सरकारं शनिवाः व आइतवाः सार्वजनिक बिदा बिइगु निर्णय याःगु दु। मन्त्रिपरिषदया थौं च्वंगु बैठकं उगु निर्णय याःगु खः।

प्रधानमन्त्री लिसें मन्त्रिपरिषदया ज्याकुथिया कथं थ्व निर्णय सरकारी ज्याकुथि व फुक्कं कथंया शैक्षिक संस्थाय् कन्हय् निसें लागू जुइगु जूगु दु। बैठकं ‘डिजिटल नेपाल ट्रान्सफरमेसन’ परियोजनाया निंतिं एसियाली विकास बैङ्क व विश्व बैङ्कपाखें ९० करोड अमेरिकी डलर सहुलियतपूर्ण त्यासा स्वीकार यायेगु निर्णय याःगु दु।

दिगो व समावेशी वित्त परियोजनाया निंतिं विश्व बैङ्कपाखें ९० करोड ५० लख अमेरिकी डलर सहुलियतपूर्ण त्यासा स्वीकार यायेगु निर्णय जूगु शिक्षामन्त्री लिसें सरकारया प्रवक्ता सस्मित पोखरेलं धयादिल। बैठकं फुक्क मन्त्रालय, सचिवालय, आयोग व अन्तर्गतया निकायया सङ्गठन लिसें व्यवस्थापन सर्वेक्षण (ओएनएम) यायेत स्वीकृति ब्यूगु दु।

अथे हे, बैठकं राससया कार्यकारी अध्यक्ष धर्मेन्द्र झां बियादीगु राजीनामा स्वीकृत याःगु दुसा डिजेल लिसें पेट्रोलपाखें सञ्चालन जुइगु सवारीसाधनयात विद्युतीय वाहनय् हिलेगु व्यवस्था मिले यायेगु निर्णय नापं याःगु दु । आः वइगु शैक्षिक सत्र वैशाख १५ गतेनिसें सञ्चालन यायेगु निर्णय जूगु दु।

राष्ट्रियसभा न्वकू पदय् नेपाल कम्युनिष्ट पार्टी (एमाले)या सांसद लीलाकुमारी भण्डारीं उम्मेदवारी बियादीगु दु।

सङ्घीय संसद् सचिवालयया कार्यतालिका बमोजिम थौं वय्कःयात निर्वाचित यानादिस धइगु प्रस्तावया सुचं दर्ता जूगु खः। वय्कःया प्रस्तावय् एमालेया प्रेमप्रसाद दङ्गाल व समर्थकय् नेपाली कांग्रेसया कृष्णबहादु रोकाया, नेपाली कम्युनिष्ट पार्टी (नेकपा) या मदनकुमारी शाह व जनता समाजवादीया पूजा चौधरीं जुयादी।

प्रतिनिधिसभा सदस्य निर्वाचनया निंतिं स्थगित यानातःगु मतदाता नामावली सङ्कलनया ज्या थौनिसें न्ह्यायेत्यंगु दु । निर्वाचन आयोगं प्रतिनिधिसभा सदस्य निर्वाचनया निंतिं धकाः वंगु मङ्सिर ६ गतेनिसें नामावली सङ्कलन यायेगु ज्या स्थगित यानातःगु खः।

आयोगया थ्वहे चैत १८ या बैठकं मतदाता नामावली सङ्कलनया ज्या न्ह्याकेगु निर्णय याःगु खः। स्थगित उगु ज्याझ्वः थनिनिसें हाकनं न्ह्याके त्यंगु आयोगया सहसचिव लिसें प्रवक्ता नारायणप्रसाद भट्टराईं जानकारी बियादिल। आयोगं राष्ट्रिय परिचयपत्र नम्बर कयातःपिं नेपाःमिपिंसं थःगु राष्ट्रिय परिचयपत्रया विवरणपाखें मतदाता नामावलीइ अनलाइन प्रणाली पाखें नां दर्ता याके फइगु व्यवस्था मिलेयानातःगु आयोगं धाःगु दु।

राष्ट्रिय परिचयपत्र प्रणालीइ आबद्ध मजूपिनिगु हकय् आयोगया ‘प्रि इनरोलमेन्ट’ प्रणालीपाखें अनलाइन फारम भरे यायेमालीगु जूगु दु। थःगु किपा व ल्हाःचिं लिसेंया जैविक विवरण प्रदेश लिसें जिल्ला निर्वाचन ज्याकुथिइ आवेदक स्वयं भौतिक कथं उपस्थित जुयाः बीमालीगु जूगु दु।मतदाता नामावलीइ द्वनाच्वंगु भिंकेगु, नां निकः जूसा चिइकेगु, मदयेधुंकूगु बाय् बाय्हिलाया विवरण अद्यावधिक यायेगु लिसेंया ज्याया निंतिं नापं अनलाइन माध्यमपाखें आवेदन बिइ फइगु व्यवस्था मिलेयानागु धकाः प्रवक्ता भट्टराईं जानकारी बियादिल।

