Display Style:
Column Style
हेमायात तीर्थहेरा सिरपाः
लहनान्यूज | पोहेंलाथ्व पारु ११३७ (डिसेम्बर ३० २०१६)
मंकाः धुकू बचत तथा ऋण सहकारी संस्था लिमिटेडं थुगुसीया तीर्थ हेरा सिरपाः नेपलीज फेसन होमया हेमा मानन्धरयात लःल्हाःगु दु ।
धुकूया च्याक्वःगु दँ मुँज्याया झ्वलय् येँय् ग्वसाः ग्वःगु छगू ज्याझ्वलय् ज्याझ्वःया मू पाहां अरनिको समाजया नायः डा.सर्वोत्तम श्रेष्ठं मानन्धरयात सिरपाः लःल्हानादिल । मिस नेवाः ज्याझ्वःया ग्वसाः ग्वया वयाच्वंगु संस्था नेपलीज फेसन होमया मानन्धरयात हनापौ लिसें सिरपाःया राशि २०द्वः तका नं लःल्हाःगु खः ।
व स्वयां न्ह्यः ज्याझ्वःया न्हापांगु ब्वय् धुकूया नायः बालकृष्ण प्रजापतिं आर्थिक दँ ११३५÷३६ या वार्षिक प्रतिवेदन व त्यासा समितिया कजि राजा शाक्यं आर्थिक दँ ११३५÷३६ या त्यासा प्रतिवेदन न्ह्यब्वयादिल ।
लेखा समितिया कजि रमेशमान पिया लेखाया प्रतिवेदन व प्रमुख कार्यकारी अधिकृत अमेश बज्राचार्यं आर्थिक दँ ११३६÷३७या बजेट न्ह्यब्वयादिल । सभां सकतां प्रतिवेदनयात पारित याःगु खः ।
सभां धुकूया लागायात तब्याकाः बहुउद्देश्यीय यायेगु नं क्वःछ्यूगु खः । उकिया नापं आज्जु ज्वःलाःगु सहकारी संस्थालिसे सम्भव दुसा मर्ज यायेगु तकं म्हिगःया सभां क्वःछ्यूगु खः ।
धुकूया नायः प्रजापतिया नायकय् न्ह्याःगु सभाय् लसकुस संचालक समितिया दुजः रमेशकाजी स्थापितं यानादीगु खःसा सुभाय् त्यासा समितिया दुजः चिनीकाजी महर्जनं बियादिल ।
सडक विस्तार विरुद्ध आन्दोलन घोषणा
लहनान्यूज | थिंलागा आमै ११३७ (डिसेम्बर २९ २०१६)
सडक तब्या यायेगु नामय् गैर न्यायिक ढङ्गं थःपिनिगु छेँ थुनेगु ज्या जूगु धासें सडक विस्तारपाखें पिडितपिं आन्दोलनय् कुहांवइगु जूगु दु ।
स्वनिगःया थीथी थासय् सडक विस्तारपाखें पिडितपिनिगु उपत्यकाव्यापी पिडित संघर्ष समितिं थौं येँय् छगू पत्रकार सम्मेलन यासें थःगु आन्दोलनया ज्याझ्वः सार्वजनिक याःगु खः । समितिं थौं पत्रकार सम्मेलनय् सरकारं बुल्डोजर हयाः छेँ थुनेगु ज्या मदिकूसा स्वनिगः बन्द तकं यायेगु धाःगु दु ।
समितिं पुष १४ गतेनिसें १९ गतेतक्क प्रचार अभियान यायेगु व पुष २० गते स्वनिगः बन्द यायेगु जानकारी पत्रकार सम्मेलनय् ब्यूगु खः । समितिं थुगु आन्दोलनय् आदिवासी जनजाति महासंघलिसे सहकार्य यायेगु तकं धाःगु दु ।
पत्रकार सम्मेलनय् समितिया कजि सुमन सायमिं थःपिन्सं कानून कथं हे थःपिनिगु छेँ दयेकागु धयादिल । पुस्तौं न्ह्यःनिसें भोगचलन याना वयाच्वनागु थःपिनिगु छेँ सरकारया मनंतुनेवं तुं थुनेमदइगु चेतावनि वयकलं बियादिल ।
