मध्यपुरथिमि नगरपालिका बोडेय् दँय्दसं विसंया न्हू दँया लसताय् वैशाख २ गते न्यायेकीगु लोकंह्वाःगु ‘मे प्वाः खनीगु जात्रा’य् थुगुसी प्यक्वःगुकुसी बोडेया २९ दँ दुम्ह सुजन बाग श्रेष्ठं मे प्वाः खनाः जात्रायात निरन्तरता बियादीत्यंगु दु।

गुक्वःतक मे प्वाः खंकाः जात्रायात न्ह्याकादीम्ह बोडेया ५१ दँ दुम्ह बुद्धकृष्ण बाग श्रेष्ठया दकसिबे चीधिम्ह काय्  सुजनं स्वदँ न्ह्यःनिसें मे प्वाः खंकाः पुस्तान्तरण यानादीगु व थुगुसी नं थःम्हेस्यां हे मे प्वाः खंकाः जात्रा न्यायेकेगु वय्कलं धयादिल।कृष्णचन्द्र बाग श्रेष्ठं १२ क्वः मे प्वाः खंकादी धुंकाः वय्कःया किजा बुद्धकृष्ण बाग श्रेष्ठं गुक्वःतक मे प्वाः खंकाः जात्रायात निरन्तरता बियादीगुलिइ लिपांगु ई स्वदँ न्ह्यःनिसें बुद्धकृष्णया दकसिबे चीधिम्ह काय्नं मे प्वाः खंकाः जात्रा न्ह्याकाः वयाच्वनादीगु खः।

जात्राया कःमि नायः नापं जुयाच्वनादीम्ह कृष्णचन्द्र बाग श्रेष्ठं प्यसः दँ न्ह्यःनिसें थ्व जात्रा न्ह्यानाः वयाच्वंगु व आः तक छुं नं परिस्थितिइ थ्व जात्रा मदिसें न्ह्यानाच्वंगु धयादिल। जात्राया निंतिं प्यंगः दां छाये धुंकाः मे प्वाः खनीम्हेस्यां अशुद्ध मनुतय्त थी मज्यूगु, मिसापिंत थी मज्यूगु, चिपं थ्यूपिं, दुखं कःपिंत थी मज्यूगु, चिप नये मज्यूगु, चि नये मज्यूगु, बोडे देय् त्वताः पिहां वने मज्यूगु सुजनया अबुजु बुद्धकृष्णं धयादिल।

थ्वसिबें न्ह्यः गुक्वःतक मे प्वाः खंकाः जात्रा न्ह्याकादीम्ह वय्कलं मे प्वाः खंकीम्हेस्यां स्वन्हु तक अपसं च्वनेमाःगु धयादिल। मचाबलेनिसें हे थः अबुजुं मे प्वाः खंकाः जात्रा न्ह्याकाच्वंगु खंकूगु, द्वलंद्वलं जयजय याःगु खनाः खःम्हेसित नापं गबले मे प्वाः खंके धयाथें जूगु धासें सुजनं न्हापांगुकुसी मे प्वाः खंका बलेया ई लुमंकाः अबले स्याः मस्याः तकं वाःचा मजूगु धयादिल।

न्हापा न्हापा मे प्वाः खंकीपिं मनूत मदइगु यानाच्वंगुलिं थुगुसी प्यम्ह ल्याय्म्ह तय्सं मे प्वां खंकेगु इच्छा तःगु धयादिसें वय्कलं थःम्हेस्यां फुबले तक मे प्वाः खंकाः जात्रा न्ह्याकेगु धयादिल। सुजनं धयादिल, “अबुजुं मे प्वाः खंकीबले जि नं नापं च्वनेगु, वय्कलं जात्रा, कला, तजिलजियात म्वाकातःगु खनाः जित नापं इच्छा दयावइगु व आँट वइगु, सकसियागु जयजयकार याःगु खनिबले तसकं इच्छा दयावइगु, थुगुसी नं रहर यानाः थ्व जात्रायात न्ह्याकातयेत मे प्वाः खंकाः महादीप क्वबिनाः बोडे देय् चाःहिले।”बुद्धकृष्णं धयादिल, “जिं मे प्वाः खंकेबले मचाबलेनिसें हे काय् नं नापं दइगु, थ्व जात्रा म्वाकातयेमा, थ्व जात्रा मदुसा बोडेया म्हसिका हुयावनी धाःगु जित जक मखु जि काय् नं नापं वाः चायेकल, अथे जुयाः थुगुसी नं मे प्वाः खंकाः जात्रायात न्ह्याके त्यंगु दु, बोडेया तजिलजि म्वाकातयेत आँ दँय् दसं बोडेया ल्याय्म्हपिं तयार जुइमाः।”

