संयुक्त राष्ट्रसङ्घया ‘विकासया नितिं वित्त’ सम्बन्धी प्यक्वःगु अन्तरराष्ट्रिय सम्मेलन स्पेनया सेभियाया फेबिस प्रदर्शनी केन्द्रय् थौनिसें सुरू जूगु दु।

सम्मेलनय् नेपाःया प्रधानमन्त्री केपी शर्मा ओलीलिसें विश्वया राष्ट्रप्रमुख नापं सरकार प्रमुख व प्रतिनिधितय्सं ब्वति कयादीगु दु। उलेज्यासत्रय् स्पेनया नरेश फिलिप द्वितीय, स्पेन सरकारया अध्यक्ष (प्रधानमन्त्री) पेड्रो साञ्चेज, संयुक्त राष्ट्रसङ्घया महासचिव एन्टेनियो गुटेरेसं संबोधन यानादिल।

उलेज्या सत्रय् प्रधानमन्त्री ओलीया नापनापं प्रधानमन्त्रीया मुख्य सल्लाहकार विष्णुप्रसाद रिमाल, परराष्ट्र मन्त्रालयया सचिव अमृतबहादुर राई, संयुक्त राष्ट्रसङ्घया नितिं नेपाःया स्थायी नियोगया स्थायी प्रतिनिधि लोकबहादुर थापा, परराष्ट्र मन्त्रालयया शिष्टाचार महापाल कुमारराज खरेल नं ब्वति दूगु खः।‘इन्टरनेसनल कन्फरेन्स अन फाइनान्सिङ फर डेभलपमेन्ट अफ युनाइटेड नेसन्स् (एफएफडि–४)’या नितिं राष्ट्रसङ्घया महासचिव गुटेरेस व स्पेनया प्रधानमन्त्री सान्चेजया मैत्रीपूर्ण ब्वनाय् प्रधानमन्त्री ओलीं थ्व भ्रमण याःगु खः।

विकासया नितिं वित्तसम्बन्धी थ्व सम्मेलनय् विश्वयक सरकारया नेतापि, विश्व व क्षेत्रीय संस्था, वित्तीय व व्यापारिक संस्था, व्यवसायी, नागरिक समाज व संयुक्त राष्ट्र प्रणालीया सम्बन्धित प्रतिनिधि पिनिगु ब्बति दुगु खः। नेपालं अल्पविकसित, चिचीधंगु व टापु मुलुकया सःतय्त नं नेतृत्व यानाः सम्मेलनय् वकालत याइ।

तःमिगु देसं चीमिगु व चिचीधंगु देय्तय् नितिं याःगु लगानी प्रतिबद्धताया कार्यान्वयन यायेत नं सम्मेलनय् सहलह जुइ । सन् २०३० तक पूवंके माःगु राष्ट्रसङ्घीय दिगो विकास आज्जुया नितिं अन्तरराष्ट्रिय ग्वाहालियात थकायेगु निति थुगु ज्याझ्वःया महत्त्वपूर्ण जुइगु भलसा कयातःगु दु।

प्रधानमन्त्री केपी शर्मा ओली व स्पेन सरकारया अध्यक्ष (प्रधानमन्त्री) पेड्रो साञ्चेज दथुइ वःगु चान्ह्यः निगु पक्षीय भेटवार्ता जुगु दु।

स्पेनया सेभिल्लाय् जुगु भेटवार्ताय् निगु पक्षीय सम्बन्धया विविध पक्ष नाप पर्यटन, जलवायु परिवर्तन, लगानी, जनता–जनता दथुइ सम्पर्कलगायत विषय सहलह जुगु दु धका प्रधानमन्त्रीया सचिवालयं धाःगु दु।

नापलायेगु झ्वलय् प्रधानमन्त्री ओलीं समकक्षी साञ्चेजयात नेपालय् औपचारिक भ्रमणय् ब्बनादीसे नेपालय् स्पेनया दूतावास चायकेत इनाप न यानादीगु खः। स्पेनया प्रधानमन्त्री साञ्चेजं राष्ट्रसङ्घया शान्ति मिसनय् नेपालं म्हितूगु भूमिकायात प्रशंसा यानादील।

भेटवार्ताय् प्रधानमन्त्रीया मुख्य सल्लाहकार विष्णुप्रसाद रिमाल, परराष्ट्र मन्त्रालयया सचिव अमृतबहादुर राई, अर्थ मन्त्रालयया सचिव घनश्याम उपाध्याय, स्पेनया निति नेपाली राजदूत शनिल नेपाल, परराष्ट्र मन्त्रालयया सहसचिव कृष्णप्रसाद ढकाल पिनिगु न ब्बति दुगु खः।

यल महानगरपालिका १६ वडा न थौ मिसा उद्यमी तयेत थीथी मेसिनरी सामान लःल्हागु दु।

थौ यल महानगरपालिका १६ वडाया अध्यक्ष निर्मल रत्न शाक्य व वडा सदस्य बबिता श्रेष्ठं प्रोत्साहन कथं मिसा थीथी मेसिनरी सामान लःल्हागु खः।

विकासया निंतिं वित्तसम्बन्धी संयुक्त राष्ट्रसङ्घया प्यक्वःगु अन्तरराष्ट्रिय सम्मेलनय् ब्वति कायेगु झ्वलय् प्रधानमन्त्री केपी शर्मा ओली थन थ्यंकःझागु दु।

प्रधानमन्त्री ओलीयात थनया अडोल्फो सौरेज बराजाज अन्तरराष्ट्रिय विमानस्थलय् स्पेनया निंतिं नेपाःया राजदूत शनील नेपाल, संयुक्त राष्ट्रसङ्घया निंतिं नेपाःया स्थायी प्रतिनिधि लोकबहादुर थापा व स्पेनया विदेश मन्त्रालयया वरिष्ठ अधिकारीपिंसं लसकुस यानादीगु खः।

प्रधानमन्त्री ओली नेतृत्वया प्रतिनिधिमण्डल थौं सनिलय् सम्मेलनस्थल सेभिल्ला थ्यनीगु ज्याझ्वः दु।

प्रधानमन्त्री केपी शर्मा ओलीं मुक्कं कृषियात आधुनिक व प्रविधिया छ्यलाबुलापाखें उत्पादन अप्वयेकेगु लँय् यंकेमाःगु धयादीगु दु।

‘राष्ट्रिय धान दिवस’या लसताय् थौं भिंतुना सन्देश पितबियादिसें वय्कलं धयादीगु दु, “थौं असार १५, झीगु उत्पादन व चःतिया नखः, धान दिवस, चाय् जीवनया नस्वाः, लःखय् चःतिया पुजा व थुकियापाखें वाया माः हुस्लुं पुइकेगु झीगु म्हगस थ्व झीगु परम्परानिसें न्ह्याना वयाच्वंगु बुँज्या संस्कृति खः, थौं देय् पिने जुसां मचाबलेनिसेंया बँुज्याया लुमन्ति वयाच्वंगु दु।”

प्रधानमन्त्री ओलीं सन्देशय् बुँज्या व मुक्कं कृषियात आधुनिक व प्रविधिया छ्यलाबुलापाखें उत्पादन अप्वयेकेगु निंतिं सरकारं कृषि आधुनिकीकरणया ज्याझ्वः हयागु नापं न्ह्यथनादीगु दु। सन्देशय् धयातःगु दु, “कृषियात आधुनिक व प्रविधिइ आधारित यानाः उत्पादन अप्वयेके, असार १५, धौ बजि नयेगु दिं नापं ‘धान दिवस’या लसताय् सकसितं भिंतुना।”