पत्रकार सम्मेलनय् सडक विस्तारया ज्यां पिडितपिं विमल श्रेष्ठ, सरोजकुमार श्रेष्ठ व थक्वाःया शान्तप्रकाश श्रेष्ठं राजनैतीक पार्टिं थःपिन्त सहानभूति जक बियाः थःपिनिगु पक्षय् छुं हे ज्या मयाःगु धयादिल । वयकःपिन्सं आः स्वनिगःया आदिवासीत सुम्क च्वनेमज्यूगु खँय् बः बियादिल ।
थौंकन्हय् सडक तब्या यायेगु नामय् थीथी थासय् बुल्डोजर न्ह्याकाः छेँ थुनेगु ज्या जुयाच्वंगु दु ।
थुकिया झ्वलय् कलंकी–थानकोट–नागढुङ्गा, त्रिपुरेश्वर–कालिमाटि–कलंकी, सामाखुसि–धापासि–तोखा, गल्कोपाखा–चक्रपथ, जोरपाटि–थलि, थलि–सक्व, जोरपाटि–सुन्दरीजल, थैब, हरिसिद्धि, बादेगां, तौख्यः, चोबहाः–फंपि–किपू, ख्वप, बुंग, सुनाकुथि, ग्वंगःबुँ, ल्हुति, सितापाइला–रामकोट, सुर्यविनायक, चापागाउँ, थेचो, तोखाय् यानाः २४ स्थानीय संघर्ष समिति दयेकूगु दु ।
त्रि.वि.या ४२क्वःगु दिक्षान्त समारोह क्वचाल
लहनान्यूज | थिंलागा आमै ११३७ (डिसेम्बर २९ २०१६)
त्रिभुवन विश्वविद्यालयया ४२क्वःगु दिक्षान्त समारोह थौं यल पूच्वया इन्जिनियरिङ क्याम्पसय् क्वचाःगु दु ।
थुगुसीया दिक्षान्त समारोहपाखें मुक्कं ९,७३४म्ह विद्यार्थी दिक्षित जूगु खः । लसकुस न्वचु ब्युसें त्रि.वि.या उपकुलपति प्रा.डा. तीर्थराज खनियां २०७२ ज्येष्ठ १८ गतेनिसें २०७३ असार १ गते तक्कया इलय् त्रि.वि.या थीथी अध्ययन संस्थान अले संकाय अन्तर्गतया ६० आंगिक व १०८४ सम्बन्धन प्राप्त क्याम्पसपाखें ८३, ४२५म्हेसिनं स्नातक, स्नातकोत्तर, एम. फिल. व विद्यावारिधि तगिं पूवंकूगुलिइ ९७३४म्ह समारोहस ब्वति काःगु जानकारी बियादिल ।
समारोहस थःथःगु तगिमय् दक्कले अप्वः ल्याः हःपिं विद्यार्थीपिन्त दिक्षान्त पदक व सिरपाः नं लःल्हाःगु खः । सिरपाः त्याकूपिं विद्यार्थीपिन्त त्रिविया कुलपति लिसें प्रधानमन्त्री पुष्पकमल दाहालं दसिपौ लिसें सिरपाः व पदक लःल्हानादिल ।
समारोहया मू पाहां कथं सताब्दि पुरुष वरिष्ठ संस्कृतिविद् डा. सत्यमोहन जोशीया उपस्थिती दुगु खः ।
थुगु हे समारोहपाखें नेपालभाषा विषयस स्नातकोत्तर याःपिं १७म्ह विद्यार्थीपिं नं दिक्षित जूगु खः ।
मदुम्ह विद्रोहि कविया अन्त्येष्टि क्वचाल
लहनान्यूज | थिंलागा त्रयोदशि ११३७ (डिसेम्बर २७ २०१६)
नेपालभाषा साहित्यय् विद्रोहि कवि धकाः म्हस्यूम्ह कवि लिसें पुलांम्ह सुभासद् बुद्ध सायमिया अन्त्येष्टि थौं येँया पशुपति आर्यघाटय् क्वचाल ।
मदुम्ह सायमियात वयकःया कायं मि तयादीगु खः । आइतबाः मदुम्ह सायमिया काय अमेरीकां म्हिगः नेपाः थ्यनेधुंकाः थौं अन्त्येष्टि याःगु खः ।
