नेवाः देय् दबूया न्हुगु नेतृत्वया निति थौ चैत २१ गते मनोनयन दर्ता यायेगु ज्या जुगु दु। कन्ह्यः निर्वाचन यायेगु ज्याझ्वः दु।

थौ मनोनयन दर्ता न्हिनसिया ३ बजे निसे न्ह्यागु खः । थौ जुगु मनोनयन दर्ता जुगुलि अध्यक्षय् रश्मिला प्रजापति व महासचिवय् श्रीकृष्ण महर्जन निर्बिरोध निर्वाचित जुगु दु। अथेहे सचिव जातिय परिषदय् मचाराजा महर्जन न न निर्बिरोध निर्वाचित जुगु दु।

अथेहे मिसा केन्द्रिय मिसा दुजलय् निर्मला श्रेष्ठ, तारा श्रेष्ठ, योगिता श्रेष्ठ, ललिता प्रधान, बिमला श्रेष्ठ, रमना श्रेष्ठ, अर्चना तण्डुकार व शोभा बज्राचार्य न निर्बिरोध निर्वाचित जुगु दु।

दाबि बिरोधया निति कन्ह्यः ८ बजे तक ई तःगु दु।

संस्कृति नाप सम्पदा संरक्षण यायेत पत्रकार तय््स तथ्य आधारित रिपोर्टिङ याना सचेतना यायेमाःगुलि बः बिउगु दु।

नेवाः पत्रकार राष्ट्रिय दबू न येँ महानगरपालिकाया अन्तर्गत हनुमानढोका दरबार क्षेत्र कार्यक्रम नाप सहकार्य याना छगु ज्या याःगु दु। उगु ज्याझ्वलय् सम्पदा संरक्षणय् पत्रकारिताया भूमिका विषय विचाः गोष्ठीइ ब्बति काउपिन्स बः बिउगु दु। सम्पदाय् जुयाच्वंगु अतिक्रमण, ढिलासुस्ती नाप लापरवाही जुयाच्वगुलि निगरानी याना सम्बन्धित यात जिम्मेवार दयका ‘वाचडग’ भूमिकायात अझ बलाका वनेमागुलि बःबिउगु दु।

उगु ज्याझ्वलय् येँ महानगरपालिकाया प्रवक्ता नाप १७ या वडा अध्यक्ष नवीन मानन्धरं सम्पदा संरक्षण यायेत स्थानीय तह, सञ्चारमाध्यम व समुदाय दथुइ सहकार्य याना वनेमाः धका धयादीसे स्वनिगःया मौलिक पहिचान म्हसिकेत सञ्चार क्षेत्रया न अझ जिम्मेवार भूमिका म्हित्येमाःगुलि प्रवक्ता मानन्धरं बःबियादीगु खः।

गुठी संस्थानया पूर्व प्रशासक किरण शाक्यं गुठी प्रणाली सम्पदा संरक्षणया मेरुदण्ड जुगुलि पत्रकार तय्स सम्बन्धित थीथी विषय दुग्यक दुहावना तथ्यय् आधारित सामग्री पिकाय् माः धका धयादीगु खः।संस्कृतिकर्मी जितेन्द्रविलास बज्राचार्यं संस्कृति, सम्पदा ल्यकेगु निति मातृभाषा भाषा पाखे पत्रकारिता व डिजिटल माध्यमयात छ्यला न्ह्यावनेमाः धका धयादीसे सांस्कृतिक सम्पदाया मौलिकता ल्यकेगु निति सञ्चारमाध्यमं बाकलं व्याख्या व सन्दर्भ सहित सामग्री प्रकाशन यायेमाःगुलि बःबियादीगु खः।

उगु ज्याझ्वलय्  नेपाल आदिवासी जनजाति पत्रकार महासंघ (फोनिज) या महासचिव समिर बलामीं नीतिगत सुधारया निति बहस न्ह्याकेमाः, विज्ञ नाप सरोकारवाला तयेगु सः नीति निर्मातातय् थाय् थ्यकेगु व लोपोन्मुख संस्कृति म्वाकेगु निति पत्रकारिता तयेगु भूमिका महत्वपूर्ण जुइ धका विचाः तयादीगु खः।पत्रकार दबूया केन्द्रीय अध्यक्ष नृपेन्द्रलाल श्रेष्ठं नेवाः पत्रकार तयेगु भूमिका केवल समाचार सम्प्रेषण यायेगु जक मखु स्थानीय पहिचान, भाषा व मौलिक ज्ञानया संरक्षण नाप तःपिकः स्वायेमागुलि बःबियादीगु खः।

