Display Style:
Column Style
पत्रकार दबूया अभिमुखिकरण ज्याझ्वः क्वचाल
लहनान्यूज | पोहेंलाथ्व सप्तमी ११३७ (जनवरी ५ २०१७)
नेवाः पत्रकार राष्ट्रिय दबूपाखें दबूया रणनिती सम्बन्धय् अभिमुखिकरण ज्याझ्वः थौं यलय् क्वचाःगु दु ।
थौं यलय् जूगु उगु अभिमुखिकरण ज्याझ्वलय् पत्रकार दबूया आवश्यकता व उद्देश्य प्राप्तीया लागिं दबुलिं लीगु रणनीतिया विषयस पत्रकार दबूया मू छ्यान्जे सुनिल महर्जनं कनादिल । लिसें दबूया वार्षिक कार्य योजना न्वकू सुरजबीर बज्राचार्यं न्ह्यब्वयादिल ।
अभिमुखीकरण ज्याझ्वलय् पत्रकारीता ख्यलय् मिसा विषयस दबूया मेम्ह न्वकू मीरा राजभण्डारी अमात्यं थःगु ज्यापौ न्ह्यब्वयादिल ।
ज्याझ्वलय् दबूया थीथी विभाग, येँ, यल, ख्वप व काभ्रे जिल्ला कचाया पदाधिकारी, दुजःपिनिगु ब्वति दुगु खः । ज्यापौ न्ह्यब्वयेधुंकाः ज्याझ्वःया ब्वतिमिपिंलिसे केन्द्रिय पदाधिकारीपिन्सं सहलह नं याःगु खः ।
दबूयात अझ धिसिलाक्क न्ह्यःने यंकेत गुकथंया लँपु लीमाली व गुकथं न्ह्याःवनेमाली धइगु खँय् सहलह केन्द्रित जूगु खः ।
उगु हे ज्याझ्वलय् वंगु पोहेंलाथ्व षष्ठी, बुधबाःया दिनय् उपत्यकाव्यापी सडक विस्तार पिडित संघर्ष समितिं आव्हान याःगु स्वनिगः बन्दय् प्रहरीं ज्वनायंकूपिं पत्रकारपिन्त हंगु खः ।
दबूया नायः श्रीकृष्ण महर्जनं लहना वाःपौलिसें लहना मिडियाया व्यवस्थापक अले दबूया दांभरिं सुरेन्द्रभक्त श्रेष्ठ, रेडियो उपत्यकाया रेडियोकर्मी लिसें दबूया केन्द्रिय दुजः बिगेन तुलाधर व झीगु स्वनिगः न्हिपौया पत्रकार गोर्की श्रेष्ठयात खादां न्ययेकाः हनादीगु खः ।
सडक विस्तारया बिरोधय् संघीय गठबन्धन नं
लहनान्यूज | पोहेंलाथ्व षष्ठी ११३७ (जनवरी ४ २०१७)
स्वनिगःब्यापि सडक विस्तार पिडित संघर्ष समितिं न्ह्याकूगु सडक विस्तार विरुद्धया आन्दोलनय् संघीय गठबन्धनं नं समर्थन यायेगु क्वःछ्यूगु दु ।
थौं येँय् च्वंगु संघीय गठबन्धनया मुँज्यां स्थानीय समुदायं उचित मुआब्जा, क्षतिपुर्ति लिसें पुनर्वासया माग यासें न्ह्याकूगु थुगु आन्दोलनय् समर्थन यायेगु क्वःछ्यूगु खः । मुँज्याया सहलहया झ्वलय् गठबन्धनया कजि उपेन्द्र यादवं गैर न्यायिक सडक विस्तारया ज्यायात थत्थें दिकेमाःगु धयादिल ।
सरकारं संसदय् दर्ता याकूगु संविधान संशोधन प्रस्तावया विषयस सहलह यायेत च्वंगु मुँज्याय् नेपाः राष्ट्रिय पार्टिया मू छ्यान्जे विजय सैंजुं सडक विस्तारया विषय नं सहलहया नितिं प्रस्ताव यानादीगु खः ।
संविधान संशोधन प्रस्तावया विषयस धाःसा आःया अवस्थाय् प्रस्तावयात समर्थन याये मफइगु निर्णय जूगु सीदुगु दु । सर्वोच्च अदालतया फैसलां संशोधन प्रस्तावया विरोध यानाच्वंपिन्त मछिंगु अवस्था वःगु खःसां अपूर्ण कथंया प्रस्तावयात यथास्थितीइ समर्थन याये मफइगु क्वःज्यूगु खः ।
बन्दय् बुखँ मुंकःवंपिं खुम्ह पत्रकारतकं गिरफ्तार
लहनान्यूज | पोहेंलाथ्व षष्ठी ११३७ (जनवरी ४ २०१७)
थौ बन्दया झ्वलय् प्रहरीं थायथासय् धरपकड याःगुलिइ बुखँ मुंकःवंपिं न्याम्ह पत्रकारत तकं लाःगु दु ।
ज्वनायंकूपिं पत्रकारमध्ये लहना मिडियाया व्यवस्थापक लिसें नेवाः पत्रकार राष्ट्रिय दबूया दांभरिं सुरेन्द्रभक्त श्रेष्ठयात सुथय् ९ताः ईपाखे न्हूसतकं ज्वनाः यंकूगु खः । शान्तिपूर्ण जुलुसया फोटो कयाच्वंम्ह पत्रकार श्रेष्ठयात प्रहरीं जबर्जस्ती हे ज्वनायंकूगु खः ।
लिसें किपुलिं पत्रकार नजरराम महर्जनयात नं ज्वनायंकूगु खः । वयकःयात सुथय् ९ः४५ताः इलय् ज्वनायंकाः महेन्द्र पुलिस क्लबय् यंकूगु खःसा स्थानीय मनूतयगु दबाब लिपा वयकःयात त्वःतूगु खः ।
अथे हे पत्रकारलिसें पत्रकार दबूया केन्द्रिय न्वकू उदेन न्हूसायमि, रेडियो पत्रकारलिसें पत्रकार दबूया केन्द्रिय दुजः बिगेन तुलाधर व पत्रकार गोर्की श्रेष्ठ, झीगु स्वनिगः न्हिपौया भागवत श्रेष्ठयात न्हिनय् २ः३०ताः ईपाखे कालिमाटिं ज्वंगु खः ।
ज्वंपिं सकसितं न्हिनय् ५ताः ईलिपा त्वःता हयेधुंकूगु दु ।
उकिया झ्वलय् नेवाः पत्रकार राष्ट्रिय दबूपाखें छगू प्रेस विज्ञप्ति जारी यासें पत्रकारतयत ज्वंगु खँय् विरोध प्वंकूगु दु । दबुलिं विज्ञप्ति मार्फत राज्यया प्रतिनिधिया रुपय् दुगु प्रहरी प्रशासन थुगु पलाः कुंखिनेबहःगु धाःगु खः ।
*खुम्ह पत्रकारतयत ज्वनायंकूगु जुइमाःथाय् अन्यथा जुयाच्वंगुलिं भिंकागु जुल । (सं.)
