि’या पितब्वज्याया नापनापं उकिया लिधंसाय् दयेकातःगु ‘पहिचान’ संकिपाया विमोचन जुल ।
दबुलि नेपाल (युथ फोर कल्चर प्रोमोशन)या ग्वसालय् जूगु उगु ज्याझ्वःया उलेज्या मूपाहां लिसें वाङमय शताब्दी पुरुष नापं वरिष्ठ संस्कृतिविद् डा. सत्यमोहन जाशीपाखें त्वाःदेवा च्याकाः यानादीगु खः ।
ज्याझ्वलय् ख्वपया वरिष्ठ साहित्यकार तिलकप्रकाश कायस्थयात ‘हिरा नरसिंह लुमन्ति साहित्य सम्मान’पाखें हंगु खःसा नगद सिरपाः दाता डा. सुभाषराम प्रजापति, सियाटल, अमेरिकाया छेँजःपिंपाखें सुवर्ण प्रजापतिं लःल्हानादीगु खः । अथे हे मध्यपुरया कृष्णलाल गोजायात ‘आशा नरसिंह लुमन्ति सम्पदा संरक्षण सम्मान’ व दाता सानुकाजी प्रजापतिं दां लःल्हानादीगु खः ।
‘किपूया संगीतकःमि वीरप्रसाद भन्सारीयात ‘तेजकृष्ण लुमन्ति संगीत सम्मान’ व दाता तुइकाजी प्रजापतिं दां लःल्हानादीगु खः । येँया लिपि विज्ञ शरदवीर कंसाकारयात ‘हरिकृष्ण लुमन्ति लिपि अभिलेख सम्मान’ व दाता सुरजविक्रम प्रजापतिं दां लःल्हानादीगु खःसा यलया मुर्तिकार चन्द्रमाया बज्राचार्ययात ‘नानीमाया लुमन्ति ल्वहंमूर्ति सम्मान’ व दाता सुष्मा प्रजापतिं दां लःल्हानादीगु खः । सम्मानित जुयादीपिं फुक्कसित म्हतिं झिद्वः/झिद्वः तका दां लःल्हाःगु खःसा मूपाहां वाङमय शताब्दी पुरुष डा. जोशीपाखें हनापौ व विशेष पाहांलिसें मध्यपुर थिमि नगरपालिकाया प्रमुख ई. मदनसुन्दर श्रेष्ठं दोसल्लां न्ययेका हनादीगु खः ।
दबुलि नेपालया नायः ई. सन्तोष प्रजापतिया सभाध्यक्षताय् न्ह्याःगु उगु ज्याझ्वलय् मध्यपुरया लिपि स्यनामि विक्की बज्राचार्ययात ‘रत्नबहादुर लुमन्ति प्रतिभा सिरपाः’ व रत्नकेशरी प्रजापतिं न्याद्वःतका दां लःल्हानादीगु खःसा रोसिका जधारीयात ‘कान्छी लुमन्ति प्रतिभा सिरपाः’ व भुवनेश्वरी प्रजापतिपाखें न्याद्वःतका दां लःल्हानादीगु खः ।
पाहांकथं विराट नेपालभाषा साहित्य सम्मेलनया नायः कृष्णभक्त बोडे, नेवाः गुथिया नायः लिसें नेवाः न्ह्यलुवा पवित्र बज्राचार्य, नेपालभाषा मंकाः खलः, यलया नायः ऋषिप्रसाद श्रेष्ठ व मध्यपुर नगदेशया समाजसेवी कृष्णबहादुर घःजु झायादीगु उगु ज्याझ्वलय् दबुलि नेपालया प्रदेश प्रतिनिधि नं म्हसीकेगु ज्याझ्वः जूगु खः । ज्याझ्वलय् मूपाहां वाङमय शताब्दी पुरुष डा. सत्यमोहन जोशी सच्छिदँ क्यंगुलिं वय्कःया भिंउसाँय् व ताःआयुया कामना यासें दबुलि नेपाल, मध्यपुर कला परिषद्, दबुलि पोर्चुगल, दबुलि जापान, दबुलि बेलायत, दबुलि अमेरिकालिसें सिक्किम नेवार संगठन व अखिल भारतीय नेवार संगठन, असाम राज्य समितिंपाखें नं भिन्तुना पौ देछायेगु ज्या जूगु खः ।