जात्रा न्ह्यः चैत २८ गते में प्वाः खंकीम्हेस्यां नायः पमाःया छेँय् वनाः नायः पमाः, कःमि नायःलिसेंयात प्यंगः दां छानाः सगं कयाः मे प्वाः खंकेगु पक्का यायेगु नापनापं वहे दिं जात्राया व्रत न्ह्याकेगु परम्परा दयावया च्वंगु वय्कलं धयादिल।जात्राया दिं अपसं च्वनीम्हेस्यां मे प्वाः खंके न्ह्यः शक्ति दयेमाः धकाः मनंतुनाः बोडे लागाया थीथी द्यःपिनिगु पुजा यायेगु व प्राचीन पाँचो गणेद्यःया देगः लागाय् द्वलंद्वः भक्तजनया न्ह्यने मे प्वाः खंकेगु चलन दु।

मे प्वाः खंकेधुंकाः उम्ह मनुखं बापा तिमिला थें च्वंगु महादीप क्वबिनाः बोडे देय् चाःहिलेगु व बोडेया हे महालक्ष्मी देगः चाः हिलाः मेखय् छुनातःगु उगु गसू मे नं लिकानाः महालक्ष्मी द्यःया देगलय् छानाः घालय् देगःया चाः पायेगु चलन दु। आः तक बोडेया झिंस्वम्हेस्यां मदिक्कं सच्छि व गुदँ न्ह्यः निसें मे प्वाः खंकाः वयाच्वंगु दु।

तान्त्रिक विधि कथं ख्वपय् गुन्हु च्याचाः तक झःझः धायेक न्यायेकीगु ऐतिहासिक बिस्काः जात्राय् अप्पां कयेकीगु व जात्रा ब्वथलेत स्वइपिंत कडा कारबाही याइगु जूगु दु।

जिल्ला प्रशासन ज्याकुथि ख्वपय् म्हिगः प्रमुख जिल्ला अधिकारी उमेशकुमार ढकालया नेतृत्वय् जात्रा सञ्चालन व सुरक्षासम्बन्धी सुरक्षा निकाय लिसें सरोकारवाला निकायलिसे बैठकं  निर्णय याःगु खः। बैठकं जात्राय् हुलदङ्गा यायेगु, अप्पां कयेकेगु, ल्वापु याइपिंत जात्रा जःछि कुनाः मुद्दा न्ह्याकेगु व गबलें विदेश वने मखनीगु यानाः प्रहरी रिपोर्टय् हाकू धलखय् तयेगु निर्णय जूगु प्रमुख जिल्ला अधिकारी ढकालं जानकारी बियादिल।

जात्राय् शान्ति सुरक्षा न्यंका तयेत व जात्रा ब्वथलेत स्वइपिंत अःपुकं म्हसिकेगु तातुना जात्रा जुइगु थासय् जःखःया लागाय् ३६ गः सिसी क्यामेरा व स्वंगू ड्रोन क्यामेरापाखें जात्राया निगरानी यायेगु जिल्ला प्रहरी परिसर ख्वपया प्रमुख लिसें प्रहरी उपरीक्षक सूर्यबहादुर खड्कां धयादिल। सिसी क्यामरा प्रहरी कन्ट्रोल रुमपाखें नी प्यघौ हे निगरानी यायेगु जानकारी बियादिसें वय्कलं मखूगु गतिविधि याइपिंत उघ्रिमय् ज्वनेगु धयादिल।

जात्रा जःछि ख्वपय् अय्ला थ्वं न्यायेमिइ लिसें ल्ह्येगु ज्या दिकेगु निर्णय नापं जूगु दु। अय्ला थ्वं न्यायेमिइ लिसें ल्ह्येगु, चकंगु थासय् च्वनाः अय्ला थ्वं त्वनाः जुइपिंत कारबाही यायेगु प्रहरी उपरीक्षक खड्कां धयादिल। जात्रा जःछि शान्ति सुरक्षाया निंतिं नेपाल प्रहरी, सशस्त्र प्रहरी, सादा पोसाकया प्रहरी परिचाल यायेगु, ख्वपया अस्पतालयात आपतकालीन उपचारया निंतिं तयारी अवस्थाय् तयेगु, जिल्लाया एम्बुलेन्सयात जात्रा जुइगु थासय् जःखः तयारी अवस्थाय् तयेगु, दमकल तयारी अवस्थाय् तयेत निर्देशन ब्यूगु दु। थुगुसीया बिस्काः जात्रा थ्वहे चैत २७ गते निसें वैशाख ५ गतेतक न्ह्याइगु जूगु दु।

बागमती प्रदेश मन्त्रिपरिषदया म्हिगः सनिलय् च्वंगु बैठकं बागमती प्रदेशसभाया हिउँदे अधिवेशन बैठक थ्वहे चैत २४ गते सनिलया ४ः०० ताः इलय् च्वनेगु यानाः आह्वान यायेत बागमती प्रदेश प्रमुख दीपकप्रसाद देवकोटाया न्ह्यने सिफारिस यायेगु निर्णय याःगु दु।

