Display Style:
Column Style
शान्तिपूर्ण बन्दय् प्रहरीपाखें व्यापक धरपकड
लहनान्यूज | पोहेंलाग्व षष्ठी ११३७ (जनवरी ४ २०१७)
उपत्यकाव्यापी सडक विस्तार पिडित संघर्ष समितिं आव्हान याःगु थौंया स्वनिगः बन्दया झ्वलय् प्रहरीं थायथासं व्यापक रुपं हे धरपकड याःगु दु ।
शान्तिपूर्ण रुपं प्रदर्शन याना वयाच्वंंपिं १२म्हेसित प्रहरीं कालिमाटिं ज्वंगु दु । उकी बुखँ संकलन यायेत वंपिं पत्रकारत बिगेन तुलाधर व उदेन न्हूसायमि नं लाःगु दु ।
छुं नं कथंया तोडफोड वा जबर्जस्ती मयाःसे शान्तिपूर्ण रुपं प्रदर्शन यानाः वयाच्वंगु पुचःयात प्रहरीं ज्वनायंकूगु खः । ज्वनायंकूपिन्त भृकुटिमण्डपया महेन्द्र पुलिस क्लबय् यंकूगु खः ।
व हे झ्वलय् किपूया पत्रकार नजरराम महर्जनयात नं किपुलिं हे ज्वनाः महेन्द्र पुलिस क्लबय् यंकूगु खः । तर लिपा किपूया स्थानीय समुदायया दबाब लिपा वयकःयात धाःसा त्वःताहल ।
लिसें बन्दया हे झ्वलय् सितापाइलां विश्वराम बलामि, करुणा बलामि व राम बलामियात नं प्रहरीं ज्वनायंकूगु दु ।
उकिया लिसें कालिमाटिइ सुथय् मुनाः खँ ल्हानाच्वंगु इलय् न्याम्हेसित ज्वनायंकूगु खः । छुं नं नारा वा प्रदर्शन यानाच्वंगु तकं मखसें अथें मुनाः खँ ल्हानाच्वंपिन्त प्रहरीं ज्वनायंकूगु खः ।
सुथय् कालिमाटिं रामशरण सायमि, सुमन श्रेष्ठ, किरण श्रेष्ठ, अमर श्रेष्ठ, कृष्ण श्रेष्ठयात ज्वनायंकूगु खः । सामाखुसिं सुरेन्द्र श्रेष्ठ, रामचन्द्र श्रेष्ठ, समिर शाहि व पंचनारायण महर्जनयात ज्वनायंकल ।
स्वयम्भुं किरण शाहि लगायत दर्जनं मयाक्क मनूत ज्वनायंकूगु स्थानीय प्रत्यक्षदर्शीं धाःगु दु ।
कालिमाटिं ज्वनायंकूपिं
१. बिगेन तुलाधर
२. उदेन न्हूसायमि
३. सुदय शिलाकार
४. शेषनारायण महर्जन
५. गोर्की श्रेष्ठ
६. निरज चित्रकार
७. राजु कपाली
८. मनिष श्रेष्ठ
९. नमस्ते सायमि
१०. भागवत प्रधान
११. रविन्द्र श्रेष्ठ
१२. श्यामकृष्ण प्रजापति
न्हूसतकं ज्वंपिन्त भृकुटिमण्डपय् तयातल
लहनान्यूज | थिंलाथ्व पंचमि ११३७ (जनवरी ४ २०१७)
बन्दया झ्वलय् कालिमाटिं प्रदर्शन यानाः न्हूसतकय् थ्यंकाः ज्वनायंकूपिन्त प्रहरीं भृकुटिमण्डपया महेन्द्र पुलिस क्लबय् तयातःगु दु ।
उपत्यकाव्यापी संघर्ष समितिया कजि सुमन सायमिं पुलिस क्लबं हे लहनान्यूजलिसे खँ ल्हासें थःपिन्सं आःतक्क बन्द लित मकयानिगु स्पष्ट यानादिल । विभिन्न संचारमाध्यमं बन्द लित काल धइगु बुखँ प्रसारण यानाः भ्रम श्रृजना याःगु धासें सायमिं थःपिन्सं बहनी ५ बजेतक हे बन्दयात निरन्तरता बीगु धयादिल ।
लिसें राज्यं दमनया निती हे काःगु दाबी कजि सायमिं यानादिल । छेँय् नं पिहां वयाः छम्ह निम्ह मुनाच्वंपिं मनूतयत तक हे ज्वनायंकाः राज्यं छु यायेत स्वःगु खः धइगु न्ह्यसः वयकलं तयादिल ।
प्रहरीं गुकथं ४६ सालय् थें घेराबन्दि दयेकाः थःपिन्त गिरफ्तार यात उकथं हे आम नागरीकपाखें नं ४६ साल लिहां वयेफुगु चेतावनि सायमिं बियादिल । थःपिं आः कडा आन्दोलनय् कुहां वयेगु सायमिया धापू खः ।
