पूर्वराष्ट्रपति विद्यादेवी भण्डारीं पूर्वराष्ट्र प्रमुखया हैसियतं नेपाल सरकारं बिइगु सेवा सुविधा मध्ये सुरक्षाबाहेक मेगु छुं नं सेवा सुविधा थनिंनिसें मकायेगु घोषणा यानादीगु दु।

वय्कःया सचिवालयं गृह मन्त्रालयया सचिवयात संबोधन यानाः च्वःगु पतिइ पूर्वराष्ट्रपति भण्डारीं थनिंनिसें हे लागू जुइगु कथं सुरक्षाबाहेकया छुं नं सेवासुविधा मकायेगु निर्देशन दूगु न्ह्यथनादिल।

पूर्वराष्ट्रपति भण्डारीं थःगु कार्यकाल पूवंकाः सेवानिवृत्त जुइ धुंकाः पूर्वराष्ट्र प्रमुखया हैसियतं नेपाल सरकारं बिया वयाच्वंगु सेवासुवधा कया वया च्वनादीगु खः।

राष्ट्रिय प्रसारण ग्रीड कम्पनी लिमिटेड (आरपिजीसिएल) व न्यागू जलविद्युत् प्रवद्र्धक कम्पनी दथुइ ग्रीड कनेक्सनसम्बन्धी सम्झौता पत्रय् ल्हाःचिं तःगु दु।

ऊर्जा, जलस्रोत लिसें सिँचाइमन्त्री दीपक खड्काया मू पाहाँसुइ मंगलवाः राष्ट्रिय प्रसारण ग्रीड कम्पनी लिमिटेड व न्यागू कम्पनी दथुइ ग्रीड कनेक्सन सम्बन्धी सम्झौता पत्रय् ल्हाःचिं तःगु खः। सम्झौता पत्रय् राष्ट्रिय प्रसारण ग्रीड कम्पनीया प्रमुख कार्यकारी अधिकृत इञ्जिनियर सागर श्रेष्ठ व एससी पावर कम्पनी प्रालि, सुर्मा सरोबर हाइड्रोपावर प्रालि, माता मालिका इनर्जी मल्टिपल प्रालि, सूर्य होल्डिङ प्रालि व हिमजल हाइड्रोपावर प्रालिया प्रतिनिधिपिंसं ल्हाःचिं तःगु खः।

ऊर्जामन्त्री खड्कां सम्झौतां नेपाःया ऊर्जा ख्यःया विकासय् कयातःगु आज्जु पूवंकेत ग्वाहालि जुइगु धयादिल। “ऊर्जा ख्यःया सही प्रवद्र्धन व लगानी व्यवस्थापनया अभावं नेपाःया समृद्धिया लँपुइ तःधंगु पंगः थनाच्वंगु खः, थुजाःगु सम्झौतां जक झीत ऊर्जा ख्यलय् माःगु सुधार यायेत ग्वाहालि याइ”, वय्कलं धयादिल। ऊर्जा सचिव सुरेश आचार्य, विद्युत नियमन आयोगया अध्यक्ष डा रामप्रसाद धिताललिसें नं सरकारं सन् २०३५ तक तयातःगु ऊर्जा विकासया आज्जुयात पूवंकेत थुजाःगु सम्झौतां ग्वाहालि याइगु धयादिल।

एससी पावर कम्पनी प्रालिपाखें प्रवद्र्धन याःगु तिला–१ जलविद्युत् आयोजना (४४० मेगावाट, कालीकोट), सुर्मा सरोबर हाइड्रोपावर प्रालिपाखें प्रवद्र्धन यानाच्वंगु सेती अर्धजलाशययुक्त जलविद्युत् आयोजना (५४ मेगावाट, बझाङ), माता मालिका इनर्जी मल्टिपल प्रालिपाखें मालुमेला सेतीनदी पिकिङ हाइड्रोपावर आयोजना, ७२ मेगावाट, बझाङ), सूर्य होल्डिङ प्रालिपाखें अपर मेवा खोला ‘ए’ हाइड्रोपावर आयोजना, ३१.९२ मेगावाट, ताप्लेजुङ) व हिमजल हाइड्रोपावर प्रालिपाखें सुपर दरौदी हाइड्रोपावर प्रोजेक्ट (९.१४३ मेगावाट, गोरखा) दु।

संयुक्त राष्ट्रसङ्घीय ‘विकासया नितिं वित्त’ सम्बन्धी प्यक्वःगु अन्तरराष्ट्रिय सम्मेलनया झ्वलय् स्पेनय् झायाच्वनादीम्ह प्रधानमन्त्री केपी शर्मा ओलीं थौं थी थी उच्चस्तरीय ‘साइड इभेन्ट’य् संबोधन यानादीगु दु।