नां, थर, थाय्बाय् भिंकेगु, छगू हे वडाय् निगू बाय् निगूसिबें अप्वः मतदानस्थल दयाच्वंगु जूसा मतदातायात पाय्छि जुइगु थासय् नां हिलेगु, नागरिकता कथंया विवरण मजुसें मेगु जुयाच्वंगु जूसा नागरिकता कथं नापं भिंके फइगु जूगु दु । आयोगं मतदाता नामावली सङ्कलन प्रक्रियाय् सक्रिय ब्वतिया निंतिं इनाप याःगु दु।

 नेवाः देय् दबूया न्हुगु नेतृत्वया निति थौ चैत २२ गते निर्वाचन जुइत्यःगु दु। मनोनयन दर्ता यायेगु निति म्हिगः चैत २१ गते नेवाः देय् दबूया ज्याकूथि मनोनयन दर्ता यायेगु ज्या जुगु खः।

खुल्ला सचिव पदय् नारायण प्रसाद श्रेष्ठ व श्रीजन श्रेष्ठ न थौ निर्विरोध निवर्चाति जुगु दु। अथेहे मिसा दुजः कोशी प्रदेशं भिमकला श्रेष्ठ, खुल्ला दुजः रामभक्त श्रेष्ठ, बागमती प्रदेशपाखे मिसा दुजः पार्वती श्रेष्ठ, लुम्बिनी प्रदेशपाखे मिसा दुजः अरुणा श्रेष्ठ, कर्णाली प्रदेशपाखे खुल्ला दुजः सुन्दरमान श्रेष्ठ, सुदुरपश्चिमपाखे मिसा दुजः सुमित्रा श्रेष्ठ व स्वनिगः बिशेष प्रदेशपाखे खुल्ला दुजः रमेश जोशी न निर्विरोध निर्वाचित जुगु दु।

अथेहे म्हिगः हे अध्यक्षय् रश्मिला प्रजापति व महासचिवय् श्रीकृष्ण महर्जन निर्बिरोध निर्वाचित जुगु खः सा सचिव जातिय परिषदय् मचाराजा महर्जन न निर्बिरोध निर्वाचित जुगु खः। मिसा केन्द्रिय दुजलय् निर्मला श्रेष्ठ, तारा श्रेष्ठ, योगिता श्रेष्ठ, ललिता प्रधान, बिमला श्रेष्ठ, रमना श्रेष्ठ, अर्चना तण्डुकार व शोभा बज्राचार्य न निर्बिरोध निर्वाचित म्हिगः हे जुइ धुकुगु खः।

आः छु ई लिपा बरिष्ठ उपाध्यक्ष, कोषाध्यक्ष, उपमहासचिव व मिसा सचिव नाप मेमेगु पदय् चुनाव राष्ट्रिय सभागृहय् जुइत्यःगु दु।

लकस नेपालया ग्वसालय् जूगु रञ्जना व प्रचलित नेपाललिपि कासाय् रञ्जना लिपिइ सुदेनकमार महर्जन व प्रचलित नेपाललिपिइ विजय महर्जन न्हाप लाःगु दु । वय्कःपिन्सं नेवाः संस्कृति मन्द छाय्पियातःगु कलात्मक सिरपालिसें दसिपौ नापं झिद्वः तका सिरपा त्याकादीगु खः । कासाय् रञ्जना लिपिइ सदिश मानन्धर ल्यू व नविन महर्जन लियांल्यू लाःगु खःसा प्रचलित नेपाललिपिइ सुदेनकुमार महर्जन ल्यू व प्रशन्ना बज्राचार्य लियांल्यू लाःगु खः । वय्कःपिन्त नं मन्दः छायेपियातःगु कलात्मक सिरपानाप दसिपौ देछाःसें ल्यू लाःपिन्त खुद्वः तका व लियांल्यू लाःपिन्त प्यद्वः तका नगद सिरपा देछाःगु खः । 
थुगु ज्याझ्वलय् ४७ दंनिसें लिपि अभियानय् सक्रियम्ह न्ह्यलुवाः लिपिविज्ञ, संस्कृतिविद् लोकरत्न शाक्यया दोसल्लां न्ययेकाः हनापौ देछाःसें हंगु खः । 