नेपालभाषाया वाःपौ लहनाया प्रकाशक जुयादीम्ह अध्यक्ष श्रेष्ठं नेपाल भाषापाखे लोपोन्मुख परम्परा, बाखं, गुठी प्रणाली व संस्कारयागु दस्तावेजीकरण यायेगु निति मातृभाषा पत्रकारिताया विशेष योगदान दु धका धयादीगु खः। वयकलं पत्रकार दबूया ग्वहालिं यल न्हनावने धुकुगु यल लाय्कूलि मानमानेश्वरी पायो जात्रा नाप थेच्वोया गथु प्याखँयात निरन्तर जुगु धका न्ह्यथना दीगु खः।

अथेहे, पत्रकार दबूया निवर्तमान अध्यक्ष सुरजवीर बज्राचार्यं पत्रकारतय्स सम्पदा, भाषा व संस्कृतिनाप सम्बन्धित मुद्दाय् प्राथमिकत बिया सः तया वयाच्वनागु दु धका धयादीगु खः। संस्कृति क्षेत्रय् ताः ईनिसे रिपोर्टिङ याना वयाच्वम्ह वरिष्ठ पत्रकार विराजकाजी राजोपाध्यायं संस्कृति सम्पदाया विषय रिपोटिङ यायेत सम्बन्धी अध्ययन, सन्तुलित याना न्ह्या वनेमाः धका धयादीगु खः।

दबूया बरिष्ठ उपाध्यक्ष सुनील महर्जन, महासचिव के.के मानन्धर व सचिव राजु नापितं पत्रकारिताया प्रवद्र्धन, नागरिक पत्रकारिता, तालिम, स्रोत साधनया उपलब्धता व समुदायनाप सहकार्य यायेगुलि प्राथमिकता तयेमाःगुलि बःबियादील।

नेपाल कम्युनिष्ट पार्टी (एमाले) या संसदीय दलया नेताय् रामबहादुर थापा ‘बादल’यात ल्यःगु दु। एमालेया केन्द्रीय ज्याकुथि, यलया च्यासलय् च्वंगु बैठकलिपा थापायात निर्विरोध जुइक ल्यःगु खः।

बैठकय् दलया नेताया निंतिं सांसद सुहाङ नेम्वाङं च्वने मास्तिवयेकूसां नं लिपा निर्विरोधय् थापायात ल्यःगु एमालेया सांसद ऐनबहादुर महरं जानकारी बियादिल।

न्वकू थापायात उगु पार्टीया न्वकू विष्णुप्रसाद पौडेल, महासचिव शङ्कर पोखरेललिसें पदाधिकारीं भिंतुना ब्यूगु खः।प्रतिनिधिसभाय् एमालेया २५ म्ह दुजः दु।

नेपाःया न्यायिक इतिहासय् निक्वःखुसी मिसां नेतृत्व यायेगु ह्वःताः वःगु दु। सर्वोच्च अदालतया वरिष्ठतम् न्यायाधीश सपना प्रधान मल्लं थौनिसें कायममुकायम (कामु) प्रधानन्यायाधीशकथं भाला कःघानादिल।

थ्वस्वया न्ह्यः, न्हापांखुसी न्यायिक नेतृत्वया इतिहासय् मिसा प्रधानन्यायाधीश कथं सुशीला कार्कीं नेतृत्व यानादीगु खः। प्रधानन्यायाधीश प्रकाशमानसिंह राउत ६५ दँया उमेरहदं यानाः मङ्गलबाः सेवानिवृत्त जुइधुंकाः वरिष्ठतम् न्यायाधीश मल्लया ब्वय् कामु प्रधानन्यायाधीशया भाला वःगु खः।

