नेपाल आयल निगमं हवाई इन्धनया भाः थकागु दु। सञ्चालक समितिया बैठकं हवाई इन्धन आन्तरिकपाखे लिटरया सच्छि व नीप्यतकां थकागु दु।

न्हापा लिटरया सच्छि व नीन्हय्तका जुयाच्वंगु आन्तरिकपाखेया हवाई इन्धन आः भाः थहांवनेधुंकाः लिटरया निसः व न्यय् छतका थ्यंगु दु।

अथे हे, हवाई इन्धन अन्तर्राष्ट्रिय पाखें प्रतिकिलोलिटर च्यासः व १९ अमेरिकी डलर प्रतिकिलोलिटरं थहांवंगु दु। लिहावःगु भाः कथं येँय् प्रतिकिलोलिटर गुसः व ६६ अमेरिकी डलर जुयाच्वंगुलिइ आः भाः थहावनेधुंकाः झिंन्हय्सः व ८५ अमेरिकी डलर थ्यंगु दु।

मेगु भाः समायोजन मयातकया निंतिं पेट्रोल, डिजल, मचिकं व एलपी ग्यासया भाः धाःसा न्हापाया हे भावय् कायम जूगु निगमं धाःगु दु।

वीर अस्पतालय् मिसापिंत निःशुल्क कथं क्यान्सर परीक्षण न्ह्याकूगु दु । येँ महानगरपालिकां अस्पताललिसे मंकाः ज्याय् म्हिगः अस्पतालय् ग्वसाः ग्वःगु ज्याझ्वलय् मिसापिनिगु दुरुपाः, मचाछेँ लिसें सर्भाकल क्यान्सरया परीक्षण न्ह्याकूगु खः।

क्यान्सर परीक्षण आः वइगु वैशाख २० गतेतक न्ह्याइगु धयातःगु दु । परीक्षण उलेज्याय् महानगरपालिकाया कार्यवाहक प्रमुख सुनिता डङ्गोलं क्यान्सर ल्वय् इलय् सिइकेफुसा जीवन लंके फइगु धयादिल। “जाँच यानाः इलय् हे क्यान्सर म्हसिकेफत धाःसा वासः याइबले म्हो जक ध्यबा फुइगु नापं अःपुइगु जुइ । जीवन बचे यायेफइ”, वय्कलं धयादिल। वहे झ्वलय् वय्कलं नापं थःगु क्यान्सर परीक्षण याकादिल।

राष्ट्रिय चिकित्सा विज्ञान प्रतिष्ठानया उपकुलपति प्राडा भूपेन्द्रकुमार बस्नेतं थ्वसिबें न्ह्यः इलय् हे क्यान्सर म्हसिके मफयाः थ्व ग्वानापुसे च्वनाच्वंगु न्ह्यथनातदिल। अस्पतालया कार्यकारी निर्देशक प्रा डा दिलिप शर्मां मिसातय्सं तःक्वः हे क्यान्सर परीक्षण यायेमाःगु व क्यान्सर जुइवं ग्याये म्वाःगु धयादिल।

महानगरया स्वास्थ्य विभाग प्रमुख दीपक केसीं देय्न्यंकंया न्ह्याम्हं मिसापिंसं अस्पतालय् वनाः क्यान्सर परीक्षण याके फइगु धयादिल। वय्कःया कथं क्यान्सर परीक्षणया निंतिं महानगरया ३२ गू शहरी स्वास्थ्य प्रवद्र्धन केन्द्रपाखें प्रेषण (रिफर) पुर्जी कयाः अस्पतालय् वनाः क्यान्सर परीक्षण याके फइ। मिसापिनिगु क्यान्सर परीक्षणया निंतिं महानगरं अस्पतालयात छगू क्वति न्ययगू लख तका ग्वाहालि याःगु दु।

राष्ट्रिय समाचार समिति (रासस) या कार्यकारी अध्यक्ष धर्मेन्द्र झां थःगु पदपाखें राजीनामा बियादीगु दु। वय्कलं म्हिगः सञ्चार लिसें सुचं प्रविधिमन्त्री डाविक्रम तिमिल्सिनाया न्ह्यने थःगु राजीनामा बियादीगु खः।