ज्याझ्वलय् मूपाहां डा. सत्यमोहन जोशी, सम्मानित ब्यक्तित्वपाखें वरिष्ठ साहित्यकार तिलकप्रकाश कायस्थ, नेवाः गुथिया केन्द्रीय नायः पवित्र बज्राचार्य, मध्यपुर थिमि नगरपालिकाया प्रमुख ई. मदनसुन्दर श्रेष्ठपिन्सं नुगःखँ तयादीगु खः ।
दबुलि नेपालया छ्याञ्जे सुरेन्द्रविक्रम प्रजापतिं लसकुस यानादीगु उगु ज्याझ्वः जुजुमान महर्जनं न्ह्याकादीगु खः ।
वसुवर्ण साकोसया उद्घोषण तथा वक्तृत्व विकास तालिम क्वचाल
सुरज, लहनान्युज | तछलागा पंचमी ११३९ (जुन २२ २०१९)
यल नागबहाःया वसुवर्ण वचत तथा ऋण सहकारी संस्था लिमिटेडं ग्वसाः ग्वःगु उद्घोषण व वक्तृत्व विकास तालिम क्वचाल । संस्थाया अध्यक्ष सुमन शाक्यया सभापतित्वय् जूगु समापन समारोहय् मूपाहाँं ललितपुर महानगरपालिका वडा नं १६ या अध्यक्ष निर्मलरत्न शाक्यं ब्वति कयादीपिन्त दसिपौ लःल्हाःसें थुगु तालिम कयादीपिनिगु ज्याझ्वः न्ह्याकेगु कला, न्वचु ब्यूगु व ब्यवस्थापनं थः अतिकं प्रभावित याःगु न्ह्यथंसें वडा व वडाबासीपिनिगु विकासय् वडां यानाः वयाच्वंगु थीथी ज्याझ्वः विषयय् कनादिल ।
२०७६ जेष्ठ ३० गते निसें जेष्ठ ७ गते झिन्हुयंक जूगु थुगु तालिमया समापन ज्याझ्वलय् विशेष पाहांकथं नागबहाल टोल सुधार समितिया उपाध्यक्ष, दाफा भजन खलः अध्यक्ष आःजु जुजुरत्न शाक्य, वसुवर्ण साकोसया पुलांम्ह नायः बुद्धरत्न शाक्य, स्यनामि सुरजवीर बज्राचार्य, नगर सभा सदस्य पञ्चबज्र बज्राचार्यं आशन ग्रहण यानादीगु खः ।
पत्रकार, ज्याझ्वः न्ह्याकामि सुरजवीर बज्राचार्यं बियादीगु प्रशिक्षणय् २२ म्हसिन ब्वति कयादीगु खः । प्रशिक्षक बज्राचार्यं न्वचु व ज्याझ्वः न्ह्याकेगु नापं ज्याझ्वः ताःलाक ग्वसाः ग्वयेगु नितिं यायेमाःगु थीथी ज्यायाबारे नं स्यनादीगु खः । थुगु ज्याझ्वय् स्यनामि बज्राचार्यं न्वचु तयेगु झ्वलय् ब्वति कयादीपिं सकलसिगु मेहनतं थःत नं अतिकं उत्साहित याःगु धयादिसें तालिम कयादीपिं सकलसित माःबलय् सदां ग्वाहालि यायेगु वचं नं बियादिल ।
तालिमया संयोजन यानादीम्ह संस्थाया महिला उपकमिटीया संयोजक गंगा शाक्य व शिक्षण उपकमिटीया संयोजक रविन्द्र शाक्यं नं नुगःखँ तयादीगु खः । थुगु ज्याझ्वलय् तालिम कयादीपिंपाखें वीणा शाक्य, दीक्षालक्ष्मी शाक्य, सम्राट शाक्य व संस्कृति शाक्यं तालिम कयागु झ्वलय् जूगु थःथःगु अनुभव कनादीगु खःसा प्रशिक्षार्थीपिं उषा शाक्यं लसकुस व धर्मराज शाक्यं सुभाय् न्वचु देछानादीगु खः । थुगु ज्याझ्वः नं प्रशिक्षार्थी मिला शाक्यं न्ह्याकादीगु खः ।
ज्याझ्वःया सभानायः वसुवर्ण वचत तथा ऋण सहकारी संस्थाया अध्यक्ष सुमन शाक्यं थुगु तालिमं ब्यूगु लिच्वलं थःपिं अतिकं लयताःगु धयादिसें “मेमेगु तालिम नं निरन्तर न्ह्याकेगु जुइ” धयादिल ।