बन्दय् ज्वनायंकूपिन्त कयाः थीथी खलःपुचःया च्यूताः
लहनान्यूज | पोहेंलाथ्व षष्ठी ११३७ (जनवरी ४ २०१७)
बन्दया झ्वलय् ज्वनायंकूपिन्त थीथी खलःपुचःलिसें नेवाः न्ह्यलुवाःपिन्सं च्यूताः क्यंगु दु ।
बन्दया झ्वलय् थीथी थासं ज्वनायंकूपिन्त थीथी खलःपुचःया प्रतिनिधिलिसें अधिकारकःमिपिन्सं महेन्द्र पुलिस क्लबय् वनाः नापलाःगु खः । क्लबय् वनाः ज्वनायंकूपिन्त नापलायेगु झ्वलय् नेपाः राष्ट्रिय पार्टि का.वा. नायः सुवर्णकेशरी चित्रकार व मू छ्यान्जे विजय सैंजुं नं नापलानादीगु खः ।
उकिया नापं नेवाः पत्रकार राष्ट्रिय दबूया प्रतिनिधिपिं नं पुलिस क्लब थ्यंगु खः । ज्वनायंकूपिं पत्रकार व सर्वसाधारणयात नापलायेत पत्रकार दबूया केन्द्रिय नायः श्रीकृष्ण महर्जन, केन्द्रिय न्वकू नृपेन्द्रलाल श्रेष्ठ, मू छ्यान्जे सुनिल महर्जन, येँ जिल्ला नायः नातीकाजि महर्जन, न्वकू बिराजकाजी राजोपाध्याय, न्वकू रेखा शाक्य, दांभरिं सानु महर्जन व पत्रकार शरणहरि ज्यापु पुलिस क्लब थ्यंगु खः ।
उकिया नापं संघीय समाजवादि फोरम नेपालया ल्यू नायः राजेन्द्र श्रेष्ठ, केन्द्रिय दुजः पवित्र बज्राचार्य व नेवाः देय् दबूया नायः नरेश ताम्रकारं नं क्लबय् वनाः प्रहरीं ज्वनायंकूपिन्त नापलानादीगु खः । लिसें आदिवासी जनजाति वकिलतयगु संस्था लाहुर्निपया मू छ्यान्जे शंकर लिम्बु व संस्थाया पुचः नं पुलिस क्लब थ्यंगु खः ।
बन्द शान्तिपूर्ण ढंगं क्वचाल
लहनान्यूज | पोहेंलाथ्व षष्ठी ११३७ (जनवरी ४ २०१७)
उपत्यकाव्यापी सडक विस्तार पिडित संघर्ष समितिं आव्हान याःगु थौंया बन्द शान्तिपूर्ण ढंगं क्वचाल ।
संघर्ष समितिं थौं सनिलया ५ताः ईतक्क बन्द यायेगु धाःकथं आः ५ताः ई लिपा बन्द क्वचाःगु घोषणा याःगु खः । सनिलय् बसन्तपुलिइ छगू सभा यासें संघर्ष समितिपाखें रामशरण डंगोलं बन्दय् साथ ब्यूपिन्त सुभाय् देछासें बन्द क्वचाःगु घोषणा यानादिल ।
बन्द क्वचाःगु घोषणा जूगुलिसें हे बन्दया झ्वलय् ज्वनायंकूपिन्त नं प्रहरीं त्वःताहःगु दु । थीथी थासं ज्वनायंकाः महेन्द्र पुलिस क्लबय् तयातःपिं ३१म्हेसित बन्द क्वचाःगुलिसें हे त्वःताहःगु खः ।
रिहा जूगुलिसें संघर्ष समितिया कजि सुमन सायमिं आः थुगु आन्दोलनयात अझ सशक्त ढंगं न्ह्यःने यंकेगु धयादिल । समितिया मुँज्या च्वनाः न्हूगु ज्याझ्वः क्वःछिनाः सार्वजनिक यायेगु वयकलं धयादिल ।
