Display Style:
Column Style
चिकंया भाः थकाःगुलिइ मोर्चाया आपत्ती
लहनान्यूज | थिंलागा त्रयोदशि ११३७ (डिसेम्बर २६ २०१६)
नेपाल आयल निगमं पेट्रोल, डिजल, मत्चिकं लिसेंया चिकनय् ४तका थकाःगु प्रति नेवाः राष्ट्रिय मुक्ति मोर्चा, नेपालं थःगु गम्भीर ध्यानाकर्षण जूगु न्ह्यथंगु दु ।
मोर्चां प्रेस विज्ञप्ति जारी यासें भारतय् चिकंया भाः थहांवनाः नेपालय् चिकंया चोरी निकासी जूगु हुनिं क्यनाः थन चिकंया भाः थकायेगु धइगु लज्जास्पद खँ खःगु धाःगु दु ।
मोर्चाया नायः पवनमान श्रेष्ठया ल्हाःचिं दुगु विज्ञप्तिइ भारतय् थहांवंगु चिकंया भाःया भार नेपाःमिं फयेमाःगु अवस्थाय् थन सरकारया औचित्यय् न्ह्यसः थंगु दु ।
थहांवंगु चिकंया भाः तत्काल लित कायेत मोर्चां सरकारयात माग याःगु दु । लिसें थकाःगु भाः लित मकाःसा थःपिं सरकार विरुद्ध संघर्षय् कुहांवयेगु चेतावनि नं मोर्चां विज्ञप्ति मार्फत ब्यूगु दु ।
कवि बुद्ध सायमि मन्त
लहनान्यूज | थिंलागा द्वादशी ११३७ (डिसेम्बर २५ २०१६)
नेपालभाषा साहित्यया पुलांम्ह कवि लिसें पुलांम्ह सभासद् बुद्ध सायमि मन्त ।
लीभर व मधुमेहया समस्या जुयाः जाउलाख्यःया अल्का अस्पतालय् वासः याकाच्वनादीम्ह सायमि थौं सनिलया ५ताः इलय् मदुगु खः । वंगु सोमबाःनिसें अस्पतालय् भर्ना जूम्ह वयकःया उसाँय् अवस्था आपाः हे स्यनावँसेंलि म्हिगः वयकःयात आइसीयूलय् तःगु खः ।
वंगु सोमबाः थःगु हे छेँय् बेहोस जुइवं वयकःयात अस्पताल यंकूगु खःसा उगु इलंनिसें अन वासः यानाच्वंगु खः ।
कवि सायमिया काय् कन्हय् जक अमेरीकां वयेत्यंगु जूगुलिं वयां लिपा जक मदुम्ह सायमिया अन्त्येष्टि याइगु धाःगु दु ।
मदुम्ह सायमिया यक्व हे नेपालभाषाया चिनाखँलिसें चिनाखँ सफूत पिदंगु दु । लिसें वयकः न्हापांगु संविधानसभाय् नेपाः राष्ट्रिय पार्टिया समानुपातिकपाखेया सभासद तकं खः ।
मदुम्ह सायमिया कविताय् आपाः यानाः विदोहया भावनां जायाच्वनीगु जूगुलिं वयकःयात विद्रोहि कवि तकं धायेगु याः ।
नेवाः देय् गुथिइ विजयरत्नया नेतृत्व
लहनान्यूज | थिंलागा एकादशि ११३७ (डिसेम्बर २४ २०१६)
नेवाः देय् गुथि नेपालमण्डलया न्याक्वःगु तःमुँज्यां विजयरत्न बज्राचार्ययात सर्वसम्मतं गुथिया न्हूम्ह नायः ल्यःगु दु ।
थौं येँय् क्वचाःगु गुथिया तःमुँज्यां ल्यःगु ४९ दुजःया गुथिया न्हूगु ज्यासना पुचलय् न्वकुलिइ कृष्णभक्त मानन्धर, सरस्वती श्रेष्ठ व विश्वनाथ ताम्राकारयात ल्यल । व हे कथं मूछ्याञ्जेय् धाःसा डा. गोपाल धौबञ्जायात ल्यःगु दु ।
व हे कथं छ्याञ्जेय् धर्म श्रेष्ठ, दांभरिं विजय रञ्जित व ल्यू दांभरिं रमिता मालाकारयात ल्यःगु दु ।
व स्वयां न्ह्यः तःमुँज्याया उलेज्या संस्कृतिविद् शताब्दि पुरुष डा. सत्यमोहन जोशीं यानादिल ।
उगु हे ज्याझ्वलय् नेवाः आन्दोलनय् थःथःथु ख्यलं मदिक्क बिया वयाच्वंगु योगदानयात च्वछासें गुथिया मू संस्थापक राजेन्द्र श्रेष्ठ, संस्थापक नायः बुद्ध सायमि व संस्थापक न्वकू लिसें पुलाँम्ह नायः नरेन्द्रभक्त हाडायात कदर पौ लःल्हानाः हंगु खः ।