थुकिया लिसें झी यल सम्वाददाता यलं नं ६म्हेसित प्रहरीं ज्वंगु जानकारी छ्वयाहःगु दुसा सक्वय् नं बन्दया झ्वलय् प्रदर्शन जुयाच्वंगु दु। लिसें डल्लुं नं ज्वनायंकूगु खबर दुसा ग्वःम्हेसित ज्वन धइगु पूवंगु जानकारी मथ्यंनि ।
न्हूसतकं ज्वनायंकूपिं
१. रामकाजी मानन्धर
२. रोमन शाक्य
३. जुजुकाजी महर्जन
४. रविन्द्र मानन्धर
५. सुमन सायमि
६. सुविन सायमि
७. रोशन डंगोल
८. दिलबहादुर मानन्धर
९. अमृत मानन्धर
१०. विद्या श्रेष्ठ
११. रविन्द्र सायमि
१२. राजुमान श्रेष्ठ
१३. मनरत्न शाक्य
१४. ज्यापु मुकेश
१५. बिनि शाक्य
१६. सुरेन्द्रभक्त श्रेष्ठ
यलं ज्वनायंकूपिं
१. विष्णु मगर
२. नवराज ढुङ्गाना
३. निरज महर्जन
४. भक्त खड्का
५. कमल विष्ट
६. अमृत बहादुर महत
थुगु बुखँ नं ब्वनादिसँ ‘बन्दया झ्वलय् ब्यापक प्रहरी हस्पक्षेप’
बन्दय् झ्वलय् व्यापक प्रहरी हस्तक्षेप
लहनान्यूज | पोहेंलाथ्व षष्ठी ११३७ (जनवरी ४ २०१७)
सडक विस्तारया विरुद्ध थौं उपत्यकाव्यापी संघर्ष समितिं आव्हान याःगु बन्दया झ्वलय् व्यापक रुपं प्रहरीं हस्तक्षेप याःगु दु ।
उचित क्षतिपूर्ति, मुआब्जा लिसें पुनर्वासया माग यासें सतकय् कुहां वःपिन्त प्रहरीं थायथासं ज्वंगु दु । न्हूसतकया जुद्ध शालिकं नं तःम्हेसित हे प्रहरीं हिरासतय् काःगु दु ।
कालिमाटिं बाजंगाजंलिसें शान्तिपूर्ण ढंगं प्रदर्शन यानावःपिन्त न्हूसतक थ्यंकाः ज्वंगु खः । उकिया झ्वलय् उपत्यकाव्यापी संघर्ष समितिया कजि सुमन सायमिलिसें लहना मिडियाया व्यवस्थापक सुरेन्द्रभक्त श्रेष्ठ नं हिरासतय् लाःगु दु ।
संघर्ष समितिया कजि सुमन सायमिं शान्तिपूर्ण बन्दय् राज्यपाखें याःगु दमनयात थःपिन्सं प्रतिकार यायेगु धयादिल । सडक विस्तारया झ्वलय् थःपिन्त जूगु क्षतिया उचित क्षतिपुर्तिलिसें पुनर्वासया माग यानावःपिन्त ज्वनायंकाः दमन याःगु वयकःया धापू खः ।
प्रहरीं कालिमाटिइ मनूतयत छथाय् मुने तक हे मब्यूगु प्रत्यक्षदर्शीं धाःगु दु ।
कन्हयया बन्दयात कयाः ज्वंपिन्त त्वःतल
लहनान्यूज | पोहेंलाथ्व पंचमि ११३७ (जनवरी ३ २०१७)
कन्हयया बन्दया प्रचार याःगु धकाः प्रहरीं ज्वनायंकूपिं किरण सायमि व जितेन्द्र बज्राचार्ययात प्रहरीं त्वःताहःगु दु ।
प्रहरीं असनं ज्वनायंकूम्ह जितेन्द्र बज्राचार्यं थःत बहनिसिया ७ः३०ताः ईपाखे त्वःताहःगु खँ कनादिल । वयकलं कनाद्यू कथं वयकःयात प्रहरीं न्हिनसिया ३ताः ईपाखे ज्वनाः जनसेवाय् यंकूगु खः ।
न्ह्यः ला थःत चछि हे हिरासतय् तयेगु खँ प्रहरीतयसं धयाच्वंगु बज्राचार्यं कनादिल । लिपा मानव अधिकारकःमिपिं अनुगमनय् वयेत्यंगु खँ वःगु व वयां छुं ई लिपा हे थःत त्वःताहःगु बज्राचार्यं लहनान्यूजयात कनादिल ।
व हे कथं किरण सायमियात सुथय् कन्हयया बन्दया माइकिंग यायेगु झ्वलय् कालिमाटिं ज्वंगु खः । थःत न्हिछि कालिमाटि चौकिइ हिरासतय् तयाः बहनी ७ताःपाखे त्वःतूगु सायमिं लहनान्यूजयात कनादिल ।
कन्हय् बन्दया छु छु जुइ ?