वहे बैठकं ११ क्वःगु तगिंया इन्जिनियर राजु श्रेष्ठयात बागमती प्रदेश भौतिक पूर्वाधार लिसें योजना मन्त्रालयय् पदस्थापन यायेगु निर्णय याःगु प्रदेश सरकारया प्रवक्ता लिसें बागमती प्रदेशया आर्थिक लिसें योजनामन्त्री प्रभात तामाङं धयादिल।अथे हे, बैठकं कृषि विशेषज्ञ गौरीमानसिंह श्रेष्ठयात अनिवार्य अवकाश बिइगु निर्णय याःगु प्रवक्ता तामाङं जानकारी बियादिल।

वहे बैठकं प्रदेशया थीथी जिल्लाय् न्ह्यानाच्वंगु दँय् सञ्चालन जुइगु बहुवर्षीय योजनायात ठेक्का तयेगु विषय ऐन संशोधन यायेत स्वीकृत प्रदान याःगु दु।अथे हे, बैठकं नवीन सिंहयात भौतिक पूर्वाधार लिसें योजना मन्त्रालयय् पदस्थापना यायेगु निर्णय याःगु दु। उगु बैठकय् प्रदेशया थीथी मन्त्रालयय् रिक्त जूगु सचिव पदया पदस्थापनाया निंतिं जिम्मेवारी क्वबीगु निर्णय याःगु प्रवक्ता तामाङं धयादिल।

भाषा सेवी, व्याकरणविद, जगतसुन्दर ब्वनेकुथिया संस्थापक लिसे नेवाः आन्दोलनया न्ह्यलुवा विष्णु चित्रकार थाैं सुथय् ३ बजे आकाझाकां मन्त । वय्कः अपर मुस्ताङ भ्रमण झायादीगु झ्वलय् आकाझाकां मदुगु खः । मदुम्ह व्याकरणविद् चित्रकार मदुम्ह देवदास मानन्धरलिसे जानाः नेपाल संवतया नगुमा पिथनेगु ज्याय् न्ह्यचिलादीम्ह खः । वय्कलं नेपाल लिपि युनिकोड दर्ताया निंतिं नं ज्या यानादीगृु खः । उकथं हे वय्कलं नेपालभाषाया व्याकरण व भाषा सयेकेगु सफू च्वयादीगु खः । ७६ दँय् मदुम्ह वय्कःया जहान भाषासेवी विद्या चित्रकार व म्ह्याय् सिचु चित्रकार दु ।

नेवाः देय् दबूया न्हुगु नेतृत्वया निति म्हिगः चैत २२ गते जुगु निर्वाचनय् बरिष्ठ उपाध्यक्षय् सत्यनारायण डंगोल १४९ मत हया निर्वाचत जुगु दु।

मेपि बरिष्ठ उपाध्यक्षया उम्मेदवारपि घनश्याम श्रेष्ठं ७२ मत व अनिल मास्के २८ मत काउगु खः। अथेहे मिसा उपाध्यक्षय् सिता श्रेष्ठं २१२ मत, कोशी प्रदेशया उपाध्यक्ष नरेशकुमार शाक्यं १६१, बागमती प्रदेशया उपाध्यक्षं अनिल कुमार श्रेष्ठं १४०, लुम्बिन प्रदेशया उपाध्यक्ष बिजुला जोशीं २०४, स्वनिगः प्रदेशया उमेश स्थापितं १६९ मत हया निर्वाचित जुगु दु।

अथेहे उप महासचिवय् बासु श्रेष्ठं ११६ मत हया निर्वाचित जुगु दु सा कोषाध्यक्षय् माईला डंगोलं २१० मत हया निर्वाचित जुगु खः। मिसा सचिवय् बसन्ता श्रेष्ठं १६९ मत हया निर्वाचित जुगु खः।खुल्ला दुजलय् कृष्ण धन कर्माचार्य, दिलिप कुमार श्रेष्ठ, देवेन्द्र नारायण प्रधान, नरेश श्रेष्ठ, बिष्णु गोपाल महर्जन, राजेन्द्र कुमार पिया, नरेन्द्र प्रधान, सुदन कुमार मुनिकार, नारायण श्रेष्ठ व बिनोद कुमार श्रेष्ठ निर्वाचित जुगु खः।

मेमेपि पदाधिकारी न्हापा हे निर्बिरोध निर्वाचित जुइ धुकुगु खः। अध्यक्षय् रश्मिला प्रजापति व महासचिवय् श्रीकृष्ण महर्जन, सचिव जातिय परिषदय् मचाराजा महर्जन, खुल्ला सचिव पदय् नारायण प्रसाद श्रेष्ठ व श्रीजन श्रेष्ठ निर्बिरोध निर्वाचित जुइ धुकुगु खः। मिसा केन्द्रिय दुजलय् निर्मला श्रेष्ठ, तारा श्रेष्ठ, योगिता श्रेष्ठ, ललिता प्रधान, बिमला श्रेष्ठ, रमना श्रेष्ठ, अर्चना तण्डुकार व शोभा बज्राचार्य निर्विरोध निर्वाचित जुइ धुकुगु खः।