व स्वयां न्ह्यः मदुम्ह सायमियात थीथी राजनैतीक दलया नेता, नेपालभाषा ख्यःया साहित्यकार, न्ह्यलुवाःलिसें नं श्रद्धान्जलि देछाःगु खः । मदुम्ह सायमियात लिपांगु श्रद्धान्जलि देछायेत नेकपा एमालेया वरिष्ठ नेता लिसें पूर्व प्रधानमन्त्री माधवकुमार नेपाल, पूर्व उपप्रधानमन्त्री चित्रबहादुर केसी, पूर्वमन्त्री विश्वेन्द्र पासवान, संघीय समाजवादी फोरम नेपालया नायः उपेन्द्र यादव, ल्यू नायः राजेन्द्र श्रेष्ठलिसेंया नेतापिं पशुपति आर्यघाटय् थ्यंगु खः ।
लिसें नेवाः न्ह्यलुवा पद्मरत्न तुलाधर, नरेशबीर शाक्य, डा.महेशमान श्रेष्ठ, न्हूदँ राष्ट्रिय समारोह समितिया नायः लिसें सांसद भीमसेनदास प्रधान, उद्योगमन्त्री नवीन्द्रराज जोशी, तीर्थराम डंगोल, नेपाः राष्ट्रिय पार्टिपाखेंया सांसद् लक्ष्मण राजवंशी, नेरापाया मू छ्यान्जे डा.विजय सैंजुलिसें नं मदुम्ह सायमियात लिपांगु श्रद्धान्जलि देछाःगु खः ।
मदुम्हेसिया अन्त्येष्टि यायेत पशुपति आर्यघाटय् यंके न्ह्यः वयकःया सीम्ह येँया न्हूसतकय् भूगोल पार्कय् तःगु खः । लिपांगु श्रद्धान्जलि देछायेत सायमिया सीम्ह सुथय् १०ताः इलंनिसें १२ताः ईतक्क भूगोल पार्कय् तयेधुंकाः पशुपति आर्यघाटय् सिथं यंकूगु खः ।
येँया न्हू सतक वंगः, जनबहाः, असं, कःमिलाक्षी जमः जुयाः पशुपति आर्यघाटय् सायमिया सीम्ह सिथं यंकूगु खः ।
७२दँ दुम्ह सायमि वंगु आइतबाः यलया अल्का अस्पतालय् वासः याकेगु झ्वलय् मदुगु खः । मदुम्ह सायमिया नेपालभाषा साहित्य ख्यलय् सलंसः चिनाखँ लिर्से ‘जि व जिगु वर्तमान’ ‘जिन्दगी : बँय् वाःगु हि, चेतनाया मि’ लिसेंया सफू पिहां वःगु दु ।
संसदय् समावेशी विधेयकया माग यासें सायमिं लछितक यानादीगु विरोध प्रदर्शन नेवाः आन्दोलनया ख्यलय् ल्वःमंके मफइगु विषय खः । सायमिया जहान लिसें छम्ह म्ह्याय् व छम्ह काय् दी ।
मदुम्ह कवि सायमिया अन्त्येष्टि कन्हय्
लहनान्यूज | थिंलागा त्रयोदशि ११३७ (डिसेम्बर २६ २०१६)
विद्रोहि कवि लिसें पुलांम्ह सभासद् बुद्ध सायमिया अन्त्येष्टि कन्हय् याइगु जूगु दु ।
मदुम्ह सायमिया अन्त्येष्टि कन्हय् पशुपतिया आर्यघाटय् जुइगु न्ह्यथंगु दु ।
व स्वयां न्ह्यः लिपांगु श्रद्धान्जलिया नितिं कवि सायमिया सीम्ह येँया न्हूसतकय् भूगोल पार्कय् तइगु जूगु दु । वयकःया सीम्हय् लिपांगु श्रद्धान्जलि देछायेत सुथसिया १०ताः इलंनिसें १२ताः ईतक्क भूगोलपार्कय् तइगु न्ह्यथंगु दु ।
वयां लिपा वयकःया सीम्हयात न्हूसतकं वंगः, असं, जुयाः भोताहितिइ तक्क सिथं यंकीसा अनं तप्यंक हे पशुपतिया आर्यघाटय् यंकीगु धाःगु दु ।