कन्हय् बन्दया झ्वलय् उपत्यकाव्यापी संघर्ष समितिइ दुथ्याःगु २६ संघर्ष समितिं थःथःगु लागां जुलुस पिकाइगु धाःगु दु ।
उपत्यकाव्यापी संघर्ष समितिया अभियन्ता जितेन्द्र बज्राचार्यं लहनान्यूजयात बियादीगु जानकारी कथं कन्हय् उपत्यकाव्यापी संघर्ष समितिया थीथी २६ संघर्ष समितिं थःथःगु लागां जुलुस पिकाइगु जूगु दु । कन्हय् सकलें थःथःगु लागाय् मुनाः शान्तिपूर्ण ढङ्गं प्रदर्शन यायेगु धयादिल ।
आःतक्क थीथी पार्टिया झण्डा ज्वनाः बन्द यानाच्वंपिं थुगु पालय् थःगु हे नितिं बन्दय् कुहांवयेत वयकलं इनाप यानादिल ।
थुगुसीया नेवाः एकता दिवस यलय्
लहनान्यूज | पोहेंलाथ्व चतुर्थी ११३७ (जनवरी २ २०१७)
थुगुसीया नेवाः एकता दिवस वइगु पोहेंलाथ्व नवमि (जनवरी ७) शन्चरबाःया दिनय् यलय् हनीगु जूगु दु ।
नेवाः स्वायत्त राज्य मंकाः संघर्ष समितिं थौं येँय् पत्रकार सम्मेलनया ग्वसाः ग्वयाः वइगु पोहेंलाथ्व नवमिकुन्हु यलय् थीथी नेवा बाजंगाजंलिसें यलय् तःजिक नेवाः एकता दिवस हनेगु जानकारी बिल । समितिं उकुन्हु यलया पूच्वं र्याली न्ह्याकाः मंगलय् विशेष सभा यायेगु धाःगु खः ।
पत्रकार सम्मेलनय् समितिं नेवाः एकता दिवसया प्रचारया झ्वलय् पुष १८ निसें २२ गतेतक्क विशेष ज्याझ्वः यायेगु नं न्ह्यथंगु दु । समितिइ आवद्ध थीथी घटकं थःथःगु संस्था व लागाय् प्रचारात्मक ज्याझ्वःत यायेगु धाःगु दु ।
उकिया हे झ्वलय् सडक विस्तार विरुद्ध वइगु पुष २० गतेया स्वनिगः बन्दयात सक्रिय समर्थन यायेगु नं समितिं न्ह्यथंगु दु । सतकय् हे कुहां वयाः बन्द सफल यायेत सक्रिय भूमिका निर्वाह यायेगु समितिं धाःगु खः ।
संघर्ष समितिया थौंकन्हयया नायः माइलाबाबु द्यःलाया नायकय् जूगु पत्रकार सम्मेलनय् राजभाइ जकःमिं नेवाः एकता दिवसया ज्याझ्वःया जानकारी बियादीगु खः । अथे हे नेवाः देय् दबूया नायः नरेश ताम्रकारं पत्रकारपिनिगु न्ह्यसःया लिसः बियादीगु खः ।