देय्या हिलावंगु राजनीतिक परिवेशयात नाला कयाः नवगठित सरकारयात ज्या यायेत अःपुइमा धइगु तातुना थःम्हेस्यां नैतिकताया ल्याखय् राजीनामा बियागु कार्यकारी अध्यक्ष झापाखें न्ह्यब्वयादीगु राजीनामा पतिइ न्ह्यथनातःगु दु। “देय्या परिवर्तित राजनीतिक परिवेशयात जिं आत्मसात् यानागु दु।

नवगठित सरकारं थःगु अनुकूलताया लिधंसाय् ज्या न्ह्याकेमाः धयागु मान्यता तसें नैतिकताया ल्याखं मार्गप्रशस्त यायेगु पाय्छि जुइगु तायेकाः जिं थौंया न्हिल्याः निसें लागू जुइगु कथं थःगु पदपाखें राजीनामा बियाच्वना”, पौखय् धयातःगु दु। न्हूगु सरकार गठन लिसें नीतिगत कथं न्ह्याः वनेगु लँ चायेकाबीत थःम्हेस्यां राजीनामा बियागु वय्कलं धयादिल।

विसं २०७९ असार ६ गते तत्कालीन सरकारं मन्त्रिपरिषद् बैठकया निर्णय कथं झायात प्यदँया निंतिं कार्यकारी अध्यक्षय् नियुक्त याःगु खः।

प्रधानमन्त्री सुशीला कार्की सकारात्मक अडान, आज्जुइ थ्यकेगु दृढता व सकारात्मक गुणया कारण म्हसिउम्ह खः। प्रधानन्यायाधीश जुयाच्वंगु इलय् सचेत नागरिकया विषय सार्वजनिक सरोकारया खँ ल्हाःगुलि हे वय्कःयात सकसिया ययेकूगु, यक्वसिगु भलसा त्याकूगु खः।

जेनजी आन्दोलन लिपा राजनीतिक व संवैधानिक अन्यौल जुयाच्वंगु इलय् देय्या भिं जुइ धकाः सकस्यां भलसा काउगु खः। सफलतापूर्वक निर्वाचन क्वचायेकाः, लोकतन्त्र व संविधान सुरक्षित जुइ थाय् तक यंकूगु खः। न्हूगु सरकार गठन लिपा हे भदौय् स्यंगू राजनीतिक व संवैधानिक लँपूयात बांलक ज्वनावःगु खनेदु।

देय्या भविष्य व सुरक्षाया विशिष्ट योगदान याम्ह प्रधानमन्त्री कार्की हे पदं पिहां वनेगु इलय् थः हे स्वकीय सचिव आदर्शकुमार श्रेष्ठयात नियुक्ति यानाः ‘राजनीतिक अनैतिकता’ प्रदर्शन याःगु दु। प्रधानमन्त्री कार्की स्वकीय सचिव श्रेष्ठयात राष्ट्रिय प्रकृति संरक्षण कोषया अध्यक्षय् मनोनीत याःगु खः। प्रकृति संरक्षण कोष ऐन, २०३० य् प्रधानमन्त्री कोषया संरक्षक जुइगु व्यवस्था दु। सञ्चालन समिति अध्यक्ष संरक्षकं मनोनीत यायेगु व्यवस्था दु।

न्हापा तत्कालीन प्रधानमन्त्री केपी शर्मा ओलीें वन नाप वातावरणमन्त्री ऐनबहादुर शाहीयात कोषया अध्यक्षया जिम्मेवारी ब्यूगु खः। जेनजी आन्दोलन लिपा तक कार्यालय वनाच्वंह नियुक्ति यायेवं विवाद जूगु खः। लिपा शाहीं कोषया अध्यक्षपाखे राजीनामा ब्यूगु खः। आः व हे अध्यक्ष पदय् प्रधानमन्त्री कार्कीं थःहे स्वकीय सचिवयात मनोनीत याःगु खः। कार्कीं खालि जुयाच्वंगु थासय् न्हूम्ह नियुक्ति यात, थः हे स्वकीय सचिवयात। अथे जूगुलि थ्व नियुक्ति अझ त्रुटिपूर्ण जू ।