लिपि कासाया सिरपा व दसिपौ देछायेगुनाप दच्छियंक न्ह्याःगु नेपालभाषा व लिपि प्रवद्र्धन परियोजनाया समापन यासें पाटन म्यूजियमय् जूगु ज्याझ्वःया मूपाहां ललितपुर महानगरपालिकाया मेयर चिरिबाबु महर्जनं सिरपा व हनापौ देछादिसें नेपाः देय्या मौलिक लिपि संरक्षण व प्रवद्र्धनया ज्याय् लकस नेपालया सक्रियता अतिकं महत्वपूर्ण जू धयादिल । वय्कलं महानगरपालिकां थुकथंया ज्याय् फूचाःगु ग्वाहालि यायेत थः न्ह्यब्वायेगु खँ कनादिल । ज्याझ्वलय् मूपाहां महर्जनं लिपि व भाय् सयकेगु निंतिं पाठ्यपुस्तककथं लकस नेपालया पिथना “लकस – रञ्जना व प्रचलित नेपाललिपि सयेके, नेपालभाषां खँ ब्याके” सफू नं विमोचन यानादीगु खः । कासा छवाः न्ह्यः आदर्श कन्या निकेतन स्कुलय् जूगु खःसा उकी प्रचलित नेपाललिपिइ २० म्ह व  रञ्जना लिपिइ १७ यानाः ३७ म्ह कासामिपिन्सं लिपिं च्वज्या व ब्वनेज्या याःगु खः ।  
कल्चरल सर्भाइवलया किपर्स अफ द अर्थ फण्डया ग्वाहालिइ दच्छियंक जूगु परियोजना अन्तर्गत ३ गू प्रचलित नेपाललिपि स्यनेज्या, ३ गू रञ्जना लिपि स्यनेज्या, २ गू रञ्जना व प्रचलित नेपाललिपिया स्यनामि उत्पादन यायेगु तातुनां टिचर्स टे«निङनापं लिपि कासा व वर्णमाला व भाय् स्यनेगु सफू ‘लकस’ पिथंगु खः । 

१५ दं निसें समाजसेवाय् समर्पित जु्याः समाजय् ह्यूपा हयेगु नितिं सक्रिय जुयाच्वंगु लकस नेपालया ग्वसालय् जूगु थुगु ज्याझ्वलय् लसकुस यासें लकस नेपालया नायः सुरजवीर बज्राचार्यं थुगु संस्थां ललितपुर जिल्लाया गोदावरी नगरपालिकाया सिखर्पा, पहाडे थापा गाउँ, बडिखेल, वनदेवी, लप्से, ईताहिति, कोन्ज्योसोम गाउँपालिकाया तल्लो नल्लु, ललितपुर महानगरपालिका वडा २२ या फर्सिडोलय् ल्यूने लाःपिन्त प्रगतिया नितिं संस्थागत, आर्थिक सशक्तताया ज्या यानावयाच्वंगु खँ कनादिल । लः, लःया पाइप छेँय्छेँय् थ्यंकेगु, कृषि, ब्यवसाय, ऋण परियोजना न्ह्याकाः समाजय् ह्यूपा थनेत अमेरिकी संस्था आउटरिच इन्टरनेशनलनाप जानाः सहभागितामूलक मानव विकास कार्यक्रम न्ह्याकाच्वनादीगु खँ कनादिसें कल्चरल सर्भाइवलया ग्वाहालिइ नेवाः भाय् व लिपिया नितिं ज्या यायेखंगु लसता प्वंकादिल । संस्थां सिन्धुपाल्चोक जिल्लाया भुखाचं दुंगु निगू स्कुल भवन दनागु खँ नं न्ह्यथनादिल ।

ज्याझ्वलय् लिपि स्यनामि, लिपि कासाया निर्णायकनाप सफू पिथनेगु निंतिं यानादीगु योगदान न्ह्यथंसें गुरुपिं किरण शाक्य, रुविन शाक्ययात लुमन्ति चिं देछानाः हंगु खःसा गुरु पवित्र कसाः व मेम्ह निर्णायक धर्मकृष्ण सिकर्मी, थाय् ग्वाहालि यानादीपिं आदर्श कन्या निकेतन स्कुल, पाटन म्यूजियम, मूपाहां चिरिबाबु महर्जनयात नं लुमन्ति चिं देछानाः हंगु खः । 

ज्याझ्वलय् यल महानगरपालिका ८ वडाया नायः बाबुरत्न महर्जन, लकसया निवर्तमान नायः सुशिला शाक्य, सल्लाहकार किरण शाक्य, नेपाल लिपि गुथिया नायः निरञ्जन ताम्राकार, वड ८ या दुजःनापं स्वंगू लिपि स्यनेगु ज्या जूगु ललित विकास आधारभूत विद्यालयया अध्यक्ष पुनाल महर्जन, अभियन्ता प्रविन्द्र शाक्यया नं पाहांकथं ब्वति दुगु खः ।