प्रधानमन्त्री ओलीं स्पेन सरकारया अध्यक्ष नापं प्रधानमन्त्री पेड्रो साञ्चेजं ग्वसाः ग्वःगु विकास ग्वाहालिइ न्हूगु सोच सम्बन्धी उच्चस्तरीय सहलहय् ब्वति कयाः उगु विषयया ‘राउण्ड टेबल’य् थःगु बिचाः न्ह्यब्वयादिल। थौं हे प्रधानमन्त्री ओलीं अल्पविकसित व चिचीधंगु टापुया देय्तय्गु उच्चस्तरीय बैठकया अध्यक्षता यानाः संबोधन यानादीगु दु धाःसा ‘देय् प्रमुख नापं सरकार प्रमुखतय्गु कुतलय् त्वनेगु लः व सुचुकुचुया ख्यलय् लगानी’ सम्बन्धी उच्चस्तरीय सहलहयात संबोधन यानादिल।

विकास ग्वाहालि व विश्व साझेदारीया ऐक्यबद्धताय् न्हूगु सोचबारे नेपाःया स्पष्ट धारणा प्वंकादिसें प्रधानमन्त्री ओलीं विश्वय् सुं नं ल्यूने मलायेमा धइगु बिचाः ज्वनाः विकास ग्वाहालियात ‘च्यारिटी’ कथं जक मकास्ये गरिबी अन्त्य व नागरिकतय् क्षमतावृद्धिया नितिं छ्यलाः दिगो शान्ति व विकासया आज्जुइ थ्यंकेत मंकाः कुतः जुइ माःगु धारणा प्वंकादिल।“

अजाःगु हे कथंया चिची धंगु विकास परियोजनात सरकार व गैरसरकारी ख्यलं समानान्तर जुइक सञ्चालन यायेगु प्रवृत्ति नं खनेदयावःगु दु। अथे हे थीथी कथं छुटे जुयाच्वंगु ग्वाहालिं समतामूलक विकासं गति काइमखु”, प्रधानमन्त्री ओलीं धयादिल, “विकास साझेदारं क्वःछिनातःगु च्यानलं ग्वाहालिया नितिं न्ह्याः वयेमाः ।

थ्व खँयात सेभिया–प्रतिबद्धतां नं झीत उप्रेरित याःगु दु। झीपिं दक्व उगु लँपुपाखें न्ह्याःवने।” वय्कलं तःमिगु मुलुकं खँ जक मखु व्यवहारय् नं थःपिनिगु ग्वाहालि यायेगु प्रतिबद्धता पूवंके माःगुलिइ बः बियादिसें धात्थें हे जनताया जीवनय् अर्थपूर्ण ह्यूपाःया नितिं प्रभाव लाइगु ख्यलय् सहकार्य जुइमाः धकाः धयादिल। अल्पविकसित देशं उच्चस्तरीय बैठकया अध्यक्षता यानाः प्रधानमन्त्री ओलीं विकास साझेदारतय्त सेभिया (सेभिल्ला) प्रतिबद्धतायात पूवंक व इमानदारीपूर्वक हनेत इनाप यानादिल।

प्रधानमन्त्री केपी शर्मा ओली स्पेन सरकारया अध्यक्ष (प्रधानमन्त्री) पेड्रो साञ्चेजपाखें ग्वसाः ग्वगू बेली भोजय् ब्वतिकयादीगु दु।

सयुक्त राष्ट्रसङ्घया ‘विकासया निंतिं वित्त सम्बन्धी प्यक्वःगु अन्तरराष्ट्रिय सम्मेलन’य् ब्वति कयाच्वंपिं देय्या राष्ट्र प्रमुख व सरकार प्रमुखया सम्मानय् ग्वसाः ग्वःगु ज्याझ्वलय् प्रधानमन्त्री ओली व न्हापांम्ह मिसा राधिका शाक्यं ब्वति कयादीगु खः।

प्रधानमन्त्री ओली व प्रधानमन्त्री साञ्चेजया दथुइ आइतबाः निगू पक्षीय नापलायेगु ज्या जूगु खः।

संस्कृति, पर्यटन लिसें नागरिक उड्डयनमन्त्री बद्रीप्रसाद पाण्डें पशुपति क्षेत्र विकास कोषया निमित्त सदस्य सचिव पदया भाला कार्यकारी निर्देशक सुवासचन्द्र जोशीयात बियादीगु दु।

कोष सञ्चालक परिषदया नायः नापं जुया च्वनादीम्ह मन्त्री पाण्डें मन्त्रिस्तरीय निर्णय यानाः कार्यकारी निर्देशक जोशीयात निमित्त सदस्य सचिवया भाला बियादीगु वय्कःया सचिवालयं धाःगु दु। अख्तियार दुरुपयोग अनुसन्धान आयोगं थ्वहे असार ७ गते विद्युतीय शवदाहगृह यन्त्र खरिद प्रकरणय् सदस्य सचिव डा मिलनकुमार थापालिसेंया विरुद्ध विशेष अदालय् मुद्दा दायर याःगु खः।

विशेष अदालतय् मुद्दा दायर जुइ धुंकाः स्वतः पदपाखें निलम्बन जुइगु कानुनी व्यवस्था कथं सदस्य सचिव पद खाली जूगु खः।नवनियुक्त निमित्त सदस्य सचिव जोशीया पदावधि आः वइगु भदौ १८ गते तक उगु पदय् दइगु कोषं धाःगु दु।

थ्यंमथ्यं निलाजकया निंतिं वयकःयागु निमित्त सदस्य सचिवया कार्यकाल जुइगु जुइ।