प्रधानन्यायाधीशया पद खालि जूसा सर्वोच्च अदालतया वरिष्ठतम् न्यायाधीशं कायममुकायम प्रधानन्यायाधीशया भाला कःघायेगु संवैधानिक व्यवस्था दु। नेपाःया संविधानया धारा १२९ (६) य् प्रधानन्यायाधीशया अवकाश लिपा वरिष्ठतम् न्यायाधीशं स्वतः कामु प्रधानन्यायाधीश जुइगु व्यवस्था यानातःगु खः।

न्याय परिषदं वंगु फागुन २६ गते प्रधानन्यायाधीश जुइत योग्यता गाःपिं सर्वोच्च अदालतया खुम्ह न्यायाधीश तय्गु धलः संवैधानिक परिषदय् छ्वःगु खः। प्रधानन्यायाधीशया निंतिं परिषदं वरिष्ठतय् न्यायाधीश मल्ललिसें, न्यायाधीशत कुमार रेग्मी, हरि फुँयाल, डा मनोजकुमार शर्मा, डा नहकुल सुवेदी व तिलप्रसाद श्रेष्ठया नां सिफारिस याःगु खः।

नेपाःया संविधान कथं, सर्वोच्च अदालतय् स्वदँ न्यायाधीश जुइधुंकूम्ह व ६५ दँ मदुनिपिं प्रधानन्यायाधीश जुइत योग्यता गाःपिं धाइ। प्रधानन्यायाधीशया पद खालि जुइस्वयां लच्छिन्ह्यः हे संवैधानिक परिषदं न्हूम्ह प्रधानन्यायाधीशया नां प्रस्ताव यायेमाः। तर प्रतिनिधिसभा विघटन जुइधुंकाः संवैधानिक परिषद्या बैठक च्वनेफूगु मदुनि।

सभामुख, उपसभामुख, प्रमुख विपक्षी दलया नेतातय्गु पद खालि जुयाच्वंगुलिं संवैधानिक परिषदं न्हूम्ह प्रधानन्यायाधीशया नां सिफारिस यायेमफूगु धाःगु खः। संसदीय सुनुवाइ विशेष समितिइ संसदीय सुनुवाइं अनुमोदन जुइधुंकाः जक हे राष्ट्रपतिं प्रधानन्यायाधीश नियुक्ति याइगु व्यवस्था दु। प्रतिनिधिसभाया निर्वाचनलिपा संसद्या अधिवेशन बिहीबाः निसें सुरु जुइगु व सभामुख÷उपसभामुखया निर्वाचनया प्रक्रिया सुरु जुइ ल्यंदनिगुलिं सुनुवाइ समितिया गठन यायेत अझ नं छवाः निवाः ई काइगु खनेदु।

सर्वाेच्च अदालतया प्रधानन्यायाधीश प्रकाशमान सिंह राउत उमेद हदया हुनिं सेवा निवृत्त जुयादीगु दु। वय्कःयात म्हिगः सर्वाेच्च अदालतया वरिष्ठतम् न्यायाधीश सपना प्रधान मल्लं बिदाइ बियादिगु खः।

विसं २०८१ असोज २० गते प्रधानन्यायाधीश नियुक्त जुयादीम्ह राउत ६५ दँ उमेरहदया हुनिं अनिवार्य अवकाश जुयादीगु खः । वय्कःया अवकाश लिपा थनिनिसें वरिष्ठतम् न्यायाधीश मल्लं कायममुकायम प्रधानन्यायाधीशया जिम्मेवारी कःघानादीगु दु।प्रधान न्यायाधीशया निंतिं न्याय परिषद्ं सर्वाेच्च अदालतया वरिष्ठतम् न्यायाधीश मल्ल, न्यायाधीशपिं कुमार रेग्मी, हरि फुँयाल, डा मनोजकुमार शर्मा, डा नहकुल सुवेदी व तिलप्रसाद श्रेष्ठया नां सिफारिस याःगु दु।

प्रधानन्यायाधीशं अवकाश कायेसिबें लच्छि न्ह्यः संवैधानिक परिषद्या बैठकं न्हूम्ह प्रधानन्यायाधीशया नां सिफारिस यायेमाःगु संवैधानिक व्यवस्था दयाच्वंगु दु। संसदीय सुनुवाइपाखें अनुमोदन जुइधुंकाः राष्ट्रपतिं प्रधानन्यायाधीश नियुक्त यायेगु व्यवस्था दु।