जनजाति महासंघय् जगत बराम
लहनान्यूज | थिंलागा अष्टमि ११३ (डिसेम्बर २१ २०१६)
नेपाल आदिवासी जनजाति महासंघया चितवनया नारायणगढय् क्वचाःगु ९क्वःगु महाधिवेशनं महासंघया न्हूम्ह नायकय् जगत बरामयात ल्यःगु दु ।
महासंघया न्हूम्ह नायः बराम मुक्कं ३१ मत हयाः नायकय् त्याःगु खः । नायःया प्रत्यासी सूर्य भुजेलं धाःसा २३ मत हःगु खः ।
नेपाली कांग्रेस सतीम्ह धाइम्ह बरामयात नेकपा माओवादी केन्द्र, संघीय समाजवादी फोरम लिसेंया दल सतीगु जनजातिया समर्थन दुगु खः । भुजेल धाःसा एमाले सतीम्ह नाली ।
अथे हे महाधिवेशनं न्वकुलिइ खुल्लापाखे किरण सुनुवार, गणेशलाल थकाली, गोविन्द छन्त्याल, नविन रोका मगर, लोकबहादुर दुरा, श्यामप्रसाद मण्डल, सोनाम लामा वालुङ व मिसा न्वकुलिइ कृष्णकुमारी शेरचन त्याःगु दु ।
अथे हे महासंघया मू छ्यान्जेय् नित्यानन्द ताजपुरिया त्याःगु दु ।
होमस्टे सम्बन्धि सम्मेलन यलय् न्ह्यात
लहनान्यूज | थिंलागा सप्तमि ११३७ (डिसेम्बर २० २०१६)
यल उद्योग वाणिज्य संघं राष्ट्रिय उत्पादक अले आर्थिक विकास केन्द्रलिसेया मंकाः ग्वसालय् याःगु ग्रामिण पर्यटन व होमस्टे सम्बन्धी राष्ट्रिय सम्मेलनय् ग्रामिण लागाय् पर्यटन उद्योगया विकासया लागिं राज्यं होमस्टेयात प्रवद्र्धन यायेमाःगु विषयस वक्तातयसं बः ब्यूगु दु ।
उद्योगमन्त्री नविन्द्रराज जोशीं ग्रामिण पर्यटन व अर्थतन्त्र विकासया लागिं होमस्टेया भूमिका महत्वपूर्ण जुइगु धासें व्यवसायीतयगु माग कथं थुकियात प्रवद्र्धन यायेत राज्य तयार दुगु धयादिल । होमस्टेयात व्यवस्थित दयेकेत निजी ख्यःया सकारात्मक भूमिका माःगुलिइ नं मन्त्री जोशीं बः बियादिल ।
लिसें संस्कृति पर्यटन तथा नागरिक उडड्यन मन्त्रालयया सचिव शंकर कोइरालां होमस्टेया विकास यायेत अले थुकियात तब्याका यंकेत पूर्वाधारया विकासया लागिं राज्य जानाच्वनागु धयादिल । म्ह्वः लगानीइ थःके दुगु स्वरुपयात हे मीगु ज्या हे होमस्टे जूगुलिं थुकियात राज्यं प्रवद्र्धन यानाः ग्रामिण अर्थतन्त्रया विकास यायेफइगु बिचाः यल उद्योग वाणिज्य संघया नायः सविन श्रेष्ठं तयादिल ।
राष्ट्रिय उत्पादक अले आर्थिक विकास केन्द्रया प्रबन्ध निर्देशक अञ्जना ताम्राकारं थीथी जातजाति, भाषाभाषीया संस्कृति, प्राकृतिक स्रोतसाधनं हे होमस्टेया विकास यायेफइगु जूगुलिं पूर्वाधार, लगानीइ सहुलियत बीमाःगु धयादीगु खः । यल उद्योग वाणिज्य संघया मू छ्यान्जे भरतलाल जोशीं होमस्टे छगू पुचलं मेगु पुचःया संस्कृति थुइकाकायेगुृ माध्यम खःगु धयादीगु खः ।
८५म्हेसिनं ब्वति कयाच्वंगु सम्मेलन कन्हयतक्क न्ह्याइ । सम्मेलनय् थीथी देशय् न्ह्यानाच्वंगु होमस्टे, अनया अवस्था, नेपालय् थुकिया हाथ्या व व्हःताःयाबारे राष्ट्रिय अन्तराष्ट्रिय ख्यःया विज्ञतयगुपाखें ६ ज्यापौ न्ह्यब्वइगु जानकारी संघया वरिष्ठ न्वकू रविन्द्रराज ताम्रकारं बियादीगु दु ।