छाय् धाःसा, कार्की प्रधानमन्त्री जूगु परिस्थिति निर्माण यायेत जेनजी आन्दोलनया यक्व हे कारण मध्ये सत्ता व शक्ति दुपिंस नियुक्ति जूगु नं छगू कारण खः। जनताप्रति जवाफदेही मजूसे थः न्ह्यःने च्वंपिंत थःयत्थे नियुक्ति यानाः जनता असन्तुष्टि जूगु खः । श्रेष्ठयात कार्कीं नियुक्ति याःगु धइगु न्हापाया हे निरन्तरता खः। थुगु ज्यायात कयाः कार्की छु नं लिसः बिउगु मदुनि । श्रेष्ठया नियुक्ति बांलाःगु कथं कायेमछिइ ।

प्रधानमन्त्री कार्कीं छु ई न्ह्यः जक छगू अन्तर्वार्ताय् श्रेष्ठया पृष्ठभूमिबारे चर्चा यासें वयात अदालतया कर्मचारी व प्रविधि नाप कानुनया बांलाक ज्ञान दुम्ह कथं म्हसिउम्ह खः। अथे जूगुलि प्रकृति संरक्षण कोषया अध्यक्ष यायेगु धइगु हे न्हापा थें ‘बांलाम्ह मखु, झीम्ह’ नियुक्ति यायेग प्रवृत्तिया हे निरन्तरता खः। प्रधानमन्त्री कार्कीया स्वकीय सचिव जुयाच्वंगु इलय् नं श्रेष्ठं थः हे छेँजःपिंत सचिवालयय् नियुक्त यायेवं विवाद जूगु खः।

हलिं नेवाः नेवाः दिवसया लसताय् थीथी ज्याझ्वः याना हंगु दु ।

दँय् दसं मार्च महिनाया लिपांगु शनिवाः हनेगु यानावया च्वंगु हलिं नेवाः दिं थुगुसिइ गुक्वःगु हलिं नेवाः दिं कथं मार्चया २८ तारिख खुन्हु हलिमय न्ह्याथाय् च्वंसां झी नेवाः धइगु नारा ज्वना हलिमय न्यंक हंगु दु।

थ्वहे झ्वलय् हलिं नेवाः दबुया नेपाः देय् मूकवःया ग्वसालय् येँया बसन्त पुलिइ तःजिक हंगु दु। येँ महानगरपालिकाया कार्यवाहक प्रमुख सुनिता डंगोल मूपाहाँ कथं न्हझायादीगु उगु ज्याझ्वः ग्वसाः खलःया नायः रमेशमान मुनिकारया सभाध्यक्षताय् विजयरत्न असंबरेयात हरिश्चन्द्र लुमन्ति सिरपापाखे हंगु खः।

अथेहेतुं गायिका रिता महर्जनयात रमेश ताम्राकार लुमन्ति सिरपा, वरिष्ठ नाट्यविद् वीणा जोशी राजभण्डारीयात सबिता महर्जन मुनिकार लुमन्ति, संगीतकार जुगल डंगोलयात जयराम श्रेष्ठ लुमन्ति, अमृता शाक्य सिर्जना सिरपा रिता दुवालयात देछागु दुसाः एनआरएनए उपाध्यक्ष रोजिना प्रधान राईयात विशेष सिरपालं छायपिउगु खः।पर्यटन व्यवसायी योगेन्द्र शाक्य, कार्डियोलजिस्ट डा राजेन्द्र कोजु, फिल्मया एक्शन डाइरेक्टर राजेन्द्र खडगी, फिल्मकःमि रजिला श्रेष्ठ, होटल व्यवसायी संगीता श्रेष्ठ, उद्योगी प्रदिप कुमार श्रेष्ठ, गणेश भैरव व्यवस्थापन समिति, भाषाविद् विष्णु चित्रकार, सगरमाथा आरोही पुर्णिमा श्रेष्ठ व प्रतिनिधि सभा सदस्य भुमिका श्रेष्ठयात सम्मान याःगु खः।